काठमाडौं, ८ जेठ । रंग पत्रकारितामा पछिल्लो समय आएर निक्कै राम्रो सम्भावना सहित देखा परेकी स्वेच्छा राउत लाई चलचित्र पत्रकार संघको १८ औं वाषिर्कोत्सवका अवसर पारेर प्रोत्साहन पुरस्कार प्रदान गरेको छ । उनी अहिले पहिलो पोष्टमा कार्यरत छिन् । संघले आफ्नो वार्षिकोत्सवको अवसरमा आइतबार ‘चलचित्र पत्रकारिता सम्मान र पुरस्कार’ प्रदान गरेको हो । जसमा यो वर्षको चलचित्र पत्रकारिता सम्मानबाट डा. नवराज लम्साललाई सम्मानित गरियो ।
यस्तै वर्षको चलचित्र पत्रकारिता पुरस्कारबाट सगरमाथा टेलिभिजनमा कार्यरत पत्रकार पारस पौडेल र अनलाइनखबर डट कममा कार्यरत चलचित्र पत्रकार विजय सुवेदी ‘आवाज’लाई पुरस्कृत गरियो । पौडेल र सुवेदीलाई सम्मान पत्र, ट्रफी र नगद २१ हजार सहित पुरस्कृत गरिएको हो ।
संघले यसै वर्षबाट प्रदान गर्न सुरु गरेको ‘चलचित्र पत्रकारिता प्रोत्साहन पुरस्कार’ बाट पहिलोपोस्टकी स्वेच्छा राउत सम्मानित भएकी हुन् । राउतलाई सम्मान पत्र, ट्रफी र ल्यापटपसहित सम्मान गरिएको हो ।
काठमाडौंमा संघले आयोजना गरेको कार्यक्रममा प्रमुख अतिथिद्वय नेपाल पत्रकार महासंघका अध्यक्ष डाक्टर महेन्द्र विष्ट र वरिष्ठ हास्य कलाकार हरिवंश आचार्यले सम्मानित र पुरस्कृत हुने पत्रकारहरुलाई सम्मान पत्र, ट्रफी प्रदान गरेका थिए ।
चलचित्र पत्रकार संघले हरेक वर्षको जेठ ७ गते स्थापना दिवसको अवसर पारेर कार्यक्रम गर्दै आइरहेको छ ।
