बिहान ७ बजेबाट मतदान कार्य सुरु , सप्तरी कंकालनी नगरपालिकामा राजपानेपाल र राप्रपाका कार्यकर्ता बिच झडप ।

0
362

२ असोज, सप्तरी । तेस्रो चरणको स्थानीय तह निर्वाचनअन्तर्गत प्रदेश नं २ को सप्तरी जिल्लामा आज बिहान ७ बजेदेखि शान्तिपूर्णरुपमा मतदानकार्य शुरु भएको छ । बिहान ५ बजेदेखिनै अत्यन्तै हर्षोल्लासका साथ मतदानकार्यमा सहभागी भएको हाम्रा सहकर्मीहरुले जानकारी दिएका छन् । निर्वाचन आयोगका प्रमुख आयुक्त डा अयोधिप्रसाद यादवले बिहान ७ः०० बजे मतदान गरेको बताईएको छ । उनले सप्तरी सदरमुकामस्थित राजविराज नगरपालिकाको वडा नं २ आधारभूत विद्यालयमा रहेको मतदान केन्द्रमा पुगी मतदान गरेका हुन् ।
बीस वर्षको प्रतीक्षापछि हुन लागेको स्थानीय तहको निर्वाचनमा आ–आफना उम्मेदवारलाई विजयी गराउन मतदाताहरु बिहानै देखी लामबद्ध भएको जनाईएको छ ।

यता कुनै पनि घटना हुन नदिन र शान्तिसुरक्षा कायम गर्न सुरक्षा निकाय मतदानस्थल र मतदान क्षेत्रमा अनुगमनका लागि खटिएको बताउँदै सप्तरीका प्रमुख जिल्ला अधिकारी भगिरथ पाण्डेले मतदातालाई निर्धक भई मतदान गर्न आग्रह गरेका छन् । स्थानीय तहको निर्वाचनमा सप्तरी जिल्लामा नौ नगरपालिका र नौ गाउँपालिका गरी कूल १८ स्थानीय तहका लागि ८५६ जनप्रतिनिधि चयनका लागि मतदान शुरु भएको हो ।यस्तै संस्कृति, पर्यटन तथा नागरिक उडड्यनमन्त्री जीतेन्द्रनारायण देवले आज बिहान राजविराज नगरपालिका अन्तर्गत बोरियास्थित नरेन्द्र मेमोरियल मावि मतदान केन्द्रमा मतदान गरे। जुन मतदान केन्द्रमा ४३४ मतदाता रहेका छन् ।
त्यस्तै जनसंख्या तथा वातावरणमन्त्री मिथिला चौधरीले पनि राजविराजस्थित बजारमा रहेको पब्लिक विन्देश्वरी उच्च मावि मतदान केन्द्रमा मतदान गरेका छन् जुन मतदान केन्द्रमा एक हजार ३६४ मतदाता रहेको र मतदाता लामबद्ध भई मतदान कार्यमा सहभागी भएका छन् ।

यसैबिच हनुमाननगर कंकालनी नगरपालिका– ९ मा रहेको मतदान केन्द्रमा दुई पक्षको झडपले त्यहाँको स्थिति तनावग्रस्त बनेको थियो । तर अहिले अवस्था सामान्य रहेको छ । त्यहाँको सुरक्षा व्यवस्था कडा पारिएको छ । राष्ट्रिय जनता पार्टी राजपा नेपाल र राष्ट्रिय प्रजातन्त्र पार्टी नेपालका कार्यकर्ता र उम्मेदवारबिच मतदान गर्ने विषयमा विवाद हुँदा त्यहाँको अवस्था तनाव बनेको इलाका प्रहरी कार्यालय हनुमाननगरले जनाएको छ