गरगहना चोरीमा संलग्न रुपबहादुर सुनुवार पक्राउ ।

0
338

चैत १५ काठमाडौं । प्रहरीको केन्द्रीय अनुसन्धान ब्यूरो (सीआईबी) ले ३१ वटा चोरी र लुटपाटको घटनामा संलग्न फरार अभियुक्तलाई पक्राउ गरेको छ ।

पक्राउ पर्नेमा नुवाकोटको थानसिंह–९ का ४२ वर्षीय रुपेश भनिने रुपबहादुर सुनुवार छन् ।

उनलाई काठमाडौंको तिनपिप्लेबाट पक्राउ गरिएको सीआईबीका प्रवक्ता प्रहरी उपरीक्षक जीवनकुमार श्रेष्ठले बताए ।

उनलाई जिल्ला अदालत, काठमाडौंमा पेश गरी २२ लाख धरौटी माग गरिएकोमा धरौटी रकम बुझाउन नसकेपछि पुर्पक्षका लागि केन्द्रिय कारागार जगन्नाथदेवल पठाइएको उनको भनाइ छ ।

रुपेशसहित उनको समूहका अन्य ३ जनाले काठमाडौंका विभिन्न स्थानबाट सुनका सिक्री लगायत विभिन्न गरगहना लुटपाट गरेर भागेका थिए ।

चोरीको गहना उनले गणेशबहादुर सुनुवार र रुपबहादुर सुनुवारले सञ्चालन गरेको पञ्चकन्या ज्वेलर्समा लगेर चलनचल्तीभन्दा कम मूल्यमा विक्री गर्ने गरेका थिए ।