काठमाडौँ, ११ असार महानगरीय प्रहरी प्रभाग नयाँ बसपार्कले वैदेशिक रोजगारीका बहानामा चेलीबेटी बेचबिखन गर्न लैजाँदै गरेको अवस्थामा १० जना महिलालाई उद्धार गरेको छ ।
प्रभागले नयाँ बसपार्कबाट बसमा राखेर बुटवल हुँदै विदेश पठाउन लागेको गोप्य सूचनाका आधारमा नयाँ बसपार्क, स्वयम्भू र कलंकीबाट शनिबार र आइतबार उद्धार गरेको हो ।
प्रभागका अनुसार विदेशमा लगेर जागिर लगाइदिने प्रलोभनमा भिसासमेत नलगाइकन उनीहरुलाई बुटवल लैजाँदै गर्दा काठमाडौँका विभिन्न स्थानबाट उद्धार गरिएको हो । उद्धार गरिएका मध्ये ४ जानले आफूखुशी जान लागेको बाताएका छन् भने अन्यले मेनपावर मार्फत जान लागेको बताएका छन् ।
आफूखुशी जान लागेका चार जनालाई सामान्य सोधपुछपछि परिवारको जिम्मा लगाइएको छ भने बाँकी छ जनालाई संरक्षणका लागि शक्ति समूह चुच्चेपाटी पठाइएको प्रभागले जनाएको छ । उनिहरुलाई लैजाने व्यक्ति भने फरार रहेको र खोजि कार्य जारी रहेको प्रहरीले जनाएको छ ।
