सप्तरी, १५ असोज । राजविराज कारागारका एक कैदीको मृत्यु भएको छ । चोरी मुद्दामा ९ लाख रुपैयाँ धरौटी बुझाउन नसकेपछि कैद जीवन बिताइरहेका छिन्नमस्ता गाउँपालिका, लोखरम टोलका ३८ वर्षीय सन्तोष साहको उपचारका क्रममा मृत्यु भएको हो । कारागारका निमित्त जेलर सत्यनारायण यादवले साहको गजेन्द्रनारायण सिंह सगरमाथा अञ्चल अस्पतालमा उपचारका क्रममा आइतबार राति ९ः१३ बजे निधन भएको जानकारी दिए । यसअघि पनि पटक–पटक ज्वरो आएपछि साहलाई उपचारका लागि अस्पताल लगिए पनि परीक्षणका क्रममा कुनै रोग भने नदेखिएको निमित्त जेलरले बताएका छन् ।
