२३ भदौ, भैरहवा । संयुक्त लोकतान्त्रिक मधेसी मोर्चाले आन्दोलनमा गोली चलाउन रोके आफुहरु वार्ता गर्न तयार रहेको बताएका छन् । सरकारले शान्तिपूर्ण आन्दोलनमा दमन गरेको भन्दै उनीहरूले वार्ताको आहृवानलार्इ नाटकको संज्ञा दिएका छन् ।
बुधवार भैरहवामा आयोजित वृहत सभामा मोर्चाका शीर्ष नेताहरुले सरकारले आन्दोलनमा दमन गरेको बताउँदै यथास्थितिमा संविधान जारी भए मुलुक द्वन्द्वमा जाने चेतावनी दिए ।
सभामा संघिय समाजवादी फोरम नेपालका अध्यक्ष उपेन्द्र यादवले राजधानीमा निषेधित क्षेत्र तोड्दा पानीको फोहारा हान्ने सरकारले मधेसमा गोली हानेको आरोप लगाए ।
मधेसीलाई गैर नागरिक बनाउने र भारतसँगको रोटी बेटीको सम्बन्ध तोड्न षड्यन्त्र भइरहेको भन्दै उनले मधेस र थरुहट प्रदेश नपाएसम्म आन्दोलन जारी रहेको बताए ।
तराई मधेस लोकतान्त्रिक पार्टीका अध्यक्ष महन्थ ठाकुरले सरकार आतंककारी बनेको बताए । ‘विगतका सम्झौता पुरा गर्ने सरकारको दायत्वि हो’ ठाकुरले भने-‘तर, अघिल्लो सहमति कार्यान्वयन भएको छैन भने अबको वार्तामा हुने सम्झौता कार्यान्यवन हुन्छ कि हुदैन हामीले सरकारलाई कसरी विश्वास गर्ने ?’
