चैत्र २५ एजेन्सी । फ्रान्सको सांसदले पैसा दिएर सेक्स गर्नु गराउनुलाई गैरकानुनी घोषित गर्ने विधेयक पारित गरेको छ । विधेयकको प्रावधानअनुसार यौन सम्बन्धको सट्टा पैसा तिर्ने व्यक्तिलाई ३७५० युरो जरिवाना हुनेछ । पहिलोपटक पक्राउ परे सजायका रुपमा १५०० युरो तिर्नुपर्ने व्यवस्था गरिएको छ। यदि कुनै व्यक्ति दोस्रोपटक सोही अपराधमा पक्राउ परेको खण्डमा सजाय दोब्बर हुनेछ । दोषी ठहरिए बेश्यावृत्तिसम्बन्धी जागरुकताको कोर्ष पनि लिनुपर्नेछ । अन्य युरोपियन मुलुक र अमेरिकामा मदिरा पिएर गाडी चलाउनेमाथि यसप्रकारको कारबाही गर्ने गरिन्छ । यो कानुनको उद्देश्य विदेशी दलालको सञ्जाल तोड्नु र यौनपेसा छोड्न चाहने यौनकर्मीको सहयोग गर्नु रहेको बताइएको छ। यो विवादास्पद कानुन फ्रान्सेली संसदबाट पारित हुन दुई वर्षभन्दा बढी समय लागेको थियो । यो कानुनका विषयमा फ्रान्सको दुवै संसद ९नेशनल एसेम्बली र सिटेन०बीच निकै मतभेद रहेको छ। विधेयकमाथिको अन्तिम बहसका क्रममा यौनकर्मीहरुको समूहले पेरिसमा संसद भवन अगाडि प्रदर्शनसमेत गरेका थिए । स्ट्रास सेक्स वर्कर्स युनियनका सदस्यहरुका अनुसार यो कानुनबाट करिब तीसदेखि चालीस हजार यौनकर्मीको जिविकामा असर पर्नेछ ।
यो कानुनको समर्थकहरुका अनुसार यो कानुन लागु भएपछि अवैध देहव्यापार गर्ने गिरोहको सञ्जालसँग लड्न सहज हुनेछ । कानुन अनुसार देह व्यापार छोडेर अन्य काम गर्न चाहने विदेशी यौनकर्मीलाई फ्रान्समा बस्ने अस्थायी अनुमतिसमेत प्रदान गरिनेछ । समाजवादी सांसद माउड ओलिभरले न्युज एजेन्सी एपीसँग कुरा गर्दै यो कानुनको सबैभन्दा महत्वपूर्ण पक्ष यसबाट यौनकर्मीहरुलाई धेरै सहयोग पुग्ने बताए । उनले भने–हामी उनीहरुलाई परिचयपत्र दिनेछौ किनभने हामीलाई थाहा छ, ८५ प्रतिशत यौनकर्मी देहव्यापार गराउने गिरोहको शिकार बनेका छन्। फ्रान्सको गृहमन्त्रालयका अनुसार देशमा रहेका यौनकर्मीमध्ये ८०–९० प्रतिशत विदेशी छन् । यसमध्ये अधिकांश देह व्यापार गराउने गिरोहको शिकार बनेका छन्। नयाँ कानुनले सन् २००३ मा बनेको कानुनको स्थान लिनेछ । जसमा देहव्यापारका लागि यौनकर्मीमाथि सजायको व्यवस्था गरिएको थियो । संसारमा स्वीडेन पहिलो देश थियो, जहाँ यौनकर्मीको सट्टा ग्राहकमाथि सजायलाई अपराधी मानिन्थ्यो । स्वीडेका अधिकारीहरुका अनुसार यो कानुन बनेपछि रेड लाइट ऐरियामा महिला यौनकर्मीको संख्यामा गिरावट देखिएको थियो ।
