चितवनमा युवकलाई निर्घात कुटपिट गरेका प्रहरी निलम्बनमा परेका छन् ।
असई बुद्धिबहादुर भुजेल युवकलाई निर्घात कुटपिट गरेको आरोपमा निलम्बनमा परेका हुन् । असई भुजेल अस्थायी प्रहरी बिट गणेशधाममा कार्यरत थिए ।
पुस १५ गते राति ११ बजे भरतपुरको तीनखोले गुम्बानजिकै बाइपास रोडमा असई भुजेलले एक युवकमाथि निर्घात कुटपिट गरेका थिए । उक्त भिडिओ आज सामाजिक सञ्जालमा भाइरल भइरहेको छ ।
सामाजिक सञ्जालमा भिडिओ भाइरल बनेपछि प्रहरीले अनुसन्धान सुरु गरेको थियो । डिएसपी ज्ञानकुमार महतोको संयोजकत्वमा पाँच सदस्यीय छानबिन समिति बनेको छ ।
उक्त समितिले घटनाबारे छानबिन गरिरहेको चितवन जिल्ला प्रहरीका एसपी गौतम मिश्रले जानकारी दिए ।
