काठमाडौँ । राष्ट्रिय स्वतन्त्र पार्टीले आफ्ना मन्त्री तथा सांसदहरूका लागि पार्टी लेबी निर्धारण गरेको छ ।
सिंहदरबारमा बसेको संसदीय दलको बैठकले उक्त प्रस्ताव पारित गर्दै लेबी दर निर्धारण गरेको हो । निर्णय अनुसार सांसद र मन्त्री दुवै तहका जनप्रतिनिधिबाट नियमित रूपमा पार्टी योगदान संकलन गरिने व्यवस्था लागू हुने भएको छ ।
पार्टीका मुख्य सचेतक कवीन्द्र बुर्लाकोटीका अनुसार सांसदहरूका लागि मासिक १६ हजार ५०० रुपैयाँ तथा मन्त्रीहरूका लागि १८ हजार रुपैयाँ लेबी तोकिएको छ ।
त्यसैगरी स्वकीय सचिवालयसँग सम्बन्धित व्यक्तिहरूका लागि पनि मासिक २ हजार रुपैयाँ लेबी तोक्ने निर्णय गरिएको छ । हाल यो व्यवस्था मन्त्रीका स्वकीय सचिवका हकमा लागू हुने जनाइएको छ ।
भविष्यमा सांसदहरूले स्वकीय सचिव नियुक्त गर्ने व्यवस्था कार्यान्वयन भएमा उनीहरूका स्वकीयलाई समेत सोही दरअनुसार लेबी तिर्नुपर्ने प्रावधान रहने निर्णय गरिएको छ ।
