नेकपा एमालेका महासचिव शंकर पोखरेलले सबैलाई संयमित रहन आह्वान गरेका छन्।
बुधबार बिहानै फेसबुकमा नेत्रलाल अभागीको कविता सेयर गर्दै उनले धैर्य गर्न र संयमित बन्न आग्रह गरेका हुन्। पोखरेलले विश्वास व्यक्त गर्दै लेखेका छन्, ‘धैर्य गरौँ, संयमित बनौँ, हामी फेरि उठ्ने छौं।’
उनले सेयर गरेको कवितामा उल्लेख छ कि आँधी र हुरी नचलेको बेला, वातावरण स्तब्ध र शान्त भएको घडीमा पनि एउटा नायक आफ्नो साहस देखाएर उभिन सक्छ।
पोखरेलले भने, ‘एउटा कायरले पनि बहादुरीका लामालामा कुरा गर्न सक्छ, तर मेरा मित्र, आँधी र हुरी चलिरहेको बेला, वातावरण गतिशील र अशान्त भएको घडीमा, पहाडको चुचुरोमाथि आँधी र हुरीसँग खेल्दै एउटा सतिसाल मात्र ठिङ्ग उभिन सक्छ।’
पछिल्लो जेनजी आन्दोलनका बीच केही व्यक्तिले असहज परिस्थितिको अनुचित फाइदा उठाउँदै काठमाडौँ र भक्तपुरका विभिन्न क्षेत्रमा लुटपाट गरेका छन्।
नेपाली सेनाले राति १० बजेपछि सुरक्षा कमाण्ड नियन्त्रणमा लिएसँगै भक्तपुरकोे राधेराधेस्थित भाटभटेनी सुपरमार्केट, होटल हायात र बौद्ध इलाकाबाट लुटपाटमा संलग्न भएको अभियोगमा २१ जना पक्राउ परेका सैनिक जनसम्पर्क तथा सूचना निर्देशनालयले जनाएको छ ।
नयाँ बानेश्वरस्थित राष्ट्रिय वाणिज्य बैंक लुटपाटमा संलग्न पाँच जनालाई पनि सेनाले पक्राउ गरेको छ ।
देशभर देखा परिरहेका सुरक्षा चुनौतीबीच नेपाली सेनाले नागरिकलाई सतर्क रहन र सुरक्षामा सहयोग गर्न अपिल गरेको छ।
