काभ्रेपलाञ्चोक । सिन्धुलीको घ्याङ्लेख गाउँपालिका–२ मा रहेको एसबीआई बैंकको शाखामा लुटपाट भएको छ ।
जिल्ला प्रहरी कार्यालय, सिन्धुलीका अनुसार साँझ ७ बजेतिर बैंकमा लुटपाट भएको हो ।
लुटपाटपछि अहिले प्रहरी सक्रिय भएको र अनुसन्धान प्रक्रिया अघि बढेको जिल्ला प्रहरी कार्यालयका एसपी लालध्वज सुवेदीले जानकारी दिए ।
स्थानीयका अनुसार भने नकाबधारीहरु छिरेर त्यहाँ रहेका सेक्युरिटी गार्डलाई हिर्काएर कर्मचारी नियन्त्रण लिएर पैसा लुटेर भागेका छन् ।
घाइते सेक्युरिटी गार्डको भने गाउँपालिकाकै बस्तीपुरको स्वास्थ्य चौकीमा उपचार भइरहेको छ ।
काठमाडौँ । आसन्न प्रतिनिधि सभा सदस्य निर्वाचन सुरक्षाका लागि खुलाइएको निर्वाचन प्रहरीमा ५ दिनमा करिब १ लाख जनाले आवेदन दिएका छन् ।
नेपाल प्रहरी र सशस्त्र प्रहरी बल (एपीएफ)ले ७७ वटै जिल्लास्थित आ-आफ्ना कार्यालयमार्फत २५ पुसबाट आवेदन खुलाएकामा मंगलबारसम्म करिब १ लाखको दरखास्त परेको हो ।
२१ फागुनका लागि तय भएको निर्वाचन सुरक्षार्थ नेपाल प्रहरीले १ लाख ३३ हजार ९ सय ८० र सशस्त्र प्रहरीले १५ हजार १ सय १० जनाका लागि आवेदन खुलाएका थिए । १ माघसम्म आवेदन दिने अवधि तोकिएको छ ।
विगतको तुलनामा यो पटक आवेदन दिनेको संख्यामा केही कमी आएको बताइएको छ ।
तोकिएको संख्यामा दरखास्त नपरेमा केही दिन थप गर्न सकिने पनि बताइएको छ । आसन्न प्रतिनिधि सभा सदस्य निर्वाचन सुरक्षाका लागि करिब ३ लाख ३७ हजार सुरक्षाकर्मी परिचालन गर्ने सरकारको तयारी छ ।
काठमाडौं । नेपाली कांग्रेसको विशेष महाधिवेशनमा नयाँ कार्यसमिति चयनका लागि बुधबार मतदान हुने भएको छ ।
विशेष महाधिवेशन निर्वाचन समितिले साँझ साढे ७ बजेसम्म उम्मेदवारी दर्ताको कार्यक्रम तय भएको जानकारी दिएको छ । उम्मेदवारी मनोनयन दर्ताबाहेक बाँकी तालिका बुधबारका लागि सारिएको हो ।
निर्वाचन समितिका संयोजक सीताराम केसीका अनुसार मनोनयन दर्ता भइसकेपछि बाँकी तालिका भोलिबाट कार्यान्वयनमा आउनेछ । यसअघि मंगलबार दिउँसो २ देखि ३ बजेसम्मको समय तोकिएको थियो । पछि मनोनयनपत्र बेलुका ५ बजेपश्चात् दर्ता गरिने भनिएको थियो । त्यसपछि पनि साँझ साढे ६ बजेका लागि सारिएको थियो । त्यस्तै राति ९ बजे मतदानको समय तोकिएको थियो ।
सभापतिमा उम्मेदवारी दिन ३० हजार रूपैयाँ शुल्क तोकिएको छ । त्यस्तै, उपसभापति र महामन्त्रीका लागि समान २५ हजार रूपैयाँ शुल्क निर्धारण भएको छ ।
त्यस्तै, सहमहामन्त्री पदका लागि २० हजार रूपैयाँ शुल्क तोकिएको छ । केन्द्रीय सदस्य पदका लागि भने १० हजार रूपैयाँ शुल्क तोकिएको छ । यसैबीच संस्थापन र विशेष महाधिवेशन पक्षमा विवाद समाधानका वार्तामा पनि छन् ।
काठमाडौँ । प्रतिनिधि सभाका सभामुख देवराज घिमिरेले विघटित प्रतिनिधि सभा पुनर्स्थापनाको सम्भावना रहेको बताएका छन्।
संसद् विघटन सम्बन्धी मुद्दा सर्वोच्च अदालतमा विचाराधीन अवस्थामा रहेका बेला उनले अदालतबाट पुनर्स्थापना हुने सम्भावना रहेको बताएका हुन्।
मंगलबार झापा क्षेत्र नम्बर २ मा आयोजित अन्तरक्रिया कार्यक्रममा बोल्दै सभामुख घिमिरेले संसद् भंग गरेर संविधानलाई जबरजस्त लिक बाहिर पुर्याउने काम गरिएको पनि दोहोर्याएका छन्।
सभामुख घिमिरेले संविधान र कानुनअनुसार आफूले आगामी फागुन ५ गतेसम्म पदीय जिम्मेवारी निर्वाह गर्नुपर्ने अवस्था रहेको जिकिर गर्दै सोहीअनुसार अघि बढिरहेको दाबी समेत गरे।
सभामुख घिमिरेले भने,‘भदौ २७ गते राति करिब ११ बजेको आसपासमा संसद् जबरजस्त भंग गरिएको छ। संविधान त्यस मानेमा लिकभन्दा बाहिर लगिएको छ। तर सभामुखको संविधान र कानूनसम्मत अवधि रहेकाले गर्दा अब हुने भनिएको आम निर्वाचन २१ फागुन भन्दा अगाडि फागुन ५ गतेसम्म अवधि रहेकाले गर्दा मैले सोही पदीय हैसियतमा बस्नुपरेको हो। भोलि संसद् पुनर्स्थापनाको पनि सम्भावना छ।’
सभामुख घिमिरेले आगामी निर्वाचनमा भाग लिने वा नलिने भन्ने कुरा पनि पदीय जिम्मेवारीका कारण आफू टुंगोमा पुग्ने अवस्था नरहेको समेत स्पष्ट पारेका छन्।
काठमाडौँ । डेढ वर्षअघि चितवनको भरतपुर-२९, सिमलतालस्थित त्रिशूली नदीमा हराएका दुई वटा बसमध्ये एउटा गणपति डिलक्सको बस फेला परेको छ ।
आइतबार बिहान बसको अवशेष फेला परेपछि उत्खननको सुरु गरिएको थियो । उत्खननको तेस्रो दिनमा डेढ वर्षअघि सिमलताल दुर्घटनामा परेको बस नै रहेको पुष्टि भएको हो । तीन दिनदेखि निरन्तर उत्खनन गर्दा मंगलबार सशस्त्र प्रहरी बलको टोलीले गणपति डिलक्स रहेको फला पारेको हो । खोजी कार्यमा खटिएका एक सशस्त्र प्रहरीका अनुसार उत्खनन् गर्दा गणपति डिलक्स लेखिएको भाग फेला परेको छ । उनले अझै उत्खनन कार्य भइरहेको बताएका छन् ।
२०८१ असार २८ गते बिहानपख काठमाडौँबाट गौर जाँदै गरेको प्रदेश ०३-००१ ख २४९५ नम्बरको गणपति यातायातको बस र वीरगन्जबाट काठमाडौँ जाँदै गरेको बागमती प्रदेश ०३-००६ ख १५१६ नम्बरको एन्जल डिलक्स बस नारायणगढदेखि २२ किलोमिटर पूर्वोत्तर सिमलतालमा पहिरोमा बग्दै त्रिशूलीमा खसेर बेपत्ता भएको थियो ।
दुवै बसका ६५ यात्रुमध्ये बस नदीमै पुगे पनि गणपति यातायातको बसमा सवार तीन यात्रु पौडेर माथि आएका थिए । दुर्घटनामा परेकामध्ये केहीको मात्रै शव फेला परेको थियो ।
काठमाडौं । नेपाली कांग्रेसको दोस्रो विशेष महाधिवेशनमा नयाँ नेतृत्व चयनको प्रक्रिया अघि बढेको छ ।
निर्वाचन समितिले मतदाता नामावली प्रकाशनदेखि मतदान तथा मतगणनासम्मको विस्तृत निर्वाचन कार्यतालिका सार्वजनिक गरिसकेको छ ।
समितिका संयोजक सीताराम केसीका अनुसार विभिन्न पदमा उम्मेदवारी दर्ता गर्न शुल्क तोकिएको छ । सभापति पदका लागि ३० हजार रुपैयाँ तोकिएको छ । उपसभापति र महामन्त्री पदमा २५ हजार रुपैयाँ, सहमहामन्त्री पदमा २० हजार रुपैयाँ र केन्द्रीय सदस्य पदमा १० हजार रुपैयाँ तोकिएको छ ।
विशेष महाधिवेशन पुस २७ गतेदेखि भृकुटीमण्डपमा सुरु भएको हो । महामन्त्रीद्वय गगन थापा र विश्वप्रकाश शर्माको अगुवाइमा आयोजित यस महाधिवेशनले पार्टीको वर्तमान केन्द्रीय कार्यसमिति विघटन गरी नयाँ नेतृत्व चयन गर्ने लक्ष्य राखेको छ ।
आज तेस्रो दिनमा पुग्दा महाधिवेशनमा मतदान प्रक्रिया राति ९ बजेदेखि सुरु हुने तयारी छ । निर्वाचन समितिले नयाँ नेतृत्व चयनका लागि नियमित महाधिवेशनकै ढाँचामा प्रक्रिया अघि बढाउने निर्णय गरेको छ । यसअघि महाधिवेशनमा कार्यविधि पारित भएसँगै नयाँ निर्वाचन समिति गठन भएको थियो ।
काठमाडौं । नेपाली कांग्रेसको विशेष महाधिवेशनबाट नयाँ नेतृत्व चयनका लागि कार्यतालिका सार्वजनिक गरिएको छ । निर्वाचन समितिका संयोजक वरिष्ठ अधिवक्ता सीताराम केसीले निर्वाचन कार्यतालिका सार्वजनिक गरेका छन् ।
सार्वजनिक कार्यतालिका अनुसार, आजै साँझ ९ बजेका लागि मतदानको समय तोकिएको छ ।
सार्वजनिक कार्यतालिकामा मध्यान्ह साढे १२ बजे नै प्रथम मतदाता नामावली प्रकाशन गर्ने उल्लेख छ । मतदाता नामावलीउपरको दाबी विरोध र छलफल साढे १ बजेसम्मका लागि तोकिएको छ ।
दिउँसो ४ बजे अन्तिम मतदाता नामावली प्रकाशन गर्ने जनाइएको छ । साँझ पौने ९ बजे उम्मेदवारहरूको अन्तिम नामावली प्रकाशन हुने कार्यतालिकामा उल्लेख छ ।
पाँच सदस्यीय निर्वाचन समितिको बैठकले निर्वाचन प्रक्रिया अघि बढाउने निर्णय गरेको हो । निर्वाचन केन्द्रीय समितिका लागि हुने भएको छ ।
खम्बबहादुर खाती नेतृत्वमा हरेको निर्वाचन समितिलाई भंग गरेर मंगलबार बिहान केसीको नेतृत्वमा नयाँ समिति गठन गरिएको छ ।
यस्तो छ निर्वाचन कार्यतालिका
प्रथम मतदाता नामावली प्रकाशन- बिहान १२:३० बजेदेखि
मतदाता नामावलीमा दाबी विरोध तथा छानबिन- १२:३० देखि १:३० बजेसम्म
अन्तिम मतदाता नामावली प्रकाशन- दिउँसो १४:०० बजे
उम्मेदवारी मनोनयन दर्ता- दिउँसो १४:०० देखि १५:०० बजेसम्म
उम्मेदवारको नेपाली वर्णानुक्रम अनुसार प्रथम नामावली प्रकाशन- दिउँसो १६:३० बजे
उम्मेदवारीमा दाबी विरोध- दिउँसो १:३० देखि ३:०० बजेसम्म
दाबी विरोधको छानबिन- अपराह्न १६:३० देखि १७:०० बजेसम्म
उम्मेदवारी मनोनयन फिर्ता- दिउँसो १७:३० देखि १९:०० बजेसम्म
अन्तिम उम्मेदवार नामावली प्रकाशन- राति २०:४५ बजे
मतदान सुरु- बिहान २१:०० देखि १:०० बजेसम्म (मिति २०८१ मंसिर ३० गते)
मतगणना तथा परिणाम घोषणा- मतदान समाप्त भएपछि
काठमाडौँ । सशस्त्र प्रहरीले मुस्ताङ जिल्लाको लोमान्थाङ गाउँपालिका–४ नेचुङ्गबाट सोमबार २ करोड, २४ लाख ५९ हजार ३ सय २० रुपैयाँ बराबरको इलेक्ट्रिक चुरोट (भेप)सहित सिन्धुपाल्चोको सुनकोशी गाउँपालिका–५ बस्ने अन्दाजी ३२ वर्षीय पेमा लामालाई नियन्त्रणमा लिएको छ ।
ना ६ ख ७५९१ नम्बरको कन्टेनरमा ३/४ दिन अघि चीनबाट अवैध रुपले ल्याई नेपाल चीन सीमानाको कोरोला नाका नजिक गाडीमा लोड गरी राखेको ८० कार्टुन इलेक्ट्रिक चुरोटसहित सोमबार उनलाई नियन्त्रणमा लिएको हो ।
उनलाई सशस्त्र प्रहरी बल नेपाल बोर्डर आउट पोष्ट नेचुङ्गबाट सशस्त्र प्रहरी नायव निरीक्षक उदयबहादुर कुमाल कमाण्डमा खटिएको सुरक्षा फौजसहित मुस्ताङ भन्सार कार्यालयका कर्मचारी, नेपाल प्रहरी, स्थानीय जनप्रतिनीधिहरुको संयुक्त टोलीले इलेक्ट्रिक चुरोट बोकेको कन्टेनरसहित नियन्त्रणमा लिएको सशस्त्र प्रहरीका सहप्रवक्ता डीएसपी डिएसपी शैलेन्द्र थापाले जानकारी दिए ।
बरामद इलेक्ट्रिक चुरोट मुस्ताङ भन्सार कार्यालयमा बुझाइएको छ भने नियन्त्रणमा लिइएका लामालाई आवश्यक कारवाहीको लागि इलाका प्रहरी कार्यालय छोसेरमा बुझाइएको छ । कन्टेनर बिग्रिएका कारण कन्टेनरमा रहेको टिसी पेपर र ट्वाइलेट पेपर भने सोही ठाउँमा भन्सार कार्यालयले सिल गरी राखेको छ ।
काठमाडौं । प्रतिनिधिसभाको समानुपातिक निर्वाचन प्रणालीतर्फ बन्दसूचीमा नाम समावेश भएका विभिन्न राजनीतिक दलका ८५ उम्मेदवारले आफ्नो नाम फिर्ता लिएका छन् ।
आयोगले सोमबार बिहान १० बजेदेखि ४ बजेसम्म नाम फिर्ता लिने व्यवस्था गरेको थियो । प्रतिनिधिसभाको निर्वाचन आगामी फागुन २१ गते हुँदैछ । समानुपातिकतर्फ बन्दसूची पेस गरेका राजनीतिक दलका उम्मेदवार आफैँले वा उम्मेदवार उपस्थिति हुन नसकेको अवस्थामा वारेसले फिर्ता लिन पाउने व्यवस्था गरेको थियो ।
आयोगका अनुसार, जनमत पार्टी, नेकपा(एमाले), जनता समाजवादी पार्टी, नेपाली कम्युनिष्ट पार्टी, प्रगतिशील लोकतान्त्रिक पार्टी, राष्ट्रिय प्रजातन्त्र पार्टीलगायतका दलका तर्फबाट बन्द सूचीमा रहेका नाम फिर्ता लिइएको हो । जनता समाजवादी पार्टीको २१ जनाले नाम फिर्ता लिएका छन् भने जनमत पार्टीका तर्फबाट २० जनाले नाम फिर्ता लिएका छन् ।
जनता समाजवादी पार्टी र लोकतान्त्रिक समाजवादी पार्टीबीच हालै एकता भएकाले बन्दसूची मिलाउनका लागि केहीको नाम फिर्ता लिएर नयाँ व्यवस्थापन गरिएको सो दलले जनाएको छ । अन्तिमसूची सार्वजनिक हुँदा केही सङ्ख्या थप हुनसक्ने आयोगले प्रष्ट पारेको छ ।
समानुपातिक निर्वाचन प्रणालीतर्फ कूल ६४ राजनीतिक दलले बन्दसूची पेस गरेका थिए । यही पुस १३ र १४ गते बन्दसूची पेस गर्न आयोगले समय दिएको थियो । कूल २७५ सदस्यीय प्रतिनिधिसभामा समानुपातिक निर्वाचन प्रणालीमार्फत ११० र प्रत्यक्ष निर्वाचन प्रणालीबाट १६५ जना निर्वाचित हुने व्यवस्था छ ।
काठमाडौं । नेपाली कांग्रेसको विशेष महाधिवेशन पक्षले नयाँ निर्वाचन समिति गठन गरेको छ । भृकुटीमण्डपमा जारी विशेष महाधिवेशनबाट डेमोक्रेटिक लयर्स एशोसिएसन (डीएलए)का अध्यक्ष सीताराम केसीको अध्यक्षतामा निर्वाचन समिति गठन गरिएको हो ।
यसअघिको समिति भंग गरेर केसीको अध्यक्षतामा नयाँ समिति गठन गरिएको हो । यसअघि पार्टीले खम्बबहादुर खातीको नेतृत्वमा निर्वाचन समिति बनाएको थियो ।
भृकुटीमण्डपमा महाधिवेशनको बन्दसत्र जारी छ । अब बाँकी प्रक्रिया सुरु गरिने नेताहरुले जानकारी दिएका छन् । विवाद समाधानका लागि दुई पक्षबीच वार्ता पनि भइरहेको छ ।
