काठमाडौँ । निर्वाचन सामग्री तथा कर्मचारी लिएर गइरहेको ट्रक दुर्घटनामा परि रामेछापमा ज्यान गुमाउनेको संख्या दुई पुगेको छ।
घाइते अवस्थामा सदरमुकाम मन्थलीस्थित मन्थली अस्पताल ल्याइएका थप एक जनाको उपचारका क्रममा मृत्यु भएको अस्पतालले जनाएको छ । मन्थली अस्पतालमा उपचारकै क्रममा ज्यान गुमाउने व्यक्ति डोरप्रसाद घिमिरे रहेको बताइएको छ।
प्रमुख जिल्ला अधिकारी श्याम कृष्ण थापाका अनुसार उनी रामेछाप नगरपालिका-२ साँघुटार वडा कार्यालय भवन ‘ख’ मतदान केन्द्रका मतदान अधिकृत थिए । मृतक घिमिरे मन्थली नगरपालिका-७ स्थित रूद्राक्षेश्वर माध्यमिक विद्यालयका शिक्षकसमेत रहेको जनाइएको छ। सोमबार अपराह्न निर्वाचन सामग्री तथा कर्मचारी लिएर गइरहेको निशान ट्रक रामेछाप नगरपालिका-२ स्थित वडा कार्यालय नजिकैको सिरूवारी भीरबाट खसेको थियो।
दुर्घटनामा घाइते भएका मध्ये तीन जना गाडीबाट हाम फालेर ज्यान जोगाउन सफल भएका छन्। यसअघि दुर्घटना स्थलमै नेपाल प्रहरीका असई आरपी यादवको मृत्यु भएको भएको थियो।
बेलबारी । मोरङको क्षेत्र नम्बर ३ मा नेपाली काँग्रेसका उम्मेदवार डा.सुनिल शर्माको जित सुनिश्चित देखिएको छ ।
शुरु देखि नै हेभीवेट उम्मेदवारका रुपमा हेरिएका शर्माको जित सुनिश्चित देखिएको मतदाता मात्र होईन केही अध्यायन रिपोर्टहरुले समेत पुष्टि गरेका छन । क्षेत्र अन्र्तगत पर्ने बेलबारी,पथरी,कानेपोखरी र सुन्दरहरैचाका झण्डै १० हजार बढी मतदाताहरु सँग प्रत्यक्ष भेटेर गरिएको कुराकानीमा ७० प्रतिशत बढी मतदाताहरुले शर्मालाई भोट हाल्ने बताएका छन । सर्बेक्षणले ६५ देखि ७० हजार मत शर्माले पाउने देखिन्छ ।
मतादाताहरुले सुखदःुखमा साथ दिने,यस क्षेत्रको बिकासमा यति धेरै पहल गरेको ब्यत्तिलाई छोडेर अन्य उम्मेदवारलाई भोट नदिने तर्क अघि सारेका छन । अन्य पार्टीका केही उम्मेदवारहरुले बाहिर मतदाताहरु सँग भोट मागेपनि भित्रीरुपमा शर्मालाई नै सघाउने र आफना मतदाताहरुलाई शर्मालाई भोट दिने गोप्य सहमति समेत भईसकेको छ । यस क्षेत्रमा गरिएका बिभिन्न सर्बेक्षण,दलका उम्मेदवारहरुले गरेका गोप्य सहमति र शर्माको प्रभावका कारण उनको जित निश्चित देखिन्छ ।
शर्माले यसअघि भएको प्रतिनिधिसभा निर्बाचनमा झण्डै दोब्बर मतका साथ बिजयी भएका थिए । उनले निर्बाचित भएर गएपनि यस क्षेत्रको शिक्षा,स्वास्थ्य,भौतिक बिकास लगायतका क्षेत्रमा उठाएका आवाज र स्पष्ट धारणाले समेत उनलाई थप मजबुत र स्थापित गरेको छ । करोडौका बिकास योजना,पुर्बाञ्चल बिश्वबिद्यालयमा मेडिकल कलेज,निजि क्षेत्रबाटै स्वास्थ्य क्षेत्रमा बिशेष छुट लगायतका कारण पनि उनीप्रति मतदाताको आर्कषण बढेको पाईएको छ ।
उनले अहिलेसम्म राज्यकोषबाट सुबिधा र भत्ताको रुपमा केही लिएका छैनन तरपनि निजि स्तरबाटै उनले स्वास्थ्य क्षेत्रमा आफनो क्षेत्र मात्र होईन देशभरका हजारौ नागरिकहरुलाई सुलभ सेवा उपलब्ध गराएका छन भने आफनो क्षेत्रका नागरिकहरुलाई बिशेष छुट दिएका छन । यो क्षेत्रमा १ लाख ५७ हजार ५८ जना मतदाता रहेका छन ।
रामेछापमा निर्वाचन सामग्री र कर्मचारी लिएर जाँदै गरेको गाडी दुर्घटना हुँदा प्रहरी सहायक निरीक्षक (असई)को मृत्यु भएको छ।
दुर्घटनामा असई पर्शुराम यादवको घटनास्थलमै मृत्यु भएको सशस्त्र प्रहरी बलका सहप्रवक्ता शैलेन्द्र थापाले जानकारी दिए। दुर्घटनामा सात जना घाइते भएका छन्। घाइतेलाई उपचारका लागि मन्थली अस्पताल पठाइएको छ।
घाइते घाइते सातमध्ये चार जनाको अवस्था गम्भीर रहेको जिल्ला प्रहरी कार्यालय, रामेछापका प्रहरी नायव उपरीक्षक (डीएसपी) राजन तिमल्सिनाले जानकारी दिए। उनका अनुसार ३ जनाको अवस्था भने सामान्य छ।
गाडीमा ११ जना सवार रहेका थिए। गाडी दुर्घटना भएपछि तीन जनाले हाम फालेको प्रहरीले जनाएको छ।
प्रतिनिधि सभा निर्वाचनको सामग्री र कर्मचारी बोकेर रामेछाप सदरमुकाम मन्थलीबाट नगरपालिका-२, देउराली जाँदै गरेको ना ७ ख ६७६८ नम्बरको निसान गाडी सिरुवारी डाँडामा दुर्घटना भएको हो। गाडीमा निर्वाचन अधिकृत, सहायक कर्मचारी र सुरक्षाकर्मीसहित मतपेटिका र आवश्यक कागजात रहेका थिए।
दुर्घटना भएलगत्तै सशस्त्र प्रहरी बल नेपाल विपद् उद्धार वेश खुर्कोटबाट सई रमेशबहादुर थापाको कमाण्डमा ११ जनाको टोली खटिएको थियो। नौ जना गोताखोर र एक जना डीएमसहितको टोलीले घाइतेको उद्धार गरेर अस्पताल पठाएको हो।
मन्थलीबाट मतदान केन्द्र कालिका देवी माध्यमिक विद्यालय र देउराली माध्यमिक विद्यालयको निर्वाचन सामाग्रीसहित कर्मचारी लिएर जाँदै गरेको गाडी सडकबाट करिब २ सय मिटर तल खसेको हो।
काठमाडौं । इरानी आक्रमणबाट यूएईमा ज्यान गुमाउने गोरखाका दिवस श्रेष्ठ रहेको पुष्टि भएको छ । मृत्यु हुने सेक्युरिटी गार्डमा कार्यरत श्रेष्ठ भएको अबुधाबीस्थित नेपाली राजदूतावास र एनआरएनए युएइले जनाएको छ।
सोमबार नेपाली राजदूतावासले प्रेस विज्ञप्ति जारी गरी अबुधाबीस्थित जायद अन्तर्राष्ट्रिय विमानस्थलमा ड्रोन निष्क्रिय पार्ने क्रममा रेक्युरिटी गार्डमा कार्यरत श्रेष्ठको मृत्यु भएको जनाइएको छ। उनी मिडिल इस्ट कम्पनीमा कार्यरत थिए।
घटनामा २९ वर्षीय श्रेष्ठको निधन भएको यूएईको परराष्ट्र मन्त्रालय जानकारी दिएको नेपाली राजदूतावासले जनाएको छ। उनको पार्थिश शरीरलाई नेपाल ल्याउन सहजीकरण भइरहेको जनाएको छ।
यससँगै यूएईमा रहेका सबै नेपालीलाई संयमता अपनाउन र सुरक्षित स्थानमा रहन आग्रह गरेको छ। यूएई सरकारद्वारा जारी गरिएका सुरक्षा सम्बन्धी सम्पूर्ण मापदण्ड पूर्ण रुपमा पालना गर्न पनि दूतावासले अनुरोध गरेको छ।
एनआरएनएले २९ बर्षीय श्रेष्ठको शव स्वदेश फिर्ता लैजाने लगायतका सम्पुर्ण कार्यमा नेपाली राजदुतवास सहजिकारणअ गर्न तत्पर रहेको जनाएको छ ।
काठमाडौँ। राष्ट्रिय प्रजातन्त्र पार्टी (राप्रपा) ले आसन्न प्रतिनिधि सभा निर्वाचन सन्दर्भमा कुनै पनि राजनीतिक दलसँग चुनावी तालमेल वा समर्थन नगर्ने आफ्नो नीतिगत निर्णय पुनः स्पष्ट गरेको छ।
विशेषतः रुपन्देही जिल्ला क्षेत्र नम्बर २ मा नेपाली काँग्रेस लाई समर्थन गरिएको भन्ने समाचारप्रति पार्टीले असहमति जनाउँदै त्यस्ता दाबी निराधार रहेको जनाएको हो।
पार्टीका प्रवक्ता मोहन श्रेष्ठद्वारा जारी विज्ञप्तिमा राप्रपाले प्रतिनिधिसभा निर्वाचनका लागि स्वतन्त्र रणनीति अवलम्बन गरेको उल्लेख छ। विज्ञप्तिअनुसार पार्टीको आधिकारिक नीति विपरीत हुने कुनै पनि गतिविधि अनुशासनको विषय बन्ने र त्यस्ता कार्यमा संलग्न हुने व्यक्तिमाथि आवश्यक कारबाही गरिने जनाइएको छ।
उक्त क्षेत्रमा प्राविधिक कारणले प्रत्यक्षतर्फ पार्टीको उम्मेदवारी कायम नरहेकाले समानुपातिकतर्फ मत संकलनमा केन्द्रित हुन पार्टीपंक्ति र समर्थकहरूलाई आग्रह गरिएको छ। निर्वाचनको सन्दर्भमा संगठनात्मक एकता र नीतिगत स्पष्टता कायम राख्न सबै तहका कार्यकर्तालाई निर्देशन दिइएको विज्ञप्तिमा उल्लेख छ।
यसैबीच, रुपन्देही-२ का उम्मेदवार रामबहादुर थापा ले पार्टी निर्देशन विपरीत गतिविधि गरेको ठहर गर्दै उनलाई निलम्बन गरिएको जानकारी पनि पार्टीले दिएको छ।
काठमाडौं– प्रधानमन्त्री सुशीला कार्कीले आउँदो फागुन २१ गते हुने प्रतिनिधिसभा निर्वाचनमा सक्रिय सहभागिताका लागि सबै मतदातासँग अपिल गरेकी छन्।
होली अर्थात् फागु पूर्णिमाको अवसर पारेर देशवासीका नाममा सम्बोधन गर्दै उनले निर्वाचनलाई शान्तिपूर्ण, स्वच्छ र भयरहित बनाउन सबैको सहकार्य आवश्यक रहेको बताइन्।
प्रधानमन्त्रीले देश फेरि इतिहासको महत्वपूर्ण मोडमा उभिएको उल्लेख गर्दै निर्वाचनमार्फत नागरिकले आफ्नै भविष्य निर्धारण गर्ने बताइन्।
उनले भोट हाल्नु केवल उम्मेदवार छान्ने प्रक्रिया मात्र नभई आफ्नो र सन्तानको भविष्य तय गर्ने निर्णय भएको स्पष्ट पारिन्। त्यसैले मतदानका दिन अन्य काम छाडेर भए पनि मतदान केन्द्रमा पुग्न आग्रह गरिन्।
जेन–जी आन्दोलनपछिको जटिल अवस्थाबाट देशलाई शान्तिपूर्ण निकासतर्फ ल्याउन सफल भएको उल्लेख गर्दै उनले अहिले विधिको शासन र संविधानको मार्गमा देश अघि बढिरहेको दाबी गरिन्। उक्त उपलब्धि सबै नेपालीको संयम र सहकार्यको परिणाम भएको उनको भनाइ छ।
निर्वाचनको सन्दर्भमा उनले राजनीतिक दल, उम्मेदवार र समर्थकलाई संयमित र सम्मानजनक ढंगले प्रचार–प्रसार गर्न आग्रह गरिन्। मौन अवधिको पूर्ण पालना गर्नसमेत उनले आह्वान गरेकी छन्।
निर्वाचन आयोग, सुरक्षा निकाय र राष्ट्रसेवक कर्मचारीहरूको भूमिकाको प्रशंसा गर्दै निष्पक्षता र मेहनतले निर्वाचन सफल हुने विश्वास व्यक्त गरिन्।
सरकारले निर्वाचन सुरक्षामा चारवटै सुरक्षा संयन्त्र परिचालन गरेको र संघ, प्रदेश तथा स्थानीय सरकारबीच समन्वय भइरहेको उनले जानकारी दिइन्।
राष्ट्रपति रामचन्द्र पौडेलबाट प्राप्त सहयोगप्रति कृतज्ञता व्यक्त गर्दै मित्रराष्ट्र र अन्तर्राष्ट्रिय निकायबाट प्राप्त सहयोगलाई पनि सकारात्मक भनेकी छन्।
सामाजिक सञ्जालमा फैलाइने भ्रामक सामग्री र तथ्यहीन सूचनाप्रति सचेत रहन उनले आग्रह गरेकी छन्। यस्ता गतिविधिलाई कानुनी दायरामा ल्याइने स्पष्ट गर्दै दण्डहीनतालाई कुनै पनि हालतमा प्रश्रय नदिने चेतावनी दिइन्।
सम्बोधनको क्रममा उनले मध्यपूर्व क्षेत्रमा बढ्दो तनावप्रति चिन्ता व्यक्त गर्दै त्यहाँ रहेका नेपालीको सुरक्षामा सरकार सतर्क रहेको बताइन्। परराष्ट्र मन्त्रालयमार्फत निरन्तर अनुगमन भइरहेको र आवश्यक सहजीकरण गरिने उनको भनाइ छ।
प्रधानमन्त्रीले निर्वाचनलाई ऐतिहासिक अवसरका रूपमा लिन आह्वान गर्दै फागुन २१ को मतदानलाई शान्तिपूर्ण र उदाहरणीय बनाउन सबैसँग सहयोग मागेकी छन्।
सम्बोधनको पूर्णपाठ
आदरणीय दिदीबहिनी तथा दाजुभाइहरू,
नमस्कार !
आज म एउटा विशेष घडीमा तपाईँहरूसँग मनका केही कुरा राख्न चाहन्छु।
हाम्रो देश फेरि इतिहासको महत्त्वपूर्ण मोडमा आइपुगेको छ।
आउँदो फागुन २१ गतेका दिन हामीले आफ्नो र आफ्नो देशको भविष्यको फैसला गर्नेछौँ।
तर, त्योभन्दा अगाडि हाम्रो सांस्कृतिक पर्व होली अर्थात् फागु पूर्णिमा परेको छ। रङ्गहरूको यो उत्सव र निर्वाचनको यो तयारी दुवै हाम्रा लागि उत्तिकै अर्थपूर्ण छन्।
मैले यो जिम्मेवारी सम्हाल्दाको समय तपाईंहरू सबैलाई सम्झना नै छ।
जेन-जी आन्दोलनपछिको त्यो परिस्थिति जटिल, संवेदनशील र चुनौतीपूर्ण थियो। सडकमा युवाहरूको आक्रोश थियो, सबैको मनमा डर थियो र देशकै भविष्य अन्योलमा थियो।
त्यो कठिन संक्रमणलाई व्यवस्थापन गर्दै, हिंसात्मक मोडबाट शान्तिपूर्ण निकासतर्फ देशलाई डोर्याउनु र संविधानको बाटोमा फर्काउनु हाम्रो पहिलो कर्तव्य थियो।
आज मलाई सन्तोष लागेको छ कि हामी त्यो कठिन संक्रमण पार गरेर यहाँसम्म आइपुगेका छौँ। विधिको शासन स्थापित गर्दै, संविधानको मार्गमा स्थिरताका साथ अघि बढ्न सफल भएका छौँ। यो उपलब्धि तपाईँ-हामी सबै नेपाली जनताको संयम र सहकार्यको परिणाम हो।
अब मेरो पहिलो आग्रह तपाईँ मतदाताहरूसँग छ:
देशलाई राजनीतिक स्थायित्व र समृद्धिको मार्गमा अघि बढाउनका लागि सबै मतदाता आगामी निर्वाचनमा सरिक भइदिनुहोस्।
भोट हाल्नु भनेको केवल चुनाव चिन्हमा छाप लगाई कसैलाई जिताएर पठाउनु मात्र होइन। यो त तपाईँले आफ्नो र आफ्नो सन्तानको भविष्य कस्तो बनाउने भनेर लिने निर्णय हो।
तसर्थ, फागुन २१ गते बिहीबारका दिन अरू काम छाडेरै भए पनि आफ्नो मतदान केन्द्रमा पुगेर मतदान गर्नुहुन म हार्दिक अपिल गर्दछु।
दोस्रो कुरा- निर्वाचनको यस सँघारमा म सबैलाई शान्ति र अमनचयन कायम राख्न अनुरोध गर्दछु। शान्ति नै नेपालको असली पहिचान हो।
चुनावमा स्वस्थ प्रतिस्पर्धा हुन्छ, फरक विचार हुन्छ, तर हामीबीच मनमुटाव र वैमनस्य हुनुहुँदैन।
म चुनावी मैदानमा रहनुभएका सबै राजनीतिक दल तथा स्वतन्त्र उम्मेदवारहरूलाई उम्मेदवारीका लागि धन्यवाद दिन चाहन्छु। तपाईँहरूको सक्रियताले नै हाम्रो लोकतन्त्र जीवित रहने हो।
साथै मौन अवधिमा पूर्ण अनुशासन पालना गर्न र त्यसअघिको बाँकी समयमा संयमित ढंगले, एक-अर्कालाई सम्मान गर्दै निर्वाचन प्रचार-प्रसार गर्न म सबै राजनीतिक दल, उम्मेदवार तथा समर्थकहरूलाई आग्रह गर्दछु।
यस महान् कार्यमा खटिनुभएका निर्वाचन आयोग, सुरक्षा निकायका साथीहरू र सम्पूर्ण राष्ट्रसेवक कर्मचारीलाई म विशेष धन्यवाद दिन चाहन्छु। तपाईँहरूको निष्पक्षता र मेहनतले नै यो निर्वाचनलाई स्वच्छ, स्वतन्त्र र भयरहित बनाउनेछ।
निर्वाचन आयोगले छोटो र कठिन समयमा कार्यतालिका बमोजिम सबै तयारी पूरा गरेको छ। निर्वाचन निष्पक्ष, स्वच्छ र भयरहित रूपमा सम्पन्न गर्न नेपाल सरकार र आयोग पूर्ण प्रतिबद्ध छन्।
प्रदेश र स्थानीय सरकारले आफ्नो सीमाभित्र रही निर्वाचन तयारीमा महत्वपूर्ण सहयोग पुर्याएका छन्।
नेपाल सरकारका चारवटै सुरक्षा संयन्त्रले निर्वाचन सुरक्षामा कुनै कमी हुन नदिन आफ्ना सबै स्रोत-साधन परिचालन गरेका छन्।
सम्माननीय राष्ट्रपतिज्यूले गर्नुभएको अभिभावकीय सहयोगप्रति व्यक्तिगत रूपमा म र वर्तमान सरकार हार्दिक कृतज्ञता ज्ञापन गर्दछौँ।
छोटो समयमा नेपालले निर्वाचन व्यवस्थापन गर्न सकेकोमा मित्रराष्ट्रहरू तथा अन्तर्राष्ट्रिय संस्थाहरूबाट पनि उत्साहजनक साथ र प्रतिक्रिया प्राप्त गरेका छौँ।
निर्वाचन व्यवस्थापनमा वस्तुगत, नगद तथा प्राविधिक सहयोग प्रदान गर्ने मित्रराष्ट्रहरूलाई म धन्यवाद दिन चाहन्छु। साथै, संयुक्त राष्ट्र संघीय निकायहरूबाट प्राप्त सहयोगका लागि पनि आभारी छौँ।
सामाजिक सञ्जाल र आमसञ्चारका केही माध्यमबाट तथ्यहीन र कृत्रिम सामग्री तथा भ्रामक भविष्यवाणी फैलाएर वातावरण धमिल्याउन खोज्ने तत्वहरूलाई सरकारले निगरानीमा राखी कानुनको दायरामा ल्याइरहेको पनि तपाईँहरुलाई जानकारी गराउँदछु।
साथै त्यस्ता भ्रममा नपर्न, त्यस्ता तत्वको पछि नलाग्न र मुलुकसामु आएको ऐतिहासिक दायित्व जिम्मेवारीपूर्वक निर्वाह गर्न म सबै देशवासीलाई विनम्र आग्रह गर्दछु।
आज सम्पूर्ण देशवासीलाई अर्को के कुरामा आश्वस्त पार्न चाहन्छु भने, मुलुकमा कुनै पनि प्रकारको दण्डहीनतालाई प्रश्रय दिने काम यो सरकारबाट हुँदैन।कानुनबमोजिम गर्नुपर्ने जुनसुकै तहको कारबाहीमा सरकार पछि हट्ने छैन।
तेस्रो, हाम्रो उत्सवको कुरा ।
निर्वाचनकै मुखमा हामी होली अर्थात् फागु पूर्णिमा मनाउँदैछौँ। यस पावन अवसरमा म देश तथा विदेशमा रहनुभएका सबै नेपालीलाई हार्दिक शुभकामना दिन चाहन्छु।
यो रङ्गहरूको पर्वले एकता, सद्भाव र उत्साहको सन्देश दिन्छ। हाम्रो समाजमा रहेको विविधतालाई मजबुत बनाउँछ।
निर्वाचनको रङ्ग र होलीको रङ्ग मिलेर देशमा नयाँ उत्साह छाओस्।
तर, म आग्रह गर्छु- होली मनाउँदा संयम अपनाऔँ, कसैको इच्छाविपरीत रङ नलगाइदिऊँ।
चौथो– एक गम्भीर विषय।
आज संसारको अर्को कुनामा, मध्यपूर्वी क्षेत्रमा युद्धको संकट गहिरिएको छ। इरान र वरपरको तनावले हामीलाई चिन्तित बनाएको छ।
विकसित घटनाक्रमलाई नेपाल सरकारले सूक्ष्म रूपमा नियालिरहेको छ। त्यहाँ रहनुभएका हाम्रा नेपाली दाजुभाइ, दिदीबहिनी र युवाहरूको सुरक्षा हाम्रो ठूलो चासोको विषय हो।
त्यस क्षेत्रमा रहेका सबै नेपाली नियोगहरूलाई सुरक्षा सहजीकरणमा कुनै कमी हुन नदिन सक्रिय बनाइएको छ र परराष्ट्र मन्त्रालयले सघन अनुगमन गरिरहेको छ।
हामी हरदम तपाईँहरूको साथमा छौँ। नेपाली जहाँ रहे पनि प्रत्येक नागरिकको व्यक्तिगत सुरक्षा र हितको रक्षामा यो सरकार कटिबद्ध छ।
अन्त्यमा, इतिहासकै यो कठिन मोडमा प्रधानमन्त्रीको जिम्मेवारी सम्हालेर देशलाई नेतृत्व दिनुलाई मैले आफ्नो मातृभूमिप्रतिको जिम्मेवारीका रूपमा लिएकी छु।
मैले सधैँ न्याय र निष्ठाको पक्षमा उभिएर काम गर्ने प्रयास गरेँ। अब केही दिनमा यो देशको बागडोर तपाईँहरूले चुन्ने प्रतिनिधिहरूको हातमा पुग्नेछ।
आउनुहोस्, होलीको खुसी साटौँ। फागुन २१ गतेको निर्वाचनलाई शान्तिपूर्ण, स्वच्छ र ऐतिहासिक बनाऔँ।
धन्यवाद।
२०८२ फागुन १८ गते सोमबार ।
मुलुकभर चुनावी रौनक छाइरहेका बेला कञ्चनपुरको दोधारा चाँदनी–३ स्थित बादी बस्ती सुनसान छ ।
निर्वाचनको मिति नजिकिँदा दल तथा उम्मेदवार मतदाता रिझाउन व्यस्त छन् । तर गरिबी, अशिक्षा, बेरोजगारी जस्ता समस्याले आक्रान्त बडुवाल टोलस्थित सीमान्तकृत समुदायमा न राज्यको प्राथमिकतामा पर्यो, न त दल र उमेदवारका ।
झण्डै तीन दशकदेखि बसोबास गर्दै आएको यो बस्तीमा बादी समुदायसहित अन्य समुदायका एक सय बढी घर परिवारको बसोबास छ ।
भारतमुखी रोजगारी र दैनिक मजदुरी गरेर जीविकोपार्जन गर्दै आएका यहाँका मतदाताको आशा थियो, निर्वाचनमा दल तथा उम्मेदवारहरुले आफ्ना प्रतिबद्धतामा बादी समुदायलाई छुने खास योजना तथा कार्यक्रम ल्याउनेछन् ।
तर त्यो आश निराशामा परिणत मात्रै भएन, भोट माग्नसमेत उम्मेदवारहरु बस्तीमा नपुगेपछि बादी समुदाय निराश छन् । ‘अहिलेसम्म हाम्रो बस्ती कोही नेता भोट माग्न आएनन्’, यहाँका स्थानीय बिरभाने वादीले भने, ‘यहाँ जङ्गली जनावरको डरले राति भाग्नुपर्ने अवस्था छ नेता नआउँदा हाम्रो माग राख्न पाएनौँ ।’
उम्मेदवाहरु बस्तीमा नपुग्दा यहाँका स्थानीयलाई चुनावले छोएको छैन । भारतसँग सीमा जोडिएको यो बस्तीमा गरिबी, अशिक्षा, बेरोजगारी, हात्ती आतङ्क, बाढी तथा कटान, सुकुम्वासी समस्या, अवैध तस्करी र सीमा विवाद प्रमुख समस्याका रुपमा रहेको यहाँका स्थानीय सीता बादीले बताइन् । हरेक चुनावमा भोट माग्न पुग्ने दल तथा उम्मेदवारहरु यसपटक घरदैलोमा नआएपछि बादी समुदाय माग राख्न नपाएकामा दुःखी छन् ।
सीमानाकाको बस्तीमा अनेक दुःख सहेर पनि सीमाको रक्षाका लागि यहाँ बसोबास गरिरहेको उनको भनाइ छ । ‘आर्थिक अवस्था कमजोर हुँदा यहाँका बालबालिका पढाइ छोडेर रोजगारीका लागि भारत जान बाध्य छन्,’ यहाँका स्थानीय रेशम बादीले भने, ‘चुनावमा नेताहरु आउलान् र हाम्रो माग राखौँला भन्ने थियो भोट माग्न नेता नै आएनन् ।’
राष्ट्रिय जनगणना २०७८ अनुसार सुदूरपश्चिममा बादी समुदायको जनसङ्ख्या दुई हजार ५८० जना छ भने कञ्चनपुरमा मात्रै ४५८ जना छन् । गरिबी, भूमिहीन र अशिक्षाका कारण यो समुदायको अवस्था दयनीय छ ।
नेपाल राष्ट्र बैङ्कले सार्वजनिक बिदाका दिन बैङ्किङ सेवा उपलब्ध गराउन बैङ्क तथा वित्तीय संस्थालाई निर्देशन दिएको छ ।
एक निर्देशनमार्फत केन्द्रीय बैंकले होली पर्व र प्रतिनिधिसभा सदस्य निर्वाचनको दिन अर्थात् फागुन २१ गते बिहीबारका दिन बैङ्क तथा वित्तीय संस्थाका कार्यालय सञ्चालनमा रहने व्यवस्था मिलाउन आग्रह गरेको हो ।
राष्ट्र बैङ्कले सरकारी कारोबार गर्न तोकिएका वाणिज्य बैङ्कहरुद्वारा भुक्तानी व्यवस्था र राजस्व दाखिला गर्ने व्यवस्था मिलाउन निर्देशन दिएको हो । निर्वाचन प्रचारप्रसारका लागि बैङ्क खाता सञ्चालन गर्ने बैङ्क तथा वित्तीय संस्थाहरुद्वारा राजनीतिक दल तथा उम्मेदवारको नगद वा चेक वा अन्य विनिमय साधनहरुको दाखिला, भुक्तानीलगायतका बैङ्किङ सेवा प्रदान गर्ने व्यवस्था मिलाउन भनिएको छ ।
काठमाडौं । प्रतिनिधि सभा सदस्य निर्वाचनको सुरक्षा र निष्पक्षता सुनिश्चित गर्न आज मध्यरातदेखि ‘मौन अवधि’ सुरु हुँदैछ । निर्वाचन आयोगका अनुसार आज (सोमबार) राति १२ बजेदेखि मतदान सम्पन्न नहुन्जेलसम्मका लागि निर्वाचनको औपचारिक प्रचारप्रसारमा पूर्ण रोक लगाइएको हो ।
आयोगको कार्यतालिका अनुसार, मतदान सुरु हुनुभन्दा ४८ घण्टाअघि सुरु हुने यो अवधि मतदान केन्द्रहरू पूर्ण रूपमा बन्द नभएसम्म कायम रहनेछ । यस अवधिमा राजनीतिक दल, उम्मेदवार तथा उनीहरूका प्रतिनिधिहरूले कुनै पनि माध्यमबाट मतदाता प्रभावित पार्ने गतिविधि गर्न पाउने छैनन् ।
के गर्न पाइँदैन ?
मौन अवधिमा चुनावी सभा, जुलुस, सम्मेलन, गोष्ठी वा कार्यशाला जस्ता कुनै पनि औपचारिक कार्यक्रम गर्न निषेध गरिएको छ । आयोगले भौतिक उपस्थितिमा गरिने छलफल मात्र नभई सामाजिक सञ्जाल वा अन्य विद्युतीय माध्यमबाट समेत मत माग्न वा निर्वाचन प्रचार गर्न रोक लगाएको छ ।
यसैगरी, मतदान केन्द्रको तीन सय मिटर वरपर राखिएका दल वा उम्मेदवारका ब्यानर, झण्डा र पोस्टर जस्ता प्रचार सामग्रीहरू आजै हटाउनुपर्ने प्रावधान छ । निर्वाचनको मर्यादा कायम राख्न र मतदातालाई स्वविवेकले निर्णय गर्ने वातावरण मिलाउन यो समयलाई अत्यन्तै संवेदनशील मानिन्छ ।
आचारसंहिता उल्लङ्घन गरे उम्मेदवारी नै खारेज हुन सक्ने
कार्यवाहक प्रमुख निर्वाचन आयुक्त रामप्रसाद भण्डारीले मौन अवधिको कडा पालना गर्न सरोकारवालाहरूलाई सचेत गराएका छन् । उनका अनुसार, यदि कसैले मौन अवधिको आचारसंहिता विपरीत गतिविधि सञ्चालन गरेको पाइएमा वा निर्वाचनको वातावरण बिथोल्ने प्रयास गरेमा सम्बन्धित उम्मेदवारको मनोनयन नै रद्द गर्न सकिने कानुनी प्रावधान रहेको छ ।
आयोगले मौन अवधिमा हुने सक्ने अवाञ्छित गतिविधि र मतदातालाई प्रलोभनमा पार्ने कार्यको निगरानीका लागि विशेष अनुगमन टोली समेत परिचालन गरेको छ । सबै राजनीतिक दल र उम्मेदवारहरूलाई आजैदेखि आफ्ना चुनावी गतिविधिहरू स्थगित गरी निर्वाचन आचारसंहिताको पूर्ण पालना गर्न आयोगले पुनः आह्वान गरेको छ ।
काठमाडौं । रंगहरुको पर्व होली आज काठमाडौं उपत्यकासहित पहाडी जिल्लाहरुमा हर्षोल्लासका साथ मनाइँदै छ । फागु अर्थात् होलीको अवसरमा सरकारले आज पहाडी जिल्लाहरुमा सार्वजनिक बिदा पनि दिएको छ ।
हरेक वर्ष फाल्गुण शुक्ल पूर्णिमाको दिन पहाडी तथा हिमाली जिल्लामा र त्यसको भोलिपल्ट तराई तथा भित्री मधेशका जिल्लाहरूमा होली पर्व हर्षोल्लासपूर्वक मनाउने गरिन्छ ।
असत्यमाथि सत्यको, अन्यायमाथि न्यायको र दुराचारमाथि सदाचारको विजय भएको खुसियालीमा मनाइने होली पर्वमा सम्पूर्ण रिसराग परित्याग गरी प्रेमभाव र आत्मीयताका साथ आफन्तजन एवं साथीसङ्गीहरूसँग एकापसमा अबिर तथा रङ दलेर रमाइलो गर्ने परम्परा छ ।
होलीलाई आपसी मेलमिलाप र सद्भावनाको सन्देश दिने पर्वको रुपमा मनाउने परम्परा छ । विभिन्न रङ्गीचङ्गी कपडाले सजिएको चीर ठड्याएपछि प्रारम्भ हुने होली पर्व पूर्णिमाको राति चीर दाह गरेपछि समापन हुन्छ ।
