सहकारी संस्थामा बचतकर्ताको अर्बौं रकम हिनामिनासम्बन्धी प्रकरणमा प्रहरीले पाँच जनालाई पक्राउ गरेको छ । काठमाडौं उपत्यका अपराध अनुसन्धान कार्यालयको टोलीले गौतम श्री बहुउद्देश्यीय सहकारी संस्था लिमिटेड र गोरखा सेभिङ एण्ड क्रेडिट सहकारी संस्था लिमिटेड सँग सम्बन्धित व्यक्तिहरूलाई नियन्त्रणमा लिएको हो ।

प्रहरीका अनुसार गौतम श्री सहकारीका व्यवस्थापक रविन विष्ट पक्राउ परेका छन् । उक्त सहकारीमा ४७९१ बचतकर्ताको जम्मा ४ अर्ब ६ करोड ३९ लाख ४८ हजार रुपैयाँ बचत रहेको देखिएको छ । त्यसमध्ये २ अर्ब ५ करोड ९९ लाख २७ हजार ५०३ रुपैयाँ ऋण प्रवाह भएको विवरण भेटिएको छ । तर बाँकी रकमसम्बन्धी आवश्यक कागजात भने उपलब्ध नरहेको प्रहरीले जनाएको छ ।

यसैगरी गोरखा सहकारीका अध्यक्ष इमानसिंह राई, प्रमुख कार्यकारी अधिकृत लालबहादुर क्षेत्री, अविनकुमार राई र पूर्व लेखा सदस्य कर्णबहादुर राईलाई पनि पक्राउ गरिएको छ ।

गोरखा सहकारीमा १० हजार ५९८ बचतकर्ताको ४ अर्ब ५ करोड ६० लाख ६८ हजार ४५८ रुपैयाँ बचत रहेको छ । त्यसमध्ये १ अर्ब ४९ करोड १६ लाख ३३ हजार ९२४ रुपैयाँ मात्र ऋण प्रवाह भएको देखिएको छ भने बाँकी रकमको स्पष्ट विवरण फेला नपरेको प्रहरीले जनाएको छ ।

अनुसन्धानका क्रममा प्रवाह गरिएको ऋणसमेत कमसल धितो, बिना धितो तथा बैंकमा पहिले नै रोक्का रहेको धितोलाई आधार बनाएर दिइएको पाइएको छ । जसका कारण ऋण असुली हुन नसकेको र बचतकर्तालाई रकम फिर्ता गर्न समस्या भएको निष्कर्ष निकालिएको छ ।

पक्राउ परेकामाथि म्याद थप गरी थप अनुसन्धान अघि बढाइएको प्रहरीले जनाएको छ ।

काठमाडौँको सामाखुशी नजिकै टोखा रोडमा अवस्थित तक्षशिला एकेडेमीले करिब तीन दशकदेखि गुणस्तरीय शिक्षामा आफूलाई स्थापित गरेको छ।

‘तक्ष’ र ‘शिला’ शब्दबाट बनेको तक्षशिलाले खस्रो ढुङ्गालाई कुशल मूर्तिकारले सुन्दर मूर्तिमा रूपान्तरण गरेजस्तै विद्यार्थीको मस्तिष्कलाई तिखारेर सफल मानव बनाउने उद्देश्यका साथ एकेडेमी अघि बढेको छ। यही दर्शनअनुसार दक्ष शिक्षकहरूको टोलीले विद्यार्थीको अन्तर्निहित क्षमतालाई प्रस्फुटन गराउँदै सर्वाङ्गीण विकासमा ध्यान दिँदै आएका छन्।

सन् १९९८ मा प्रसिद्ध शिक्षसेवी तथा कूटनीतिज्ञ प्रा. डा. जयराज आचार्यको दूरदर्शी नेतृत्वमा स्थापना भएको यो संस्थाले झण्डै तीन दशक लामो गरिमामय इतिहास निर्माण गरिसकेको छ। सुरेशराज शर्मा र केदारभक्त माथेमा जस्ता प्रतिष्ठित शिक्षाविद्हरूको सद्भाव र आशीर्वाद प्राप्त गरेको तक्षशिला आज समाजको प्रतिष्ठित शैक्षिक संस्थाका रूपमा स्थापित छ। हाल पनि प्रा। डा। आचार्यको अभिभावकत्व तथा वरिष्ठ शिक्षाविद् एवं कुशल व्यवस्थापक नेत्रप्रसाद न्यौपानेको सक्रियताले संस्था नयाँ उचाइतर्फ अघि बढिरहेको छ।

यहाँबाट दीक्षित हजारौं विद्यार्थी देश–विदेशका प्रतिष्ठित पदमा कार्यरत छन्। हजारौं डाक्टर, इन्जिनियर तथा विभिन्न क्षेत्रमा सफल व्यक्तित्व उत्पादन गर्न सफल भएको तक्षशिलाले राष्ट्रियस्तरका कठिन प्रतिस्पर्धामा पनि उल्लेखनीय सफलता हासिल गर्दै आएको छ। हालै मात्रै एमबीबीएस प्रवेश परीक्षामा विद्यालयका विद्यार्थीले नेपालमै दोस्रो स्थान हासिल गर्नु शैक्षिक गुणस्तरको उदाहरण बनेको छ।

विद्यालयका विद्यार्थीहरूले कला, संगीत र खेलकुद क्षेत्रमा पनि उत्कृष्टता देखाएका छन्। तक्षशिलामा अध्ययन गरेका प्रोशेस पाण्डेले ‘द भ्वाइस अफ नेपाल’ सिजन–२ मा पहिलो स्थान हासिल गरेका थिए भने प्रसिद्ध लोकदोहोरी गायिका कमला घिमिरे पनि यही विद्यालयमा अध्ययनरत छिन्। खेलकुद क्षेत्रमा फुटबलर रोहित चन्द र विमल घर्ती मगर तक्षशिलाका उत्पादन हुन्।

तक्षशिला एकेडेमीले केवल किताबी ज्ञानमा मात्र सीमित नभई विद्यार्थीको सर्वाङ्गीण विकासमा जोड दिएको छ। यहाँ खेलकुद, आईटी, सामाजिक तथा व्यावहारिक शिक्षाका विभिन्न क्लबहरू सक्रिय छन्। एस्ट्रोनोमी क्लब नेपालकै पहिलो तथा अन्तर्राष्ट्रिय मान्यता प्राप्त खगोल विज्ञान क्लबका रूपमा परिचित छ, जुन संस्थाको विशिष्ट पहिचान बनेको छ। अनुसन्धानमुखी शिक्षा, प्रयोगात्मक सिकाइ र शैक्षिक भ्रमणलाई विद्यालयले प्राथमिकतामा राखेको छ।

प्राचीन तक्षशिला विश्वविद्यालयका आचार्य कौटिल्यलगायतका विचारकहरूको दर्शनबाट प्रेरणा लिँदै संस्था आधुनिक विज्ञान र मौलिक मूल्यबीच सन्तुलन कायम गर्दै विद्यार्थीलाई बौद्धिक, सामाजिक र भावनात्मक रूपमा सबल बनाउन केन्द्रित छ।

नेपाल सरकारको पाठ्यक्रमअनुसार विद्यालय तहमा कक्षा १ देखि १० सम्म र उच्च माध्यमिक तहमा विज्ञान, मानविकी, व्यवस्थापन, कानुन, होटल म्यानेजमेन्ट तथा कम्प्युटर विज्ञान विषय सञ्चालनमा छन्। उच्च शिक्षातर्फ त्रिभुवन विश्वविद्यालयसँग आबद्ध चारवर्षे बीबीएस कार्यक्रम पनि सञ्चालन भइरहेको छ।

भविष्यमा प्रतिष्ठित विश्वविद्यालय बन्ने लक्ष्यसहित अघि बढिरहेको तक्षशिला एकेडेमी गुणस्तरीय शिक्षाको खोजीमा रहेका अभिभावक र विद्यार्थीका लागि भरोसायोग्य गन्तव्य बनेको छ।

काठमाडौं– सर्वोच्च अदालतले शैक्षिकसत्र सुरु भएपछि मात्रै विद्यालयहरूमा नयाँ भर्ना लिन अन्तरिम आदेश दिएको छ ।

विद्यार्थीको वार्षिक परीक्षाको परीक्षाफल प्रकाशित नभएको र शैक्षिक सत्र सुरु नभएको तथा शिक्षा नियमावली, २०५९ को नियम ७८ (१) (ग) बमोजिम लब्धाङ्कपत्रलगायत आवश्यक सक्कल प्रमाणपत्रसमेत प्राप्त नभएको अवस्थामा विद्यालयहरूले भर्नाको सूचना प्रकाशन नगर्न आदेश दिइएको हो ।

न्यायाधीश बालकृष्ण ढकालको एकल इजलासले शिक्षा नियमावली, २०५९ अनुसार शैक्षिक सुरु भएपछि विद्यार्थी भर्ना प्रक्रिया सञ्चालन गर्नुपर्ने आदेश दिएको हो । हरेक वर्ष वैशाख २ गतेदखि नयाँ शैक्षिक सत्र सुरु हुन्छ ।

आदेशमा परीक्षा नतिजा, शैक्षिक सत्र र आवश्यक प्रमाणपत्रबीच समन्वय कायम गर्नुपर्ने उल्लेख गरिएको छ । अदालतले सम्बन्धित निकायलाई प्रचलित कानुनअनुसार कार्य गर्न निर्देशन दिँदै विपक्षीलाई १५ दिनभित्र लिखित जवाफ पेस गर्न आदेश दिएको छ ।

नेपाल सरकार, शिक्षा, विज्ञान तथा प्रविधि मन्त्रालय तथा शिक्षा विकास तथा मानव स्रोत विकास केन्द्र, सानोठिमी भक्तपुरद्वारा यही चैत ५ गते प्रकाशित सूचनामा वार्षिक परीक्षा सम्पन्न गरी नतिजा प्रकाशन पश्चात नयाँ शैक्षिक सत्र २०८३ सुरु भएपछि मात्रै भर्ना कार्यक्रम सञ्चालन गर्न निर्देशन दिइएको थियो ।

तर, उक्त निर्देशनविपरीत हालै विभिन्न छापा तथा विद्युतीय सञ्चार माध्यममार्फत विद्यार्थी भर्नाका सूचना प्रकाशित भएको पाइएको अदालतको आदेशमा उल्लेख छ ।

काठमाडौं । संस्कृति, पर्यटन तथा नागरिक उड्ययनमन्त्री गनेस पौडेलको कार्यकक्षमा मोबाइल लिएर जान निषेध गरिएको छ ।

मन्त्री पौडेललाई भेट्न जाने केही व्यक्तिले उनीसँग खिचेको तस्वीरको आधारमा शक्तिको दुरुपयोग गर्न लागेपछि उक्त निर्णय लिनुपरेको सामाजिक सञ्जालमार्फत जानकारी गराइएको छ ।

‘मन्त्रालयको कार्यसम्पादनलाई व्यवस्थित, मर्यादित तथा पारदर्शी बनाउन आजको मितिदेखि लागु हुनेगरी मन्त्रीको कार्यकक्षभित्र मोबाइल फोन तथा अन्य विद्युतीय उपकरण लैजान पूर्ण रूपमा निषेध गरिएको जानकारी गराउँदछु,’ मन्त्री पौडेलले स्टाटस लेखेका छन् ।

मन्त्रालय र अन्य स्थानमा भएका भेटघाटका क्रममा खिचिएका सौहार्दपूर्ण तस्वीरहरू प्रयोग गरी केही व्यक्तिले दुरुपयोग गरेको उनले मन्त्री पौडेलले जानकारी गराएका छन् ।

‘मन्त्रीसँग आफ्नो विशेष सम्बन्ध रहेको दाबी गर्दै विभिन्न सर्वसाधारण तथा सरकारी निकायहरूबाट अनधिकृत लाभ लिन प्रयास गरेको सूचना प्राप्त भएको छ,’ उनले भनेका छन्, ‘यसले मेरो तथा सचिवालय टीमको गम्भीर ध्यानाकर्षण गरेको छ ।’

काठमाडौं । प्रतिनिधिसभाको नयाँ सभामुखमा राष्ट्रिय स्वतन्त्र पार्टी (रास्वपा) का उपसभापति डीपी अर्याल निर्विरोध निर्वाचित भएका छन् । दिउँसो २ बजेसम्ममा अर्यालको मात्रै उम्मेदवारी परेपछि निर्विरोध सभामुखमा चयन भएका हुन् ।

संसद् सचिवालयले बिहान ११ देखि २ बजेसम्म उम्मेदवारी दर्ताका लागि समय तोकेको थियो । अर्यालको प्रस्तावक रास्वपा सभापति रवि लामिछाने र समर्थकमा अर्थमन्त्री स्वर्णिम वाग्ले, कानूनमन्त्री सोविता गौतम र भौतिक पूर्वाधार मन्त्री सुनिल लम्साल रहेका छन् ।

काठमाडौं । राष्ट्रिय स्वतन्त्र पार्टी (रास्वपा) का उपसभापति डोलप्रसाद अर्याल (डीपी) ले सभामुख पदमा मनोनयन दर्ता गराएका छन् ।

शुक्रबार रास्वपाबाट सभामुख पदमा मनोनयन दर्ता गराइको पार्टीका महामन्त्री कविन्द्र बुर्लाकोटीले बताए ।

उनले भने, ‘पार्टीको उपसभापति डोलप्रसाद अर्याललाई हामीले पार्टीको तर्फबाट सभामुखको उम्मेदवारमा प्रस्ताव गरेर दर्ता गरेका छौं । यो विषयमा अरु पार्टीहरुसँग पनि छलफल भइरहेको छ । उपसभामुखको लागि अहिले छलफल गरेका छैनौं । यो सभामुखको निर्वाचन पश्चात मात्रै यो विषयले प्रवेश लिनेछ । अहिले सभामुखमै केन्द्रित छौं ।’

उनको प्रस्तावकमा प्रतिनिधिसभा सदस्य समेत रहेका पार्टी सभापति रवि लामिछाने छन् । सभामुख पदको निर्वाचनमा चैत २२ गते हुँदैछ । त्यसका लागि संघीय संसद सचिवालयले आज शुक्रबार बिहान ११ बजेदेखि दिउँसो २ बजेसम्म सभामुख पदको उम्मेदवारी दर्ताको समय तोकेको छ । लगत्तै साढे २ बजे उम्मेदवारको सूची प्रकाशित हुनेछ ।

काठमाडौं । बले भनेर चिनिने कलाकार सागर लम्सालमाथि बलात्कारको आरोप लागेको छ ।

अमेरिका बस्ने एक युवतीले वर्ष दिनअघि आफ्नो इच्छाविपरीत लम्सालले जबर्जस्ती करणी गरेको आरोप लगाएकी हुन् । त्यो घटनापछि आफू मानसिक रूपमा थप विक्षिप्त बनेको पीडित युवतीले फेसबुकमार्फत बताएकी छन् ।

पारिवारिक रूपमै चिनजान भएको व्यक्तिसँग भेट्दा मनमा शान्ति र हौसला मिल्ने ठानेर भेटेको युवतीले बताएकी छन् । लम्सालले ‘तिम्रो अपार्टमेन्ट हेर्न लैजाऊ’ भनेपछि उनले आफू बस्ने कोठामा लगेको बताएकी छन् ।

कोठामा पुगेपछि रुँदै आफूले भोगेका मानसिक पीडा सुनाइरहँदा लम्सालले जबर्जस्ती करणी गरेको युवतीको आरोप छ ।

सागर लम्साललाई समेत ट्याग गरिएको उक्त पोस्टअनुसार दुवै जनाबीच पारिवारिक रूपमै चिनजान थियो । युवतीले उनलाई ‘दाइ’ भनेर सम्बोधन गर्थिन् । लम्साल अमेरिका गएका बेला युवतीसँग भेट भएको थियो ।

नेपाल हुँदादेखि नै एन्जाइटी र डिप्रेसनजस्तो मानसिक समस्यासँग जुधिरहेको बताउने युवतीले आफ्ना बुबाको सुझावपछि नै लम्साललाई भेटेकी थिइन् ।

उनको यो पोस्टपछि धेरैले प्रतिक्रिया दिएका छन् । कमेन्टमा लम्साललाई पनि थुप्रैले प्रश्न गरेका छन् । तर लम्सालले यसबारे कुनै प्रतिक्रिया जनाएका छैनन् । मोबाइल फोन पनि रिसिभ भएन ।

काठमाडौँ । ४० हजार रुपैयाँ घुससहित सशस्त्र प्रहरी निरीक्षक पक्राउ परेका छन् । अख्तियार दुरुपयोग अनुसन्धान आयोग क्षेत्रीय कार्यालय बर्दिबासको टोलीले धनुषाको लालगढबाट प्रहरी निरीक्षक ओकिल अधिकारीलाई पक्राउ गरेको हो ।

उनलाई आज बिहान लालगढबाट घुससहित पक्राउ गरिएको अख्तियारको क्षेत्रीय कार्यालय बर्दिबासका सूचना अधिकारी उपसचिव प्रकाश पोखरेलले जानकारी दिए । अहिले आवश्यक कागजात संकलन गरेर प्रहरी निरीक्षक अधिकारीलाई अख्तियारको केन्द्रिय कार्यालय टंगालमा पठाउने तयारी भइरहेको उनले बताए ।

कमला–ढल्केवर–बाग्मती सडक निर्माण खण्डअन्तर्गत माटो तथा ग्राभेल फिलिङ कार्यमा प्रयोग हुने सवारी साधनहरू रोक्ने, अनावश्यक अवरोध सिर्जना गर्ने र घुस माग्ने गरेको उजुरीको आधारमा अख्तियारको टोलीले निगरानी गर्दै आएको थियो । सोही क्रममा उनलाई ४० हजार रुपैयाँ घुससहित पक्राउ गरिएको हो ।

निरन्तर काममा खटेका गृहमन्त्री सुधन गुरुङ मन्त्रालयमै आराम गरिरहेको तस्बिर सार्वजनिक भएको छ । कार्यव्यस्तताका कारण घर जान नपाएपछि उनी मन्त्रालयकै सोफामा सुतेका हुन् ।

उनको निजी सचिवालयका अनुसार २४ घण्टा काममा व्यस्त मन्त्री गुरुङ मन्त्रालयमै सुतेका हुन् ।

यो तस्बिर फेसबुकमा सार्वजनिक गर्दै गृहमन्त्री गुरुङले लेखेका छन्, ‘निर्माता भन्दा ठूलो निर्माण हुँदैन, जनताभन्दा माथि सरकार हुँदैन ।’

पश्चिम एसियामा जारी द्वन्द्वका कारण अलपत्र परेका नेपालीको उद्धार गर्न नेपाल सरकारले आजदेखि तीन दिनसम्म विशेष उडान सञ्चालन गर्ने भएको छ।

नेपाल वायुसेवा निगम (नेपाल एयरलाइन्स) ले ३ अप्रिलमा काठमाडौँ-दुबई, ४ अप्रिलमा दुबई-काठमाडौं तथा ५ अप्रिलमा काठमाडौँ-दमाम-काठमाडौँ उडान गर्ने तालिका तय गरेको छ।

सरकारका अनुसार ती क्षेत्रमा रहेका नेपालीलाई स्वदेश फर्काउन तथा गन्तव्य मुलुकसम्म पुर्‍याउन यो विशेष उडान सञ्चालन गर्न लागिएको हो।

यसअघि चैत १७ गते परराष्ट्र मन्त्रालय, संस्कृति, पर्यटन तथा नागरिक उड्डयन मन्त्रालय, नेपाल नागरिक उड्डयन प्राधिकरण र नेपाल वायुसेवा निगमका उच्च अधिकारीबीच बैठक बसेर उद्धार र आवागमन सहज बनाउने विषयमा छलफल भएको थियो।

परराष्ट्रमन्त्री शिशिर खनालको निर्देशनपछि निगमले तीन दिनका लागि विशेष उडान सञ्चालन गर्ने निर्णय गरेको हो। पश्चिम एसियामा बढ्दो तनाव र असुरक्षाका कारण फेब्रुअरी २८ देखि नियमित उडानहरू स्थगित छन्।

उडान सञ्चालनका क्रममा आवश्यक बीमा व्यवस्थापनका लागि राष्ट्रिय बीमा कम्पनीले सहयोग गरेको परराष्ट्र मन्त्रालयले जनाएको छ।