प्रधानमन्त्री बालेन शाहले रसुवाको भोटेकोशीमा आएको भीषण बाढीबाट भएको मानवीय क्षतिप्रति दुःख व्यक्त गर्दै विपद्को सामना गर्न सरकार दृढतापूर्वक लागिरहेको बताएका छन् ।
बुधबार प्रतिनिधिसभाको विशेष समयमा सम्बोधन गर्दै प्रधानमन्त्री शाहले भदौ १० गते रसुवाको भोटेकोशीमा आएको बाढीले क्षणभरमै ठूलो मानवीय क्षति पुर्याएको बताए ।
उनले बाढीमा परी ज्यान गुमाउने सबैप्रति भावपूर्ण श्रद्धाञ्जली अर्पण गर्दै शोकसन्तप्त परिवारजनप्रति समवेदना व्यक्त गरे ।
प्रधानमन्त्री शाहले भने, ‘भदौ १० गते रसुवाको भोटेकोशीमा आएको भीषण बाढीले क्षणभरमै हाम्रा आमाबुवा, दिदीबहिनी तथा दाजुभाइलाई हामीबाट खोसेर लग्यो । यो अकल्पनीय विपत्तिमा परी ज्यान गुमाउने सम्पूर्णप्रति भावपूर्ण श्रद्धाञ्जली अर्पण गर्दछु ।’
उनले विपद्बाट रसुवा, नुवाकोट र धादिङमा भएको क्षति ती जिल्लाको मात्र नभई सिंगो देशको साझा पीडा भएको बताए ।
‘यो पीडा रसुवा, नुवाकोट र धादिङको मात्र होइन, सिंगो नेपालको छातीमा परेको साझा बज्रपात हो,’ उनले भने ।
प्रधानमन्त्री शाहले संकटका बेला नेतृत्वले निराशा होइन, जनतालाई हिम्मत र भरोसा दिनुपर्ने बताए । विपद्को समयमा थकान र पीडाका कारण विश्राम लिने अवस्था नरहेको उल्लेख गर्दै उनले उद्धार, राहत तथा पुनःस्थापनाका कामलाई प्राथमिकताका साथ अघि बढाइरहेको बताए ।
‘शरीर थाकेको भन्दै विश्राम लिने छुट छैन । मन भक्कानिँदा पनि एकआपसमा विलाप गर्ने समय छैन । संकटको यो घडीमा देशको नेतृत्वले आँसु होइन, जनतालाई हिम्मत र आड–भरोसा दिनुपर्छ भन्ने यथार्थलाई हामीले स्वीकार गरेका छौँ, त्यसैले दृढ संकल्प, साहसका साथ यो विपत्तिमा लड्नुको हामीसँग अर्को विकल्प छैन । हामी लडिरहेका छौं,’ प्रधानमन्त्री शाहले भने ।
उनले विपत्तिको सामना गर्न दृढ संकल्प र साहसका साथ अघि बढ्नुको विकल्प नरहेको बताए ।
प्रधानमन्त्री बालेन शाहले प्रतिनिधिसभाको बैठकमा भोटेकोशी बाढीबाट भएको क्षति तथा सरकारले गरिरहेको उद्धार, राहत र पुनःस्थापनाका कामबारे जानकारी गराएका छन्।
बुधबार बसेको प्रतिनिधिसभाको बैठकमा समय माग गरेर प्रधानमन्त्री शाहले भोटेकोशी बाढीपछि सरकारले गरेका कामकारबाहीबारे विस्तृत जानकारी गराएका हुन्।
उनले बाढीबाट प्रभावित क्षेत्रमा उद्धार तथा राहतका लागि सरकारले तत्कालै विभिन्न संयन्त्र परिचालन गरेको जानकारी दिँदै प्रभावित नागरिकको उद्धार, राहत वितरण तथा अवरुद्ध सडक र सञ्चार सेवा सञ्चालनका लागि भइरहेको प्रयासबारे संसद्लाई अवगत गराएका छन्।
प्रधानमन्त्री शाहले बाढीबाट भएको मानवीय तथा भौतिक क्षतिको विवरण संकलन भइरहेको र प्रभावित क्षेत्रको अवस्था सामान्य बनाउन सरकारले प्राथमिकताका साथ काम गरिरहेको बताए।
पृथ्वी राजमार्गअन्तर्गत नागढुंगा नजिकै पातले वनमा सडकको केही भाग भासिएपछि सवारी आवागमन प्रभावित भएको छ । आज बिहान सडकको केही भाग भासिएपछि हाल पेट्रोलियम पदार्थ बोक्ने सवारीसाधन र दुईपांग्रे सवारीलाई सोही स्थानबाट एकतर्फी रूपमा आवतजावत गर्ने व्यवस्था मिलाइएको छ ।
अन्य सबै सवारीसाधनलाई भने नागढुंगा सुरुङमार्ग हुँदै पठाउने व्यवस्था गरिएको सडक विभागले जनाएको छ । सडक भासिएको स्थानको स्थलगत निरीक्षण तथा आवश्यक प्राविधिक अध्ययनका लागि विभागको प्राविधिक टोली परिचालन गरिएको छ । अध्ययनपछि आवश्यक मर्मतसम्भार गरी यातायात सेवा चाँडै पूर्ण रूपमा सञ्चालनमा ल्याइने विभागले जनाएको छ ।
सडकको अवस्था र मर्मत कार्यका कारण यस खण्डमा यात्रा गर्ने सवारीसाधनले वैकल्पिक मार्ग तथा सुरुङमार्ग प्रयोग गर्नुपर्ने अवस्था रहेको छ ।
दक्षिण कोरियाको अदालतले नेपालका नेताहरूलाई ‘होली वाइन’ खुवाउने विवादास्पद युनिफिकेशन चर्चकी नेतृ हान हाक जा मुनलाई दुई वर्षको जेलसजाय सुनाएको छ ।
राजनीतिक कोष ऐन उल्लङ्घन गरेको र तत्कालीन प्रथम महिला किम किओन हीलाई घुस तथा महँगा उपहारहरू दिएको अभियोगमा उनी दोषी ठहर भएकी हुन् ।
यो मुद्दा दक्षिण कोरियामा विशेष अनुसन्धान टोलीमार्फत अघि बढाइएको थियो । चर्चले आफ्नो राजनीतिक प्रभाव बढाउन र विभिन्न व्यापारिक स्वार्थ सिद्ध गर्न अनुचित दबाब दिएको अदालतको ठहर छ । अदालतले दुबै पक्षलाई एक साताभित्र अपिल गर्न समयसीमा दिएको छ ।
८३ वर्षीय हाक यस चर्चका संस्थापक सन म्योङ मुनकी विधवा पत्नी हुन् । उनीविरुद्ध सन् २०२२ मा दक्षिण कोरियाकी तत्कालीन प्रथम महिला किम किओन हिलाई ग्राफ ब्रान्डको हिराको हार, च्यानल ब्यागलगायतका विलासी सामाग्री उपहारमा दिएको अभियोग थियो ।
यस अभियोगमा गत जनवरीमा किमलाई सोल डिस्ट्रिक कोर्टबाट २० वर्षको सजाय भइसकेको थियो । किओनमाथि चर्चका सदस्यहरुलाई आफ्नो पतिको कन्जरभेटिभ पिपुल पावर पार्टीमा भर्ति गरेको तथा सत्तामा छँदा जागिरमा लगाएको पनि आरोप लागेको थियो ।
अप्रिलमा उच्च अदालतले किओलको सजाय वृद्धि गरेर ४ वर्षको सजाय सुनाएको थियो । किओल पूर्व राष्ट्रपति योन सुक योलकी पत्नी हुन् । सन् २०२५ मा संसद्ले उनीमाथि महाभियोग प्रस्ताव पारित गरेको थियो । राष्ट्रपति छँदा लोकतन्त्र मास्ने मनसायले डिसेम्बर २०२४ मा सैनिक शासन लागु गरेको आरोप राष्ट्रपति योलविरुद्ध थियो ।
दक्षिण कोरियामात्रै नभएर विश्वभरका नेताहरुसँग हाक जाको राम्रो सम्बन्ध छ । नेपालमा मंसिर २०७५ मा काठमाडौंको हयात होटलमा युनिमर्शल पिस फेडेरेशन (युपिएफ) ले आयोजना गरेको ‘एशिया प्यासिफिक सम्मेलनमा हाक जाले सहभागीहरुलाई होली वाइन खुवाएकी थिइन् ।
हाक नेतृत्वको युपिएफ युनिफिकेशन चर्चसँग आबद्ध संस्था हो । उक्त सम्मेलनमा बर्माकी नेतृ आङ सान सुची र कम्बोडियाका प्रधानमन्त्री हुन सेनसहित १ हजार ५ सय प्रतिनिधि सहभागी थिए ।
उक्त कार्यक्रममा नेपालमा तत्कालीन प्रधानमन्त्री केपी ओलीदेखि स्थानीय तहका प्रमुखसम्मलाई होली वाइन पिउनका लागि जोडीसहित आउन निमन्त्रणा गरिएको थियो ।
युनिफिकेशन चर्चले रगत शुद्ध गर्ने भन्दै मानिसहरुलाई होली वाइन खुवाउँदै आएको छ । तर विवाद भएपछि प्रधानमन्त्री, मन्त्री र अधिकांश स्थानीय निकायका प्रमुख वाइन पिउने कार्यक्रममा गएनन् । युनिफिकेसन चर्चको मान्यताअनुसार होली वाइन पिउने जोडीहरू मुन दम्पतीको वंशमा समाहित हुन्छन् ।
विवाहित वा विवाहयोग्य जोडीहरूलाई यस कार्यक्रममा समावेश गरिन्छ । होली वाइन नपिईकन यस चर्चले कसैलाई पनि विवाहको मान्यता दिँदैन । समापनमा भने प्रधानमन्त्री ओली पुगेका थिए ।
उनलाई हाक जाले गुड गभर्नेन्स अवार्डसहित एक लाख डलर पुरस्कार दिएकी थिइन् । लगत्तै, ओलीले उक्त पुरस्कार नेपाली युवा र बालबालिकाको क्षेत्रमा खर्च गर्न सरकारी कोषमा दाखिला गर्ने घोषणा गरेका थिए ।
परिवार दलका अध्यक्ष तथा पूर्व मन्त्री एकनाथ ढकालको अगुवाईमा यस सम्पन्न भएको थियो । ढकालले सन् २०१७ मा नेपाली टाइम्ससँगको एक अन्तर्वार्तामा आफु युनिफिकेशन अभियानसँग जोडिएको स्विकारेका थिए ।
युनिफिकेशन चर्चसँग सम्बन्धित गतिविधिहरूलाई नियमित रूपमा प्रचारप्रसार गर्ने टी प्यारेन्ट्स डट ओआरजी नामक साइटले २१ मे २०१२ मा ‘युनिफिकेसन चर्चका नेपालस्थित नेता ढकाल मन्त्री नियुक्त शीर्षकमा’ समाचार प्रकाशित गरेको थियो ।
रसुवाको भोटेकोशी नदीमा आएको बाढी कारण हालसम्म १ हजार १२७ जनाको शव फेला परेको छ ।
नेपाल प्रहरीले आज बिहान ८ बजेसम्मको सार्वजनिक गरेको विवरण अनुसार ४ हजार ८५८ जना अझै सम्पर्कविहीन छन् ।
प्रहरीका अनुसार बाढी प्रभावित क्षेत्रमा ७ हजार ९१२ जना प्रहरी परिचालन गरिएको छ ।
त्यस्तै, बाढीमा परेका ६हजार ५४१ हजार ७४२ जना घाइतेहरुको उद्धार गरिएको छ ।
भोटेकोशी बाढीमा परेर बेपत्ता भएकाहरूको शव एक सातासम्म पनि फेला नपरेपछि आफन्तहरूले कुशको शव बनाएर अन्तिम संस्कार गर्न थालेका छन्।
बेपत्ता भएको लामो समय बितिसक्दा पनि खोजीबाट शव फेला नपरेपछि पशुपतिको आर्यघाटमा कुशको शव बनाएर दाहसंस्कार गर्ने आफन्तको संख्या बढ्दै गएको छ।
बेपत्ता व्यक्ति जीवितै भेटिने आशा कमजोर हुँदै गएको र शव फेला पर्ने सम्भावना पनि न्यून देखिएपछि परिवारजनले धार्मिक विधिअनुसार अन्तिम संस्कार सुरु गरेका हुन्।
बाढीमा बेपत्ता आफन्तको पर्खाइमा रहेका परिवारका लागि शवसमेत नपाई अन्त्येष्टि गर्नुपर्ने अवस्था थप पीडादायी बनेको छ।
