२०८३ मंसिर १ गते सोमबार
२०८३ मंसिर १ गते सोमबार

काठमाडौं- नेपाली कांग्रेसका नेता डा. शेखर कोइरालाले पार्टीको एकता जोगाउन आफूले मध्यमार्गी बाटो रोजेको जिकिर गरेका छन् ।

बिहीबार मोरङ क्षेत्र नम्बर ६ स्थित सुन्दरहरैँचामा कांग्रेसका समर्थकहरूसँग कुराकानीका क्रममा कोइरालाले आफू दोस्रो विशेष महाधिवेशनमा नगएर पार्टी विभाजन रोक्न भूमिका खेलेको बताए ।

त्यसबेला एउटा समूह विशेष महाधिवेशन र अर्को नियमित महाधिवेशन भनेर हिँड्दा आफूले मध्यमार्गी बाटो रोजेको उनले बताएका छन् । ‘त्यसैले पार्टी नफुटोस् भनेर मैले बीचको बाटो लिएँ’, उनले भने ।

आफू विशेष महाधिवेशनको हलमा गएको भए पार्टी दुई टुक्रा हुने निश्चित रहेको उनले सुनाए । ‘म त्यो हलमा गएको भए पार्टी दुई टुक्रा हुन्थ्यो,’ उनले भने ।

विशेष महाधिवेशनको हलमा जाँदा सभापति बन्ने अवसर पनि पाउने अवस्था रहेको उनको भनाइ थियो । तर पार्टी दुई टुक्रा हुने देखेपछि त्यहाँ नगएको उनले जिकिर गरे । ‘त्यहाँ गएको भए म पार्टी सभापति म बन्थेँ, बन्दैनथे त्यो बेग्लै कुरा हो। तर, पार्टी दुई टुक्रा हुन्थ्यो,’ कोइरालाले भने ।

 

काठमाडौं- राष्ट्रिय प्रजातन्त्र पार्टी (राप्रपा) बाट झापा क्षेत्र नम्बर २ का उम्मेदवार स्वागत नेपाललाई नेपाल प्रहरीको साइबर ब्यूरोले बोलाएको छ।

पार्टीका प्रवक्ता मोहनकुमार श्रेष्ठले झापा–२ का पार्टी उम्मेदवार नेपाललाई सरकारी संयन्त्रले दबाब दिन खोजेको आरोप लगाएका छन् ।

श्रेष्ठले स्वागत नेपाल अब एक्लो नरहेको उल्लेख गरेका छन् । उनले दिवंगत वरिष्ठ नेता दीपक बोहोराले अस्वस्थ अवस्थामै एक शब्द नबोली चुनाव लडेर बहालवाला गृहमन्त्रीलाई पराजित गरेको इतिहास राप्रपासँग रहेको स्मरण गराए ।

श्रेष्ठले भने, ‘झापा–२ का उम्मेदवार, अधिवक्ता स्वागत नेपालले विगतमा दिएको अभिव्यक्तिका आधारमा अहिले सरकारी संयन्त्रले निरुत्साहित गर्ने प्रयास गरिरहेको छ, जुन आपत्तिजनक छ ।’ उनले स्वागत नेपाल नबोल्ने वा कानुन नजान्ने व्यक्ति नभएको स्पष्ट पारे ।

राप्रपाले देशभर उम्मेदवारी दिएर कुशासन र भ्रष्ट व्यवस्थाविरुद्ध वैकल्पिक धार सिर्जना गरेपछि सरकार राप्रपाका उम्मेदवारविरुद्ध अनावश्यक र पुराना विषय उठाएर आक्रमणमा उत्रिएको श्रेष्ठको आरोप छ ।

यसैक्रममा झापा–२ का उम्मेदवार स्वागत नेपाललाई साइबर ब्यूरो भोटाहिटीबाट फोन गरी उपस्थित हुन भनिएको उनले बताएका छन् ।

स्वागत नेपाल पार्टीमा समाहित हुनुअघि दिएका अभिव्यक्ति र राष्ट्रिय एकता दिवसका अवसरमा भृकुटीमण्डपमा भएको कार्यक्रममा बोलेका विषयलाई आधार बनाएर पक्राउ गर्न खोजिएको उनले बताए । ती अभिव्यक्ति दिँदा स्वागत नेपाल राप्रपामा आबद्ध भइनसकेको पनि उनले उल्लेख गरेका छन् ।

सिंहदरबार जलाउने अभिव्यक्ति दिनेहरूले व्यवहारमै त्यस्तो काम गरिसक्दा पनि स्वागत नेपाललाई बोलेकै आधारमा दुःख दिने नियत अवाञ्छित भएको श्रेष्ठको भनाइ छ ।

प्रवक्ता श्रेष्ठले दलको टिकट लिएर चुनावमा होमिएका उम्मेदवार पार्टीले तोकेको तालिकाअनुसार अघि बढ्नुपर्ने उल्लेख गरेका छन् ।

स्वागत नेपाल अहिले झापा–२ को चुनावी प्रचारमा व्यस्त रहेको श्रेष्ठले बताए । यदि सरकार प्रचारमा सहयोग गर्न लागेको हो भने स्वागतयोग्य भए पनि अनावश्यक दुःख दिएर चुनावी गतिविधि अवरुद्ध गर्ने प्रयास सह्य नहुने चेतावनी उनले सरकारलाई दिएका छन् ।

काठमाडौँ । नेकपा एमालेका सचिव महेश बस्नेतले राष्ट्रिय स्वतन्त्र पार्टीका वरिष्ठ नेता बालेन्द्र साहले प्रयोग गरेको भाषिक अभिव्यक्तिलाई लिएर आफूबाट सार्वजनिक रूपमा भएको टिप्पणीप्रति क्षमा व्यक्त गरेका छन्।

जनकपुरमा आयोजित रास्वपाको चुनावी सभामा साहले मैथिली भाषामा सम्बोधन गर्ने क्रममा ‘मधेसी छौरा प्रधानमन्त्री बन्ने’ भन्ने भावको अभिव्यक्ति दिएका थिए। सोही सन्दर्भमा मैथिली भाषाको अर्थ के लाग्छ भन्ने विषयमा बस्नेतले राखेको जिज्ञासालाई केही व्यक्तिहरूले गलत आशयका साथ प्रस्तुत गरेको उनको भनाइ छ।

बस्नेतले बिहीबार सामाजिक सञ्जालमार्फत आफ्नो धारणा सार्वजनिक गर्दै मधेस, मैथिली भाषा, संस्कृति र पहिचानप्रति आफू सधैँ सम्मानशील रहेको स्पष्ट पारे। आफूले नबोलेका वा फरक आशय निहित नभएका विषयलाई तोडमोड गरी प्रचार गरिएकोप्रति आपत्ति जनाउँदै उनले यस्ता प्रचारबाट भ्रमित नहुन आग्रह गरेका छन्।

उनले उक्त प्रक्रियामा कसैको भावना अनाहकमा आहत भएको भए त्यसप्रति आत्मालोचना गर्दै क्षमायाचना गरेका छन्।

काठमाडौँ । आइसिसी महिला टी-२० विश्वकप ग्लोबल छनोटको आफ्नो दोस्रो खेलमा पनि नेपाल पराजित भएको छ । नेपाल २ रनले पराजित भएको हो ।

१४१ रनको लक्ष्य पछ्याएको नेपालले २० ओभरमा ७ विकेट गुमाएर १३८ रन मात्र बनाउन सक्यो । अन्तिम ओभरमा १३ रन आवश्यक हुँदा रुबिना क्षेत्री र सीता राना मगर मिलेर १० रन मात्र जोड्न सके ।

त्यसअघि नेपाललाई २४ बलमा ४८ रन आवश्यक हुँदा सीता र रुबिना मिलेर खेललाई अन्तिम ओभरसम्म पुर्‍याएका थिए । रुबिनाले अविजित ३७ रन, सीता रानामगरले अविजित २७ रन बनाइन् । बिन्दु रावलले १८ रन बनाइन् ।

नेदरल्यान्ड्सका लागि इसाबेल भान डर वोनिङले ३ विकेट लिइन् । सिल्भर सिगर्स, रोबिन रिके र कारोलिन डे लाङले १-१ विकेट लिए ।

त्यसअघि टस जितेर पहिले ब्याटिङ गरेको नेदरल्यान्ड्सले २० ओभरमा ५ विकेट गुमाएर १४० रन बनाउँदै नेपाललाई १४१ रनको लक्ष्य दिएको थियो।

नेदरल्यान्ड्सका लागि कप्तान बाबेट डे लिडले सर्वाधिक ४९ रन बनाइन् । स्टेर कालिसले ३० रन बनाइन् । रोबिन रिके १९ तथा आइरिस ज्विलिङ १४ रनमा अविजित रहे ।

नेपालका लागि रुबिना क्षेत्रीले २ विकेट लिइन् भने रिया शर्मा, सुमन विष्ट र पूजा महतोले १-१ विकेट लिए ।

नेपाल यसअघि पहिलो खेलमा थाइल्यान्डसँग पराजित भएको थियो । नेदरल्यान्ड्स आजको जितसँगै सुपर सिक्समा पुगेको छ ।

काठमाडौं । काठमाडौं उपत्यकाका सार्वजनिक सवारी साधनमा आजदेखि सिसी क्यामरा जडान सुरु गरिएको छ । काठमाडौं उपत्यका ट्राफिक प्रहरी कार्यालयका प्रवक्ता नरेशराज सुवेदीले आज एक समारोहकाबीच काठमाडौं उपत्यका प्रहरी कार्यालय प्रमुख, प्रहरी अतिरिक्त महानिरीक्षक ईश्वर कार्कीबाट उक्त क्यामरा जडानको थालनी भएको जानकारी दिए ।

उनले भने, “यातायात व्यवसायीसँगको छलफलपछि आजदेखि गाडीमा सिसी क्यामरा राख्ने अभियान थालिएको हो, यसलाई तीव्र गतिमा अघि बढाउने छौँ, जसले सवारी दुर्घटना न्यूनीकरण, अपराध नियन्त्रण तथा दुव्र्यवहार र चोरी नियन्त्रणमा सहयोग पुग्ने अपेक्षा छ ।”

उनले सिसी क्यामरासँगै ड्यासबोर्ड क्यामरा पनि जडान थालनी गरिएको बताए । दुर्घटनापछि चालक भाग्ने, बसभित्रै पनि कूटपिटका घटना हुने तथा यात्रुमाथि दुव्र्यवहारलगायत घटना भएका गुनासा व्यापक आइरहेकाले क्यामरामार्फत निगरानी हुने र तथ्य थाहा पाइने हुँदा सवारीसाधनमा सिसी क्यामरा राख्ने विषयलाई प्राथमिकतामा राखिएको प्रवक्ता सुवेदीले बताए ।

यस्तै ड्यासबोर्डमार्फत बाहिरका गतिविधिका साथै दुर्घटनामा कसको कमजोरी भएको हो भनेर समेत पत्ता लाग्ने हुँदा यसलाई तीव्रताका साथ अघि बढाइने उनले बताए । सो समारोहमा प्रहरी अतिरिक्त महानिरीक्षक कार्कीले सार्वजनिक यातायातमा सबैभन्दा बढी नागरिकको पहुँच हुने भएकाले यसलाई प्रविधियुक्त बनाउँदा थप सुरक्षित हुने बताए ।

आजै काठमाडौँ उपत्यकाका विभिन्न स्थान र मितिमा चोरी भएका ५० ओटा मोटरसाइकल र स्कुटर खोजतलास गरी प्रहरीले धनीलाई बुझाएको छ ।

काठमाडौँ । आगामी २१ फागुनमा हुने प्रतिनिधिसभाको निर्वाचनमा दलित समुदायबाट अत्यन्त न्यून उम्मेदवार रहेका छन् । नेपाली कांग्रेसले बझाङबाट सह–महामन्त्री प्रकाश रसाइली स्नेहीलाई मात्रै उम्मेदवार बनाएको छ ।

नेकपा (एमाले)बाट डडेल्धुरामा चक्र स्नेहीलाई र बर्दिया– २ बाट बाट विमला विकलाई उम्मेदवार बनाइएको छ । नेपाली कम्युनिस्ट पार्टीले स्याङ्जा– २ बाट पदम विश्वकर्मा र कञ्चनपुर– ३ बाट मानबहादुर सुनारलाई मात्रै टिकट दिएको छ । राष्ट्रिय स्वतन्त्र पार्टी (रास्वपा)ले बाँके–३ बाट खगेन्द्र सुनारलाई उम्मेदवार बनाएको छ ।

दलित आन्दोलनका अगुवा तथा पूर्वराजदूत पदम सुन्दासले मुख्य ठूला राजनीतिक दलहरूले नै दलित समुदायलाई भोट बैंक बनाएको तर अवसरबाट सधैँ वञ्चित गर्दै आएको टिप्पणी गरे । उनी भन्छन्, ‘पार्टीभित्र दलित नेताको योगदान अरू समुदायको जत्तिकै हुन्छ, तर निर्वाचनको समयमा उनीहरूले टिकट पाउँदैनन् । टिकट दिँदा नै एक प्रकारको विभेद हुँदै आएको छ, दलितको जनसङ्ख्यालाई हेर्ने हो भने पनि १३ प्रतिशत छ ।’

नेपाल दलित महिला उत्थान संघ (एड्वान)की अध्यक्ष विन्दु परियारले परिवर्तनका लागि पटकपटक लडेको पुरानो प्रजातान्त्रिक दल कांग्रेस, मजदुर, गरिब, किसान, दलित, महिला, जनजाति, मधेसी आदिको अधिकारका लागि संघर्ष गरिरहेको दाबी गर्ने नेपाली कम्युनिस्ट पार्टी र एमाले नै दलितप्रति अनुदार देखिएको टिप्पणी गरे । यसरी दलित समुदायलाई प्रत्यक्षमा टिकट नदिनुले प्रतिनिधिसभामा दलित समुदायको प्रतिनिधित्व घट्ने देखिन्छ । संसद्मा ३३ प्रतिशत महिला अनिवार्य हुने संवैधानिक व्यवस्थाजस्तै दलितको सवालमा पनि अनिवार्य व्यवस्था गर्नुपर्ने उनको भनाइ छ ।

२०७९ को प्रतिनिधिसभामा १५ जना (५‍.८१ प्रतिशत)को प्रतिनिधित्व रहेको थियो । २०६४ को संविभानसभामा ५० जना दलित (८.३२ प्रतिशत)को उपस्थिति थियो । २०७० सालको संविधानसभामा ४० जना (६.६५ प्रतिशत) र २०७४ सालमा प्रतिनिधिसभामा २० जना (७.२७ प्रतिशत) रहेको थियो ।

यो संख्या हेर्ने हो भने संसद्मा दलितको प्रतिनिधित्व क्रमशः घट्दो क्रममा देखिन्छ । ५९ जनाको राष्ट्रियसभामा आठ जना मात्रै दलितको सहभागिता छ । संविधानको धारा, ४२ (१) अनुसार सामाजिक रूपले पछाडि परेकालाई समावेशी सिद्धान्तका आधारमा राज्यको निकायमा सहभागिताको हक हुने व्यवस्था हुनेछ भनिए पनि त्यसको व्यावहारिक कार्यान्वयन हुन सकेको छैन ।

प्रतिनिधि सभा सदस्यका लागि उम्मेदवारी दिएका उम्मेदवारको नामावली आज प्रकाशन हुँदै छ ।

निर्वाचन आयोगको निर्वाचन कार्यतालिका अनुसार पहिलो हुने निर्वाचित हुने निर्वाचन प्रणालीतर्फको निर्वाचन कार्यक्रम अनुसार मनोनयन पत्र दर्ता भएका उम्मेदवारको विरोधमा मंगलबार उजुरी दिने कार्यतालिका थियो ।

उक्त उजुरीउपर जाँचबुझ एवं आवश्यक निर्णय गरी आज बेलुकी ५ बजेदेखि ७ बजेसम्म उम्मेदवारको अन्तिम नामावली प्रकाशन गरिने आयोगले जनाएको छ ।

उम्मेदवारी दिएका पाँच उम्मेदवारविरुद्ध उजुरी परेको छ । निर्वाचन आयोगका अनुसार, भक्तपुर, सुनसरी, रौतहट, कैलालीबाट उम्मेदवारी दिएका उम्मेदवारविरुद्ध उजुरी परेको हो ।

यस्तै, माघ ९ गते शुक्रबार बिहान १० बजेदेखि दिउँसो १ बजेसम्म उम्मेदवारले नाम फिर्ता लिने समय तोकिएको छ ।

माघ ९ गते दिउँसो १ बजेदेखि ३ बजेसम्ममा उम्मेदवारको अन्तिम नामावली प्रकाशन गरिनेछ । त्यसै दिन दिउँसो ४ बजेदेखि साँझ ७ बजेसम्ममा उम्मेदवारलाई निर्वाचन चिह्न प्रदान गरिने कार्यक्रम रहेको जनाइएको छ ।

आयोगमा अहिलेसम्म प्राप्त जानकारीअनुसार पुरुष ३०८९, महिला ३९६ र तेस्रो लिंगी एक गरी ३४८६ को उम्मेदवारी दर्ता भएको छ ।

यसपटक जेन जेड आन्दोलनका कारण संसद विघटन गरेर कार्यकाल पूरा नहुँदै प्रतिनिधि सभाको निर्वाचन हुन लागेको हो । सुशीला कार्की नेतृत्वको अन्तरिम सरकारले आगामी फागुन २१ गतेका लागि निर्वाचन मिति तोकेको छ ।

यसपटक ९६ लाख ६३ हजार ३५८ पुरुष, ९२ लाख ४० हजार १३१ महिला र अन्य २०० गरी जम्मा एक करोड ८९ लाख ०३ हजार ६८९ मतदाता निर्वाचनमा सहभागी हुँदैछन् ।

यस वर्षको कक्षा १० को अन्तिम परीक्षा आगामी चैत १९ देखि २९ गतेसम्म गर्ने राष्ट्रिय परीक्षा बोर्डले तय गरेको छ । बोर्डले बुधबार परीक्षा तालिका सार्वजनिक गरेको हो । जस अनुसार पहिलो दिन अनिवार्य अंग्रेजी र दोश्रो दिन अनिवार्य नेपालीको परीक्षा हुने छ ।

२२ गते अनिवार्य गणित, २३ गते अनिवार्य विज्ञान, २४ गते सामाजिक, २५ गते ऐच्छिक प्रथम पत्रका विषय र २६ गते ऐच्छिक द्धितीय विषयका परीक्षा हुने छन् । २७, २८ र २९ गते प्राविधिक धार तर्फका पुराना र नयाँ कोर्सको परीक्षा हुने बोर्डले जनाएको छ ।

यसअघिका वर्षमा प्राय चैत पहिलो साता परीक्षा हुँदै आएको थियो । गत बर्ष पनि चैत ७ गतेबाट परीक्षा सञ्चालन गरिएको थियो ।

काठमाडौं । अमेरिकाले थप ८० जना नेपाली नागरिकलाई डिपोर्ट गरेको छ ।

मंगलबार अपराह्न साढे ५ बजेतिर त्रिभुवन अन्तर्राष्ट्रिय विमानस्थलमा उनीहरूलाई नेपाल फर्काइएको हो ।

डिपोर्ट गरिएकामध्ये एक जना महिला रहेको मानव बेचबिखन अनुसन्धान ब्युरोका प्रमुख एसएसपी कृष्ण पंगेनीले जानकारी दिए । उनीहरूलाई फर्काइएसँगै प्रहरीले आवश्यक अनुसन्धान थालेको छ ।

प्रारम्भिक अनुसन्धानअनुसार डिपोर्ट गरिएका अधिकांश नेपाली नागरिकले अवैध तथा तल्लो बाटो प्रयोग गरेर अमेरिका प्रवेश गर्ने प्रयास गरेको खुलेको छ । एक जना भने अध्ययन भिसामा अमेरिका गएका थिए भने बाँकीले विभिन्न दलालमार्फत करोडौँ रुपैयाँसम्म खर्च गरेको भेटिएको छ ।

कतिपयले अमेरिका पुग्न एक करोड ४० लाख रुपैयाँसम्म खर्च भएको दाबी गरेका छन् । यस विषयमा मानव बेचबिखन तथा अवैध आप्रवासनसँग जोडिएर थप अनुसन्धान भइरहेको प्रहरीले जनाएको छ ।

रौतहट । पूर्वप्रधानमन्त्री एवं नेपाली कम्युनिस्ट पार्टीका सह–संयोजक माधव कुमार नेपालको उम्मेदवारी खारेज गर्नुपर्ने माग गर्दै रौतहट क्षेत्र नं. १ मा उजुरी दर्ता भएको छ । सोही निर्वाचन क्षेत्रका प्रतिनिधिसभा सदस्यका उम्मेदवार राम नरेश यादवले निर्वाचन अधिकृतको कार्यालय गौरमा नेपालविरुद्ध उजुरी दिएका हुन् ।

उम्मेदवार यादवले दर्ता गराएको उजुरीमा नेपालविरुद्ध भ्रष्टाचार मुद्दा विचाराधीन रहेको दाबी गरिएको छ । पतञ्जलि योगपीठको जग्गा प्रकरणमा भ्रष्टाचार गरेको आरोपमा नेपालविरुद्ध विशेष अदालत काठमाडौंमा मुद्दा चलिरहेको र उनी निलम्बित अवस्थामा रहेको जिकिर उजुरीमा गरिएको छ ।

प्रतिनिधि सभा सदस्य निर्वाचन ऐन, २०७४ र अख्तियार दुरुपयोग अनुसन्धान आयोग ऐन, २०४८ को दफा १७ बमोजिम भ्रष्टाचार मुद्दा दायर भई निलम्बनमा रहेका व्यक्ति निर्वाचनमा उम्मेदवार हुन अयोग्य हुने कानुनी प्रावधान रहेको उम्मेदवार यादवको भनाइ छ ।

‘कानुनी रूपमा अयोग्य व्यक्तिले निर्वाचन लड्न नमिल्ने भएकाले ऐनको व्यवस्था अनुसार नेपालको उम्मेदवारी खारेज हुनुपर्छ ।’ यादवले बताए ।
निर्वाचन अधिकृतको कार्यालयले उजुरी दर्ता भएको पुष्टि गर्दै यसबारे आवश्यक कानुनी प्रक्रिया र छानबिन सुरु गरिएको जनाएको छ । निर्वाचन तालिका अनुसार दाबी विरोधमाथि जाँचबुझ गरी निर्वाचन अधिकृतको कार्यालयले केही दिनभित्रै निर्णय सुनाउनेछ । यस विषयमा नेपालको पक्षबाट हालसम्म कुनै औपचारिक प्रतिक्रिया सार्वजनिक भएको छैन ।

ताजा अपडेट

Login

कृपया ध्यान दिनुहोस्:

  • अब तपाइले कमेन्ट गर्नका लागि अनिवार्य रजिस्ट्रेसन गर्नुपर्ने छ ।
  • आफ्नो इमेल वा गुगल, फेसबुक र ट्वीटरमार्फत् पनि सजिलै लगइन गर्न सकिने छ ।
  • यदि वास्तविक नामबाट कमेन्ट गर्न चाहनुहुन्न भने डिस्प्ले नेममा सुविधाअनुसारको निकनेम र प्रोफाइल फोटो परिवर्तन गर्नुहोस् अनि ढुक्कले कमेन्ट गर्नहोस्, तपाइको वास्तविक पहिचान गोप्य राखिने छ ।
  • रजिस्ट्रेसनसँगै बन्ने प्रोफाइमा तपाइले गरेका कमेन्ट, रिप्लाई, लाइक/डिसलाइकको एकमुष्ठ बिबरण हेर्नुहोस् ।