
नेकपा (एमाले)का अध्यक्ष केपी शर्मा ओलीले फेरि अध्यक्ष पदमा उम्मेदवारी दर्ता गराएका छन्।
काठमाण्डुको भृकुटीमण्डपस्थित महाधिवेशनस्थिलमा पुगेर ओलीले अध्यक्षमा उम्मेदवारी दिएका हुन्।
यस्तै ईश्वर पोखरेलले अध्यक्ष पदमा उम्मेदवारी दिएका छन्। सञ्चारकर्मीसँग कुराकानी गर्दै पोखरेलले पार्टीलाई विधि र पद्धतिअन्तर्गत ठिक ढंगले चलाउन आफू अध्यक्ष पदको उम्मेदवार बनेको बताए।
पार्टीलाई सांगठनिक, वैचारिक र कार्यशैलीका आधारमा पुनःव्यवस्थित गर्नुपर्ने आवश्यकता रहेको उनको भनाइ थियो। ‘पार्टीको सांगठनिक जीवनमा आन्तरिक प्रतिष्पर्धाको कुरा स्वभाविक हो। हिजो भूमिगत अवस्थामा हुँदा पनि प्रतिष्पर्धा हुन्थ्यो,’ पोखरेलले भने, ‘अहिले जनताको बहुदलीय जनवादद्वारा निर्देशित हाम्रो पार्टीमा आन्तरिक प्रतिष्पर्धालाई अस्वभाविक रुपमा लिनुहुदैन।’
निर्वाचन कार्यतालिका अनुसार, मतदान भोलि हुँदैछ । आजै उम्मेदवारको अन्तिम नामावली प्रकाशन हुँदैछ ।
काठमाडौं । नेकपा एमालेको अध्यक्ष पदका लागि ईश्वर पोखरेलले उम्मेदवारी दर्ता गराएका छन्।
भृकुटीमण्डपमा जारी बन्दसत्रमा पोखरेलले उम्मेदवारी दर्ता गराएका हुन्।
केन्द्रीय निर्वाचन आयोगले सार्वजनिक गरेको निर्वाचन कार्यतालिका अनुसार पुस १ गते दिउँसो ११ बजेबाट मतदानको समय निर्धारण गरिएको छ।
एमालेमा अध्यक्षको उम्मेदवारी दर्ता शुल्क १५ हजार तोकिएको छ। पदाधिकारीहरू र केन्द्रीय आयोगका अध्यक्षका लागि १० हजार तोकिएको छ। केन्द्रीय सदस्यहरू र आयोगका पदाधिकारीका लागि ५ हजार शुल्क तोकिएको छ।
नयाँ नेतृत्वका लागि वर्तमान अध्यक्ष केपी शर्मा ओली र वरिष्ठ उपाध्यक्ष ईश्वर पोख्रेल प्रतिस्पर्धामा छन्।
एमालेले आगामी कार्यकालका लागि १९ जना पदाधिकारीको व्यवस्था गरेको छ। पदाधिकारी सबै पदमा निर्वाचन हुने पक्का भएको छ।
नेकपा एमालेको ११औँ राष्ट्रिय महाधिवेशनमा अध्यक्ष पदमा केपी शर्मा ओली र वरिष्ठ उपाध्यक्ष ईश्वर पोखरेलबीच कडा प्रतिस्पर्धा हुने निश्चित भएको छ । दुवै नेताले आफ्नो प्यानल तयार पारेर महाधिवेशनमा प्यानलगत प्रतिस्पर्धाको तयारी गरेका छन् ।
ओली पक्षले पदाधिकारीको टिमलाई अन्तिम रूप दिइसकेको छ भने पोखरेल पक्षले पनि अधिकांश पदमा नाम टुंगो लगाएको छ ।
ओली पक्षको प्रस्तावित प्यानल :
अध्यक्ष : केपी शर्मा ओली
उपाध्यक्ष (५ जना) : विष्णु पौडेल, रामबहादुर थापा ‘बादल’, गुरु बराल, पृथ्वीसुब्बा गुरुङ, प्रदीप ज्ञवाली
महासचिव : शंकर पोखरेल
उपमहासचिव (३ जना) : रघुवीर महासेठ, विष्णु रिमाल, भानुभक्त ढकाल
सचिव (९ जना) : पद्मा अर्याल, छवि विश्वकर्मा, लेखराज भट्ट, खगराज अधिकारी, यमलाल कँडेल, शेरधन राई, महेश बस्नेत, हिक्मत कार्की, राजन भट्टराई
ईश्वर पोखरेल पक्षको प्रस्तावित प्यानल :
अध्यक्ष : ईश्वर पोखरेल
उपाध्यक्ष (४ जना टुंगो, १ खाली) : अरुण नेपाल, गोकर्ण विष्ट, बिन्दा पाण्डे, परशुराम मेघी गुरुङ (एक पद खाली राखिएको)
महासचिव : सुरेन्द्र पाण्डे
उपमहासचिव : योगेशकुमार भट्टराई (अन्य दुईजनाको तयारी जारी)
सचिव (६ जना, ३ खाली) : विनोद ढकाल, ठाकुर गैरे, गोकुल बाँस्कोटा, कृष्णगोपाल श्रेष्ठ, कर्ण थापा, रचना खड्का
महाधिवेशनमा दुवै पक्षले भूगोल, समुदाय र समावेशितालाई ध्यानमा राखेर नाम छनोट गरेको दाबी गरेका छन् । तर पोखरेल पक्षले ओली पक्षको प्यानल हेरेर अन्तिम टुंगो लगाउने रणनीति अपनाएको बुझिएको छ ।
काठमाडौं । सोमबार पनि सुनको भाउले नयाँ रेकर्ड क्रम जारी राखेको छ । अघिल्लो दिनको तुलनामा आज सुनको भाउ प्रतितोला १ हजार ९ सय रुपैयाँ बढेको छ।
नेपाल सुनचाँदी व्यवसायी महासंघले यस दिन सुन प्रतितोला २ लाख ६० हजार ७ सय रुपैयाँ मूल्य तय गरेको छ । यो मूल्य हालसम्मकै उच्च हो ।
यसअघि असोज ३१ गतेको मूल्य रेकर्ड अघिल्लो दिन आइतबार मात्रै तोडिएको थियो । अघिल्लो दिन २ लाख ५८ हजार ८ सय रुपैयाँमा सुनको कारोबार भएको थियो । त्यसअघि असोज ३१ गते सुनको भाउ २ लाख ५८ हजार रुपैयाँ पुगेको थियो ।
चाँदीको भाउ प्रतितोला ४५ रुपैयाँ बढेको छ । अघिल्लो दिन प्रतितोला ३ हजार ८२५ रुपैयाँमा कारोबार भएको चाँदी आज ३ हजार ८७० रुपैयाँ पुगेको छ । चाँदीले यसअघि गत शुक्रबार हालसम्मकै उच्च ३ हजार ९०५ रुपैयाँको रेकर्ड बनाएको छ ।
चितवनको रत्ननगरमा रहेको राष्ट्रिय आधारभूत विद्यालय अमिलियामा अध्ययनरत १०० जना बालबालिकालाई ट्र्याक सुट वितरण गरिएको छ। मातृभूमि सेवा फाउन्डेसनले आइतबारका दिन ती विद्यार्थीहरूलाई जाडोबाट बचाउने उद्देश्यका साथ न्यानो ट्र्याक सुट प्रदान गरेको हो।

आर्थिक अभावका कारण जाडोको समयमा पनि पर्याप्त न्यानो कपडा लगाउन नपाएका बालबालिका ट्र्याक सुट पाएपछि अत्यन्तै खुसी र उत्साहित देखिएका थिए।

ट्र्याक सुट वितरण कार्यक्रममा विशिष्ट व्यक्तित्वहरूको उपस्थिति रहेको थियो। कार्यक्रममा मातृभूमि सेवा फाउन्डेसनका संरक्षक धर्मगुरु ज्योतिष पुष्कर खतिवडा, फाउन्डेसनका संस्थापक धमेन्द्र सापकोटा, सोही विद्यालय व्यवस्थापन समितिका अध्यक्ष, र रत्ननगर नगरपालिका वडा नम्बर १३ का वडा अध्यक्ष लगायत स्थानीय अगुवाहरूको समेत सहभागिता रहेको थियो।

मातृभूमि सेवा फाउन्डेसनले सामाजिक सेवाका कार्यहरूमा सक्रिय भूमिका निर्वाह गर्दै आएको छ। यो फाउन्डेसनले विगत लामो समयदेखि देशका विभिन्न भागमा आर्थिक अभावका कारण विद्यालय जानका लागि झोला (ब्याग) बोक्न नसकेका विद्यार्थीहरूलाई ब्याग वितरण गर्दै आएको छ। यस पटक ट्र्याक सुट वितरण गरेर जाडोको याममा विद्यार्थीहरूलाई न्यानो राख्न मद्दत गर्ने अर्को महत्वपूर्ण सामाजिक कार्य गरेको छ।

फाउन्डेसनको यो कार्यले विपन्न बालबालिकाहरूलाई शैक्षिक वातावरणमा सहजता प्रदान गर्न र उनीहरूको मनोबल बढाउन महत्वपूर्ण सहयोग पुगेको छ।

काठमाडौं । निर्वाचन आयोगले आगामी फागुन २१ गतेका लागि तय गरेको प्रतिनिधिसभा सदस्य निर्वाचनका लागि तय गरेको र हाल राय सुझावका लागि सार्वजनिक गरेको निर्वाचन आचारसंहिता-२०८२ मा केही नयाँ व्यवस्था थप गरेको छ । खर्च वा आम्दानी सबै बैंक तथा वित्तीय संस्थामार्फत गर्नुपर्ने, सबै बिल तथा भरपाई राख्नुपर्नेलगायतका नयाँ व्यवस्था थप गरेको हो ।
निर्वाचनमा हुने खर्चको स्रोतको पारदर्शिता कायम गर्न यस्तो व्यवस्था गर्न लागिएको आयोगले जनाएको छ । आयोगले निर्वाचन खर्चसम्बन्धी आचरण शीर्षकमा राजनीतिक दल तथा उम्मेद्वारले मनोनयनपत्र दर्ता निर्वाचनमा आफूले खर्च गर्ने अनुमानित रकम र सो को स्रोत समेत खुलाउनुपर्ने उल्लेख गरेको छ ।
उम्मेद्वारले खर्च गर्दा बैंक तथा वित्तीय संस्थामा छुट्टै खाता खोली सोही खाताबाट गर्नुपर्नेछ । यस्तै निर्वाचन खर्चसम्बन्धी खर्च गर्दा निजको तर्फबाट खर्च गर्ने ज्म्मिेवार पदाधिकारी तोक्नुपर्नेछ । तोकिएका पदाधिकारीको नाम नामेसीसहितको विवरण निर्वाचन अधिकृतको कार्यालय तथा निर्वाचन कार्यालयमा जानकारी गराउनुपर्ने व्यवस्था गरिएको छ ।
प्रस्तावित आचारसंहितामा राजनीतिक दलले निर्वाचनसम्बन्धी खर्च गर्दा बैंक वा वित्तीय संस्थामा छुट्टै खाता खोली दलले तोकेको जिम्मेवार पदाधिकारीबाट सो खाताबाट मात्रै खर्च गर्नुपर्नेछ । यसैगरी रु २५ हजारभन्दा बढी आर्थिक सहयोग प्राप्त गर्दा बैंक वा वित्तीय संस्था मार्फत नै गर्नुपर्ने जनाइएको छ ।
व्यक्ति वा संस्थाबाट स्वेच्छिक सहयोगका रुपमा नगद लिएमा सो रकम बुझेको रसिद वा भरपाई दिई बैंक वा वित्तीय संस्थामा जम्मा गराउनुपर्नेछ । खर्चको विवरणसमेत तथा बिल भरपाई राख्नुपर्नेछ । आम्दानी तथा खर्चको विवरण प्रचलित कानुन बमोजिम आयोगले तोकेका ढाँचामा जिल्ला निर्वाचन कार्यालय वा आयोगमा बुझाउनुपर्नेछ ।
आयोगले खर्चको बिल भरपाई तथा बैंक तथा वित्तीय संस्थामा रहेको खाताको विवरण पेस गर्न आदेश दिएमा सक्कल बिल भरपाई तथा बैंक वा वित्तीय संस्थाको खाताको विवरण पेश गर्नुपर्ने सो थप गरिएको व्यवस्थामा उल्लेख गरेको छ । निर्वाचन खर्चको विवरण निर्वाचन सम्पन्न भएपछि सार्वजनिक गरी प्रचलित निर्वाचनसम्बन्धी कानुनले तोकेको अवधिभित्र आयोग वा निर्वाचन कार्यालयमा पेस गर्नुपर्ने जनाइएको छ ।
काठमाडौं । नेपाल कम्युनिष्ट पार्टी (एमाले) को जारी ११औँ राष्ट्रिय महाधिवेशन अब नेतृत्व चयनको निर्णायक चरणमा प्रवेश गरेको छ । भक्तपुरको सल्लाघारीमा शनिबार भव्य उद्घाटनसँगै सुरु भएको महाधिवेशनको बन्दसत्र आइतबारदेखि काठमाडौँको भृकुटीमण्डपमा जारी छ ।
निर्वाचन प्रक्रियाअन्तर्गत आज (सोमबार) उम्मेदवारी दर्ता लगायतका मुख्य कार्यक्रमहरू हुँदैछन् । केन्द्रीय निर्वाचन आयोगका अध्यक्ष डा. विजय सुब्बाले सार्वजनिक गर्नुभएको कार्यतालिका अनुसार, नेतृत्वका लागि आकांक्षी उम्मेदवारहरूले आज बिहान १०:३० देखि दिउँसो १:३० बजेसम्म आफ्नो दरखास्त फाराम दर्ता गराउन सक्नेछन् ।
यस्तो छ आजको चुनावी कार्यतालिका
निर्वाचन आयोगले आजको दिनलाई उम्मेदवारी मनोनयन र अन्तिम नामावली प्रकाशनका लागि छुट्याएको छ । बिहान १०:१५ बजे अन्तिम मतदाता नामावली प्रकाशन भएसँगै चुनावी प्रक्रियाले गति लिनेछ । दिउँसो साढे १ बजेसम्म उम्मेदवारी दर्ताको समय तोकिएको छ भने २:३० बजे उम्मेदवारहरूको प्रारम्भिक नामावली सार्वजनिक गरिनेछ ।
आयोगका अनुसार, उम्मेदवारको विरोधमा उजुरी दिन चाहनेका लागि दिउँसो २:३० देखि ३:०० बजेसम्मको समय निर्धारण गरिएको छ । दाबी विरोध र फिर्ताको प्रक्रिया सकिएपछि आजै साँझ ६:०० बजे उम्मेदवारहरूको अन्तिम नामावली प्रकाशन गरिनेछ ।
भोलि मतदान
महाधिवेशनको मुख्य आकर्षण मानिएको नेतृत्व चयनको मतदान प्रक्रिया भने भोलि (मंगलबार) हुनेछ । निर्वाचन तालिकाअनुसार मंगलबार बिहान ११ बजेदेखि साँझ ५ बजेसम्म मतदानको समय तोकिएको छ । देशभरबाट आएका महाधिवेशन प्रतिनिधिहरूले भोलि बन्ने नयाँ नेतृत्वका लागि भृकुटीमण्डपमा आफ्नो मताधिकार प्रयोग गर्नेछन् ।
काठमाडौँ । दुर्गा प्रसाईँसँग वार्ता गर्न सरकारले समिति बनाएको छ । आइतबार प्रधानमन्त्री सुशीला कार्कीको सचिवालयले महाअभियानसँग वार्ता गर्न आन्तरिक सहजीकरण तथा समस्या समाधान समिति गठन गरिएको जानकारी दिएको हो ।
महाअभियानले उठाएका तत्कालै सम्बोधन गर्न सकिने विषय तथा मागहरूका सम्बन्धमा वार्ता गर्नका लागि सञ्चार तथा सूचना प्रविधि मन्त्री जगदीश खरेलको संयोजकत्वमा प्रधानमन्त्रीका प्रमुख सल्लाहकार अजयभद्र खनाल र जनसम्पर्क सल्लाहकार गोविन्द नारायण तिमिल्सिना रहने गरी आन्तरिक सहजीकरण तथा समस्या समाधान समिति गठन गरिएको प्रधानमन्त्रीका प्रमुख स्वकीय सचिव आदर्श कुमार श्रेष्ठले जानकारी दिएका छन् ।

नेकपा एमालेको ११औँ महाधिवेशन जारी छ । यसैबिच नयाँ नेतृत्व चयनका लागि आइतबार निर्वाचन तालिका प्रकाशन गरिएको छ ।
केन्द्रीय निर्वाचन आयोगले आज बेलुकी ७ बजेदेखि पुस १ गतेसम्मको कार्यक्रम सार्वजनिक गरेको हो ।
पार्टी अध्यक्ष केपी शर्मा ओली र वरिष्ठ उपाध्यक्ष ईश्वर पोखरेलले अध्यक्षमा भिड्ने भएका छन् ।

काठमाडौं । नेकपा (एमाले) को केन्द्रीय कमिटी बैठकले विधान महाधिवेशनको निर्णयलाई संशोधन गर्दै पदाधिकारी र कमिटीको संख्या पुरानै अवस्थामा फर्काएको छ । यससँगै पार्टीको केन्द्रीय कमिटी फेरि ३०१ सदस्यीय बन्नेको छ ।
गत भदौमा सम्पन्न दोस्रो विधान महाधिवेशनले पदाधिकारी संख्या १५ मा सीमित गर्ने र स्थायी कमिटी नै नराख्ने निर्णय गरेको थियो । केन्द्रीय कमिटीको आकार पनि २५१ सदस्यीय बनाइएको थियो ।
तर आइतबार बसेको केन्द्रीय कमिटी बैठकमा अध्यक्ष केपी शर्मा ओलीले पदाधिकारी संख्या बढाउनुपर्ने दबाब रहेको भन्दै संशोधन प्रस्ताव पेश गरेका थिए । सो प्रस्ताव बहुमतले पारित भएको हो ।
संशोधित व्यवस्थाअनुसार अब पार्टीमा अध्यक्ष १, वरिष्ठ उपाध्यक्ष १, उपाध्यक्ष ६, महासचिव १, उपमहासचिव ३ र सचिव ७ जना गरी कुल १९ जना पदाधिकारी हुनेछन् ।
यसैगरी ४५ सदस्यीय स्थायी कमिटी र ९९ सदस्यीय पोलिटव्युरो कायम गरिएको छ । यसरी पदाधिकारीसहित केन्द्रीय कमिटीको कुल संख्या ३०१ पुगेको छ ।
विधान महाधिवेशनले मिहिनेतपूर्वक टुंग्याएको संगठनात्मक संरचनालाई तीन महिनामै उल्ट्याइएपछि पार्टीभित्रै विरोध भएको छ । वरिष्ठ उपाध्यक्ष ईश्वर पोखरेलले संख्या बढाउँदैमा पार्टीको क्षमता नबढ्ने भन्दै असन्तुष्टि व्यक्त गरेका छन् ।
‘बदलिएको परिस्थितिले अंक बढाउन भनेको होइन,’ पोखरेलले भने, ‘बदलिएको परिस्थितिले त हामी सबैलाई बदलिनु भनेर जबरजस्त सन्देश दिएको छ । संख्या बढाएर क्षमता बढ्छ भने अघिल्लो पटकको हाम्रो क्षमता जाँचिएन र ?’
उनले दुई कार्यकालको सीमालगायत अन्य विषयमा पनि छलफल हुनुपर्ने बताए । ‘दुई कार्यकालबारे पनि कुरा उठेको छ, यसबारे छलफल नहुने ?’ पोखरेलको प्रश्न छ ।





