
काठमाडौँ । भौतिक पूर्वाधार तथा यातायात, सहरी विकास र ऊर्जा जलस्रोत तथा सिँचाई मन्त्री कुलमान घिसिङले कर्मचारीका कारण पनि ठेक्का रुग्ण भएको बताएका छन्।
नेपाल पूर्वाधार पत्रकार समाजले मंगलबार काठमाडौँमा आयोजना गरेको ‘रुग्ण ठेक्का व्यवस्थापन सम्बन्धी’सरोकारवाला निकायसँग संवाद कार्यक्रममा उनले यस्तो बताएका हुन्। उनले त्यस्ता ठेक्कामा भने कुनै कारवाही नगरेको बताउँदै मन्त्री घिसिङले छानबिन गरिने उनको भनाइ छ।
‘आयोजनाको तर्फबाट पनि रुग्ण भएका ठेक्का धेरै छन् । त्यस्तालाई पनि कारवाही गर्नुपर्छ, ’उनले भने, ’अहिले जति पनि ठेक्का तोडिएको छ र तोडिँदै छन् । त्यस्ता ठेक्का निर्माण व्यवसायीकै कारण रुग्ण भएका हुन् । कर्मचारीको कारण रुग्ण भएको ठेक्कामा कुनै कारवाही अघि बढाइएको छैन । त्यसमा छानबिन गरेर सम्बन्धित कर्मचारीलाई कारवाही गर्नुपर्छ ।’
निर्माण व्यवसायीको कारण २५० हाराहारी ठेक्का रुग्ण भएको उनले बताए । यस्तै,उनले निर्माण व्यवसायी बिना देश विकास सम्भव नभएको बताए । यद्यपि,नेपालका निर्माण व्यवसायीको क्षमता अभिवृद्धि गर्न आवश्यक रहेको उनले बताए ।
‘निर्माण व्यवसायी बिना ठुला काम सम्भव छैन । निर्माण व्यवसायी बिना देशको विकास सम्भव छैन । राष्ट्रिय होस् या अन्तर्राष्ट्रिय होस्,’उनले भने, ‘निर्माण व्यवसायीको क्षमता अभिवृद्धि गर्न आवश्यक छ । अन्तर्राष्ट्रिय स्तरको काम गर्ने सक्ने क्षमता नेपाली निर्माण व्यवसायीमा हुनुपर्छ ।’
उनले नेपालमा लगानी सम्मेलन भन्दा निर्माण व्यवसायी सम्मेलन गर्नुपर्नेमा जोड दिए। त्यसबाट निर्माण व्यवसायीको क्षमता अभिवृद्धि हुने उनको भनाइ छ।
मन्त्री घिसिङले समयमा निर्णय नगर्दा पनि ठेक्का रुग्ण भएको बताए । ‘निर्णय नै नगर्दा पनि ठेक्का रुग्ण भएका छन् । सही समयमा सही निर्णय गर्न सक्नुपर्छ । तर,परियोजना प्रमुखहरूले समयमा निर्णय नगर्दा पनि ठेक्का रुग्ण भएका छन्,’उनले भने,‘सही समयमा निर्णय गर्न सक्नुपर्छ ।’
यसैगरी नेपाल सरकारका पूर्वसचिव तथा पूर्वाधारविज्ञ अर्जुनजंग थापाले रुग्ण ठेक्का सहज अवस्थामा आएको बताए । संवाद कार्यक्रममा कार्यपत्र प्रस्तुत गर्दै रुग्ण ठेक्का सहज अवस्थामा आए पनि जिरोमा पुर्याउन आवश्यक रहेको उनले बताए ।
‘२०७५ मंसिरसम्म ११८ अर्बका १८४८ वटा ठेक्का रुग्ण थिए । १०३२ ठेक्काको म्याद नै ग्रुजीएको अवस्था थियो । २३ अर्ब ६० अर्ब पेश्की उठ्न बाँकी थियो । ५ अर्ब ९० करोड कार्य सम्पादन जमानत जोखिममा थियो, उनले भने, ‘त्यसबेला अख्तियार दुरुपयोग अनुसन्धान आयोगले यसमा अध्ययन गरेर ३०–३५ वटा सुझाव दिए । जनशक्ति थप गर्ने,कर्मचारीको क्षमता वृद्धि गर्ने, ठेक्कालाई सहजीकरण गर्ने, अनुगमन गर्ने लगायतका सुझाव दियो । सम्बन्धित निकायहरूले त्यो सबैले पालना गरे । त्यसकारण १८ सय भन्दा बढी रुग्ण ठेक्का अहिले ४०० सयमा सीमित भएको हो । यो आफैमा धेरै भए पनि सहज अवस्थामा आएका हौँ । भयावह स्थितिबाट धेरै नै सहज अवस्थामा आएका हौँ । तर, यसलाई जिरोमा पुराउनुपर्छ ।’
काठमाडौँ- नेपाली काँग्रेसका सभापति शेरबहादुर देउवाले डडेल्धुराबाट आसन्न निर्वाचनमा उम्मेदवार हुने बताएका छन् । सभापति देउवाले अन्तिम पटक चुनावी प्रतिस्पर्धा गर्ने नेताहरूलाई बताएका हुन् ।
डडेलधुराका काँग्रेस सभापति भीमबहादुर साउदले सभापति देउवाले उम्मेदवार हुने इच्छा राखेपछि सर्वसम्मत सिफारिस गरिने बताए ।
अघिल्लो साता सभापति देउवालाई भेट्न महाराजगन्जस्थित निवास पुगेका सुदूरपश्चिमका एक केन्द्रीय सदस्यले पनि देउवाले चुनाव लड्न चाहेको बताएको जानकारी गराए ।
मंगलबार बिहान सभापति देउवालाई भेट्न पुगेका नेविसंघका नेता भुवन भट्टले पनि सभापति देउवाले अन्तिम पटक चुनावमा उठ्ने जानकारी गराएको बताएका छन् ।
काँग्रेस यही महिनाको अन्तिमसम्म केन्द्रमा नाम सिफारिस गर्न परिपत्र गरेको छ । निर्वाचन क्षेत्रीय समितिले प्रदेश समितिलाई मंसिर २५ भित्र नाम पठाउन भनिएको छ । काँग्रेस विधान अनुसार एक महिला सहित तीन जनाको नाम उपल्लो तहमा सिफारिस गर्नुपर्ने व्यवस्था छ ।
देउवाले २०४८ सालदेखि निरन्तर डडेलधुरामा चुनाव जित्दै आएका छन् ।
काठमाडौँ । राजधानीमा जारी दोस्रो संस्करणको नेपाल प्रिमियर लिग (एनपिएल) मा पहिलो क्वालिफायर खेल हुनेछ ।
त्रिवि अन्तरराष्ट्रिय क्रिकेट रङ्गशाला कीर्तिपुरमा आज अपराह्न ४ बजे हुने उक्त खेलमा सुदूरपश्चिम रोयल्स र विराटनगर किङस प्रतिस्पर्धा गर्नेछन् । सुदूरपश्चिम अंक तालिकाको शीर्ष र विराटनगर दोस्रो स्थानमा पुगेर पहिलो क्वालिफायर खेल्ने पक्का गरेका हुन् ।
सुदूरपश्चिम लिग चरणका सात खेलमध्ये छ र विराटनगरले भने सातमध्ये पाँच खेल जितेको थियो । सुदूरपश्चिमले विराटनगरसँग मात्रै लिग चरणमा पराजय भोग्नुपरेको थियो । विराटनगर भने चितवन र लुम्बिनीसँग पराजित भएको हो ।
आज जित्ने टोली सिधैँ फाइनल पुग्नेछ । पराजित टोली इलिमिनेटर खेल्ने मौका पाउनेछ ।
काठमाडौँ। हुलाकी राजमार्गअन्तर्गत मोरङको रतुवा–केशलिया ६ किलोमिटर सडकखण्ड निर्माणको ठेक्का तोडिएको छ ।
सडक विभाग मातहतको हुलाकी राजमार्ग निर्देशनालयअन्तर्गत योजना कार्यालय इटहरीले आज एक सूचना जारी गर्दै सडक निर्माणको जिम्मा पाएको श्रेष्ठ कन्स्ट्रक्सन कम्पनी प्रा.लि. हेटौडासँगको ठेक्का सम्झौता अन्त्य गरिएको जानकारी दिएको छ ।
सडक स्तरोन्नति तीन वर्षभित्र सम्पन्न गर्ने गरी उक्त कम्पनीसँग २३ कात्तिक २०७६मा ८३ करोड ९९ लाख रुपैयाँमा (करसहित)ठेक्का सम्झौता भएको थियो । सडक निर्माण २३ कात्तिक २०७९ भित्र सम्पन्न गर्ने गरी ठेक्का सम्झौता भएकोमा निर्माण प्रगति करिब २५ प्रतिशत मात्र छ ।
उक्त सडक कुनै ठाउँमा ४ र कुनै ठाउँमा ६ लेनमा स्तरोन्नति गर्ने गरी ठेक्का सम्झौता भएको थियो । ठेक्का सम्झौताको म्याद दुई पटक थप गरिएको थियो । पछिल्लो पटक थप गरिएको ठेक्का सम्झौता गत जेठमा सकिएको थियो ।
ठेक्का सम्झौता रद्ध गरिएको निर्माण व्यवसायीको कार्य सम्पादन जमानत बापतको ४ करोड १९ लाख र पेश्की बापतको ९ करोड ६७ लाख रुपैयाँ जफतका लागि बैंकमा पत्रचार गरिसकिएको योजना प्रमुख पोखरेलले उल्लेख गरे । पेश्की रकममा १० प्रतिशत व्याजसहित असुल हुनेछ ।
योजना कार्यालय इटहरीबाट गत साउनमा ठेक्का किन नतोड्ने रु भन्दै निर्माण व्यवसायीलाई १५ दिने स्पष्टीकरण सोधिएको थियो । निर्माण व्यवसायीबाट पेश भएको स्पष्टीकरण चित्तबुझ्दो नभएकाले सार्वजनिक खरिद कानूनमा भएको व्यवस्था बमोजिम ठेक्का रद्ध गरिएको हो ।
निर्धारित अवधिमा कार्य सम्पन्न हुन नसकेको कारण र कार्य सम्पन्न गर्न सक्ने अद्यावधिक कार्यतालिका, स्रोत परिचालनको भरपर्दो योजना र कार्य सम्पन्न गर्ने प्रतिबद्धतासहित निर्माण व्यवसायीको आधिकारी प्रतिनिधि उपस्थित नभएको, पेश भएको स्पष्टीकरण चित्त बुझ्नो नभएको र कार्य सुचारु गर्नेतर्फसमेत तदारुकता नदेखाएको हुँदा सार्वजनिक खरिद ऐन तथा ठेक्का सम्झौता उल्लंघन गरिएको जनाइएको छ ।
ऐनको प्रावधान बमोजिम कार्य सम्पादन जमानत बापतको रकम जफत गरिने, बाँकी काम पूरा गर्न आवश्यक पर्ने रकम सरकारी बाँकी सरह असुल उपर गरिने र कालोसूचीमा राख्न सिफारिस गरिएको छ ।
हालसम्मको अद्यावधिक भएको काम र बाँकी कामको नापजाँच मूल्याकन गरी वित्तीय फरफारख गर्न १५ दिनभित्र कार्यालयमा उपस्थित हुन अनुरोध गरिएको छ । निर्माण व्यवसायी कार्यालयमा उपस्थित नभएमा कार्यालयबाट नापचाँच गरिनेछ ।

मेष (चु, चे, चो, ला, लि, लु, ले, लो, अ)
पारिवारिक सद्भावमा कमी आउनेछ । कृषि वा पशुपालनबाट राम्रो लाभार्जन गर्न सकिनेछ । कुनै कुरालाई लिएर मनमा मानसिक चिन्ता रहनेछ । आजको शुभ रंग निलो हो भने शुभ अंक ७ रहेको छ ।
वृष (इ, उ, ए, ओ, वा, वि, वु, वे, वो)
आफन्त वा मित्रवर्गहरूबाट सहयोग मिल्नेछ । स्वास्थ्य सबल रहनेछ । सानो दूरीको सुखद यात्राको योग छ । पराक्रमबाट शत्रुमाथि विजय प्राप्त गर्न सकिनेछ । आजको शुभ रंग केशरी हो भने शुभ अंक १ रहेको छ ।
मिथुन (का, कि, कु, घ, ङ, छ, के, को, हा)
मिठो बोलीको सकारात्मक प्रभाव पर्नेछ । आफन्तहरू मध्य उत्तम भोजनको आनन्द मिल्ला । व्यापार व्यवसायमा सहयोगीहरूबाट सहयोग मिल्नेछ । आजको शुभ रंग पहेलो हो भने शुभ अक ३ रहेको छ ।
कर्कट (हि, हु, हे, हो, डा, डि, डु, डे, डो)
सामाजिक कार्यको लागि दिन अनुकूल रहनेछ । नयाँ पहिरनले व्यक्तित्वमा निखार आउनेछ । दाम्पत्य जीवन सुमधुर रहनेछ । मन प्रसन्न रहनेछ । महत्वकांक्षी योजनाहरू पूरा हुनेछन् । आजको शुभ रंग हरियो हो भने शुभ अंक २ रहेको छ ।
सिंह (मा, मि, मु, मे, मो, टा, टि, टु, टे)
अनावश्यक यात्रामा धन खर्चका योग छन् । व्यर्थको काममा समय व्यतीत हुनेछ । कार्यक्षेत्रमा नयाँ अवसर पााउन सङ्घर्ष गर्नुपर्ला । स्वास्थ्यलाई लिएर सचेत रहनुहोस् । आजको शुभ रंग सेतो हो भने शुभ अंक ५ रहेको छ ।
कन्या (टो, पा, पि, पु, ष, ण, ठ, पे, पो)
व्यापार व्यवसायमा मनग्य लाभ आर्जन गर्न सकिनेछ । सन्तानको प्रसिद्धिले मन उत्साहित रहनेछ । नोकरी वा पेशामा अधिकारी वर्गहरु सहयोगी सिद्ध हुनेछन् । आजको शुभ रंग कलेजी हो भने शुभ अंक ६ रहेको छ ।
तुला (रा, रि, रु, रे, रो, ता, ति, तु, ते)
मानसम्मानमा वृद्धि हुनेछ । नयाँ कार्यप्रति मन जानेछ । प्रशासनिक वा राज्य पक्षबाट सहयोग मिल्नेछ । सोचेका कामहरू बन्नेछन् । आजको शुभ रंग सेतो हो भने शुभ अक ७ रहेको छ ।
वृश्चिक (तो, ना, नि, नु, ने, नो, या, यि, यु)
धार्मिक स्थलहरूमा भ्रमणका साथै केही परोपकार गर्न सक्नुहुनेछ । भाग्य सबल रहनेछ । व्यापार व्यवसायलाई लिएर गरिएको यात्रा सफल रहनेछ । नयाँ कार्यमा रूचि उत्पन्न हुनेछ । आजको शुभ रंग रातो हो भने शुभ अक ४ रहेको छ ।
धनु (ये, यो, भा, भि, भु, धा, फा, ढा, भे)
मन अशान्त रहनेछ । स्वास्थ्यमा कमजोरीको अनुभूति हुनेछ । खोजी स्वभावले ठूलो समस्याबाट बचिएला । व्यापार व्यवसायमा पारदर्शिता राख्नुहोस् । आजको शुभ रंग हरियो हो भने शुभ अंक ३ रहेको छ ।
मकर (भो,जा,जि,जु,जे,जो,ख,खि,खु,खे,खो,गा,गि)
जीवनसाथीको स्वास्थ्यमा सुधार आउनेछ । संवेदनशील मामलाहरूमा सफलता मिल्नेछ । कानुनी पक्ष सबल रहनेछ । कार्यक्षेत्रमा नयाँ सम्झौता गर्नुपर्ला । आजको शुभ रातो हो भने शुभ अंक ४ रहेको छ ।
कुम्भ (गु, गे, गो, सा, सि, सु, से, सो, दा)
समस्या दर्शाउँदा सहयोगीहरूले साथ दिनेछन् । अरुको लागि श्रम वा बुद्धि खर्च गर्नुपर्ला । लगनशीलताले कार्यमा सफलता पाइनेछ । सवारी साधन चलाउँदा सावधान रहनुहोला। आजको शुभ रंग सुन्तला हो भने शुभ अंक २ रहेको छ ।
मीन (दि, दु, थ, झ, ञ, दे, दो, चा, चि)
प्रेममा सफलता मिल्नेछ । मनमा परोपकारको भावना जागृत हुनेछ । सृजनात्मक वा कलात्मक क्षेत्रतिर मन जानेछ । विद्यार्थीहरूको बौद्धिक क्षमतामा विकास हुनेछ । आजको शुभ रंग निलो हो भने शुभ अंक ९ रहेको छ ।
काठमाडौं- सरकारले १० जिल्लाका ९४ हजार ५ सय २७ गरिब परिवारको अन्तिम सूची स्वीकृत गरेको छ ।
सोमबार बसेको मन्त्रिपरिषद् बैठकले यस्तो निर्णय गरेको हो ।
सरकारका प्रवक्ता एवं सञ्चारमन्त्री जगदीश खरेलका अनुसार इलाम, कास्की, चितवन, झापा, तेह्रथुम, नवपरासी बर्दघाट सुस्तापूर्व, नवलपरासी बर्दघाट सुस्ता पश्चिम, पर्वत, मोरङ र सुनसरीका गरिब परिवारको सूची स्वीकृत गरेको हो ।
काठमाडौं- सर्वोच्च अदालतले ऊर्जामन्त्री कुलमान घिसिङद्वारा बर्खास्त गरिएका हितेन्द्रदेव शाक्यलाई नेपाल विद्युत प्राधिकरणको कार्यकारी निर्देशकमा फर्काउन सोमबार परमादेश दिएको छ।
सर्वोच्च अदालतका न्यायाधीशद्वय नहकुल सुवेदी र श्रीकान्त पौडेलको संयुक्त इजलासले हाल जल तथा ऊर्जा आयोगमा रहेका हितेन्द्रको पक्षमा परमादेश दिएको हो ।
भदौ २३ र २४ गते भएको जेन-जी आन्दोलनको बलमा ऊर्जासहित तीवनटा मन्त्रालय सम्हालेका घिसिङले पुरानै प्रतिस्पर्धी शाक्यलाई प्राधिकरणबाट हटाएका थिए ।
त्यसपछि ढिलोगरी शाक्य सर्वोच्च अदालतमा गएका थिए । शाक्यको रिटमाथि सुनुवाइ गर्दै सोमबार सर्वोच्चले प्राधिकरणमा पुनर्वहाली गरिदिएपछि ऊर्जामन्त्री कुलमान घिसिङलाई ठूलो झट्का लागेको छ।
सर्वोच्चले हितेन्द्रलाई हटाउने निर्णय उनीसँग भएको कार्यसम्पादन सम्झौता तथा अदालतबाट भएका यसअघिका व्याख्याको प्रतिकूल रहेको ठहर पनि गरेको छ।
‘शाक्यलाई नेपाल विद्युत प्राधिकरणको कार्यकारी निर्देशक पदबाट जल तथा ऊर्जा आयोगको विशेषज्ञ सदस्य पदमा नियुक्त गर्ने तथा उक्त पदबाट रिक्त हुन आउने प्राधिकरणको कार्यकारी निर्देशक पदमा विपक्षीमध्येका मनोज सिलवाललाई नियुक्त गर्ने नेपाल सरकार मन्त्रिपरिषद्को २०८२ असोज ५ को निर्णय पूर्वपठित कानुनी व्यवस्था, निजसँग गरिएको कार्यसम्पादन सम्झौता तथा यस अदालतबाट विभिन्न मुद्दामा पटक पटक व्याख्या भई प्रतिपादित न्यायिक सिद्धान्तसमेतको प्रतिकूल देखिँदा सो निर्णयका आधारमा गरिएको कामकारबाही र पत्राचारसमेत उत्प्रेषणको आदेशले बदर भई यी रिट निवेदकलाई नेपाल विद्युत प्राधिकरणको कार्यकारी निर्देशकको पदमा पूर्ववत काम कारबाही गनू दिनु, दिलाउनु भनि विपक्षीको नाममा परमादेशसमेत जारी हुने ठहर्छ’, सर्वोच्चले सोमबार भनेको छ।
घिसिङले जेन-जी आन्दोलनको म्यान्डेटसमेत ख्याल नगरी शाक्यलाई मात्रै पदबाट हटाएका थिए । त्यसपछि उनले गत असोज ५ मा आफूनिकट मनोज सिलवाललाई प्राधिकरणको कार्यकारी निर्देशक बनाएका थिए ।
काठमाडौं– सरकारले उखुको न्यूनतम खरिद मूल्य निर्धारण गरेको छ। सोमबार साँझ बसेको मन्त्रिपरिषद् बैठकले आर्थिक वर्ष २०८२/८३ का लागि उखुको न्यूनतम खरिद मूल्य प्रतिक्विन्टल ६२० रुपैयाँ निर्धारण गर्ने निर्णय गरेको हो।
त्यस्तै, अनुदान रकम प्रतिक्विन्टल ७० रुपैयाँ कायम गर्ने निर्णय भएको सरकारका प्रवक्ता सञ्चार तथा सूचना प्रविधिमन्त्री जगदीश खरेलले जानकारी दिए।
बैठकले जेनजी आन्दोलनका क्रममा घाइते तथा अपांग भएका व्यक्तिलाई राहत सहायता उपलब्ध गराउनेसम्बन्धी कार्यविधि २०८२ स्वीकृत गरेको छ। त्यस्तै, जेनजी आन्दोलनका घाइतेलाई शिक्षा, स्वास्थ्य र रोजगारीको सम्बन्धमा आवश्यक व्यवस्था मिलाउने निर्णय गरेको छ।
बैठकले सहसचिव राजेन्द्रकुमार पौडेललाई सचिवमा बढुवा गर्ने निर्णय गरेको छ भने आर्थिक कार्यविधि तथा वित्तीय उतरदायित्व दोस्रो संशोधन नियमावली स्वीकृत गरिएको प्रवक्ता खरेलले जानकारी दिए।
मन्त्रिपरिषद्ले विभिन्न १० जिल्लाका ९४ हजार ५२७ गरिब परिवारको सूची स्वीकृत गर्ने निर्णय गरेको छ।
काठमाडौं । राजावादी अभियन्ता तथा व्यवसायी दुर्गा प्रसाईँले प्रधानमन्त्री सुशीला कार्कीसँग भेटवार्ता गरेका छन् । भेटवार्तापछि पत्रकारसँग कुरा गर्दै उनले आफूले जनमत संग्रहको माग राखेको र २ पुससम्मको अल्टिमेटम दिएको बताए ।
उनले भने, ‘मैले राजसंस्था पुन:स्थापना लगायतका विषयमा जनमत संग्रहमा जाउँ भने । प्रधानमन्त्रीले पुस २ गतेसम्म डिसिजन दिन्छु भन्नुभएको छ ।’
माग पूरा भएन भने चुनाव हुनै नसक्ने प्रसाईँले ठोकुवा गरे ।
उनले भने, ‘माग पूरा भएन भने जनविद्रोह हुन्छ, चुनाव हुँदैन भनेर भनिदिएको छु ।’
प्रसाईले राजसंस्था पुनस्थापनालगायतका विभिन्न २७ बुँदे माग सरकारसामु राखेको छ । आफुहरुको माग पुरा नभए चुनाव हुनै नदिएर। जनविद्रोह गर्ने ठाडो चेतावनी प्रसाईले दिएका छन् ।
काठमाडौँ । निर्वाचन आयोगले मतदाता नामावलीमा भएको त्रुटि सच्याउनका लागि मंसिर २६ गतेसम्म समय तोकेको छ।
मतदाता नामावलीलाई त्रुटिरहित तुल्याउन सच्याउने समय दिइएको आयोगका प्रवक्ता नारायणप्रसाद भट्टराईले जनाएका छन्।
आयोगले भनेको छ, ‘मतदाता नामावली अद्यावधिक (दाबी विरोध) कार्यक्रम अन्तर्गत मतदाता नामावलीलाई त्रुटिरहित र थप शुद्ध तुल्याउन आम मतदाता तथा सबै सरोकारवालाको सहभागिता अपरिहार्य रहेकोले मिति २०८२/८/२६ सम्म त्रुटि सच्याउन अनलाइन प्रणालीबाट निवेदन, सूचना एवं उजुरी दिने कार्यमा सबै सरोकारवालाहरूको सक्रिय सहभागिताको लागि आयोग हार्दिक अपिल
गर्दछ।’
यो अवधिमा त्रुटि सच्याउनेसँगै कसैले झुटो विवरण दिई नामावलीमा नाम समावेश गरेको भए उजुरी दिन, एकभन्दा बढी ठाउँमा नाम समावेश भए एउटै ठाउँमा कायम गर्न, मृत्यु वा नागरिकता त्यागेको भए जानकारी गराउन पनि आग्रह गरेको छ। यो प्रक्रिया पूरा भएपछि आयोगले मतदाता नामावली प्रकाशन गर्नेछ।
आयोगले आगामी फागुन २१ गते हुने प्रतिनिधि सभा निर्वाचनका लागि फागुन २० गतेलाई ‘कट अफ डेट’ निर्धारण गरेको छ। यसअनुसार, फागुन २० गतेसम्म १८ वर्ष उमेर पुग्ने मतदाताको विवरण मतदाता नामावलीमा अद्यावधिक गर्ने भएको छ।





