२०८३ मंसिर २ गते मंगलवार
२०८३ मंसिर २ गते मंगलवार

काठमाडौं- चालु आर्थिक वर्षको पहिलो तीन महिनामा विप्रेषण आप्रवाहमा ३५ दशमलव चार प्रतिशतले वृद्धि भएको छ । नेपाल राष्ट्र बैंकले सार्वजनिक गरेको विवरणअनुसार सो अवधिमा रु पाँच खर्ब ५३ अर्ब ३१ करोड बराबरको विप्रेषण स्वदेश भित्रिएको छ ।

अघिल्लो वर्षको सोही अवधिमा यस्तो आप्रवाह ११ दशमलव नौ प्रतिशतले वृद्धि भई रु चार खर्ब आठ अर्ब ७७ करोड रहेको थियो । चालु आवको पहिलो महिना अर्थात् गत साउनमा विप्रेषण आप्रवाह २९ दशमलव नौ प्रतिशतले वृद्धि भई रु एक खर्ब ७७ अर्ब ४१ करोड बराबर पुगेको थियो ।

यस्तै, गत भदौ महिनामा विप्रेषण आप्रवाह ३३ दशमलव एक प्रतिशतले वृद्धि भई रु तीन खर्ब ५२ अर्ब आठ करोड पुगेको थियो । चालु आवको पहिलो त्रैमासमा चालु खाता रु दुई खर्ब ३७ अर्ब ५९ करोड र शोधनान्तर रु दुई खर्ब ६४ अर्ब तीन करोडले बचतमा रहेको छ । अघिल्लो आवको सोही अवधिमा चालु खाता रु एक खर्ब १५ अर्ब ३६ करोड र शोधनान्तर रु एक खर्ब ८४ अर्ब ९९ करोडले बचतमा थियो ।

यसैगरी, चालु आवको पहिलो तीन महिनामा कूल वस्तु निर्यात ८९ दशमलव छ प्रतिशतले वृद्धि भई रु ७२ अर्ब ७८ करोड कायम भएको छ । सो अवधिमा वस्तु आयात १९ दशमलव आठ प्रतिशतले बृद्धि भई रु चार खर्ब ६८ अर्ब आठ करोड कायम भएको छ । समीक्षा अवधिमा कूूल वस्तु व्यापार घाटा १२ दशमलव दुई प्रतिशतले वृद्धि भई रु तीन खर्ब ९५ अर्ब ३० करोड पुगेको छ ।

काठमाडौं– दोस्रो संस्करणको नेपाल प्रिमियर लिग (एनपीएल) अन्तर्गत मंगलबार दुई खेल हुँदैछन् । सोमबार ‘ब्रेक’ दिइएको प्रतियोगितामा आज दुई खेल हुन लागेका हुन्।

मंगलबारको पहिलो खेलमा जनकपुर र चितवनले प्रतिस्पर्धा गर्नेछन् । यो खेल बिहान ११ : ४५ मा सुरु हुँदैछ । दोस्रो खेलमा पोखरा र कर्णाली अपराह्न ४ बजे भिड्ने छन्।

साविक विजेता जनकपुर यो सिजना खाता खोल्न संघर्ष गरिरहेको छ । चार खेलमा जितबिहीन जनकपुरका लागि सान्त्वना जितको खाँचो छ । चार अंक जोडेको चितवन भने जनकपुरलाई हराउँदै प्लेअफ पुग्ने लक्ष्यका साथ मैदानमा हुनेछ।

दोस्रो खेलमा पोखरा र कर्णाली याक्स भिड्दैछन् । दुवै टिम संघर्ष गरिरहेका छन् । तालिकामा पोखरा र कर्णालीको दुईदुई अंक मात्र छ । कर्णालीले पाँच खेल खेलिसकेको छ भने पोखराले चार खेल मात्र खेलेको छ । यी दुई टिमसमेत तालिकामा संघर्ष गरिराखेका छन् ।

१९ खेल सकिँदा अंक तालिका भने रोचक बनेको छ। अंक तालिकामा अपराजित सुदूरपश्चिम १० अंकसहित प्लेअफमा पुगिसकेको छ। एक खेल मात्र खेल्न बाँकी रहेको काठमाण्डुले दुई खेल गुमाएर ८ अंक बनाएको छ। पाँच खेलमा एक खेल गुमाएको विराटनगरको समेत समान ८ अंक रहेको छ। रनरेटका आधारमा काठमाडौं दोस्रो स्थानमा उक्लिएको छ भने विराटनगर दोस्रो स्थानमा छ।

चितवन र लुम्बिनीको समान चार अंक छ। लुम्बिनीले पाँच खेल खेलिसकेको छ भने चितवनले चार खेल मात्र खेलेको छ। रनरेटका आधारमा चितवन चौथो स्थानमा छ भने लुम्बिनी पाँचौं स्थानमा छ। कर्णाली र पोखराको दुईदुई अंक छ। तालिकामा कर्णाली छैटौं र पोखरा सातौं स्थानमा छन् भने पुछारमा रहेको जनकपुर अंकबिहीन छ।

एनपीएल दोस्रो सिजनका सबै खेल कीर्तिपुरस्थित त्रिवि मैदानमा दिउँसो र राति गरेर भइरहेका छन्। नेपाल क्रिकेट सङ्घ (क्यान)ले हरेक खेलका लागि नौ हजार चार सय ५० टिकट बिक्री गर्दै आएको छ। मङ्सिर १ देखि सुरु भएको एनपीएल २७ गतेसम्म सञ्चालन हुँदै छ।

एनपीएलमा लिग चरण, तीन वटा प्लेअफ र फाइनलसहित ३२ खेल हुँदै छन्। शनिबारका लागि टिकट मूल्य साधारणतर्फ पाँच सय र प्रिमियमतर्फ १५ सय रुपियाँ राखिएको छ। यसैगरी लिग चरण र अन्य दिनको खेलका लागि टिकटको मूल्य पाँच सय र एक हजार तोकिएको छ। प्लेअफपछिका खेलका लागि जनरलतर्फ एक हजार र प्रिमियरतर्फ दुई हजार रुपियाँ राखिएको छ।

एनपीएलमा जनकपुर बोल्टस, सुदूरपश्चिम रोयल्स, कर्णाली याक्स, पोखरा एभेन्जर्स, विराटनगर किंग्स, चितवन राइनोज, काठमाण्डु गुर्खाज र लुम्बिनी लायन्स गरेर आठ फ्रेन्चाइज टोलीले प्रतिस्पर्धा गर्दैछन्।

मेष (चु, चे, चो, ला, लि, लु, ले, लो, अ)

वैदेशिक रोजगारमा सफलता मिल्नेछ । कार्यक्षेत्रमा संघर्ष गर्नुपर्ला । सवारी साधन चलाउँदा सावधान रहनुहोला । आजको शुभ रंग रातो हो भने शुभ अंक २ रहेको छ ।

वृष (इ, उ, ए, ओ, वा, वि, वु, वे, वो)

आँटेको कार्यमा सफलता मिल्नेछ । राज्यपक्ष वा प्रशासनिक सहयोगबाट कुनै विशिष्ट कार्य सम्पादन गर्नमा सहायता मिल्नेछ । आय आर्जनका नयाँ स्रोतहरू फेलापर्नेछन् । आजको शुभ रंग बैजनी हो भने शुभ अंक ३ रहेको छ ।

मिथुन (का, कि, कु, घ, ङ, छ, के, को, हा)

महत्वकांक्षी योजनाहरू पूरा हुनेछन् । सभा समारोहमा सम्मानित भइएला । नोकरी वा पेशामा अधिकारी वर्गहरू हजुरको लागि सहयोगी हुनेछन् । आजको शुभ रंग पहेलो हो भने शुभ अंक २ रहेको छ।

कर्कट (हि, हु, हे, हो, डा, डि, डु, डे, डो)

आत्मविश्वास वा स्पष्ट दृष्टिकोणमा उल्लेखनीय वृद्धि हुनेछ । उच्च शिक्षालाई लिएर नयाँ अवसरहरू मिल्नेछन् । नयाँ नोकरीको खोजीमा सफलता मिल्नेछ । आजको शुभ रंग बैजनी हो भने शुभ अंक २ रहेको छ ।

सिंह (मा, मि, मु, मे, मो, टा, टि, टु, टे)

सृजनात्मक गतिविधिहरूमा रुचि बढ्नेछ वा नवीन विचारहरू कार्यान्वयन गर्न सकिनेछ । अबसरवादीहरूबाट सावधान रहनुहोला । धर्म कर्मतर्फ मन जानेछ । आजको शुभ रंग निलो हो भने शुभ अंक २ रहेको छ ।

कन्या (टो, पा, पि, पु, ष, ण, ठ, पे, पो)

अरुको लागि बुद्धि र धन खर्च गर्नुपर्ला । कार्यक्षेत्रमा तपाईँको योग्यता वा दक्षतामाथि पुनः विश्वास पुष्ट हुनेछ । जीवनसाथीको साथ र सहयोग पाइनेछ । आजको शुभ रंग सेतो हो भने शुभ अंक ४ रहेको छ ।

तुला (रा, रि, रु, रे, रो, ता, ति, तु, ते)

कार्यक्षेत्रमा धैर्य वा सजगताको साथमा विवेकपूर्ण निर्णय लिन आवश्यक हुनेछ । व्यवहारलाई सरल राख्ने प्रयास गर्नुहोला । नयाँ कामको थालनी हुनेछ । आजको शुभ रंग हरियो हो भने शुभ अंक ३ रहेको छ ।

वृश्चिक (तो, ना, नि, नु, ने, नो, या, यि, यु)

प्रेम सम्बन्धलाई दाम्पत्य यात्रामा रुपान्तरण गर्न अनुकूल समय रहको छ । परिवार वा आफन्तहरूको साथले कठिन कार्य पनि सरलतापूर्वक सम्पादन गर्न सकिनेछ । विद्यार्थीहरूको पढाइमा मन लाग्नेछ । आजको शुभ रंग रातो हो भने शुभ अंक ५ रहेको छ ।

धनु (ये, यो, भा, भि, भु, धा, फा, ढा, भे)

नयाँ अवसरको खोजीमा केही दौडधुप गर्नुपर्ला । व्यक्तिगत वा व्यावहारिक त्रुटीले आलोचना हुन सक्छ । राजनीतिक क्षेत्रमा प्रभाव बढ्नेछ । आजको शुभ रंग केशरी हो भने शुभ अंक ६ रहेको छ ।

मकर (भो,जा,जि,जु,जे,जो,ख,खि,खु,खे,खो,गा,गि)

गृहणिहरूको धार्मिक वा आध्यात्मिक क्षेत्रमा समय व्यतीत हुनेछ । भविष्यलाई लिएर योजनाहरु कोरिनेछन् । स्वास्थ्य सबल रहनेछ । आजको शुभ रंग खैरो हो भने शुभ अंक २ रहेको छ ।

कुम्भ (गु, गे, गो, सा, सि, सु, से, सो, दा)

आर्थिक पक्ष सबल रहनेछ । व्यापार व्यवसायलाई लिएर यात्रा गर्नुपर्ला । सन्तुलित आहार अपनाउनुहोस् । आफन्तहरूबाट साथ पाइनेछ । विद्यार्थीहरूको अध्ययनमा मन लाग्नेछ । आजको शुभ रंग खैरो हो भने शुभ अंक ८ रहेको छ।

मीन (दि, दु, थ, झ, ञ, दे, दो, चा, चि)

प्रतिष्ठित कार्य गर्ने अवसर मिल्नेछ । गोप्य कुराहरू सार्वजनिक नगर्नुहोला । योग्यताको मूल्यांकन हुनेछ । प्रभावशाली व्यक्तित्व निर्माण गर्ने समय रहेको छ । आजको शुभ रंग सुन्तला हो भने शुभ अंक ३ रहेको छ ।

काठमाडौं । मधेश प्रदेशका मुख्यमन्त्री सरोज यादवलाई २४ घण्टाभित्र विश्वासको मत लिन सर्वोच्च अदालतले आदेश दिएको छ ।

गैरसंवैधानिक रूपमा यादवको नियुक्ति गरिएको भन्दै ७३ जना सांसदले दायर गरेको रिटमाथि सुनुवाइ गर्दै सर्वोच्चले यस्तो निर्देश आदेश गरेको हो ।

सर्वोच्चको आदेशअनुसार मुख्यमन्त्री यादवले अब तात्कालिक रूपमा प्रदेशसभा बैठकमा विश्वासको मत लिने प्रस्ताव पेश गर्नुपर्नेछ । विश्वासको मत प्राप्त भएमा उनी पदमै कायम रहनेछन् भने, मत नपाए प्रदेशमा नयाँ राजनीतिक विकल्पको प्रक्रिया अघि बढाउने स्थिति आउनेछ ।

यसबाहेक अदालतले प्रदेश प्रमुखलाई संविधानको धारा १६८(२) अनुसार संयुक्त सरकार गठनको प्रक्रिया अघि बढाउन निर्देशन दिएको छ । यदि वर्तमान मुख्यमन्त्रीले विश्वासको मत प्राप्त नगरे प्रदेशमा नयाँ सत्ता समीकरण निर्माण हुने मार्ग खुल्नेछ ।

काठमाडौं महानगरपालिकाका मेयर बालेन्द्र शाह (बालेन)का बुवा रामनारायण शाहको निधन भएको छ।

अस्वस्थ भएसँगै आइतबार बिहान नयाँ बानेश्वरस्थित सिभिल अस्पताल भर्ना भइ भेन्टिलेटरमा उपचाररत शाहको सोमबार मध्यान्ह निधन भएको हो।

पिसाबमा संक्रमण भएर शरीरमा फैलिएसँगै उनी अस्पताल भर्ना भएका थिए। शाहलाई भेट्न आज बिहान मात्रै प्रधानमन्त्री सुशीला कार्की सिभिल पुगेकी थिइन्।

काठमाडौँको ह्यात होटलभित्रको क्यासिनोमा छिरेर रकम चोरी गर्ने, आगजनी गर्ने तथा तोडफोड गर्ने दुई जनालाई प्रहरीले पक्राउ गरेको छ ।

गत भदौ २३ र २४ गते जेनजी आन्दोलनका क्रममा काठमाडौँ महानगरपालिका–६ बौद्धस्थित ह्यात होटेलभित्र रहेको क्यासिनोमा छिरेर धारिलो हतियार देखाएर क्यासिनोको काउन्टरमा राखिएको नगद रकम चोरी गरी तोडफोड गर्ने दुई जनालाई जिल्ला प्रहरी परिसर काठमाडौँको टोलीले आज पक्राउ गरेको हो ।

पक्राउ पर्नेमा काठमाडौँ–६ बौद्धका ४२ का दावा शेर्पा र बूढानीलकण्ठ नगरपालिका–१२ का २९ वर्षीय रन्जित खड्गी रहेका छन् । क्यासिनोभित्र रहेको रकम चोरी गर्ने तथा संरचना तोडफोड र आगजनी गरी फरार रहेका उनीहरुलाई बूढानीलकण्ठ क्षेत्रबाट पक्राउ गरिएको परिसरका प्रवक्ता, प्रहरी उपरीक्षक (एसपी) पवनकुमार भट्टराईले जानकारी दिए ।

पक्राउ परेका दुवैमाथि चोरी तथा डाँकासम्बन्धी कसुर र आपराधिक उपद्रव गर्न नहुने कसुरमा जिल्ला अदालत काठमाडौँबाट सात दिनको म्याद थप गरी अनुसन्धान भइरहेको प्रवक्ता भट्टराईले बताए ।

नेपालकी सक्रिय समाजसेवी तथा व्यवसायिक नेतृत्वकर्ता पुनम सिंह यादव भारतको प्रतिष्ठित “दादासाहेव फाल्के लाइफस्टाइल आइकनिक अवार्ड २०२५” बाट सम्मानित भएकी छन्।

मुम्बईको इस्कन जुहू अडिटेरियममा सम्पन्न छ छैटौँ “दादा साहेव अवार्डमा “गेष्ठ अफ हनर” को रूपमा “लाइफस्टाइल आइकनिक अवार्ड २०२५” बाट महत्वपूर्ण सम्मान प्राप्त गरेकी हुन्।

पुनम यादवका अनुसार स्वास्थ्यले साथ् नदिएपछि उनि अवार्ड कार्यक्रममा जान सकिनन्। कार्यक्रममा जान नसके पनि आफ्नो कर्मलाइ उचित ठाउँ दिएर सम्मान गरेकोमा आफुलाई धेरै खुसि लागेको बताइन भने भारत सरकारलाइ धन्यवाद पनि भनेकी छिन।

यो कार्यक्रम “दादासाहेव फाल्के आइकन अवार्ड फिल्म संस्था (DPIAF) अन्तर्गत आयोजित थियो, जसको नेतृत्व संस्थापक तथा अध्यक्ष कल्याणजी जानाले गरेका थिए। उक्त कार्यक्रममा भारतका चर्चित कलाकर्मी शाहरुख खान देखि सलमान खानसम्मको उपस्थित थियो।
नेपालका तर्फबाट यस श्रेणीको Dadasaheb Phalke Lifestyle Iconic Award प्राप्त गर्ने सम्भवत: उनि पहिलो महिलाबनेकी छिन। 

नेपाल विद्युत् प्राधिकरणका पूर्वकार्यकारी निर्देशक तथा हाल ‘उज्यालो नेपाल पार्टी’ खोलेर राजनीतिमा सक्रिय कुलमान घिसिङले काठमाडौँ महानगरपालिकाका मेयर बालेन्द्र साह(बालेन) सँगको भेटको तस्बिर सामाजिक सञ्जाल फेसबुकमा पोस्ट गरेका छन्।

तस्बिरसँगै कुलमानले लेखेका छन्, “देश बनाउने अभियानमा हामी सँगै छौं।”

बालेन शाहको सचिवालय स्रोतका अनुसार यो भेट शनिबार बालेनको निवासमै भएको थियो। दुवै नेताबीच देशको समसामयिक राजनीतिक अवस्था र विकासका एजेन्डामा छलफल भएको बुझिएको छ।

हालै मात्र उज्यालो नेपाल पार्टी घोषणा गरेका घिसिङ र स्वतन्त्र रूपमा निर्वाचित भई चर्चित बालेन शाहबीचको यो भेटलाई धेरैले आगामी दिनमा सम्भावित सहकार्यको सङ्केतको रूपमा हेरेका छन्।

कालीकोटका सामुदायिक विद्यालयमा विषयगत शिक्षकको सधैँ अभाव हुने गरेको छ। सामुदायिक विद्यालयमा गणित, विज्ञान र अङ्ग्रेजी विषयका शिक्षकको सधैँ अभाव हुने गरेको हो।​

नरहरिनाथ गाउँपालिका–७, माल्कोट उच्छवस्थित रूपादेवी माविले गणित विषय शिक्षकका लागि १८ पटकसम्म विज्ञापन गरे पनि पाउन सकेको छैन । अछामको रामारोसनसँग सिमाना जोडिएको दुर्गमको यो विद्यालयले सङ्घीय अनुदान कोटामा गत वर्ष प्राप्त गणित विषयको दरबन्दीमा शिक्षक नपाएपछि १९औँ पटकको विज्ञापन गरेको छ।

वैशाखयता १५–१५ दिनको फरकमा १८ औँ पटक विज्ञापन गर्दा पनि दर्खास्त परेन। विद्यालयका प्रधानाध्यापक (प्रअ) दानबहादुर बुढाले गणितका शिक्षक पाउनै मुस्किल भएको बताए।

गत कात्तिक ३० गते विद्यालयले १९ औँ पटक आवेदन आह्वान गरेको थियो तर अध्यापन अनुमतिपत्र (लाइसेन्स) भएको शिक्षक पाउन कठिनाइ भएको प्रअ बुढाको भनाइ छ।

९० प्रतिशत दलित समुदायको बसोबास रहेको उच्छवबाट नजिकको अर्को विद्यालय पुग्न दुई घण्टा जङ्गलको बाटो हिँड्नु पर्छ। विद्यालय टाढा भएपछि स्थानीयले मानापाथी उठाएर २०३५ सालमा स्थापना गरेको रूपादेवी विद्यालयमा बाल विकासदेखि १० कक्षासम्म ३७५ जना विद्यार्थी अध्यानरत छन्।

तीन प्रावि स्थायी दरबन्दी भएको विद्यालयमा पालिका अनुदान, निजी स्रोत गरी १३ जना शिक्षक कार्यरत छन्।

यस्तै शुभकालिका गाउँपालिका–२, बालाचौरस्थित कालिका माविले अघिल्लो शैक्षिक सत्रका लागि मावि तह विज्ञान विषयको शिक्षकका लागि पाँच पटक विज्ञापन गर्दासम्म अध्यापन अनुमतिपत्र भएको एक जनाले पनि दर्खास्त दिएनन्।

पटक पटक विज्ञापन गर्दा पनि शिक्षक नपाएपछि बिनालाइसेन्सको विज्ञान शिक्षक भर्ना गरेर विद्यालयले अध्यापन गराउँदै आएको छ। गोरखापत्र दैनिकमा समाचार छ

भूमि व्यवस्थापन तथा अभिलेख विभागले घर जग्गासम्बन्धी कारोबार गर्न इजाजत पत्र लिन चाहने फर्म, कम्पनी वा संस्थालाई आवेदनका लागि म्याद थप गरेको छ ।

 

विभागले यही मङ्सिर २७ गतेसम्म आवेदन दिन सकिने गरी म्याद थप गरेको हो । यसअघि विभागले गत असोज १३ गते सूचना प्रकाशित गर्दै आवेदनका लागि सार्वजनिक आह्वान गरेको थियो ।

घर जग्गासम्बन्धी कारोबार गर्न इजाजत पत्र लिनुपर्ने मालपोत ऐन, २०३४ मा भएको व्यवस्था बमोजिम सरकारले राजपत्रमा सूचना प्रकाशित गरी घरजग्गा कारोबार गर्ने कम्पनीका हकमा कार्यक्षेत्र समेत तोकेको थियो । विभागले पहिलो चरणमा महानगरपालिका र उपमहानगरपालिकालाई कार्यक्षेत्रका रुपमा परिभाषित गरेको थियो ।

 

एक पटकमा रु तीन करोड भन्दा बढीको कारोबार गर्ने इच्छुक फर्म, कम्पनी वा संस्थाले आवेदन दिन सकिने प्रबन्ध गरेको थियो । घरजग्गाको व्यवसायलाई पारदर्शी, मर्यादित एवम् वैज्ञानिक बनाउने उद्देश्यका साथ कारोबारलाई व्यवस्थित गर्न लागेको जनाइएको छ ।

विभागले गत शुक्रबारदेखि लागू हुने गरी आवेदनको म्याद थप गरिएको जनाएको हो । विभागले पहिलो चरणमा छ वटा महानगर र ११ उपमहानगपालिकामा घर जग्गा कारोबारलाई व्यवस्थित बनाउने उद्देश्यका साथ कम्पनी दर्ताको प्रक्रिया अगाडि बढाएको छ । यसअघि प्रकाशित सूचनाअनुसार न्यून सङ्ख्यामा आवेदन परेकाले म्याद थप गरिएको हो ।

विभागका अनुसार गत कात्तिकमा घरजग्गा कारोबारबाट रु दुई अर्ब ७४ करोड ५१ लाख ७२ हजार १९९ बराबरको राजस्व सङ्कलन भएको थियो । त्यसैगरी सेवा कर रु २१ करोड ३४ लाख ४७ हजार ४१३, रजिष्टे«शन शुल्क रु एक अर्ब ५० करोड ६२ लाख ९६ हजार १४, पूँजीगत लाभकर रु ९९ करोड ७८ लाख ४४ हजार ३९२ बराबर सङ्कलन भएको थियो ।

ताजा अपडेट

Login

कृपया ध्यान दिनुहोस्:

  • अब तपाइले कमेन्ट गर्नका लागि अनिवार्य रजिस्ट्रेसन गर्नुपर्ने छ ।
  • आफ्नो इमेल वा गुगल, फेसबुक र ट्वीटरमार्फत् पनि सजिलै लगइन गर्न सकिने छ ।
  • यदि वास्तविक नामबाट कमेन्ट गर्न चाहनुहुन्न भने डिस्प्ले नेममा सुविधाअनुसारको निकनेम र प्रोफाइल फोटो परिवर्तन गर्नुहोस् अनि ढुक्कले कमेन्ट गर्नहोस्, तपाइको वास्तविक पहिचान गोप्य राखिने छ ।
  • रजिस्ट्रेसनसँगै बन्ने प्रोफाइमा तपाइले गरेका कमेन्ट, रिप्लाई, लाइक/डिसलाइकको एकमुष्ठ बिबरण हेर्नुहोस् ।