
काठमाडौँ । राष्ट्रिय परीक्षा बोर्डले कक्षा १२ को पूरक परीक्षाको नतिजा प्रकाशित गरेको छ ।
बोर्ड बैठक आज बसेर नतिजा प्रकाशित गरेको हो । बोर्डका अनुसार पूरक परीक्षामा ७३.४१ प्रतिशत विद्यार्थी उत्तीर्ण भएका छन् ।
गत असोज ७ र ८ गते भएको परीक्षामा १ लाख ४ हजार २६ जना विद्यार्थी सहभागी भएका थिए । जसमा ७६ हजार ३ सय ६७ जना उत्तीर्ण भएका हुन् । ४ जनाको परीक्षाफल रद्द गरिएको छ ।
गत ११ साउनमा प्रकाशित भएको नियमित नतिजामा ६१.१७ विद्यार्थी ग्रेडेड भएका थिए । नतिजा हेर्नका लागि नेपाल टेलिकमको १६०० मा एसएमएस गर्नुपर्नेछ ।
काठमाडौं । संसद् पुनर्स्थापनाको पक्षमा नेपाली कांग्रेसका निवर्तमान सांसदहरूले हस्ताक्षर अभियान सुरु गरेका छन् ।
कांग्रेस केन्द्रीय कार्यसम्पादन समितिको बैठकले हालको सरकार गठन र संसद् विघटनलाई असंवैधानिक र अलोकतान्त्रिक ठहर गरेको थियो ।
सो निष्कर्षका आधारमा प्रतिनिधिसभा पुनस्र्थापनाको मागसहित न्यायालयमा जाने तयारी स्वरूप हस्ताक्षर अभियान सुरु गरिएको कांग्रेस स्रोतले जनायो ।
यता, कांग्रेसका निवर्तमान सांसद श्यामकुमार घिमिरेले सरकार गठन र विघटन दुबै असंवैधानिक र अलोकतान्त्रिक भएको बताए । तर, अहिले नै संसद् पुनस्र्थापनाका लागि पहल गर्ने भन्ने विषयमा अन्तिम निर्णय नभएको बताए ।
‘नेपाली कांग्रेसले सरकार गठन र विघटन दुबै असंवैधानिक र अलोकतान्त्रिक भएको ठहर गरिसकेको छ । त्यसैले त्यसको विरोधमा न्यायालयको ढोका ढकढक्याउन हामीले हस्ताक्षर अभियान थालेका हौं’ उनले भने ।
उनका अनुसार, विघटित प्रतिनिधिसभाका सांसदहरूले संकलन गरेको हस्ताक्षर सूची पार्टी नेतृत्वलाई बुझाइनेछ । ‘हामीले यो सिग्नेचर पार्टीमा बुझाउनेछौं,’ उनले भने, ‘निर्णय पार्टीले एकताबद्ध भएर गरोस् भन्ने हाम्रो आग्रह हो ।’
यसअघि प्रमुख विपक्षी दल नेकपा (एमाले) ले पनि संसद् पुनस्र्थापनाको मागसहित हस्ताक्षर अभियान सञ्चालन गरिरहेको छ ।
संसद् पुनस्र्थापनाका लागि हालसम्म सर्वोच्च अदालतमा १६ वटा निवेदन दर्ता भइसकेका छन् । तीमाथि प्रारम्भिक सुनुवाइ भई कारण देखाउ आदेश जारी भइसकेको छ ।
प्रतिनिधिसभा गत २७ भदौमा विघटन भएको थियो । त्यसअघि २३ र २४ भदौमा व्यापक जनआन्दोलन भएपछि तत्कालीन प्रधानमन्त्री केपी शर्मा ओलीले राजीनामा दिएका थिए ।
ओलीको राजीनामापछि नयाँ सरकार बन्ने अवस्था नरहेको भन्दै राष्ट्रपति रामचन्द्र पौडेलले प्रतिनिधिसभा विघटन गरी पूर्वप्रधानन्यायाधीश सुशीला कार्कीलाई अन्तरिम प्रधानमन्त्री नियुक्त गरेका थिए । अन्तरिम सरकारले आगामी फागुन २१ गते निर्वाचनको मिति घोषणा गरेको छ ।
काठमाडौं । २३ र २४ भदौको जेनजी विद्रोहलाई संस्थागत गर्ने उद्देश्यले रक्षा बम नेतृत्वको नेपाल जेनजी फ्रन्टले केन्द्रीय र प्रदेशस्तरीय संरचना विस्तार गरेको छ । हालै बसेको केन्द्रीय संयोजन समितिको अनलाइन बैठकले केन्द्रीय विभागीय सदस्य तथा सातै प्रदेशका सम्पर्क व्यक्तिहरू तोकेको हो ।
फ्रन्टको केन्द्रीय विभागीय जनसम्पर्क समिति सदस्यमा रितु खड्का, अभियान समितिमा अमृता बन र सूचना प्रविधि समितिमा संविधान प्रसाईले जिम्मेवारी पाएका छन् ।
त्यस्तै, प्रदेशस्तरीय सम्पर्क व्यक्ति क्रमशः कोशी प्रदेशमा रोहन दंगाल, मधेशमा मो. नजरे आलम, बागमतीमा सचिन चापागाईं, गण्डकीमा साबिज मिया, लुम्बिनीमा सौरभ न्यौपाने, कर्णालीमा बिनिता बोगटी र सुदूरपश्चिम प्रदेशमा नवीन बिष्ट तोकिएका छन् ।
फ्रन्टले सुशासन, पारदर्शिता, जवाफदेहीता र डिजिटल अभिव्यक्ति स्वतन्त्रताको पक्षमा तथा भ्रष्टाचार, कुशासन र डिजिटल निरंकुशताको विरुद्धमा अभियान सञ्चालन गरिरहेको पनि जनाएको छ । यसमार्फत देशभरका जेन–जी, युवा र विद्यार्थीहरूलाई सहजीकरण र समन्वयमा ल्याइने बताइएको छ ।
दाङ । दाङको गढवा गाउँपालिका-४ अजगढवामा जुकाको औषधि घाँटीमा अड्किएर १८ महिने बालिकाको मृत्यु भएको छ । गढवा-४ अजगढवाका शिवकुमार यादवकी १८ महिने छोरी जमुना यादवको मृत्यु भएको इलाका प्रहरी कार्यालय गढवाका प्रहरी निरीक्षक डबलबहादुर बमले जानकारी दिए ।
उनका अनुसार राष्ट्रव्यापी रूपमा यही कात्तिक २० र २१ गते सञ्चालन भएको भिटामिन ‘ए’ र जुकाको औषधि वितरण कार्यक्रमअन्तर्गत बिहीबार गढवा-४ रामनगरमा औषधि खुवाउने बेला बालिकाको घाँटीमा अड्किएपछि सास रोकिएर केही मिनेटमा उनको घटनास्थलमा नै मृत्यु भएको अनुसन्धानका क्रममा खुलेको हो ।
प्रारम्भिक अनुसन्धान भइरहेकाले घटना सार्वजनिक नगरिएको प्रहरीको भनाइ छ । महिला स्वास्थ्य स्वयंसेविकाद्वारा खुवाइएको औषधि बालिकाको घाँटीमा अड्किए बालिकालाई श्वासप्रश्वासमा समस्या भएको प्रहरीले जनाएको छ । प्रहरी निरीक्षक बमले राप्ती स्वास्थ्य विज्ञान प्रतिष्ठान घोराहीमा शव परीक्षण गरी परिवारलाई बुझाइएको जानकारी दिए ।
घटनाबारे थप अनुसन्धान भइरहेको बताउँदै उनले ‘पोस्टमार्टम रिपोर्ट’ आएपछि थप कुरा प्रस्ट हुने उल्लेख गरे । उनले भिटामिन ‘ए’ र जुकाको औषधि सावधानी अपनाएर खुवाउनुपर्नेमा जोड दिए ।
काठमाडौँ । एकीकृत समाजवादीले घनश्याम भुसाललाई संयोजक तोकेको छ ।
शनिबार एकीकृत समाजवादीका ६७ केन्द्रीय सदस्यहरूको ‘भर्चुअल’ बैठकले पार्टी पुनर्गठन गर्दै तत्कालीन महासचिव भुसाललाई संयोजक तोकेको हो।
अध्यक्ष माधवकुमार नेपालले नेकपा माओवादी केन्द्रसँग एकता गरेपछि विमति जनाउँदै भुसालले पार्टी पुनर्गठन गर्ने बताएका थिए।
बैठकले विभिन्न पार्टीसँग वार्ता गर्ने जिम्मा भुसाललाई दिएको छ। यसैगरी मंसिर पहिलो हप्ता राष्ट्रिय भेला आयोजना गर्ने निर्णय गरेको छ ।
त्रिभुवन अन्तर्राष्ट्रिय विमानस्थलको एयर फिल्ड लाइटिङ सिस्टममा समस्या आएको कारण सबै उडान र अवतरण रोकिएका छन् ।
विमानस्थल प्रवक्ता रिन्जी शेर्पाका अनुसार समस्या शनिबार बेलुका करिब साढे ५ बजेदेखि देखा परेको हो । अन्तर्राष्ट्रिय उडानका जहाजहरू आकाशमै होल्ड गरिएका छन् भने आन्तरिक उडानका जहाजहरू विमानस्थलमै रोकिएका छन्।
प्रवक्ता शेर्पाले भने, ‘के कारणले समस्या आएको हो भन्ने विषयमा जाँच भइरहेको छ। समस्या समाधान भएलगत्तै उडान र अवतरण पुनः सञ्चालन हुनेछ।’
उनका अनुसार प्राविधिक टोलीले हाल लाइटिङ सिस्टमको समस्या समाधान गर्ने प्रयास गरिरहेका छन् ।
काठमाडौँ । मधेश प्रदेशका मुख्यमन्त्री जितेन्द्र सोनलले राजीनामा दिएका छन्।
सोनलले विश्वासको मत नपाउने निश्चित भएपछि पदबाट राजीनामा घोषणा गरेको हो । आज प्रदेश सभामा विश्वासको मत लिने कार्यसूची थियो। तर, उनले राजीनामा दिएका हुन्।
दरबारमार्गस्थित नेपाल ट्रस्टको जग्गा लिज सम्झौतासम्बन्धी अनियमितताको आरोपमा ट्रस्टका तत्कालीन सहसचिव लेखबहादुर कार्की पक्राउ परेका छन्।
प्रहरीले प्रहरीले ठगी, आपराधिक विश्वासघातसम्बन्धी कसुरमा अनुसन्धान अघि बढाउने क्रममा कार्कीलाई नियन्त्रणमा लिएको हो । केन्द्रीय अनुसन्धान ब्युरो (सीआईबी) का प्रमुख प्रहरी अतिरिक्त महानिरीक्षक (एआईजी) मनोज केसीका अनुसार ६६ वर्षीय कार्कीलाई शुक्रबार पक्राउ गरी थप अनुसन्धान सुरु गरिएको हो ।
प्रहरीका अनुसार,प्रारम्भिक अनुसन्धानमा कम्पनीलाई नोक्सानी हुने गरी ३० वर्षका लागि जग्गा लिजमा दिने सम्झौता भएको र सम्झौतामा उल्लेख भएको ४६०६ नम्बरको जग्गासँगै ४६०५ नम्बरको कित्ता समेत अनुमति वा निर्णयबिना लिजमा दिएको देखिन्छ ।
अनुसन्धानअनुसार काठमाडौं महानगरपालिका–१ दरबारमार्गस्थित नेपाल ट्रष्टको जग्गा थामसेर्कु ट्रेकिङ प्रालिसँग लिजमा दिने क्रममा नियमानुसार संचालक समितिको निर्णयबिना र बिनाआधार अर्को कित्ता पनि थप गरी लिज सम्झौता गरिएको थियो।
सो क्रममा ट्रष्टका अधिकारी, कर्मचारी र अन्य व्यक्तिहरूले गैरकानूनी लाभ लिएको प्रारम्भिक अनुसन्धानले देखाएको प्रहरीले जनाएको छ।
अब कार्कीको बयानका आधारमा ठगी र आपराधिक विश्वासघातसम्बन्धी मुद्दामा थप अनुसन्धान अघि बढाइने प्रहरीले जनाएको छ।
काठमाडौँ । मधेश प्रदेशका माओवादी केन्द्रका सांसद रहबर अन्सारीले रोष्टममै आफ्नो मुखमा कालो मोसो दलेका छन्।
शनिबार प्रदेश सभामा अन्सारीले केन्द्रीकृत शासन पद्धति लागू गरेको भन्दै आफ्नो मुखमा कालो मोसो दलेका हुन्।
मधेश प्रदेशका मुख्यमन्त्री जितेन्द्र सोनाले आज विश्वासको मत लिइरहेका छन्। रोष्टममा बोल्ने क्रममा रहबर अन्सारीले कालो मोसो दल्दै विश्वासको मत नदिने बताए।
‘मेरो दलको नाम के हो म बिर्से म बिर्से, के रे कुन दल, नेपाली कम्युनिस्ट पार्टी, होइन माओवादी केन्द्र नै हो!,’ अन्सारीले भने,‘ यो हामीले बनाइरहेको सरकार होइन, काठमाडौँ र शीर्ष नेताहरुले बनाइरहेको सरकार हो, किन विश्वासको मत दिने? विश्वासको मत दिन्न।’
प्रदेशको भ्रष्टाचार र कुशासन देख्दा विष उत्पन्न भएको बताउँदै उनले जेन जेड आन्दोलन भए पनि नेताहरू नसुध्रिएको जिकिर गरे।
काठमाडौँ । प्रधानमन्त्री सुशीला कार्कीले घुस खोरी, पार्टीगत लेवी र कमिसनको सञ्जाल अब सह्य नहुने चेतावनी दिएकी छिन्।
शनिवार काठमाडौँमा आयोजित राष्ट्रिय बृहत् आर्थिक बहस २.० लाई सम्बोधन गर्दै प्रधानमन्त्री कार्कीले घुस खोरी, पार्टीगत कमिसनको सञ्जाल अब सह्य नहुने चेतावनी दिएकी हुन्।
उनले लोकतन्त्रको नाममा अब लुटतन्त्र सह्य नहुने पनि बताइन्। उनले इमान्दार उद्यमीलाई प्रताडित गर्ने र नीतिगत चलखेल गर्नेहरू पोसिने अवस्था नरहने पनि स्पष्ट पारिन्।
जेन जेड आन्दोलनको पृष्ठभूमिमा केही उश्रृंखल समूहहरूले राज्यविहिनताको फाइदा उठाउँदै व्यापारिक क्षेत्रमाथि गरिएको आक्रमण स्वीकार्य नभएको पनि बताइन्। उक्त घटनापछि मर्माहत भएको निजी क्षेत्रलाई जेन जेड आन्दोलनमा घाइते युवाहरूलाई झैँ तत्काल राहत, सहयोग पुर्याउँदै आत्मविश्वासको जगेर्ना गर्न सरकार कुनै कसर बाँकी नराख्ने प्रतिबद्धता व्यक्त गरिन्।
प्रधानमन्त्री कार्कीले गत भदौ २३ र २४ गतेको आन्दोलनले नेपाललाई एक नवीन म्याण्डेट दिएको बताउँदै नेपाल अब एक पछौटे मुलुकको यथास्थितिमा बस्न नसक्ने स्पष्ट पारिन्।





