
काठमाडौं । प्रधानमन्त्री सुशीला कार्कीले सहकारी ठगहरूलाई जुनसुकै अवस्थामा पनि अहिलेकै सरकारले कारबाही गर्ने प्रतिबद्धता जनाएकी छिन् ।
बिहीबार प्रधानमन्त्री तथा मन्त्रिपरिषद् कार्यालयमा मन्त्री, सचिव, संकटग्रस्त समस्या समाधान आयोगका सदस्य, सहकारी समस्या नियमन प्राधिकरण, सहकारी पीडित बचतकर्ता संरक्षण राष्ट्रिय महासंघका सदस्यहरूलाई एकै ठाउँमा राखेर छलफल गरेकी थिइन् ।
सो छलफलमा उनले सहकारी ठगी गरेर हिँड्नेहरूलाई कुनै हातमा छाड्न नहुने बताइन् ।
‘ठगेर खाएर हिँड्नेहरूलाई कुनै हालतमा छाड्न हुँदैन । यिनीहरू महंगा सुनका घडी लगाएर हिँड्छन् । गाडी चढेर हिँड्छन् । नक्कली डिभोर्स गराएर हिँड्छन्,’ प्रधानमन्त्रीको भनाइ उद्धृत गर्दै स्रोतले भन्यो, ‘उनीहरूलाई छाड्न मिल्दैन । बरु कानुनमा समस्या छ भने त्यो पनि संशोधन गरौं ।’
अहिलेकै सरकारले यो समस्या समाधान नगरे अरु कसैले पनि नगर्ने उनको भनाइ थियो । सहकारी ठगीमा परेकाहरूको घरजग्गा नै लिलाम गरेर भए पनि पीडितको बचत फिर्ता हुनुपर्ने उनको भनाइ थियो ।
‘हामीले नगरे कसले गर्ने ? यही सरकारले गर्छ । पीडित चाहीँ सडकमा रोएर हिँड्ने, अनि जो ठग हो त्यो चाहीँ सुकिलो मुकिलो भएर हिँड्ने । यस्तो हुन हुँदैन,’ प्रधानमन्त्रीले भनेकी छिन्, ‘यो सभ्य समाजको परिचय होइन । उनीहरूको घरजग्गा लिलाम गरेर हुन्छ कि, विदेशमा कोही छ भने पनि सम्पर्क गरेर अघि बढ्नुपर्छ ।’
झापा- झापाको गौरादह नगरपालिका-९ स्थित सिस्नेखोलामा माछा मार्नेे क्रममा डुबेर बिहीबार दिउँसो तीन जना बालिकाको मृत्यु भएको प्रहरीले जनाएको छ ।
मृत्यु हुनेमा स्थानीय अञ्जु मगरका दुई छोरी सात वर्षीया सुष्मा, नौ वर्षीया स्वीकृति र निर्मला परियारकी ११ वर्षीया छोरी रोश्नी छन् । उनीहरूको माछा मार्ने क्रममा खोला डुबेर मृत्यु भएको जिल्ला प्रहरी कार्यालयले जनाएको छ ।
प्रहरीले घटनास्थल पुगिसकेको र थप अनुसन्धान भइरहेको जनाएको छ ।
काठमाडौं । सरकारले केपी शर्मा ओलीको पालामा नियुक्त भएका राजदूतहरूलाई फिर्ता बोलाउने भएको छ ।
त्यस सम्बन्धी निर्णय आजको मन्त्रिपरिषद् बैठकबाट गर्ने तयारी छ । मन्त्रिपरिषद्को बैठक अहिले जारी छ ।
सरकारले फिर्ता बोलाउने तयारी गरेका राजदूतहरूमा भारतका लागि डा. शंकरप्रसाद शर्मा, चीनका लागि कृष्णप्रसाद ओली, अमेरिकाका लागि लोकदर्शन रेग्मी, बेलायतका लागि चन्द्रकुमार घिमिरे, इजरायलका लागि धनप्रसाद पण्डित, जर्मनीका लागि शाहिल रुपाखेती, स्पेनका लागि शनिल नेपाल, रूसका लागि जंगब चौहान लगायत छन् ।
यसैगरी मलेसियाका लागि नेत्रप्रसाद तिम्सिना, कतारका लागि रमेशचन्द्र पौडेल, साउदी अरेबियाका लागि डा. नरेशविक्रम ढकाल लगायत पनि सरकारले फिर्ता बोलाउन लागिएका राजदूहरुको सूचीमा रहेको स्रोतले बतायो ।
केही राजदूतहरूलाई फिर्ता हुने तयारीका लागि परराष्ट्र मन्त्रालयमार्फत् सन्देश पठाइसकिएको स्रोतले बतायो ।
काठमाडौं । नेपाली कांग्रेसका सभापति तथा पूर्वप्रधानमन्त्री शेरबहादुर देउवाको बूढानीलकण्ठस्थित निजी निवासबाट बुद्ध मूर्तिको चोरी भएको घटनामा प्रहरीले एक जनालाई पक्राउ गरेको छ ।
पक्राउ पर्नेमा चितवनको कालिका नगरपालिका-६ टाँडी घर भएका २९ वर्षीय विजय लामा रहेका छन् । महानगरीय प्रहरी परिसर काठमाडौँले लामालाई काठमाडौँको पेप्सीकोलाबाट पक्राउ गरेको हो । उनको डेरामा गरिएको खानतलासीका क्रममा चोरी भएको बुद्ध मूर्तिसहित गणेशको मूर्ति र एउटा शंख पनि बरामद भएको प्रहरीले जनाएको छ ।
प्रारम्भिक अनुसन्धानबाट खुलेअनुसार, लामाले गत भदौ २४ गते जेनजी प्रदर्शनका क्रममा देउवाको घरबाट ती सामग्री लुटेको आशंका गरिएको छ । उक्त दिन विभिन्न माग राखी युवाहरूको एक समूहले देउवा निवासअगाडि प्रदर्शन गरेको थियो । प्रहरीले घटनाको थप अनुसन्धान गरिरहेको छ ।
पक्राउ परेका लामालाई हाल भद्रकालीस्थित जिल्ला प्रहरी परिसर काठमाडौँको हिरासतमा राखिएको छ । प्रहरीले चोरी र अन्य सम्भावित संलग्नताका विषयमा विस्तृत अनुसन्धान गरिरहेको जनाएको छ ।
काठमाडौं । नेपाल आयल निगमले उपभोक्तालाई राहत दिँदै पेट्रोलको खुद्रा बिक्री मूल्य प्रतिलिटर दुई रुपैयाँले घटाएको छ । यो नयाँ मूल्य आजदेखि देशभर लागू भएको छ । यद्यपि, डिजेल र मट्टितेलको मूल्य भने यथावत राखिएको निगमले जनाएको छ ।
नयाँ मूल्यसूची अनुसार, अब काठमाडौँ उपत्यका, पोखरा र दीपायलमा पेट्रोल प्रतिलिटर १५९ रुपैयाँमा उपलब्ध हुनेछ । यसैगरी, सुर्खेत र दाङमा १५८ रुपैयाँ तथा देशका अन्य क्षेत्रमा १५६ रुपैयाँ ५० पैसा कायम भएको छ ।
चाडपर्वको मुखमा उपभोक्तालाई पर्न सक्ने आर्थिक भारलाई मध्यनजर गर्दै निगमले मूल्य घटाउने निर्णय गरेको हो । ‘इण्डियन आयल कर्पोरेशन (आईओसी) बाट मूल्य बढेर आए पनि चाडपर्वलाई ध्यानमा राख्दै पेट्रोलियम पदार्थको मूल्यवृद्धिले आम उपभोक्तामा पर्ने चाप कम गर्न र मूल्य स्थिरता कायम गर्न यो कदम चालिएको हो,’ निगमद्वारा जारी विज्ञप्तिमा उल्लेख छ ।
यसअघि पनि निगमले अन्तर्राष्ट्रिय बजारमा कच्चा तेलको मूल्यमा हुने उतारचढाव अनुसार मूल्य समायोजन गर्दै आएको थियो । हालको मूल्य घटाउने निर्णयले दशैँ, तिहारजस्ता ठूला चाडपर्वमा यात्रा गर्ने र दैनिक जीवनमा पेट्रोलको प्रयोग गर्ने लाखौँ उपभोक्तालाई प्रत्यक्ष लाभ पुग्ने देखिन्छ ।
काठमाडौं । गत भदौ २४ गते संघीय राजधानीसहित देशभर भएको प्रदर्शनका क्रममा ‘आपराधिक गतिविधि’मा संलग्न व्यक्तिहरू धमाधम पक्राउ पर्न थालेका छन् । आन्दोलनमा सहभागीमाथि धरपकड नगर्न गृह मन्त्रालयले दिएको निर्देशनपछि सुस्ताएको प्रहरी कारबाही गौरीबहादुर कार्की आयोगको स्पष्टीकरणसँगै पुनः सक्रिय भएको हो ।
आयोगका सदस्य विज्ञानराज शर्माले फौजदारी कसुरमा संलग्नलाई कारबाही गर्न आयोगको प्रतिवेदन कुर्नु नपर्ने बताएपछि प्रहरीले अनुसन्धान प्रक्रियालाई तीव्रता दिएको छ । प्रदर्शनका क्रममा बन्दुक तेर्स्याउँदै गरेको भाइरल तस्बिरमा देखिएका राजु परियार (सम्राट) लाई उपत्यका अपराध अनुसन्धान कार्यालयले बुधबार पक्राउ गरेको छ । प्रहरीका अनुसार, परियारले सर्वोच्च अदालतमा ड्युटीमा रहेका प्रहरीले छाडेको हतियार लिएर गएको बयान दिएका छन्, यद्यपि उनले हतियार नेपाली सेनालाई बुझाएको भनाइको कुनै प्रमाण भेटिएको छैन ।
एसएसपी रमेश बस्नेतका अनुसार, प्राविधिक विश्लेषणका आधारमा प्रहरीले आन्दोलनलगत्तैदेखि परियारको खोजी गरिरहेको थियो । परियारको आपराधिक पृष्ठभूमि पनि सार्वजनिक भएको छ । उनीविरुद्ध ज्यान मार्ने उद्योग, ठगी र अभद्र व्यवहार लगायतका दर्जनौं मुद्दा दर्ता छन् । आन्दोलनको आडमा पटके अपराधीहरूले मौकाको फाइदा उठाएको देखिन्छ ।
जिल्ला प्रहरी परिसर, काठमाडौंले ‘जेनजी’ को नाममा कर्मचारीलाई धम्क्याएको आरोपमा अर्जुनबहादुर शाहीलाई पक्राउ गरेको छ । उपत्यका प्रहरी प्रमुख दानबहादुर कार्कीका अनुसार, शाहीले विभिन्न सरकारी कार्यालयका प्रमुखलाई भेटेर केरकार गर्ने र युट्युबरका साथमा गएर कर्मचारीको राजीनामा माग्ने गरेका थिए । नागरिक उड्डयन प्राधिकरण र नेपाल वायुसेवा निगमका कर्मचारीले उनको गतिविधिबारे गुनासो गरेपछि प्रहरीले अनुसन्धान थालेको हो ।
शाही पनि वैदेशिक ठगी र बैंकिङ कसुरका आरोपी रहेको खुलेको छ । उनलाई यसअघि पनि कोरिया पठाउने भन्दै ठगी गरेको आरोपमा पक्राउ गरिएको थियो । इलाम २ को उपचुनावमा उम्मेदवार बनेका शाहीको आपराधिक संलग्नताले आन्दोलनको आवरणमा हुने आपराधिक क्रियाकलापलाई थप प्रस्ट पारेको छ ।
महाराजगन्जमा खटिएका असई मिलन राय र जवान उत्तम थापाको हत्यामा संलग्न आरोपमा २८ वर्षीय युवराज क्याप्छाकी र २१ वर्षीय सोनाम तामाङ (बुद्धिलाल थिङ) विरुद्ध बुधबार अदालतमा मुद्दा दर्ता भएको छ । प्रहरीले बुझाएको रायसहितको प्रतिवेदनका आधारमा जिल्ला सरकारी वकिलको कार्यालय, काठमाडौंले दुवै जनाविरुद्ध ज्यान र आपराधिक उपद्रव गर्न नहुने कसुरमा सजाय माग दाबी गरेको छ ।
प्रहरीको बयानमा, आन्दोलनकारीले प्रहरी जवान थापालाई कार्यालयबाटै लछारपछार गर्दै बाहिर ल्याएर भाटभटेनी सुपर मार्केट पछाडिको सडकमा लाठी, रड, चिर्पट, इँटा, ढुंगा लगायतका हतियारले अन्धाधुन्ध प्रहार गरेको उल्लेख छ । प्रहरीले संकलन गरेको कल डिटेल रेकर्ड र सरकारी वकिलको रोहबरमा आरोपित तामाङले दिएको बयानले घटनामा उनीहरूको संलग्नता पुष्टि गरेको छ । असई होमबहादुर विकले आफू लगायतका प्रहरी अधिकारीहरूले कार्यालयको माथिल्लो तलामा बसेर नेपाली सेनाको हेलिकोप्टरमार्फत उद्धारका लागि गुहार मागेको बयान दिएका छन् । २४ भदौमा प्रहरी प्रभाग, कोटेश्वरमा प्रहरी सहायक हवल्दार अमृत गुरुङको पनि हत्या भएको थियो ।
प्रहरीले टेकुस्थित उपत्यका अपराध अनुसन्धान कार्यालयमा प्रवेश गरी तोडफोड र आगजनी गर्ने भारतीय नागरिक निरज पोद्दार, दोलखाका लक्ष्मण थामी र काठमाडौंका सजन तामाङलाई पनि पक्राउ गरेको छ । उनीहरू कार्यालयबाट लुटिएको हतियारसहित प्रदर्शनमा उत्रिएका थिए । सरकारले आन्दोलनको नाममा भएको अराजकता र आपराधिक गतिविधिलाई शून्य सहनशीलता अपनाउने रणनीति लिएको छ ।
काठमाडौं । ठेक्का सम्झौता गर्ने तर काम नगरेर वर्षोंदेखि अलपत्र पारी रुग्ण बनाइएका सिँचाइतर्फका ठेक्का तोड्न सुरु गरिएको छ । यसैबीच बबई सिँचाइ आयोजनाले करिब ६ वर्ष अघि अमन कन्स्ट्रक्सन कम्पनी गुलरिया—५सँग गरिएको ठेक्का सम्झौता तोड्ने बिहीबार सार्वजनिक सूचना जारी गरेको छ ।
आयोजनाले कम्पनीसँग नहर मर्मत, कमाण्ड क्षेत्र संरक्षण, भवन मर्मतलगायतका काम गर्न आर्थिक वर्ष २०७७÷७८मा ठेक्का सम्झौता गरेको थियो । ६वटा ठेक्कामध्ये चारको निर्माण प्रगति शून्य छ । एउटाको ३० र अर्कोको ५५ प्रतिशत प्रगति रहेको छ ।
ऊर्जा, जलस्रोत तथा सिँचाइ, भौतिक पूर्वाधार तथा यातायात र शहरी विकास मन्त्री कुलमान घिसिङले ठेक्का लिने तर काम नगर्ने र आयोजना अलपत्र पार्ने प्रवृत्ति अन्त्यका लागि रुग्ण ठेक्का तोड्न मातहतका निकायलाई निर्देशन दिएका थिए ।
आयोजनाले पटक—पटक सूचना प्रकाशन गर्दासमेत सम्झौता बमोजिम काम सुरु नगरी बीचैमा छोडी ठेक्काको म्याद समाप्त हुँदासम्म पनि काम सम्पन्न गर्नेतर्फ कुनै जासो नदिएको जनाएको छ । ठेक्का सम्झौता अन्त्य गरी कारबाहीको प्रक्रिया अगाडि बढाउनुनपर्ने कुनै ठोस कारण भएमा १५ दिनभित्र प्रमाणसहित सम्बन्धित आधिकारिक व्यक्ति आयोजना कार्यालयमा उपस्थित हुन सूचना जारी गरिएको छ ।पेस गरिएका प्रमाण नियमसङ्गत भरपर्दो वा चित्त बुझ्दो नभएमा सम्झौता र सार्वजनिक खरिद कानूनमा भएको व्यवस्था बमोजिम कार्यसम्पादन जमानत तथा धरौटी बापत राखिएको रकम जफत र कालोसूचीमा राख्ने प्रक्रिया अगाडि बढ्नेछ ।
सिँचाइ विभागअन्तर्गत राष्ट्रिय गौरबका भेरी बबई तथा सुनकोशी मरिण वहुउद्देश्यीयसहित २५ आयोजनाका ठेक्का रुग्ण छन् । त्यसमध्ये ६ वटाको ठेक्का तोड्ने प्रक्रिया अगाडि बढाइएको हो ।
काठमाडौँ । हमासले रेडक्रसमार्फत इजरायललाई हस्तान्तरण गरेको मृत बन्धकको शव कुनै पनि बन्धकको नभएको पाइएको छ । इजरायली सेनाले शवको परिक्षणपछि एक शव कुनै पनि बन्धकको नभएको बताएको छ । इजरायली सेनाले हमासले हस्तान्तरण गरेको चौथो शव बन्धकको पुष्टि हुन नसकेको बताएको हो ।
साथै इजरायली सेनाले बन्धकको शव फिर्ता गर्ने क्रममा आवश्यक तयारी र ध्यान दिएर गर्न समेत आग्रह गरेको छ । गत सोमबार दिउसोसम्म हमासले सबै जीवित र मृत बन्धक हस्तान्तरण गरिसक्नु पर्नेमा सबै जीवित बन्धक रिहा गरेपनि मृत बन्धकको शव हस्तान्तरणको प्रक्रिया अहिले पनि जारी रहेको छ ।
यसैबीच इजरायली प्रधानमन्त्री बेन्जामिन नेतान्याहूले हमासलाई बन्धक र शवहरूको रिहाइको लागि सम्झौताका सर्तहरू पूरा गर्न माग गरेका छन् ।
त्यस्तै अर्कोतर्फ अमेरिकी राष्ट्रपति डोनाल्ड ट्रम्पले हमासले हतियार छोड्न तयार नभएमा फेरी कारवाही गर्ने चेतावनी दिएका छन् । ट्रम्पले हमासले आफ्नो जिम्मेवारी समयमा पूरा गरेन भने, इजरायलले युद्ध पुनः सुरु गर्न सक्ने समेत बताएका छन् ।
नेपाल प्रहरीको ३३ औँ महानिरीक्षकको पदका लागि प्रहरी अतिरिक्त महानिरीक्षक दानबहादुर कार्कीको चर्चा सुरु भएको छ। वर्तमान महानिरीक्षक चन्द्रकुवेर खापुङ आउँदो २६ कात्तिकमा अनिवार्य अवकाशमा जाने भएकाले कार्की बलियो प्रत्याशीका रूपमा देखा परेका छन्।
मुख्यगरी बसन्त कुँवरसहित तीन जना अधिकारी खापुङको पालाबाट वरिष्ठताको आधारमा चर्चामा आएका थिए। राजनीतिक रूपमा संक्रमणकालीन अवस्थामा कार्कीले प्रहरी संगठनलाई नेतृत्व प्रदान गर्ने सक्षम व्यक्तिका रूपमा आफ्नो क्षमता प्रमाणित गरिसकेका छन्। वरिष्ठताको क्रममा उनी पहिलो नम्बरमा रहेका कारण अबको एक महिनाभित्रै संगठनको नेतृत्वमा पुग्ने अपेक्षा गरिन्छ।
संगठनभित्र अत्यन्त रुचाइएका, व्यावसायिक र स्वच्छ छविका धनी एआईजी कार्कीले राजनीतिक विवादबाट सधैं आफूलाई टाढा राखेका छन्, जसले नेतृत्वमा पनि उनको राम्रो छवि निर्माण गरेको छ।
कार्कीले राजधानी काठमाडौं, प्रमुख पर्यटकीय नगरी पोखरा, कपिलवस्तु र लुम्बिनी प्रदेशका विभिन्न जिल्लाहरूमा सफल कमाण्ड गरिसकेका छन्। उनी नक्कली भुटानी शरणार्थी प्रकरणको सफल अनुसन्धानमा संलग्न अधिकारीमध्ये एक हुन्। जिल्ला प्रहरी परिसर काठमाडौं प्रमुख हुँदा कार्कीले उक्त प्रकरणमा उच्च तहसम्मका व्यक्तिलाई कानुनी दायरामा ल्याएका थिए। संगठनमा व्यापक राजनीतीकरण र आन्तरिक गुटबन्दीले प्रहरीको छवि धुमिल भएको बेला कार्कीले यस अनुसन्धानमार्फत संगठनको साख जोगाएका थिए।
प्रहरीको केन्द्रीय प्रवक्ता तथा मानवस्रोत विभाग र काठमाडौं उपत्यका प्रहरी प्रमुखको जिम्मेवारी सम्हालिरहेका कार्की ठूला जनसभा, आन्दोलन वा विपद् व्यवस्थापनजस्ता संवेदनशील अवस्थामा पनि आफ्नो चतुर निर्णय क्षमताका कारण संगठनभित्र निर्विवाद अधिकारीका रूपमा परिचित छन्। उदाहरणका लागि भदौ २४ गतेको जेनजी आन्दोलनको समयमा कार्कीको नेतृत्वमा सयौँ प्रहरीको ज्यान जोगिएको थियो।
त्यसैगरी, दशैँपछिको निरन्तर वर्षा र बाढी–पहिरोको विपद्मा कार्की फिल्डमै सक्रिय थिए। जेनजी विद्रोहका कारण प्रहरीको मनोबल खस्किरहेका बेला उनी आफैं छाता ओढेर फिल्डमा निस्किए र काठमाडौं उपत्यकाबासीलाई सुरक्षित राख्न रणनीति अवलम्बन गरे। यस कारण काठमाडौं उपत्यकामा जनधनको क्षति न्यून भयो।
जेनजी आन्दोलनको सन्दर्भमा अतिरिक्त महानिरीक्षक टेकबहादुर तामाङले अनिवार्य अवकाश पाएपछि काठमाडौं उपत्यका प्रहरी कार्यालय भदौ १९ गतेदेखि प्रमुखबिहीन थियो। विकल्पमा नायब महानिरीक्षक ओम रानाले कमाण्ड सम्हालिरहेका थिए। भदौ २३ गते मन्त्रिपरिषद्को निर्णय अनुसार अतिरिक्त महानिरीक्षक दानबहादुर कार्कीलाई काठमाडौं उपत्यका प्रहरी कार्यालयको प्रमुखमा खटाइएको थियो।
कार्कीले बल प्रयोगभन्दा पनि संवाद, तथ्य र रणनीतिक संयोजनमार्फत भीड नियन्त्रण र समस्याको समाधानमा ध्यान दिए। यसले काठमाडौं उपत्यकामा थप जनधनको क्षति हुनबाट जोगाएको छ। हालको अवस्थामा प्रहरीका भौतिक संरचना, लत्ता–कपडा र खाने गास जलेर नष्ट भए पनि नेपाल प्रहरी आफ्नो काममा जिम्मेवारीपूर्वक खटिरहेको देखिन्छ।
२०५४ चैत १८ मा प्रहरी निरीक्षक पदमा नियुक्त भएका कार्की अहिलेसम्म एकपटक पनि दसैंमा घर गएको छैनन्। यसले उनको सेवाप्रतिको कर्तव्यनिष्ठता प्रष्ट देखाउँछ।
गुल्मीको मालिका गाउँपालिका वडा नम्बर ७ मा जन्मेका कार्की बाल्यकालदेखि नै लगनशील र मेहनती थिए। विद्यालय जीवनमा जिज्ञासु र मेधावी विद्यार्थीका रूपमा चिनिएका उनी पढाइसँगै अतिरिक्त गतिविधिमा पनि सक्रिय थिए। सुरुमा कूटनीतिक सेवामा जाने सोच बनाए पनि पछि नेपाल प्रहरीको निरीक्षक पदमा नियुक्त भए। उनको ब्याचबाटै नेपाल प्रहरीमा लोकसेवा आयोगको परीक्षा प्रणाली सुरु भएको हो।
संगीत क्षेत्रमा पनि विशेष रुचि राख्ने एआईजी कार्कीले हालसम्म तीन–चार वटा गीत बजारमा ल्याइसकेका छन्, जसमा पछिल्लो गीत प्रहरी संगठनसँग सम्बन्धित छ।
काठमाडौँ । नेपाल अर्को वर्ष हुने टी–२० विश्वकपमा छनोट भएको छ ।
आइसिसी टी–२० विश्वकप एसिया र इस्ट एसिया प्यासिफिक छनोटबाट नेपाल टी–२० विश्वकपमा छनोट भएको हो ।
एसिया र इस्ट एसिया प्यासिफिक छनोटका दुई खेल अगाबै नेपाल विश्वकपमा छनोट भएको हो ।
आज भएको खेलमा युएईले सामोआलाई पारजित गरेसँगै नेपाल दुई खेल अगाबै विश्वकपमा स्थान पक्का गरेको हो । नेपाल लगातार दोस्रो पटक विश्वकपमा छनोट भएको हो ।
आजै भएको खेलमा कुवेतले जापानलाई हराएको थियो । त्यसपछि यूएईले सामोआलाई हराए नेपाल र ओमान विश्वकपमा छनोट हुने समिकरण बनेको थियो ।
युएईले सामाओलाई पराजित गरेसँगै नेपाल र ओमान विश्वकपमा छनोट भएका हुन् । नेपाल र ओमान पनि आजै खेल्दै छन् ।





