
राष्ट्रिय परीक्षा बोर्डले माध्यमिक शिक्षा उत्तीर्ण (कक्षा १२) परीक्षा यही वैशाख २१ देखि आगामी जेठ २ गतेसम्म नियमित रूपमा सञ्चालन हुने स्पष्ट पारेको छ ।
परीक्षाका सन्दर्भमा अनधिकृत तवरले विभिन्न सामाजिक सञ्जालमा बोर्डको लोगो प्रयोग गरी प्रचार भएकामा आपत्ति प्रकट गर्दै भ्रामक सूचनाका पछाडि नलाग्न आग्रह गरिएको छ । यसअघि बोर्डले कक्षा १२ को परीक्षा यही वैशाख ११ गतेदेखि गर्ने समयतालिका निर्धारण गरेको थियो । नेपाल शिक्षक महासंघ आन्दोलनमा रहेका कारण परीक्षाको मिति सारिएको थियो ।
पछिल्लो पटक महासंघसँग सहमति भएकाले अब भने निधारित परीक्षा केन्द्रहरूमा परीक्षा सञ्चालन हुने बोर्डले जनाएको छ । बोर्डले आफ्नो कुनै फेसबुक पेज नभएको र आधिकारिक सूचना वेबसाइटमार्फत सार्वजनिक हुने स्पष्ट पारेको छ ।
बोर्डले परीक्षाका बाँकी सबै काम पूरा गरेर तोकिएको मितिमा मर्यादित तवरले सम्पन्न गराउन सबै केन्द्राध्यक्ष, शिक्षक, कर्मचारी एवं सुरक्षा निकाय, अभिभावक, सञ्चारकर्मी र सम्पूर्ण सरोकारवालालाई एक सूचनामार्फत आग्रह गरेको छ ।
भारतको कलिंगा इन्स्टिच्युट अफ इन्डस्ट्रियल टेक्नोलोजी (केआईआईटी) मा अर्की नेपाली विद्यार्थी प्रिसा साह मृत फेला परेकी छिन् । प्रिसा मृत फेला परेको खबरपछि परराष्ट्र मन्त्रालयले छानबिनका लागि कूटनीतिक पहल थालेको छ ।
परराष्ट्रमन्त्री डा. आरजु राणा देउवाले हिजो नै भारत सरकार, ओडिसा सरकारका उच्च अधिकारीहरू र दिल्लीस्थित नेपाली दूतावासमार्फत घटनाको सत्य तथ्य छानबिन गर्न कूटनीतिक पहल थालेको जानकारी दिएकी छिन्। उक्त विश्वविद्यालयको स्नातक तह प्रथम वर्षमा अध्ययनरत नेपाली छात्रा वीरगञ्जकी प्रिसा बिहीबार साँझ आफ्नै कलेज होस्टलको कोठामा पंखामा झुण्डिएको अवस्थामा मृत फेला परेकी थिइन् । उनी बी.टेक साइन्सकी विद्यार्थी थिइन् ।
यसबारे प्रिसाका आमा–बाबुलाई पनि जानकारी गराइएको छ । उनीहरू वीरगञ्जबाट आज भुवनेश्वर पुग्दैछन्। यसपछि मात्र पोस्टमार्टम गरिने छ । नयाँ दिल्लीस्थित नेपाली दूतावासका कन्सुलर, एसएसपी सञ्जीव शर्मा दासले घटनाको अनुसन्धान सुरु भइसकेको जानकारी दिएका छन् । मृतक शाहको घरबाट परिवार नआउन्जेलका लागि पोस्टमार्टम नगर्ने गरी शव सुरक्षित गरिएको उनले बताए ।
भारतको सबैभन्दा ठूलो विद्यार्थी संगठन अखिल भारतीय विद्या परिषद् (एबीभीपी) ले केआईआईटीमा नेपाली विद्यार्थी प्रिशा शाह मृत भेटिएको घटनालाई अत्यन्त पीडादायी भनेको छ । यस्तो घटना बारम्बार हुँदा पनि राज्य सरकार किन मौन छ भन्ने प्रश्न गर्दै एबीभीपीका राष्ट्रिय महासचिव वीरेन्द्र सिंह सोलाङ्कीले केआईआईटीविरूद्ध तत्काल कडा कारबाही गर्न राज्य सरकारसँग माग गरेको छ । यसअघि गत ४ फागुनमा सोही विश्वविद्यालयमा अध्ययनरत २० वर्षीय नेपाली विद्यार्थी प्रकृति लम्साल पनि होस्टलमा मृत फेला परेकी थिइन् ।
भारतको उडिसा राज्य सरकारले कलिंगा इन्स्टिच्युट अफ इन्डस्ट्रियल टेक्नोलोजी (केआईआईटी)मा नेपाली विद्यार्थी प्रिसा साह मृत फेला परेको घटनाबारे छानबिन सुरु भएको जानकारी दिएको छ ।
स्थानीय प्रहरीलाई बिहीबार राति ८ः१० बजे घटनाबारे जानकारी आएको र लगत्तै प्रहरी आयुक्त र राजस्व डिभिजनल कमिश्नर लगायतका वरिष्ठ अधिकारीहरू घटनाको कारणबारे सोधपुछ र अनुसन्धानमा जुटेको उडिसाको मौलिक तथा जनसम्पर्क विभागले एक विज्ञप्तिमार्फत जानकारी दिएको हो ।
उक्त विश्वविद्यालयको स्नातक तह प्रथम वर्षमा अध्ययनरत नेपाली छात्रा वीरगन्जकी प्रिसा साह बिहीबार साँझ फेला परेकी हुन् । उनको शव कलेज होस्टेलमा फेला परेको थियो ।
गत ४ फागुनमा सोही विश्वविद्यालयमा अध्ययनरत २० वर्षीय नेपाली विद्यार्थी प्रकृति लम्साल पनि होस्टलमा मृत फेला परेकी थिइन् । साह प्रथम वर्षको परीक्षा दिनका लागि विश्वविद्यालयको होस्टेलमै बस्दै आएको बताइएको छ।

मेष
जोश जाँगरका बावजुद काम बन्नेछ । केही छोटो दूरीको यात्रा तय हुनेछ । पहिलेको सफलताले थप हौसला जगाउनेछ । सामाजिक कामको दायित्व बढ्नेछ । कूटनीतिक नियोगको सहयोग मिल्नेछ ।
वृष:
सानो उपलब्धिका लागि बढी रकम खर्चनुपर्ने देखिन्छ । स्वतःसिद्ध अधिकारसमेत बिनासंघर्ष प्राप्त नहुन सक्नेछ । बोल्दा निकै विचार पुर्याउनुहोला । कला र सांस्कृतिक क्षेत्रमा रुचि पनि बढ्नेछ ।स्वास्थ्य प्रति सजगता अपनाउनु पर्ने समय छ ।
मिथुन:
महत्वपूर्ण काम हात लाग्ने समय छ । मान सम्मान मिल्नेछ । सन्तानबाट शुभ समाचार प्राप्त हुनेछ । सहयोगीहरूले साथ दिनेछन् र काममा सोचेजस्तै सफलता मिल्नेछ ।
कर्कट:
समयले साथ नदिंदा हुनै लागेको कामहरु बिग्रने तथा काम अरुकै पोल्टोमा जानेछन् । लगानी गर्नका लागि केही समय पर्खनु नै राम्रो हुनेछ । जेजसरी सजिलो हुन्छ, उसरी नै आफूलाई प्रस्तुत गरिने समय रहेको छ ।
सिंहः
प्रयत्न गर्दा लक्ष्य प्राप्त हुनुका साथै दिगो लाभ हुने काम प्रारम्भ हुनेछ । फाइदाको स्रोत पहिल्याउन सकिनेछ । विपरीत लिङ्गिको साथ सहयोग मिल्नेछ ।
कन्या:
व्यवसाय र रोजगारीको क्षेत्र राम्रो छ । लगानीमा रहेको रकम उठाउन गरिएको प्रयास सफल हुनेछ । सामाजिक कामबाट प्रशंसा प्राप्त हुनेछ । विद्यार्थी वर्गहरूको नयाँ रचना तथा ज्ञानमा वृद्धि हुनेछ ।
तुला:
केही सामाजिक जिम्मेवारीसमेत प्राप्त हुने सम्भावना छ । मतभेदले आफन्तमा भने खटपटी निम्त्याउन सक्नेछ । तत्काल धेरै फाइदा नभए पनि पछिका लागि काम गर्ने समय छ ।
बृश्चिक:
विशेष उपलब्धिका लागि भने केही समय प्रतीक्षा गर्नुपर्ला । समस्या र अर्थअभाव एकसाथ सामना गर्नुपर्ने दिन रहेको छ । स्वास्थ्य कमजोर रहनाले औषधि–उपचारमा खर्च बढ्नेछ ।
धनुः
दाम्पत्य जीवन सुखद् तथा समृद्ध बन्ने देखिन्छ । रमाइलो यात्रामा निस्कन सक्नुहुनेछ । आतिथ्यपूर्ण सम्मान र मीठो भोजनको प्राप्ति हुनेछ । लगनशीलताले महत्वकांक्षी योजनाहरू पूरा हुनेछन् ।
मकरः
प्रतिस्पर्धीलाई पछि पार्न सकिने छ । व्यापार तथा कृषि क्षेत्रमा मनग्य धन लाभ हुनेछ । सफलताले उत्साह जगाउनेछ । मनमा भएको बोझ हट्दा तनमन हल्का भएको अनुभूति हुनेछ ।
कुम्भः
बौद्धिक र प्राज्ञिक क्षमतामा ह्रास आउनेछ । सृजनात्मक कामबाट आत्मसन्तुष्टि मिल्नसक्दैन । मानसिक खिन्नता र वैराग्य जाग्नेछ । केही विचार पुर्याएर कार्यगर्नुपर्ने दिन रहेको छ ।
मीनः
संगोलको सम्पत्ति र साझेदारीमा वादविवाद हुने योग छ । नियमित काममा समेत समय दिन नसक्दा अरूको विश्वास गुम्न सक्नेछ । झन्झटिलो काममा संलग्न हुनुपर्ने समय छ ।
काठमाडौँ । नेसपा (नयाँ शक्ति)का अध्यक्ष डा. बाबुराम भट्टराईले केही वर्षयता काँग्रेस र कम्युनिष्टहरुले सत्ता चलाएकै कारण देश कंगाल हुँदै भएको आरोप लगाएका छन्।
जनवर्गीय संगठन नेपाल समाजवादी ट्रेड युनियन महासंघको आयोजना गरेको कार्यक्रमलाई सम्बोधन गर्दै कम्युनिष्ट भन्नेहरू नै भ्रष्टाचारमा लिप्त भएको जिकिर गरेका हुन्।
उनले भने, ‘राजनीति भनेको तमासाजस्तो भएको छ कहिले, केही मान्छेहरूलाई झूटा सपना देखाउने, चुनाव जित्ने अनि सत्तामा गएर लूट मच्याउनेलाई राजनीति भन्ने गरिएको छ। देशलाई विकल्प दिने भनेर आएका यी मुख्य तीन दल नै पालैपालो सरकार चलाएर श्री ३ भएर बसेका छन्, त्यसैले अब यी सबैको विकल्पमा नयाँ शक्तिको आवश्यकता छ।’
उनले प्रधानमन्त्री केपी ओली, काँग्रेस सभापति शेरबहादुर देउवा र माओवादीका अध्यक्ष ‘प्रचण्डले सत्ता आलोपालो चलाएका तीन नेताहरूकै कारणले जनतामा वितृष्ण बढेकै कारणले अहिले श्री ३ भन्दा श्री ५ नै ठिक हो कि भन्ने पर्न थालेको बताए।
पेस्तोल पड्काउँदै नाचेको भिडिओ भाइरल बनेपछि प्रहरी सोधपुछमा परेकी जनता समाजवादी पार्टी (जसपा) नेपालकी केन्द्रीय सदस्य डा. बबी सिंह यादवलाई प्रहरीले छाडेको छ ।
जिल्ला प्रहरी कार्यालय सप्तरीले उनलाई सोधपुछका लागि भन्दै कार्यालयमा बोलाएको थियो । सोधपुछ गरेपछि प्रारम्भिक अनुसन्धानका क्रममा सक्कली नभई बारुद मात्रै पड्किने खालको भएपछि उनलाई छाडिएको प्रहरीले बताएको छ ।
यादवले सर्लाहीमा हल्दी-मेहेन्दी कार्यक्रममा पेस्तोल पड्काएको खुलेको थियो । पेस्तोल पड्काएको भिडिओ सामाजिक सञ्जालमा भाइरल भएपछि अनुसन्धान अघि बढाइएको थियो । उनकै बयानका आधारमा सर्लाहीको मलंगवा नगरपालिका-२ का अञ्जनी कुमारको घरबाट प्रहरीले पेस्तोल बरामद गरेको थियो ।
काठमाडौं । सीके राउत नेतृत्वको जमत पार्टी र रेशम चौधरी संरक्षक रहेको नागरिक उन्मुक्ति पार्टी (नाउपा) को एकता घोषणा केहि दिन ढिलो हुने भएको छ। रेशम चौधरी पक्राउको घटनाको समीक्षापछि मात्रै जनमत पार्टी र नागरिक उन्मुक्ति पार्टीबीचको एकताको नयाँ मिति तय हुने भएको छ । समीक्षा रिपोर्ट आएपछि मात्रै एकताको मिति तय हुने जनमत पार्टीका उपाध्यक्ष अब्दुल खानले जानकारी दिए ।
‘भएका सहमतिमा दुवै पार्टी प्रतिबद्ध छ । यस घटनाको समीक्षा गरेर रिपोर्ट तयार हुन्छ, त्यसपछि संयुक्त बैठक बसेर प्रक्रिया अघि बढाउँछौँ । र, एकताको मिति तय हुन्छ’, उनी भन्छन् । जनमत पार्टी र नागरिक उन्मुक्ति पार्टीबीच बुधबार एकता गर्ने तय भएको थियो । तर, सर्वोच्च अदालत मुद्दा शाखाका अधिकृत महिमानसिंह विष्टले लेखेको एक अनधिकृत पत्रका आधारमा चौधरी एकता कार्यक्रमस्थल प्रज्ञाभवनबाट पक्राउ परेका थिए । उनको पक्राउपछि एकता सभा नै स्थगित गरिएको थियो ।
अहिलेसम्म एकता घोषणाको अर्को मिति तोकिएको छैन । हिजो चौधरी कैदमुक्त भएपछि दुबै पार्टीका नेताहरू मध्यबानेश्वरको सनराइज क्याफेमा भेटेका थिए । तर, त्यहाँ जनमत पार्टीका अध्यक्ष डा. चन्द्रकान्त (सीके) राउत भने पुगेनन् । पूर्व निर्धारित कार्यक्रममा पुग्नुपरेकाले उनी त्यहाँ पुगेनन् । यसपछि झन् एकता घोषणा अनिश्चित बन्यो । तर, अबको तीन दिनभित्र एकता घोषणा हने नागरिक उन्मुक्तिका प्रवक्ता दामोदर पण्डित बताउँछन् । ‘अबको तीनभित्र एकता भइसक्छ,’ उनले भने, ‘म्याक्सिमम एक हप्ता हो । एक हप्ता लाग्दैन ।’
चौधरी–राउतबीच निरन्तर संवाद
जनमत अध्यक्ष चन्द्रकान्त राउत र नागरिक उन्मुक्ति संरक्षक रेशम चौधरीबीच निरन्तर संवाद भइरहेको छ । उनीहरूका बीचमा कतिपय कुराहरू टुङ्गिन बाँकी रहेको बताइन्छ । चौधरी ‘प्याकेज’ मै घोषणा गरेर जानुपर्ने पक्षमा छन् भने राउत अहिलेका लागि नाम, नेतृत्व, झण्डालगायत मात्रै घोषणा गरेर जानुपर्ने अडानमा छन् । यसमा उनीहरूबीच सहमति भइसकेको छैन ।
यसअघि गत मंगलबार राति १२ बजेसम्म उनीहरूबीच संवाद भएको थियो । तर, यस विषयमा कुरा मिलेको थिएन । चौधरीले ‘उधारो एकता गरिन्न’ भनेका छन् । स्रोतका अनुसार मंगलबार राति १२ बजे उनीहरू बिना सहमति उठेका छन् । अब फेरि पनि उनीहरूबीच संवाद हुने नेताहरूले बताएका छन् । तर, यो विषय एकता घोषणा नै रोक्नेखाले भने नभएको बताइएको छ ।
काठमाडौं । नेपाल विद्यालय कर्मचारी परिषद्ले शिक्षक महासंघ र सरकारबीच भएको सहमतिप्रति आपत्ति जनाएको छ।
विद्यालय कर्मचारीको माग मुद्दा सम्बोधन नगरि महासंघले एकपक्षीय ढंगले सरकारसंग सहमति गरि आन्दोलनका कार्यक्रम फिर्ता गरिएको भन्दै परिषद्ले सहमतिको भत्र्सना समेत गरेको छ।
परिषद्का अध्यक्ष गंगाराम तिवारीले आफूहरूको माग मुद्दाप्रति महासंघ गम्भीर नबनेकाले आफूहरूको आपत्ति रहेको बताए। उनले महासंघको आन्दोलनमा निरन्तर साथ र समर्थन गरिरहको अवस्थामा विद्यालय कर्मचारीकै माग सम्बोधन नहुनु उचित नभएको जिकिर गरे। तिवारीले शिक्षकहरूले आन्दोलनका नाममा शिक्षक महासंघले राजनीति गरेको आरोपसमेत लगाए।
उनले परिषद्को बैठक बसेर आगामी रणनीति तय गर्ने जानकारी दिए। यसअघि बिहीबार नै काठमाडौंमा शिक्षक महासंघको समीक्षा बैठक बसेको थियो। सो क्रममा विद्यालय कर्मचारीहरूले आफूहरूको समस्या समाधान नभएको भन्दै आपत्ति जनाएपछि होहल्लासमेत भएको थियो।
काठमाडौं । जनता समाजवादी पार्टी (जसपा) नेपालकी केन्द्रीय नेता डा. बबीसिंह यादवले पेस्तोल पड्काउँदै नाचेको भिडिओ सामाजिक सञ्जालमा भाइरल भइरहेको छ।
बुधबार सामाजिक सञ्जालमा बाहिरिएको भिडिओमा सिंहसँगै अन्य मानिसहरू पनि नाचिरहेको देखिन्छ । पेस्तोलबाट सिंहले एक राउण्ड ‘हवाई फायर’ गरेको धुवाँ उडेको दृश्य पनि भिडिओमा देखिन्छ । त्यसपछि अर्का युवाले उक्त पेस्तोल समाएको देखिन्छ ।
पेस्तोल पड्काउँदै नाचेको भिडिओ भाइरल भएपछि यसबारे अनुसन्धान अघि बढाइएको जिल्ला प्रहरी कार्यालय सप्तरीका एसपी ढकेन्द्र खतिवडाले जानकारी दिए । अहिलेसम्म उक्त भिडिओ कहाँको र कहिलेको हो भन्ने केही खुलिनसकेको उनले बताएका छन् ।
भिडिओ सार्वजनिक भएपछि सिंहलाई बोलाइएको उनले बताएका छन् । ‘हामीले उहाँलाई बोलाइसकेका छौं । उहाँ पनि आउँछु भन्नु भएको छ । त्यसपछि यसको वास्तविकता आउँला’, एसपी ढकालले भने । यस विषयमा समाचार समेत बनेपछि नेतृ डा. बबीले ‘खेलौना पेस्तोल’ रहेको दाबी गरेकी छन् । सप्तरीको बोदे बरसाइन नगरपालिका–५ की यादव जसपा नेपालकी उपाध्यक्ष समेत रहेका राष्ट्रिय सभा सदस्य मृगेन्द्र सिंह यादवकी छोरी हुन् ।
नेपाली बजारमा आज सुनको मूल्य घटेको छ । आज सुन तोलामा ४ हजार ६ सय रुपैयाँले घटेर एक लाख ८३ हजार ५ सय रुपैयाँ कायम भएको नेपाल सुनचाँदी व्यवसायी महासंघले जनाएको छ ।





