रास्वपा मोरङका जिल्ला सदस्य दुर्गा रेग्मीको निधन भएको छ।
मोरङ क्षेत्र नम्बर २ को मतगणना स्थलमा नै ढलेका थिए। उनको हृदयघातको कारण मृत्यु भएको प्रहरीले जनाएको छ।
बिहानदेखि मतगणना सुरु भएको केही समय पछि ढलेका रेग्मीको घटना स्थलमा नै मृत्यु भएको जिल्ला प्रहरी कार्यालय मोरङका एसपी कवित कटुवालले जानकारी दिए।
काठमाडाैं। मुस्ताङमा कांग्रेसका योगेश गौचन थकाली निर्वाचित भएका छन्।
उनले नेकपा एमालेका उम्मेदवार निवर्तमान सांसद प्रेमप्रसाद तुलाचनलाई पराजित गरेका हुन्। गौचनले ३ हजार ९९२ मत पाउँदा उनका प्रतिद्वन्द्वी तुलाचनले ३०७८ मत पाएका छन्। यस्तै राष्ट्रिय स्वतन्त्र पार्टीका सुदेश गुरुङ्गले ४१ मत प्राप्त गरेका छन् ।
काठमाडौँ । रौतहट निर्वाचन क्षेत्र नम्बर ४ का उम्मेदवार ऋषि धमलाले ६ मत मात्र पाएका छन् । हालसम्म ४ हजार ३ सय ६९ मत गणना हुँदा धमलाले निकै कमजोर मत पाएका हुन् ।
अन्य उम्मेदवारहरूको तुलनामा धमलाले निकै कम मत प्राप्त गरेपछि सामाजिक सञ्जाल र स्थानीय तहमा पनि यसबारे चर्चा सुरु भएको छ। धमलाले मोबाइल चिह्नबाट चुनाव लडेका थिए ।
मतगणनाको प्रारम्भिक नतिजाअनुसार राष्ट्रिय स्वतन्त्र पार्टीका उम्मेदवार गणेश पौडेल अग्रस्थानमा रहेका छन्। उनले १ हजार १०८ मत प्राप्त गर्दै अग्रता लिएका छन् भने नेपाली काँग्रेसले ५४६ मत प्राप्त गरेको छ। त्यसैगरी नेपाली कम्युनिष्ट पार्टीले ३०७ मत पाएको छ भने नेकपा एमाले ६९ मत प्राप्त गरेको छ।
यसैगरी छाता चिह्नले १२ मत, हर्न चिह्नले १५ मत र माटो चिह्नले १ मत प्राप्त गरेका छन्। यस अवधिमा १ सय १६ मत बदर भएको निर्वाचन अधिकृतको कार्यालयले जनाएको छ।
हालसम्म गढीमाई नगरपालिका–९ इनरवाटोल धर्मशाला र गढीमाई नगरपालिका–१ समनपुरस्थित शंकर गुदुर माध्यमिक विद्यालयको मतदान केन्द्रको मतगणना सम्पन्न भइसकेको छ। बाँकी मतदान केन्द्रहरूको मतगणना क्रमशस् जारी रहेको छ।
निर्वाचन अधिकृतका अनुसार मतगणना शान्तिपूर्ण रूपमा अगाडि बढिरहेको छ भने थप नतिजा आउने क्रम जारी रहने बताइएको छ।
झापा निर्वाचन क्षेत्र नं ५ मा राष्ट्रिय स्वतन्त्र पार्टी (रास्वपा) का उम्मेदवार बालेन्द्र शाहले १०,१९० मत प्राप्त गर्दै अग्रस्थानमा छन्।
उनका प्रमुख प्रतिस्पर्धी, नेकपा एमालेका अध्यक्ष केपी शर्मा ओलीले ४,०८७ मत पाएका छन् र दोस्रो स्थानमा छन्। यसैगरी, नेपाली कम्युनिष्ट पार्टीका उम्मेदवार रञ्जित तामाङले ९० मत ल्याएका छन्।
मतगणना जारी छ र अन्तिम परिणाम प्रतीक्षित छ।
काठमाडौं । राष्ट्रिय स्वतन्त्र पार्टी(रास्वपा)ले जितको खाता खुलेको छ । भर्खरै सम्पन्न मतगणनाको अन्तिम परिणाम अनुसार रास्वपा उम्मेदवार रञ्जु न्यौपाने(दर्शना) १५ हजार ४५५ मतसहित विजयी भएकी छन् ।
६ हजार ३६४ मतसहित नेपाली कांग्रेसका प्रबल थापा निकटतम प्रतिद्वन्द्वी मात्रै रहे । अघिल्ला दुई निर्वाचनमा जित झिनो मतान्तरले पराजित हुँदै आएका राप्रपाका रवीन्द्र मिश्रले ३ हजार ९७२ मत मात्रै प्राप्त गरे ।
यस्तै एमालेका मोहनराज रेग्मीले एक हजार ६१८ मत, नेपाली कम्युनिस्ट पार्टीकी मेनुका भण्डारीले ३४५ मत, श्रम संस्कृति पार्टीका समीर लामा तामाङले ४२६ मत पाएका छन् ।
`बुलेट´बाट उदाएको माओवादीलाई स्वागतको संयम दोहोर्याउँदै `ब्यालेट´बाट आउँदै गरेको रास्वपालाई स्वागत
काठमाडौँ । नेपाली कांग्रेसका उपसभापति विश्वप्रकाश शर्माले प्रतिनिधि सभा निर्वाचनको परिणामलाई स्वीकारेका छन् । चुनावी प्रारम्भिक मत परिणाम अनुसार पार्टीले लज्जास्पद हार बेहोर्दै गर्दा उपसभापति शर्माले संयमित भएर मतदाताको फैसला स्वीकार्य भएको बताएका हुन् ।
उनले ०६४ सालमा जसरी सशस्त्र द्वन्द्वबाट आएको माओवादीले जितेर उदाएको थियो त्यही संयम दोहोहर्याउँदै रास्वपा आइरहेको भन्दै उक्त परिणामलाई स्वागत गरेका हुन् ।
उपसभापति शर्माले रास्वपाको यो परिणाम अप्रत्याशित नभएको बताएका छन् । उनले ०७९ को चुनावमै रास्वापले उक्त संकेत देखाइसकेको भन्दै अहिले आएको यो परिणाम अप्रत्याशित नभएको बताए ।
रास्वपा ०७९ को असारमा गठन भएर मंसिरमा चुनाव लड्दा राष्ट्रिय दलको मान्यतासहित चौथो ठूलो दल बनेको थियो ।
यसपालिको प्रारम्भिक मतगणना अनुसार रास्वपाको दुई तिहाई मत आउने लगभग पक्का देखिएको छ ।
०७९ को निर्वाचनमा कांग्रेस सबैभन्दा ठूलो दल बनेको थियो ।
यसो लेखेका छन् उपसभापति शर्माले सामाजिक सञ्जाल एक्समाः
मतदाताको फैसला स्विकार्य छ !
`बुलेट´बाट उदाएको माओवादीलाई स्वागतको संयम दोहोर्याउँदै `ब्यालेट´बाट आउँदैगरेको रास्वपालाई स्वागत । ०७९ मै प्रस्तुत संकेतका दृस्टीले यो अप्रत्याशित होईन । चर्को आशा अर्को निराशामा बदलिनु हुन्न, देशको मुल प्रश्नमा साथ र खबरदारी दुवै रहनेछ । जय नेपाल
काठमाडौं । मुलुकभर बिहीबार सम्पन्न भएको प्रतिनिधिसभा सदस्य निर्वाचनअन्तर्गत जारी मतगणनामा राष्ट्रिय स्वतन्त्र पार्टी (रास्वपा)ले आक्रामक अग्रता लिएको छ । पछिल्लो प्राप्त रुझान अनुसार, रास्वपाले स्थापित पुराना दलहरूलाई निकै पछाडि पार्दै देशभरका ४२ निर्वाचन क्षेत्रमा आक्रामक अग्रता कायम गरेको हो ।
निर्वाचन आयोगको पछिल्लो आधिकारिक तथ्याङ्क अनुसार रास्वपा ४२ सिटमा अगाडि देखिएको छ । विशेषगरी नेपाली कांग्रेस र नेकपा एमालेका ‘अभेद्य’ मानिने किल्लाहरूमा समेत रास्वपाका उम्मेदवारहरूले फराकिलो मतान्तरले अग्रता लिइरहेका छन् । विगतमा कांग्रेस र एमालेका उम्मेदवारहरू निरन्तर विजयी हुँदै आएका क्षेत्रमा देखिएको यो ‘घण्टी’ को रापले राजनीतिक वृत्तमा नयाँ र शक्तिशाली तरङ्ग पैदा गरिदिएको छ ।
हालसम्मको मतगणनाको स्थिति हेर्दा राष्ट्रिय स्वतन्त्र पार्टी ४२ सिटमा अग्रता लिँदै पहिलो स्थानमा छ । दोस्रो स्थानका लागि नेकपा एमाले र नेपाली कांग्रेसबीच तीव्र प्रतिस्पर्धा देखिएको छ । एमाले ४ निर्वाचन क्षेत्रमा अगाडि रहँदा नेपाली कांग्रेस ३ क्षेत्रमा खुम्चिएको छ । त्यस्तै, नेपाली कम्युनिष्ट पार्टी (तारा चिह्न) ले २ क्षेत्रमा आफ्नो अग्रता बनाएको छ । राष्ट्रिय प्रजातन्त्र पार्टी (राप्रपा), जनता समाजवादी पार्टी (जसपा) र जनमत पार्टीको खातामा भने हालसम्म कुनै पनि क्षेत्रमा प्रारम्भिक अग्रता देखिएको छैन ।
केही निर्वाचन क्षेत्रहरूमा गए रातिदेखि नै मतगणना सुरु भएको थियो भने केही दुर्गम क्षेत्रहरूमा आज बिहानदेखि मात्र गणना प्रारम्भ गरिएको हो ।
काठमाडौं । प्रतिनिधिसभा निर्वाचन अन्तर्गत आज देशभर मतदान सम्पन्न भएको छ । निर्वाचन आयोगका कार्यवाहक प्रमुख निर्वाचन आयुक्त रामप्रसाद भण्डारीले मतदान बिहान ७ बजेदेखि साँझ ५ बजेसम्म शान्तिपूर्ण रुपमा सम्पन्न भएको जानकारी दिए ।
यसैगरी आयोगले पत्रकार सम्मेलन गर्दै देशभरको निर्वाचन व्यवस्थापनमा सहयोग गर्ने सबै पक्ष नेपाल सरकार, प्रदेश सरकार, स्थानीय तह, सुरक्षा निकाय, मुख्य निर्वाचन अधिकृत, निर्वाचन अधिकृत, निर्वाचनमा संलग्न कर्मचारी, सुरक्षाकर्मी, राजनीतिक दल, उम्मेदवार, आम मतदाता र सञ्चारमाध्यमप्रति हार्दिक धन्यवाद व्यक्त गरेको छ ।
प्रारम्भिक विवरण अनुसार करिब ६० प्रतिशत मत खसेको आयुक्त रामप्रसाद भण्डारीले बताए ।
उनले भने, ‘२०८२ फागुन २१ गते बिहीबार भएको प्रतिनिधिसभा निर्वाचनको मतदान कार्य बिहान ७ बजेदेखि साझ ५ बजेसम्म शान्तिपूर्ण र उत्साहजनक रुपमा सम्पन्न भएको छ । यस कार्यको लागि सहयोग गरेकोमा निर्वाचन आयोग नेपाल सरकार, प्रदेश सरकार, स्थानिय तह, सुरक्षा निकाय, मुख्य निर्वाचन अधिकृत, निर्वाचन अधिकृत, निर्वाचनमा संलग्न कर्मचारी, सुरक्षाकर्मी, राजनीतिक दल, उम्मेदवार, आममतदाता, सञ्चारमाध्यम सम्पूर्ण सरोकारहरुमा हार्दिक आभार सहित धन्यवाद व्यक्त गर्न चाहन्छौं । देशभर प्राप्त विवरण अनुसार करिब ६० प्रतिशत मत खसेको प्रारम्भिक अनुमान छ ।’
यसैगरी मतपेटिका सुरक्षित रूपमा संकलन भएपछि निर्देशिका २०८२ अनुसार मतगणना तत्काल सुरु हुने जनाइएको छ । केही मतदान केन्द्रमा भने तोकिएको समयमा प्रवेश गरेका मतदाताहरूले मतदान प्रक्रिया जारी राखेका छन् ।
निर्वाचन प्रर्यवेक्षणमा खटिएका राष्ट्रिय तथा अन्तर्राष्ट्रिय पर्यवेक्षकहरूको प्रारम्भिक रिपोर्टले पनि देशभर शान्तिपूर्ण मतदान भएको पुष्टि गरेको समेत आयोगले जनाएको छ ।
दुर्गम १५ जिल्लामा हेलिकोप्टरमार्फत मतपेटिका ढुवानी गरिने छ । यसमा ताप्लेजुङ, रसुवा, दोलखा, बाजाङ, पूर्वी रुकुमका सम्पूर्ण मतपेटिका आजै सम्बन्धित मतगणना स्थलमा पुर्याइने लक्ष्य राखिएको छ । संखुवासभा, सोलुखुम्बु, गोरखा, पश्चिम रुकुम, मनाङ, बाजुरा र हुम्लामा भने शुक्रबार बिहानसम्म मतपेटिका मतगणना स्थलमा पुर्याइने निर्वाचन आयोगले जनाएको छ ।
राष्ट्रिय स्वतन्त्र पार्टी (रास्वपा) का वरिष्ठ नेता बालेन शाहले प्रधानमन्त्री सुशीला कार्कीको प्रशंसा गरेका छन् ।
उनले बिहीबार सामाजिक सञ्जाल फेसबुकमा स्टाटस लेख्दै आज लोकतन्त्रले जितेको छ भन्दै प्रधानमन्त्री कार्कीको प्रशंसा गरेका हुन् ।
उनले लेखेका छन्, ‘हजुरको नेतृत्वमा आज लोकतन्त्रले जितेको छ, आमा ।’
सरकारले सफलतापूर्वक निर्वाचन गराएपछि बालेनको यस्तो प्रतिक्रिया आएको हो ।
जनकपुरधाम । रौतहट-२ बाट नेपाली कम्युनिष्ट पार्टी (नेकपा)का उम्मेदवार किरण शाहले पार्टी परित्याग गरेका छन्। उनले मतदान चलिरहँदा पार्टी त्यागेको घोषणा गरेका हुन्।
उनले फेसबुकमार्फत पार्टी परित्याग गरेको जानकारी दिएका छन्।
