निर्वाचन आयोगले आजदेखि निर्वाचनको अन्तिम परिणाम घोषणा नभएसम्म मादक पदार्थ बिक्रीवितरण तथा सेवनमा प्रतिबन्ध लगाउने भएको छ।

आयोगले निर्वाचन सुरक्षा व्यवस्थापन निर्देशिका, २०७८ को दफा ३ बमोजिम गठित उच्चस्तरीय निर्वाचन सुरक्षा समितिको बैठकबाट पारित निर्वाचन सुरक्षा योजनाअनुसार सो प्रस्ताव गरिएको हो।

सुरक्षाको समग्र अवस्थाको समीक्षा एवं वस्तुस्थितिको आकलन तथा सुरक्षा व्यवस्थासम्बन्धी मार्गदर्शन तथा सिफारिससमेतका आधारमा आयोगले गृह मन्त्रालयलाई निर्देशन दिएको छ।

आयोगले निर्वाचन आचारसंहिताको पूर्ण पालना गर्न गराउन गृह मन्त्रालयले सबै जिल्लाका प्रमुख जिल्ला अधिकारी र सुरक्षा निकायहरूलाई निर्देशन दिएको छ।

जिल्ला आचारसंहिता अनुगमन समितिले तोकिएका व्यक्ति तथा संयन्त्रको परिचालन गरी निर्वाचन (कसुर तथा सजाय) ऐन, २०७३ र निर्वाचन आचारसंहिता, २०८२ बमोजिम निषेध गरिएका कार्य हुन नदिने र कहीँकतै भए गरेको पाइएमा प्रचलित कानुनबमोजिम तत्काल कारबाही गरी आयोगमा जानकारी गराउन निर्देश गरिएको छ।

मतदानको दिनमा अत्यावश्यक सेवाका सवारीसाधन एम्बुलेन्स, दमकल, शववाहन, रक्तसञ्चार सेवाका साधन, सुरक्षा निकायका सवारीसाधन, विद्युत् मर्मत, खानेपानी तथा ढल मर्मतका सवारीसाधन निर्वाध चल्न सक्नेछन्।

यस्तै, दूरसञ्चार सेवा मर्मतका लागि प्रयोग हुने सवारीसाधन, कूटनीतिक नियोगका सवारीसाधन र निर्वाचनको दिनमा प्रयोग गर्नेगरी पास प्राप्त गरेका सवारीसाधन पनि सहज सञ्चालन हुनेछ।

सार्वजनिक तथा निजी सवारीसाधन भने यही फागुन २० गते राति १२ बजेदेखि फागुन २१ गते साँझ मतदान सम्पन्न नभएसम्मका लागि सञ्चालनमा रोक लगाउने निर्णय भएको आयोगले जनाएको छ।

यस्तै, मतदानको दिनमा अन्तर्राष्ट्रिय तथा आन्तरिक हवाई उडान यथावत सञ्चालनको व्यवस्था मिलाइनेछ। अन्तर्राष्ट्रिय र आन्तरिकतर्फका हवाई उडानका लागि टिकट भएका यात्रुलाई विमानस्थलदेखि घर र बसोबास गर्ने होटलसम्म ल्याउन सहज व्यवस्था गरिएको छ।

यस्तै, घर बसोबास गर्ने होटलदेखि विमानस्थलसम्म यात्रा गर्दा निजी वा सम्बन्धित एयरलाइन्सले उपलब्ध गराएको सवारीसाधन प्रयोग गर्न दिनेगरी आवश्यक व्यवस्था मिलाइने आयोगले उल्लेख गरेको छ।

नेपाली राष्ट्रिय महिला फुटबल टिमकी कप्तान एवं स्टार फर्वाड सावित्रा भण्डारी साम्बाको काठमाडौँ मेडिकल कलेजले नि:शुल्क उपचार गर्ने घोषणा गरेको छ । साम्बाले नेपालमै उपचार गर्न तयार भए केएमसीले निःशुल्क उपचार गर्ने घोषणा गरेको हो ।

केएमसीका प्रमुख प्रशासकीय अधिकृत नारायणप्रसाद दाहालले प्रेस विज्ञप्ति जारी गर्दै ‘राष्ट्रिय महिला फुटबल टिमकी कप्तान एवं राष्ट्रिय गहनाको रूपमा परिचित सावित्रा भण्डारी ‘साम्बा’ पछिल्लो सात हप्तादेखि चोटिल रहेको तथा कतारको अस्पेटार अस्पतालमा घुँडाको शल्यक्रिया गरेर हालिएको ग्राफ्ट र एमसिएल दुवैमा गम्भीर चोट लागेर पुनः शल्यक्रिया गर्नुपर्ने अवस्थाका कारण सामाजिक सञ्जाल मार्फत सहयोगको आग्रह गरेकोप्रति केएमसीको गम्भीर ध्यानाकर्षण भएको भन्दै” ‘साम्बा’ नेपालमै उपचार गर्न तयार भए नि:शुल्क उपचार गर्ने घोषणा गरेका हुन् ।

नेपाली राष्ट्रिय महिला फुटबल टिमकि कप्तान एवं स्टार फर्वाड ‘साम्बा’ले सोमबार अपरान्ह आफ्नो आधिकारिक फेसबुक पेज मार्फत पछिल्लोपटक एन्फा नेतृत्वको पहलमा आफ्नो सम्पूर्ण व्यवस्थापन र सहयोग पुर्‍याए पनि यसपटक एन्फाले उपचारमा सहयोगको प्रयास मात्रै गर्न सक्ने भन्दै एन्फा अध्यक्षले ५ लाखसम्म सहयोग गर्ने र अन्य प्रक्रिया आफैं अगाडि बढाउन भनेपछि ‘साम्बा’ले सामाजिक सञ्जाल मार्फत आफ्नो उपचारका लागि ८० हजार हाराहारी अमेरिकी डलर खर्च हुने भन्दै सहयोगको अपिल गरेकि थिइन् ।

सामाजिक सञ्जाल मार्फत ‘साम्बा’ले अपील गरेको केही घन्टामै काठमाडौँ मेडिकल कलेजका प्रमुख प्रशासकीय अधिकृत दाहालले आर्थिक अभावकै कारण राष्ट्रका गहनाले अत्यावश्यक स्वास्थ उपचार नपाउनु दु:खद भएको टिप्पणी गर्दै काठमाडौं मेडिकल कलेजमा ‘साम्बा’को घुँडाको जटिल शल्यक्रिया र ग्राफ्ट तथा एमसिएलको उपचार सम्भव रहेको उल्लेख गर्दै राष्ट्रका गहनाको चित्कारले आफूलाई विचलित बनाएको भन्दै नि:शुल्क उपचारको घोषणा गरेका हुन् ।

काठमाडौँ मेडिकल कलेज नेपाली कांग्रेसका लोकप्रिय युवा नेता तथा पूर्व सांसद र नेपाली कांग्रेस मोरङ ३ बाट प्रतिनिधि सभाका उम्मेदवार प्रमुख स्वामित्वमा रहेको संस्था हो। डा शर्माले सुदूर पूर्वदेखि सुदूरपश्चिमसम्म निःशुल्क स्वास्थ्य शिविर आयोजना गर्दै उनीहरूको नोबेल अथवा काठमाडौँ मेडिकल कलेजमा निशुल्क उपचार गरेका छन् ।

डा.शर्माले नेपाली क्रिकेट टोली लाई हालै २० लाख रुपैयाँ र यसअघि पनि २० लाख गरी ४० लाख रुपैयाँ हस्तान्तरण गरेका हुन् । साथै निःशुल्क उपचारको पनि घोषणा गरेका थिए ।

नेपाली राष्ट्रिय महिला टिमकै सबैभन्दा अब्बल र सफल फर्वाडको रूपमा आफूलाई दर्ज गरेकी ‘साम्बा’ले आफ्नो स्वास्थ उपचारका लागि आफूले अभिभावक मानेको अखिल नेपाल फुटबल संघ एन्फालाई आग्रह गर्दा क्लबका लागि खेल्दा चोट लागेको तर्क गर्दा आफू निराश भएको उल्लेख गर्दै यसबिचमा आफ्ना प्रतिनिधि मार्फत सरकारसँगसमेत पहल गरे पनि सरकारी प्रक्रिया अपेक्षा अनुसार अगाडि नबढेकोमा असन्तुष्टि व्यक्त गर्दै सहयोगको अपील गर्दै चोटमुक्त भएपछि देशका लागि शतप्रतिशत दिने प्रतिबद्धतासमेत व्यक्त गरेकी थिइन् ।

राष्ट्रिय महिला फुटबल टिमकी कप्तान जसले युरोपमा पुगेर देशको फुटबललाई अन्तर्राष्ट्रिय स्तरमा परिचित गराइन् उनको उपचारमा एन्फा र नेपाल सरकारले देखाएको उदासीनतालाई चुनौती दिंदै केएमसीले देखाएको उदारता र सहयोगको यतिबेला सामाजिक सञ्जालमा प्रशंसा भैरहेको छ ।

एन्फाका पूर्व अध्यक्ष एवं कप्तान गणेश थापाले ५० हजार रुपैयाँ दिने घोषणा गरेका छन् ।

दुर्गा प्रसाईँलाई रिहा गर्न माग गर्दै काठमाडौँमा मोटरसाईकल र्याली निकालिएको छ ।

आइतबार काठमाडौँको माइतीघर मण्डलामा भेला भएका राजावादीहरूले प्रसार्ईंको तत्काल रिहा गर्न सरकारसँग माग गर्दै सो र्याली निकालेका हुन् ।

उनीहरूले प्रसाईँलाई पक्राउ गरेको भन्दै सरकारविरुद्ध चर्का नाराबाजी समेत गरेका थिए ।

प्रसाईँलाई यही फागुन ४ गते सोमबार भक्तपुरस्थित आफ्नै निवासबाट पक्राउ गरिएको थियो । सोही पक्राउको विरोधमा हिन्दुराज्य नेपाल कायम गरौँ भन्ने मूल नारासहित र्यालीमा सहभागी भएकाहरूले गणतन्त्र विरोधी नारा पनि लगाएका थिए ।

माइतीघर मण्डलाबाट सुरु भएको सो र्याली भद्रकालीमा पुगेर समापन भएको थियो ।

काठमाडौँ । निर्वाचनलाई बढीभन्दा बढी सहभगितामूलक बनाउने र बदर प्रतिशत घटाउने उद्देश्यका साथ निर्वाचन आयोगले देशव्यापी रूपमा मतदाता शिक्षा कार्यक्रमलाई व्यापक रूपमा अगाडि बढाएको छ ।

आमनागरिकलाई मताधिकारको महत्व र मतदानको प्रक्रियाका विषयमा जानकारी दिने उद्देश्यले आयोगबाट स्वीकृत कार्यक्रम मतदाता शिक्षा कार्यक्रम अगाडि बढाइएको छ । आयोगले यही फागुन ३ देखि १७ गतेसम्म देशभरका ७५३ स्थानीय तहका ६ हजार ७४३ वडामा एक–एक जना मतदाता शिक्षा स्वयंसेवक परिचालित भएको जनाएको छ ।

आममतदाताको बस्ती तथा घरदैलोमा पुगेर नमूना मतपत्रको माध्यमबाट निर्वाचनको महत्व र मतदान प्रक्रियाबारे मतदातालाई जानकारी गराउने कार्य खटिएका स्वयंसेवकबाट भइरहेको आयोगले उल्लेख गरेको छ । मतदाता शिक्षा कार्यक्रम प्रयोजनका लागि आयोगले स्थानीय तहमा यसअघि तोकेका सम्पर्क व्यक्तिलाई नै निर्वाचन मतदाता शिक्षा कार्यक्रमको अनुगमनकर्ता तोकी अभिमुखीकरण कार्यक्रमसमेत सम्पन्न भइसकेको छ ।

यस्तै, निर्वाचन आचारसंहिताको उल्लंघन हुनेगरी मिथ्या तथा भ्रमपूर्ण सूचना र घृणास्पद अभिव्यक्ति दिने व्यक्तिको निगरानी गर्न तथा गैरकानुनी कार्य गर्ने व्यक्ति र संस्थालाई नियामक निकायसँगको सहकार्यमा कानुनको दायरामा ल्याउन आयोगले अधिकतम् प्रयास गरिरहेको छ । आयोगमा स्थापना गरिएको निर्वाचन सूचना सम्प्रेषण तथा समन्वय केन्द्रअन्तर्गत सूचना सदाचार प्रवर्द्धन एकाइ पूर्ण रूपमा क्रियाशील रहेको जनाएको छ ।

हानिकारक सूचना उत्पादन एवं सम्प्रेषण गर्ने २९० कन्टेन्ट उत्पादक र सम्प्रेषकलाई विद्युतीय कारोबार ऐन, २०६३ बमोजिम कारबाहीका लागि नेपाल प्रहरीको साइबर ब्यूरोमा उजुरी गरिएको छ । यस्तै, ११ वटालाई दूरसञ्चार प्राधिकरण ऐन, २०५२ बमोजिम कारबाही गर्न नेपाल दूरसञ्चार प्राधिकरणमा पठाइएको छ । त्यस्तै, ६५ वटालाई प्रेस काउन्सिल ऐन, २०४८ बमोजिम कारबाहीका लागि प्रेस काउन्सिल, नेपालमा र एक वटालाई विज्ञापन ९नियमन गर्ने० ऐन, २०७६ बमोजिम कारबाहीका लागि पठाइएको आयोगले जनाएको छ ।

काठमाडौं । दुई समुदायबीच उत्पन्न तनावका कारण रौतहटको सदरमुकाम गौरमा लगाइएको कर्फ्यु आज (आइतबार) पनि जारी रहने भएको छ । स्थिति थप बिग्रन नदिन र सुरक्षा संवेदनशीलतालाई ध्यानमा राख्दै जिल्ला प्रशासन कार्यालयले शनिबारदेखि जारी कर्फ्युलाई परिमार्जनसहित निरन्तरता दिएको हो ।

प्रमुख जिल्ला अधिकारी दिनेश सागर भुसालद्वारा जारी संशोधित आदेश अनुसार शनिबार दिउँसो १ बजेदेखि सुरु भएको कर्फ्यु आज बिहान ६:३० बजेसम्म यथावत रहनेछ । सर्वसाधारणको सुविधा र अत्यावश्यक कामका लागि बिहान ६:३० बजेदेखि ८:३० बजेसम्म दुई घण्टाका लागि कर्फ्यु केही खुकुलो पारिएको छ ।

यद्यपि, खुकुलो पारिएको सो समयमा पनि कुनै पनि किसिमका भेला, सभा, जुलुस, प्रदर्शन वा मानिसहरू जम्मा हुन पाइने छैन । बिहान ८:३० बजेपछि अर्को आदेश नभएसम्मका लागि पुनः पूर्ण रूपमा कर्फ्यु लागू हुने प्रशासनले स्पष्ट पारेको छ ।

स्थानीय प्रशासन ऐन, २०२८ को दफा ६ ‘क’ बमोजिम जारी गरिएको यो आदेशको उल्लंघन गर्ने जोकोहीलाई कानुन बमोजिम कडा कारबाही गरिने चेतावनी समेत दिइएको छ । कर्फ्यु अवधिमा तोकिएको क्षेत्रभित्र हिँडडुल गर्न र आवतजावत गर्न पूर्णतः निषेध गरिएको छ ।

गुल्मी । यहाँको रेसुङ्गा विमानस्थलमा अबदेखि सातामा तीनपटकमात्र हवाई उडान गरिने भएको छ । नेपाल वायु सेवा निगमले यसअघि गुल्मीमा बिहीबार हुँदै आएको हवाई उडानको तालिकामा परिवर्तन गरेको हो ।

नेपाल वायु निगमले यसअघि आइतबार, मंगलबार, बिहीबार र शनिबार गरी सातामा चारपटक उडान गर्दै आएको थियो । उडान तालिकामा परिवर्तन गरेसँगै अबदेखि आइतबार, मंगलबार र शनिबार गरी सातामा तीन पटकमात्र उडान हुने भएको रेसुङ्गा विमानस्थल गुल्मीका स्टेसन प्रमुख सुमन थापाले जानकारी दिए।

नेपाल वायुसेवा निगमका हाल तीन मात्र ट्वीनअटर जहाज रहेको र उक्त जहाज समय–समयमा मर्मत गर्नुपर्ने भएका कारण जहाजको अभावमा केही समयका लागि निगमले यसअघिको नियमित तालिकामा परिवर्तन गरेको उनले बताए । वर्षात्को समय, खराब मौसम र बाक्लो हुस्सुका कारणबाहेक पछिल्लो तीन महिना रेसुङ्गा विमानस्थलमा नियमित रूपमा हवाई उडान हुँदै आइरहेको छ ।

रेसुङ्गा विमानस्थलमा नेपाल वायुसेवा निगमले १८ सिट क्षमताको ट्वीनअटर जहाजबाट काठमाडौँदेखि बिहान ६:३० बजे र रेसुङ्गा विमानस्थलदेखि बिहान ७:३० बजे उडान गर्दै आइरहेको छ । निगमले काठमाडौँबाट गुल्मीका लागि सात हजार ५०० र गुल्मीदेखि काठमाडौँका लागि रु सात हजार ३०० भाडादर निर्धारण गरेको छ । रेसुङ्गा विमानस्थलमा दिउँसोको समयमा अत्यधिक हावाको चाप हुने भएकाले प्राविधिक दृष्टिकोणले बिहानको समयमा मात्र उडान हुने गर्दछ ।

जिल्लामा हवाई उडान सुरु भएसँगै जिल्लामा आउने आन्तरिक एवं बाह्य पर्यटकहरूको सङ्ख्यामा समेत वृद्धि हुँदै गएको छ । अठार घण्टा लामो यात्रा गरेर राजधानी पुग्नुपर्ने बाध्यता रहेको यस क्षेत्रका नागरिकले आकाशमार्गबाट ४५ मिनेटमै सहज रूपमा गुल्मीबाट राजधानी आवतजावत गर्न सहज बनेको छ ।

जिल्लामा हवाई सेवा लिने नागरिकको चाप पछिल्लो समयमा बढ्दै गएको छ । तर यात्रुहरूको चाप बढे पनि उडान सङ्ख्या थोरै हुने र उडान तालिकामा परिवर्तन भइरहने भएका कारण यस क्षेत्रका नागरिक समस्यामा परेका छन् । जिल्लामा नेपाल वायुसेवा निगमले २०८० वैशाख २९ गतेदेखि व्यावसायिक हवाई उडान सेवा सुरुआत गरेको थियो ।

मोरङ क्षेत्र नम्बर ३ बाट नेपाली कांग्रेसका प्रतिनिधिसभा उम्मेदवार डा. सुनिल शर्मा कानेपोखरी गाउँपालिका–५ भन्साबारीमा आयोजित घरदैलो कार्यक्रममा सहभागी हुँदा स्थानीयवासीको उत्साहजनक भीड देखिएको छ।

घरदैलोका क्रममा गाउँ–टोलका बासिन्दाले जुरुक्क उठेर स्वागत गर्दै “यसपालि जित सुनिश्चित छ” भन्दै खुलेर समर्थन जनाएका थिए। कार्यक्रममा सहभागी स्थानीयले विकास निर्माण, रोजगारी सिर्जना, शिक्षा र स्वास्थ्य सुधारका अपेक्षा राख्दै उम्मेदवारप्रति विश्वास व्यक्त गरेका छन्।

डा. शर्माले जनताको सुझाव र अपेक्षालाई प्राथमिकतामा राखेर काम गर्ने प्रतिबद्धता व्यक्त गर्दै मोरङ–३ को समग्र विकासका लागि आफू निरन्तर सक्रिय रहने बताएका छन्। उनले घरदैलो अभियानमार्फत मतदातासँग प्रत्यक्ष संवाद गर्दै स्थानीय समस्या सुन्ने र समाधानका उपाय खोज्ने प्रयास गरिरहेको बताए।

अभियान टोलीका अनुसार जनताको माया, विश्वास र आशिर्वादले चुनावी माहोल झन् उत्साहित बनेको छ र आगामी दिनमा यस्ता भेटघाटलाई निरन्तरता दिइनेछ।

 प्रतिनिधिसभा सदस्य निर्वाचन आउन अब १२ दिन मात्र बाँकी रहँदा निर्वाचन तयारी देशभर तीव्र पारिएको छ । निर्वाचन आयोग नेपालले अधिकांश प्रदेशमा मतपत्र तथा आवश्यक सामग्री पठाइसकेको र बाँकी स्थानमा अन्तिम चरणको ढुवानी भइरहेको जनाएको छ ।

आयोगका अनुसार सुदूरपश्चिम, कर्णाली र कोशी प्रदेशका निर्वाचन क्षेत्रमा मतपत्र पुगिसकेको छ भने बागमतीसहित अन्य प्रदेशमा ढुवानी नियमित रूपमा जारी छ । राजधानीभित्रका मतदान केन्द्रमा समेत केही दिनमै मतपत्र पु¥याइने तयारी गरिएको छ ।

निर्वाचनका लागि पहिलो हुने निर्वाचित हुने प्रणालीतर्फ ७७ जिल्लाका १६५ निर्वाचन क्षेत्रका लागि दुई करोडभन्दा बढी मतपत्र छपाइ गरी प्याकिङसहित पठाइसकिएको आयोगले जनाएको छ । समानुपातिकतर्फ पनि दुई करोडभन्दा बढी मतपत्र छपाइ सम्पन्न भइसकेको छ ।

मतपत्र बाहेक आवश्यक ५१ प्रकारका निर्वाचन सामग्रीमध्ये अधिकांश ढुवानी पूरा भइसकेको छ, जसले निर्वाचन व्यवस्थापनलाई व्यवस्थित बनाएको आयोगको दाबी छ ।

मतपत्र छपाइ भने जनक शिक्षा सामग्री केन्द्र लिमिटेड, सानोठिमीमा आयोगको क्यालेण्डरअनुसार चरणबद्ध रूपमा गरिएको थियो । पुस महिनादेखि सुरु भएको छपाइ प्रक्रियाअन्तर्गत मतदाता शिक्षा प्रयोजनका लागि झन्डै ११ लाख नमूना मतपत्र समेत तयार गरिएको थियो ।

निर्वाचन नजिकिँदै जाँदा आयोगले सुरक्षा, सामग्री व्यवस्थापन तथा मतदान केन्द्र तयारीलाई उच्च प्राथमिकतामा राखेको जनाएको छ ।

काठमाडौं । जेनजी आन्दोलनपछि हुन लागेको प्रतिनिधि सभाको निर्वाचन आउन अब १४ दिन बाँकी छ ।

निर्वाचन आयोगले प्रतिनिधिसभा सभा सदस्य निर्वाचनअन्तर्गत समानुपातिक निर्वाचन प्रणालीअनुसार हुने निर्वाचनको लागि आवश्यक पर्ने अस्थायी मतदाता नामावाली सङ्कलन तथा स्थायी मतदान प्रक्रियालाई व्यवस्थित तुल्याउन ‘अस्थायी मतदाता नामावलीसम्बन्धी कार्यविधि २०८२’ जारी गरेको छ ।

आयोगले मतदाता नामावलीसम्बन्धी ऐन, २०७३ को दफा ४४ ले दिएको अधिकार प्रयोग गरी कार्यविधि बनाएर जारी गरेको हो । कार्यविधिअनुसार आयोगले स्थायी मतदाता नामावली सङ्कलन गर्ने कार्यक्रमसहितको सूचना प्रकाशन गर्नेछ । सो सूचना आयोगले आवश्यकताअनुसार राष्ट्रियस्तरका सञ्चारमाध्यमबाट समेत प्रकाशन तथा प्रसारण गर्न सक्ने व्यवस्था कार्यविधिमा गरिएको छ ।

नेपाल सरकार, प्रदेश सरकार, स्थानीय तह, सरकारको स्वामित्व वा नियन्त्रणमा रहेका संस्थामा कार्यरत कर्मचारी, सेना, प्रहरी, कारागारमा रहेका थुनुवा र कैदी, निर्वाचन कार्यमा खटिएका कर्मचारी र सुरक्षाकर्मी, संवैधानिक निकायका प्रमुख तथा पदाधिकारको नाम स्थायी मतदाता नामावलीमा समावेश हुनेछ ।

निर्वाचन आयोगले जारी गरेको उक्त कार्यविधिअनुसार कुनै व्यक्तिको नाम छुटेको वा कुनै मतदाताको नाम वा विवरणमा कुनै त्रुटि भएमा सम्बन्धित व्यक्तिले आफ्नो नाम समावेश गराउन वा त्रुटि सच्याउन प्रमाणसहित प्रमुख नाम दर्ता अधिकारीसमक्ष निवेदन दिनुपर्ने आयोगले जनाएको छ ।

काठमाडौं । नेपाली कांग्रेसका सभापति गगनकुमार थापाले कांगे्रसले देशको नेतृत्व लिएर कुसाशन हटाउने प्रतिज्ञा गरेका छन् । जनकपुरको तिरूहुतिया गाछीमा आयोजित प्रतिज्ञासभालाई सम्बोधन गर्दै थापाले सबैलाई समेटेर लैजान कांग्रेस सक्षम रहेको बताए । उनले कुरा हैन काम काम गर्न आएको प्रतिवद्धता जनाएका छन् ।

सभापति थापाले भने, ‘मधेशबाट कांग्रेसले देश बदल्ने सहास लिएको छ । आट लिएको छ। अब मधेशले देशको संघीयतालाई कार्यान्वयन गराउन जरूरी छ ।’ उनले मधेशले देशलाई नेतृत्व गर्ने शिक्षा, स्वास्थ्य र विज्ञान र सूचना प्रविधिको क्षेत्र भएकाले मधेशले अब परविर्तन गर्नु पर्ने बताए। उनले मधेशलाई ज्ञानको केन्द्र बनाउन कांग्रेस मधेश झरेको बताए ।

उनले भने, ‘मधेशको शिक्षा नभएको भए आज पहाडमा गणित राम्रो पढाइ हुँदैनथ्यो । पहाडमा मधेशका शिक्षकले पढाएका हुन्। उनकै शिक्षाले देश शिक्षित भएको छ । तर आज मधेशको शिक्षा, स्वास्थ्य र वि१ानको अवस्था जरजर छ, यहाँ किसान, उखु किसानको अवस्था, पर्यावयरणको अवस्था भयावह छ। खानेपानीको समस्या समाधान गर्न म मधेश आएको हुँ ।’

उनले मधेशले सिंगो देशलाई पाल्न सक्ने तागत बोक्न सक्ने बनाउने प्रतिज्ञा गरेको बताए। उनले मधेशका या देशका जुनसुकै युवा विदेशमा भए त्यहाँ दूतावास राखेर भए पनि नेपालीको हेरचाह गर्ने व्यवस्था गर्ने बताए । उनले भने, ‘अब मधेश वा कुनै क्षेत्रका नेपाली विदेशमा रहेछ भने उसको हेरचाह गर्न नेपाल सरकारले दुतावासको व्यवस्था र कर्मचारीको व्यवस्था गर्छ ।’

थापाले मधेशको वित्तीय संरचना खल्बलिएकोले यहाँका सहकारी ठगहरूलाई तह लगाउन कांग्रेस मधेश आएको बताए । ‘यहाँको वित्तीय संस्था खल्बलिएको छ’, उनले भने, ‘सहकारी ठगहरूको विगबिगी बढेको छ । सहकारी ठगहरूलाई तह लगाउन कांग्रेस मधेश झरेको छु ।’

सभापति थापाले मधेशका युवाहरूले देखेको क्रिकेटको सपना पूरा गराउन चाहेकोले यहाँ क्रिकेट एकाडेमी बनाउने रहेको समेत बताएका छन । उनले भने, ‘मैले यहाँका युवाहरूको क्रिकेटको सपना पुरा गर्न चाहन्छु ।’ उनले आफू मधेशको बेटा बन्न आएको भन्दै दुर्गानन्दको सहास, कुशेश्वरको रगतको सम्मान र महेन्द्रनिधिको जीवनशैली रहेकोले यहाँ आफू मधेशमा आएको बताए ।

कांग्रेस पखालिएर जनविश्वास लिन मधेश आएको सभापति थापाले बताए । ‘अब हामी मत मात्रै होइन विश्वास र भरोसा लिन आएक छौं । देशलाई सँगसँगै हिडाउन र परिवर्तन देख्न आएको हुँ । म सबै युवाहरूको सपना पूरा गर्न र युवाहरूको साँझा पार्टी बनाउन आएको हुँ ।’