मौसम बदलीले ठाउँ ठाउँको जनजिवन प्रभावित

0
246

काठमाडौं, २० फागुन । एक्कासी आएको हावाहुरी र वर्षाका कारण केही पहाडी जिल्लामा असर पारेको छ । हावाहुरीले विद्यालयको छानो उडाउँदा म्याग्दीको भकिम्ली–२ डोलेस्थित मुसुङडोले निमाविमा तीन जना विद्यार्थी घाइते भएका छन् ।

बिहिबार दिउँसो आएको हावाहुरीका कारण कक्षा ४ मा अध्ययरत ३ जना विद्यार्थी घाइते भएको  विद्यालयका प्रधानध्यापक शेरबहादुर बिकले बताउनुभयो । हुरीले छानो उडाउन थालेपछि भाग्ने क्रममा र कक्षा कोठाभित्र घाइते भएका विद्यार्थीलाई भकिम्ली स्वास्थ्यचौकीमा उपचार गरी परिवारको जिम्मा लगाइएको विद्यालयले जनाएको छ । हावाहुरीबाट विद्यालयका दुईवटा कोठाको छानासहितको संरचनामा क्षति पु¥याउँदा झण्डै २ लाख बराबरको क्षति भएको विद्यालय व्यवस्थापन समितिले जानकारी दिएको छ । हावाहुरीका कारण पखेर प्रावि विद्यालयमा पनि समेत क्षति पुगेको छ ।

उता, मध्यान्हदेखि चलेको हुरीबतासले दोलखाको जनजीवन प्रभावित भएको छ ।  हुरी चल्न थालेपछि जंगल र टहरामा आगलागी भएको छ भने विद्युत आपूर्ति हिजो दिनभर बन्द भयो । प्रहरी नायव उपरीक्षक रवीन कार्कीले हुरीले आगो दन्किएपछि सिप्रिङखोला जलविद्युत् आयोजनास्थलका आठ कोठे मानिस बस्ने टहरा जलेर नष्ट भएको  बताए ।

सदरमुकाम चरिकोटमा हुरीले उडाएको धूलोको मुस्लोका कारण हिँड्डुल गर्न कठिन भयो । हुरीले पसलभित्र बस्न मुस्किल भएपछि बजारका कतिपय पसलहरु दिउँसो १ बजे नै बन्द गरिएका थिए । व्यापारिक प्रयोजनले राखिएका होडिङ बोर्डहरु झरेर सडकमा यत्रतत्र छरिएका छन् । छानाहरु उडाएकाले टहरामा बस्ने भूकम्पपीडितको बिचल्ली भएको जानकारी आएको प्रनाउ कार्कीले बताए । छौडे प्रहरी चौकीको छाना उडाएको छ ।

हुरीले पोल ढालेपछि जिल्लाभरि नै विद्युत्त आपूर्ति बन्द छ । नेपाल विद्युत् प्राधिकरण दोलखा शाखा प्रमुख शेरबहादुर सुनारका अनुसार हुरीले सुनकोसी, सिप्रिङ र चर्नावतीबाट उत्पादन हुने विद्युतका प्रशारण लाइनहरुमा क्षति पुगेको छ । सुनकोसीबाट प्रसारण लाइनको बनाउन खरिढुङ्गा पुगेका कर्मचारीहरु हुरीले मोटर अगाडि बढाउन नसकेरे त्यही बसेको सुनारले बताए ।

यता, काठमाडौं उपत्यकामा बिहीबार साँझ एक्कासी पानी परेको छ । यसलाई मौसमविदहरुले मनसुन सुरु हुनु अघिको संकेतको रुपमा लिएका छन् । मौसमविद सुवास रिमालले ‘मार्च, अप्रिल र मेलाई प्रि मनसुनको सिजन मानिन्छ । हिजो परेको पानी पनि त्यही संकेत हो ।’ यो बेला स्थानीयस्तरमा विकसित जलवाष्पको कारण बादल बन्ने, चट्याङ पर्ने, हावा हुरी चल्ने र सानो ठाउँमा केही क्षणमात्र पानी पर्ने मौसमविदको भनाइ छ ।

मौसमविद रिमालका अनुसार आज पनि काठमाडौं उपत्यकामा मौसममा बदली हुने र केही क्षण पानी पर्नसक्छ । पश्चिम नेपालमा भने पश्चिमी वायुको प्रभावको कारण मौसममा बदली भएको छ । पूर्वी नेपालका पहाडी जिल्लामा पनि मौसममा बदली भएको मौसमविद रिमालले जानकारी दिए ।