काडमाडौं, ४ बैशाख । असोजयता उपत्यकाको प्रदूषण मात्रा पटकरपटक राष्ट्रिय मापदण्ड भन्दा धेरै माथि पुगेको छ। नेपाल सरकारले तोकेको मापदण्डअनुसार उपत्यकाको हावामा पिएम २.५ को मात्रा ४० माइक्रोग्राम प्रतिघनमिटर हुनुपर्छ। तर, उपत्यकाको हावामा पार्टीकुलेट म्याटर (पिएम) २.५ को मात्रा २ सय माइक्रोग्राम प्रतिघनमिटर भन्दा माथि पुगेको तथ्याङ्क छ। औसतभन्दा प्रदूषण मात्रा बढी (हानिकारक अवस्थामा) हुँदा सास फेर्नै सकस हुन्छ ।
पुस, माघ, फागुनको अधिकांश समय उपत्यकावासीले मापदण्डभन्दा पाँच गुणा बढीसम्म प्रदूषणको सकस भोग्नुपर्यो। राष्ट्रिय मापदण्डभन्दा दोब्बर प्रदूषणको मात्रा त उपत्यकाको हावामा २४ सै घण्टा रह्यो। फागुनमा छिटफुट वर्षा र चैतमा त्योभन्दा बढी भएको वर्षाले हावाको प्रदूषणमा केही कमी आए पनि चैत अन्तिममा भने प्रदूषणको मात्रा ह्वात्तै बढेको तथ्याङ्कले देखाएको छ। वातावरणबारे स्वतन्त्र अनुगमन गर्दै आएका व्यक्तिहरुको सञ्जाल दृष्टि काठमाडौंले उपत्यकामा डेढ दर्जन ठाउँमा प्रदूषण मापन उपकरण राखेर गरेको अनुसन्धानको तथ्याङ्कले यस्तो देखाएको हो।
