रौतहटमा केही दिनअघि सुटकेसमा भेटिएको रुबी साहको शवले देशभर चासो पाएको थियो । तर अब सो प्रकरण अन्तिमतर्फ उन्मुख भएको देखिन्छ, किनकि घटनाका मुख्य आरोपी लक्ष्मण पासवानको मृत्यु भइसकेको छ ।
बुधबार साँझ काठमाडौंको कीर्तिपुरस्थित वर्न अस्पतालमा उपचारकै क्रममा उनको निधन भएको रौतहट प्रहरी प्रवक्ता डीएसपी राजु कार्कीले बताए । चार दिनदेखि फरार रहेका पासवानलाई बिहानै रौतहटको माधोपुर नजिकै आफ्नै शरीरमा पेट्रोल छर्केर आगो लगाएको अवस्थामा भेटिएको थियो । गम्भीर घाइते अवस्थामा भेटिएका उनलाई प्रहरीले नियन्त्रणमा लिएर उपचारका लागि काठमाडौं पठाएको थियो ।
रौतहटका प्रहरी प्रमुख एसपी नेत्रमणि गिरीका अनुसार मुख्य अभियुक्तकै मृत्यु भएपछि मुद्दा क्रमशः बन्द हुने अवस्थामा पुगेको हो । तर अन्य व्यक्तिको संलग्नता भएरनभएको पत्ता लगाउन अनुसन्धान भने अझै जारी छ ।
यस प्रकरणमा सुटकेस बोकेर शव फाल्ने ई–रिक्सा चालक राजकुमार महरा पनि प्रहरी हिरासतमा छन् । प्रारम्भिक अनुसन्धानमा उनको प्रत्यक्ष संलग्नता नदेखिएको भए पनि प्रहरी अनुसन्धान जारी रहेको छ ।
आफ्नो अन्तिम घडीमा पासवानले बनाएको भिडियोमा उनले रुबीको हत्या आफूले नै गरेको स्वीकार गरेका छन् । उनले विद्यालय समयदेखि नै रुबीसँग प्रेम सम्बन्ध रहेको र दुई पटक विवाहसम्म गरेको खुलासा गरेका थिए । तर आर्थिक अभाव र पारिवारिक अस्वीकृतिले घटनाले यस्तो मोड लिएको उनको भनाइ भिडियोमै रेकर्ड भएको छ ।
रुबी साह केही महिनादेखि गौरमा डेरा लिएर ४ वर्षीय छोरालाई पढाउँदै आएकी थिइन् । उनका माइती घर र लक्ष्मणको गाउँ एउटै रहेको बताइएको छ ।
