काठमाडौं- नेकपा एमाले अध्यक्ष केपी शर्मा ओलीले देशका चर्चित भनिएका मानिसहरू नसामा भेटिने गरेको बताएका छन् ।
एघारौँ महाधिवेशनका स्वयंसेवकहरूलाई धन्यवाद दिन काठमाडौंमा बिहीबार आयोजित कार्यक्रममा उनले यस्तो बताएका हुन् ।
काठमाडौं महानगरपालिकाका मेयर बालेन्द्र साह, जेन-जी अभियन्ता सुधन गुरुङ र निकोलश भुसालहरूमाथि नसामा रमाउने गरेको आरोप लागिरहेका बेला ओलीले यो कटाक्ष गरेका हुन् ।
निकोलशले सार्वजनिक रुपमै लागुपदार्थ मानिने गाँजाको वकालत गर्ने गरेका छन् । उनले कहिलेकाहीँ खाने गरेको पनि बताउँछन्।
उता आफूलाई जेन-जी अभियन्ता बताउने सुधन गुरुङले सार्वजनिक रुपमै भेपबाट धुमपान गरिरहेको भेटिएको थियो ।
बालेनमाथि पनि यस्तै आरोप लाग्ने गरेको छ। यही सन्दर्भमा ओलीले देशका चर्चित मानिसहरू नसामा भेटिने गरेको भनेर कटाक्ष गरेका हुन् ।
‘देशका चर्चित भनिएका मानिसहरू अचेल नसामा भेटिन्छन् । चर्चामा ल्याउन खोजिएका मानिसहरू नसामा हुन्छन्’, उनले भने, ‘हाम्रा युवाहरू कोही पनि दुर्व्यवसनमा लागेका छैनन् । मेरो भनाइलाई इख मानेर दुर्व्यसन छोडे भने म खुसी हुन्छु ।’
