सडक विभागले धादिङको कृष्णभीरमा पुनः बल्झिएको पहिरोको समस्या समाधानका लागि दीर्घकालीन योजना अघि बढाएको छ ।
विभागका महानिर्देशक डा. विजय जैसीले आइतबार स्थलगत अनुगमनका क्रममा सञ्चारकर्मीसँग कुरा गर्दै कृष्णभीरको भौगर्भिक अवस्था र दीर्घकालीन समाधानका लागि दुईवटा विकल्पमा अध्ययन भइरहेको जानकारी दिएका हुन् ।
उनका अनुसार हालैको वर्षा र बाढीले कृष्णभीरको तल्लो भाग कटान गरेपछि पहिरोको समस्या पुनः देखिएको हो । सडकमा यातायात सञ्चालनमा ल्याउन विभागले चौबिसै घण्टा काम गरिरहेको उनले बताए ।
‘रसुवाको बाढीपछि सिर्जित समस्याले यहाँको सुरक्षा पर्खाल भत्काएपछि पहिरो फेरि सक्रिय भएको हो । अहिले ट्रयाक खोल्ने क्रममा भित्री भागमा सोचेभन्दा बढी दरारहरू देखिएका छन् । ती दरारलाई तत्काल सिल गर्ने र विज्ञहरूको परामर्शमा थप विश्लेषण गर्ने काम भइरहेको छ,’ जैसीले भने ।
उनका अनुसार विश्व बैंकको ठेक्काअन्तर्गतका निर्माण व्यवसायी तथा आवश्यक उपकरण परिचालन गरेर काम भइरहेको छ । रातिको समयमा फ्लड लाइट जडान गरी जोखिम न्यूनीकरण गर्दै कामलाई निरन्तरता दिइएको उनले बताए ।
‘प्राविधिक जटिलताका कारण ठ्याक्कै मिति तोक्न कठिन भए पनि उच्च प्राथमिकताका साथ सडक सञ्चालन गर्ने हाम्रो प्रयास जारी छ,’ उनले भने । कृष्णभीरको स्थायी समाधानका लागि विभागले दुईवटा मुख्य विकल्पमा अध्ययन गरिरहेको महानिर्देशक जैसीले जानकारी दिए ।
पहिलो विकल्पका रूपमा कृष्णभीर क्षेत्रमा सुरुङमार्ग निर्माण गर्ने र दोस्रो विकल्पका रूपमा त्रिशूली नदीको अर्को किनारबाट वैकल्पिक सडक विस्तार गरी दुईवटा पुल निर्माण गर्ने विषयमा गृहकार्य भइरहेको उनले बताए ।
‘यी दुईमध्ये जुन प्राविधिक रूपमा उपयुक्त र लागतका हिसाबले किफायती हुन्छ, त्यसलाई नै हामीले अगाडि बढाउनेछौँ,’ जैसीले भने ।
त्रिशूली करिडोरलगायत विभिन्न क्षेत्रमा क्षति भएका करिब २९ वटा पुलको मर्मत, सम्भार तथा पुनर्निर्माणलाई समेत सडक विभागले प्राथमिकतामा राखेको उनले बताए ।
धादिङको फुर्केखोला पुलको पुनर्निर्माणका लागि समेत काम अघि बढिरहेको जैसीले जानकारी दिए ।
उनका अनुसार फुर्केखोलामा रहेको ९४ मिटर लामो स्पानमा पिलरबिनाको बेलीब्रिज राख्ने विषयमा चिनियाँ विशेषज्ञहरूसँग परामर्श भइरहेको छ ।
‘चीनबाट आएको १०० मिटरको पुल त्यहाँ जडान गर्न सकिएमा २ देखि ३ हप्ताभित्र यातायात सुचारु गर्न सकिनेछ,’ उनले भने ।
सडक विभागसँग पुल निर्माण तथा पुनर्निर्माणका लागि आवश्यक प्राविधिक दक्षता रहेको उल्लेख गर्दै जैसीले क्षतिग्रस्त संरचनालाई यथाशक्य छिटो पुरानै अवस्थामा फर्काउने प्रतिबद्धता जनाए ।
देशभर करिब १४ हजार किलोमिटर सडक सञ्जाललाई व्यवस्थित राख्नु चुनौतीपूर्ण भए पनि स्रोतसाधनले भ्याएसम्म विभाग चौबिसै घण्टा परिचालन भइरहेको उनले बताए ।
राष्ट्रिय योजना आयोगका सदस्य तथा भौतिक पूर्वाधार मन्त्रालयका सचिवसहितको टोलीले समेत कृष्णभीरको स्थलगत अवस्था अवलोकन गरी समस्या छिटो समाधान गर्न निर्देशन दिएको विभागले जनाएको छ ।
सडक विभागले सुरक्षित रूपमा यातायात सञ्चालनका लागि आवश्यक सबै उपाय अपनाइरहेको जनाउँदै सर्वसाधारणलाई धैर्य गर्न आग्रह गरेको छ ।
