एमालेले कारबाही गरेको १० औँ दिनमा उनले सुनसरीको बराह क्षेत्रबाट मातृभूमि जागरण कार्यक्रमको सुरुवात गरेका हुन् ।
पार्टीको कारबाहीमा परेको एक सातापछि पुस १७ गते काठमाडौंमा पत्रकार सम्मेलन गरेर रावलले मातृभूमि जागरण अभियान सञ्चालन गर्ने घोषणा गरेका थिए । अभियानका क्रममा सुनसरीको बराहक्षेत्र नगरपालिका–५ मा शनिबार आयोजित समारोहमा रावलले अभियानमा आफ्नो कुनै व्यक्तिगत स्वार्थ नभएको बताए ।
‘मैले जुन मातृभूमि जागरण अभियान भनेको छु । यसमा मेरो कुनै व्यक्तिगत स्वार्थ छैन,’ उनले भने, ‘म आफैं पनि धेरै वर्ष अगाडि ०४९ सालमा नै मैले स्नातकोत्तर गरेको हुँ । ०४० सालको म अधिवक्ता हुँ । एउटा नागरिकले जहाँ पुग्नु पर्ने हो, म त्यहाँ पुगेको छु ।’
रावलले देशको एउटा सचेत नागरिक देश डुब्न लाग्दा टुलुटुलु हेरेर बस्न नसक्ने भएकाले आफूले पाइला चालेको बताए ।
‘म आज किन तपाईंहरूको बीचमा आएको छु भने, एउटा सचेत नागरिक देश डुब्न लाग्दा पनि राष्ट्रको अर्थतन्त्र, कृषि, उद्योग, राजनीतिक सुरक्षा सम्पूर्ण ध्वस्त हुँदा टुलुटुलु हेरेर बस्न सक्दैन,’ रावलले भने, ‘उसले पाइला चाल्नु पर्छ ।’
