सप्तरी । युवतीको बलात्कारपछि हत्या र नाबालकलाई वेपत्ता पारेको आरोप लागेका सप्तरीको डाक्नेश्वरी नगरपालिका–१ का नव निर्वाचित वडाध्यक्ष धीरेन्द्रकुमार साह पुर्पक्षका लागि जेल चलान भएका छन् ।
जिल्ला अदालतका न्यायाधीश दीपक धितालको एकल इजलासले वडाध्यक्ष साहसहित दुई जनालाई सोमबार पुर्पक्षका लागि थुनामा पठाउने आदेश दिएको हो । अदालतको आदेशपछि वडाध्यक्ष साहसहित शिक्षक राजनारायण साहलाई पनि पुर्पक्षका लागि जेल पठाइएको जिल्ला प्रहरी कार्यालयले जनाएको छ ।
नव निर्वाचित वडाध्यक्षसहित ६ जनाविरुद्ध दुई वटा मुद्दा दर्ता भएका छन् । उनीहरूलाई जबर्जस्ती करणी गरी कर्तव्य ज्यान गरेको र व्यक्ति वेपत्ता गरेको सम्बन्धी अभियोग लागेको छ । साह मंसिर २० मा वडाध्यक्षको शपथ लिँदै गर्दा पक्राउ परेका थिए । उनीसहितको समूहले सन्तोषीकुमारी साहलाई बलात्कार गरी हत्या गरेको आरोप छ ।
आफ्नी दिदीलाई बलात्कार गरी हत्या गरेको देखेपछि उनका भाइ १३ वर्षका नितिशकुमार साहलाई अपहरण गरी बेपत्ता पारेको आरोप छ । २०७९ फागुनमा डाक्नेश्वरी नगरपालिका–१ माधधोपुर टोलस्थित आँपको बगैँचाबाट मुखमा रुमाल कोचेर नितिशलाई अहपरण गरी लगेको प्रहरीको अनुसन्धानमा देखिएको थियो । अझैसम्म नितिशको अवस्था अज्ञात छ ।
