नेपाल एलपी ग्यास उद्योग सङ्घले पुरानै दरमा ग्यासको बिक्री वितरण गर्न उद्योगीहरूलाई आग्रह गरेको छ ।

सङ्घले आज विज्ञप्ति जारी गर्दै शुक्रबारदेखि नेपाल आयल निगमले तोकेको प्रतिसिलिण्डर रु दुई हजार ६० मा बिक्री गर्न आग्रह गरेको हो । भोटेकोशी बाढीका कारण पृथ्वी राजमार्गको कृष्णभीर खण्ड अवरुद्ध हुँदा उद्योगीले वैकल्पिक मार्गबाट ग्यास काठमाडौँमा ल्याएर बिक्री गरेका थिए ।

उपत्यकाबाहिरका उद्योगमा ग्यास भरेर ल्याउनु परेको भन्दै उद्योगीले प्रतिसिलिण्डर १०५ रूपैयाँ ३८ पैसा ढुवानी भाडाबापत थप गरी उपभोक्तासँग लिँदै आएका थिए । पृथ्वी राजमार्ग अवरुद्ध भएपछि गत भदौ १४ गतेदेखि काठमाडौँ उपत्यकामा बजारीकरण गरिरहेका उद्योगले मकवानपुर, पर्सा, बारा, चितवन, नवलपरासी र धनुषामा रहेका उद्योगमा सिलिण्डर रिफिल गरी वैकल्पिक मार्गबाट ल्याएर ग्यास बिक्री गर्दै आएका थिए । 

बालक अशोक दर्जीलाई सडकबाट ल्याएर संरक्षण गरे संगीतकार टंक बुढाथोकीले । उनीहरुबीच बाबुछोराजस्तै सम्बन्ध थियो । तर अहिले आएर यो सम्बन्धमा गम्भीर फाटो आएको छ ।

बुढाथोकीले हिजो सञ्चारकर्मीहरूसँग यो विषयमा पहिलो पटक खुलेर बोले । ‘झिंगेदाउ २’ चलचित्रको प्रिमियरमा पुगेका टंक बुढाथोकीलाई युट्यूबरहरुले घेरेर असान्दर्भिक विषय कोट्याएका थिए । बुढाथोकीले पनि मनको भँडास सबै पोखिदिए ।

अशोक दर्जीसँग अहिले आफ्नो बोलचाल र सम्पर्क नरहेको उनले स्वीकार गरे ।

उनले निकै असन्तुष्ट भावमा भने, ‘बोलचाल पनि छैन, केही पनि छैन मसँग । यति कुरा क्लियर हुनु । दाइसँग (टिका बुढाथोकी पनि त्यहीँ थिए) बोल्छन् । दाइलाई फोन गर्छन् अथवा के गर्छन् । मसँग अशोक दर्जीको उसको आइरहेको फिल्म (पार्वती) को टाइमदेखि हेलो-हाई र केही पनि छैन । यसमा लुकाएर लुक्ने केही कुरा छैन ।’

बुढाथोकी यतिमा रोकिएनन् । उनले अब जिन्दगीमा कसैलाई सहयोग नगर्ने अप्रिय घोषणा समेत गरे ।

‘यति कुरा क्लियर हुनु, म लाइफमा कसैलाई सहयोग गर्दिन अब,’ उनले भने ।

त्यसो त बुढाथोकीको ठूलो रिस चाहिँ अशोक दर्जीभन्दा बढी सामाजिक सञ्जालका फलोअर्ससँग रहेछ । अधिकांशले कमेन्टमा आफूलाई हमेशा ‘अशोक दर्जीलाई युज गरेको’ आरोप लगाएको भन्दै उनले चित्त दुखाए ।

उनले कटाक्षयुक्त भाषामा भने, ‘हो, मैले उसलाई गीत गाउन सिकाउन युज गरेँ । उसलाई मैले बोल्न सिकाएर युज गरेँ । मैले उसलाई एक्टर बनाएर युज गरेँ । करोडौँ खर्च गरेर फिल्म बनाइदिएर हिरो बनाएँ, युज गरेँ । अब म युज गर्दिनँ । म लाइफमा कसैलाई सहयोग पनि गर्दिन ।’

टंक र अशोकको सम्बन्ध बिग्रिनुको कारण चाहिँ टंकका दाजु टिका बुढाथोकीले खोले । उनका अनुसार अशोकले सुरुमा पढाइ सकेर नेपाली सेनामा जागिर खाउन् भन्ने टंक चाहन्थे । तर अशोकले फरक बाटो समातेपछि आफूहरूलाई करिअरको चिन्ता भएको उनको भनाइ छ ।

‘भाइले उसलाई पहिले एसइई सकेर सेनामा जागिर खावस् र लाइफ सेटल होस् भन्ने चाहेको थियो र त्यही सल्लाह दिएको थियो । गीत-संगीतको काम त सेनाको जागिर खाएरै पनि गर्न सकिन्छ भनेको थियो । अशोकले चाहिँ अहिल्यै केही गर्छु भनेर आफ्नो हिसाबले अगाडि बढ्यो । हामीलाई चिन्ता भनेको उसले पढाइ बीचमै छोडेकोमा हो,’ उनले प्रष्ट्याए ।

‘मन विनाको धन २’ मा अशोक दर्जीलाई नराखिएको प्रसंगबाट कुराकानी सुरु भएको थियो । युट्यूवर र टंक बुढाथोकीबीचको पुरा सवाल जवाफ यस्तो छ:

‘मन विनाको धन २’ ठूलोमा अशोक दर्जीलाई नराखिएकै हो त ?

हो । यसमा उनी छैनन् । २ हजार प्रतिशत छैनन् ।

 

खासमा तपाईँहरूको सम्बन्ध किन बिग्रिएको हो ?

एउटा सडकको बच्चालाई हिरो बनाइदिएर मैले गल्ती गरेँ । मलाई जतिसुकै जे कमेन्ट गरे पनि हुन्छ, जे भने पनि हुन्छ । जीवनमा टंक बुढाथोकीले अब कसैलाई पनि यसरी ‘यूज’ गर्दैन । अशोक मात्र हैन कसैलाई पनि ।

एउटा बच्चालाई मैले ‘हिरो’ बनाइदिएँ । त्योभन्दा अरू-अरु उसको कार, एरोप्लेनवाला सपना चाहिँ म पूरा गर्न सक्दिनँ । त्योभन्दा ठूला सपनाहरू म आफ्नै छोराको त सक्दिनँ ।

अन्तिममा उनले चाहे भने फेरि जोडिन सम्भव छैन ?

सम्भव नै छैन । असम्भव छ । किनभने मैले पनि आफ्नो परिवार, आफ्नो छोराछोरी… यो समाजको कमेन्ट सुन्दासुन्दा आठ वर्षमा म अति नै भइसकेँ । प्रयोग गर्‍यो, प्रयोग गर्‍यो, प्रयोग गर्‍यो, प्रयोग गर्‍यो । समाजले नै जोड्देको सम्बन्ध थियो, समाजले नै सम्बन्धलाई तोड्दियो ।

कतिपयले अशोकको अरबौँ रुपैयाँ थियो, अब टंकले फिर्ता गर्नुपर्छ भने जस्ता पनि कमेन्ट गरिरहेका छन् नि ?

अँ हो हो । त्यस्ताहरू रहेछन् । मेरो बैंक एकाउन्ट हेर्दा, यताउति सब हेर्दा त्यस्तो देखियो भने फिर्ता गर्न कुनै ठूलो कुरो भएन ।

अशोक भाइको पार्वती लागिरहेको छ । तपाईँले हेर्नुभयो ?

मैले फिल्म हेरेको छैन । म सुटिङमा छु । आज अलिकति ब्रेक मिलाएर यो ज्ञानेन्द्र दाइको रिक्वेस्टले गर्दा म यहाँ आएको हुँ ।

केही शुभकामना सन्देश त दिनुभयो होला नि ?

सधैँ शुभकामना छ नि । बाबुले राम्रो गरिरहेका छन्, अझ राम्रो हुन्छ, राम्रो होस् । उसलाई सधैँ शुभकामना । मैले भनेकै थिएँ, जबसम्म आफ्नो खुट्टामा उभिने छैनन्, तबसम्म म साथ दिनेछु । अब आफ्ना खुट्टामा उभिइसकेका छन् भनेपछि अब मसँग त्यस्तो पहिलाको जस्तो साथ हुनेछैन ।

फादर्स डे पनि अस्ति भर्खर गयो, बाबुले तपाईँलाई त बुवा नै मान्नुहुन्थ्यो, शुभकामना दिनुभयो कि भएन ?

केही पनि भएन ।

अनि चित्त दुखाइ कत्तिको हुन्छ ?

किन चित्त दुखाउने ? उ मेरो छोरा हो र ? मेरो छोराले शुभकामना दियो भइहाल्यो नि ।

तपाईँलाई खासमा के कुराले बढी आहत बनाएको छ ?

अशोकको भन्दा पनि जनताले प्रयोग गर्‍यो, प्रयोग गर्‍यो…भन्ने सुन्दा सुन्दा म वाक्क भइसकेँ । सडकबाट उठाएर ल्याएर आज आफ्नो खुट्टामा उभिएर खाने बनाइदिएँ । तर देशविदेशदेखि सबैतिर युज गर्‍यो, युज गर्‍यो भनिरहेका छन् । कहिलेसम्म सुन्ने ? अब त मेरो छोरोले पनि कमेन्ट पढ्न थालिसक्यो । मेरो छोरो पनि ठूलो भयो । उसले पनि उसको बुवाको लागि लेखेका कमेन्टहरू पढेर चित्त दुखाउने बेला हुन थालिसकेछ ।

सुरुमा अशोक टंकसँग छुट्टिए भन्ने हल्ला भएको थियो । उहाँ आफैँ निस्किनुभएको हो कि अरू केही भएको थियो ?

सबै अन्तर्वार्ताहरू आइरहेका छन् हैन, त्यो मैले भन्नै पर्दैन । अन्तर्वार्तामा उसले सबै कुरा बोलिरहेको छ । अशोकले सबै अन्तर्वार्तामा भनिसकेको छ । फेरि फेरि मैले यसको आन्सर दिनु जरुरी छैन ।

अब च्वाट्टै हात छोड्नै भएको हो त ? सहकार्य हुँदै हुँदैन ?

सहकार्य हुन सक्छ तर ‘मन बिनाको धन २’ मा चाहिँ भएन । अब म यो यूज गर्‍यो भन्नेवाला कमेन्ट सुन्न चाहँदिनँ । पछि फेरि जनताले नै टंक बुढाथोकीले अशोकलाई काम दियोस्, अर्को फिल्ममा हालोस् भनेर मलाई प्रतिक्रिया आयो भने हुन सक्छ ।

अशोकले तपाईँसँग अनुमति लिएर नै पार्वतीमा अभिनय गरेको हो ?

मेरो त्यस्तो अनुमति-सनुमति केही पनि छैन । मबाट गइसकेका छन् उनी । अब उनले मसँग अनुमति लिने, सोध्ने ती दिनहरू, ती कुराहरू सबै सकिएका छन् । म उसको गार्जियन थिएँ, अब होइन । थिएँ, अब त्यो सम्बन्ध त्यहीँसम्म थियो । अबको सम्बन्ध भयो भने व्यावसायिक सम्बन्ध हुन्छ ।

अशोकजीले कुटाइ खाएको भिडियो सार्वजनिक भयो । टंकले किन हात छोड्यो, किन हेरेन भन्ने प्रश्नहरू पनि आएको थियो । त्यो समयमा तपाईँको के थियो रिप्लाई ?

त्यो समयमा म केही बोलिनँ । म आज मात्रै बोलेको हो । बोलेर कामै छैन । मैले जे गरेँ, जे बोले पनि यूजै गर्‍यो भन्ने हो । यूज गर्न छोडेँ के, दिक्क भइसकेँ अब । हुँदाहुँदै एआर (टंकको छोरा) सँगको फोटोमा पनि गाली आइराख्या छ । अब म यस्तो सहँदिनँ के ।

एआरले अब यो कमेन्टहरू पढ्न थालिसक्यो । अब एआर बुझ्न थालिसक्यो । एउटा सडकको बच्चालाई हिरो बनाइदिएर मैले गल्ती गरेँ ।

गल्ती गरेकै महसुस भएको हो त ?

अँ गल्ती गरेँ । अनि त्यो मैले कमेन्ट पाइरहेको छु नि त यूज गर्‍यो भनेर । यूज गर्नु भनेको त गल्ती हो । मलाई गल्ती गरेको महसुस गराइदिनुभएको छ दर्शकहरूले । त्यो कारणले गर्दा यस्तो गल्तीहरू अब जीवनमा म कसैलाई पनि गर्दिनँ ।

नेपाली कांग्रेसका सभापति गगन थापाले पूर्वसभापति शेरबहादुर देउवालाई आगामी पन्ध्रौँ महाधिवेशनमा सहभागी हुन आग्रह गरेका छन्।

बिहीबार बसेको कांग्रेस केन्द्रीय कार्यसमिति बैठकलाई सम्बोधन गर्दै थापाले पार्टीभित्र एकता भइसकेकाले छुट्टै महाधिवेशन गर्नुपर्ने आवश्यकता नरहेको बताएका हुन्।

उनले पार्टीलाई थप एकताबद्ध बनाएर अघि बढ्न आफूले आवश्यक त्याग र लचकता अपनाउन तयार रहेको पनि बताए।

‘मेरो सर्वोच्च नेता शेरबहादुर दाइलाई आग्रह गर्दछु, छुट्टै बसेर महाधिवेशन गर्नुपर्ने आवश्यकता छैन। मेरो तर्फबाट अरू के त्याग गर्नुपर्छ, म तयार छु। म पार्टीको नेता भएपछि अरू थप विषयमा समेटेर लिएर जाने कुरामा केमा लचकता लिएर जानुपर्ने हो, म तयार छु,’ थापाले भने।

थापाले महाधिवेशनमा तल्लो तहका कार्यकर्ताले सहभागिता नजनाउने भन्ने भ्रममा नपर्न पनि आग्रह गरे। ‘३ गतेको अधिवेशनमा तल वडामा रहेका साथीहरू भाग नलिऊँ भन्ने धेरै ठाउँमा सुनेको छु। यो अलमलमा नरहनु होला,’ उनले भने।

नेताहरूबीच मात्रै एकता भएर नपुग्ने भन्दै थापाले पार्टीका तल्लो तहसम्मका नेता तथा कार्यकर्तालाई समेत एकताबद्ध भएर महाधिवेशनमा सहभागी हुन आग्रह गरे।

‘नेता एक भएर मात्र हुँदैन, तल्लो तहका कार्यकर्ता पनि एकजुट हुनुपर्छ। त्यसकारण जे–जे कारणले जस–जसले चित्त दुखाउनुभएको छ, एक ठाउँमा आइदिनुहोला,’ थापाले भने।

नेपाल विद्युत् प्राधिकरणले रसुवाको भोटेकोशी नदीमा आएको विनाशकारी बाढीमा बेपत्ता भएका कर्मचारी तथा कामदारका परिवारका लागि राहत प्याकेज घोषणा गरेको छ।

बाढीका कारण १३ वटा जलविद्युत् आयोजनामा क्षति पुगेको छ भने विभिन्न आयोजनामा कार्यरत कर्मचारी तथा कामदार बेपत्ता भएका छन्। प्राधिकरणअन्तर्गत मात्रै ४७ जना कर्मचारी तथा कामदार बेपत्ता रहेको जनाइएको छ।

ऊर्जा, जलस्रोत तथा सिँचाइ मन्त्री विराजभक्त श्रेष्ठको अध्यक्षतामा बुधबार साँझ बसेको प्राधिकरण सञ्चालक समितिको बैठकले बेपत्ता कर्मचारी तथा कामदारका आश्रित परिवारलाई तत्काल राहत उपलब्ध गराउने निर्णय गरेको हो।

प्राधिकरण सञ्चालक समिति सदस्य अंशुकिरण शाहीका अनुसार बेपत्ता भएकाको खोजी कार्यमा सहयोग, सम्बन्धित परिवारको धर्म तथा परम्पराअनुसार सामाजिक संस्कार गर्न र दैनिक जीवनयापनमा सहयोग पुर्‍याउने उद्देश्यले राहत प्याकेज ल्याइएको हो।

निर्णयअनुसार बेपत्ता भएका स्थायी कर्मचारी, ज्यालादारी तथा सेवा करारका कामदारका नजिकका हकवालालाई तत्काल राहतस्वरूप प्रति कर्मचारी/कामदार ५० हजार रुपैयाँ उपलब्ध गराइनेछ।

त्यस्तै, स्थायी कर्मचारीका हकमा प्राधिकरणले क्षतिपूर्ति वा अन्य रकमसम्बन्धी थप निर्णय नगरेसम्म, अथवा बढीमा ६ महिनासम्म, बेपत्ता कर्मचारीको तहको सुरु तलब स्केलको ५० प्रतिशत रकम मासिक निर्वाह भत्ताका रूपमा उपलब्ध गराउने निर्णय भएको छ। यो सुविधा भदौ महिनादेखि लागू हुने जनाइएको छ।

बैठकमा मन्त्री श्रेष्ठले बेपत्ता भएका कर्मचारी तथा कामदारका परिवार सरकारको जिम्मेवारी भएको बताएका थिए।

‘हामी एउटै परिवार हौँ। यो पैसाले यत्रो ठूलो दुःखको घाउ त निको पार्दैन, तर मल्हम लाउने काम गरोस्,’ उनले भने।

प्रधानमन्त्री दैवी प्रकोप उद्धार कोषमा मौज्दात रकम झण्डै साढे १४ अर्ब पुगेको छ ।

प्रधानमन्त्री तथा मन्त्रिपरिषद्को कार्यालयका अनुसार आज बिहानसम्म विभिन्न नौवटा बैङ्कमा रु १० अर्ब ७९ करोड २६ लाख ६४ हजार ८९८ मौज्दात छ । त्यस्तै, कोषका दुई वटा बैङ्कमा रहेको डलर खातामा रु दुई करोड ३९ लाख ३० हजार ७३१ अमेरिकी डलर जम्मा भएको छ ।
कार्यालयका अनुसार सबै खातामा गरी रु १४ अर्ब ४५ करोड ९८ लाख १० हजार १७८ जम्म भएको हो ।

कोषमा जम्मा भएको रकमबाट रसुवाको भोटेकोशी नदीमा आएको बाढीबाट पीडितलाई राष्ट्रिय विपद् जोखिम न्यूनीकरण तथा व्यवस्थापन प्राधिकरणमार्फत रु एक अर्ब निकासा भइसकेको छ ।

सरकारले हालै रसुवाका बाढी प्रभावित परिवारलाई आवास भाडा र अन्य आवश्यक खर्च व्यवस्थापनका लागि मासिक रकम उपलब्ध गराउने निर्णय गरिसकेको छ ।

जसअनुसार चार सदस्यसम्मको परिवारलाई मासिक रु १५ हजार र थप प्रत्येक सदस्यका लागि रु दुई हजार अतिरिक्त उपलब्ध गराइने छ ।

 करदाता प्रोत्साहन उपहार कार्यक्रमअन्तर्गत भदौ महिनाको विजेता घोषणा गरिएको छ । 

बिहीबार अर्थमन्त्रालयअन्तर्गत आन्तरिक राजस्व विभागले बिहीबार भदौ महिनाका लागि ३२ जना विजेता घोषणा गरेको हो ।

विभागका कटियानी पोलिक्लिनिकमा २०० रुपैयाँको सेवा लिएका कुपन नम्बर ०४८९१५६१८२११ ले १० लाख रुपैयाँ जितेको छ । 

साथै १५ भदौसम्मको कार्यक्रममा सुनिता फेन्सी स्टोरबाट सात हजार रुपैयाँको सामान खरिद गर्ने उपहार कुपन नम्बर ०३६४४७८५२३७८ ले १० लाख रुपैयाँ जितेको छ ।

यस्तै ३० जनाले जनही १ लाख ३३ हजार ३३४ रुपैयाँका दरले नगद पुरस्कार पाएका छन् ।

त्यस्तै प्रधानमन्त्री राहत कोषमा १ हजार रुपैयाँ भुक्तानी गरेका एक ग्राहकले१ लाख रुपैयाँ प्राप्त गरेका छन् ।

उनको कुपन नम्बर ०४२६१८४७७६२० रहेको छ ।

रसुवा बाढीपछि १५ भदौसम्म रोकिएको कार्यक्रम सरकारले आज विजेताहरू घोषणा गरेको हो ।

काठमाडौं उपत्यकाभित्र बिग्रिएका संघीय सडकको मर्मतसम्बन्धी गुनासो तथा सुझाव दर्ता गर्न ‘सडक सुझाव एप’ सञ्चालनमा ल्याइएको छ । सडक डिभिजन काठमाडौंले सफल परीक्षणपछि एपलाई औपचारिक रूपमा सञ्चालनमा ल्याएको हो ।

अब उपत्यकाका नागरिकले संघीय सडकअन्तर्गतका बिग्रिएका सडकको मर्मतसम्बन्धी गुनासो तथा सुझाव एपमार्फत दर्ता गर्न सक्नेछन् । एपमा दर्ता गरिएको गुनासोको समाधान प्रक्रिया र अवस्था नागरिकले प्रत्यक्ष हेर्न सक्ने व्यवस्था गरिएको छ । गुनासो सम्बोधन भएपछि त्यसको जानकारीसमेत एपमार्फत प्राप्त हुने सडक डिभिजन काठमाडौंले जनाएको छ ।

हाल एपमार्फत काठमाडौं उपत्यकाभित्र संघीय सडकअन्तर्गतका करिब ४७२ किलोमिटर सडक सम्बन्धी गुनासो तथा सुझाव दर्ता गर्न सकिनेछ । संघीय सडकअन्तर्गत नपर्ने सडकका सम्बन्धमा भने उक्त सडक कुन निकायको जिम्मेवारीमा पर्छ भन्ने जानकारीसमेत एपबाट उपलब्ध गराइनेछ ।

सडक मर्मतसम्बन्धी गुनासो व्यवस्थापनलाई प्रभावकारी बनाउँदै एपलाई देशभर विस्तार गर्ने तयारी गरिएको छ । आगामी दुई हप्ताभित्र ललितपुर र भक्तपुरलाई समेटेर सेवा विस्तार गर्ने र त्यसपछि क्रमशः देशभर सञ्चालनमा ल्याउने सडक डिभिजन काठमाडौंको लक्ष्य छ ।

राज्य व्यवस्था तथा सुशासन समितिले राष्ट्रिय सेवा दल विधेयक, २०८३ सम्बन्धी प्रतिवेदन पारित गरेको छ ।

समितिको बिहीवार बसेको बैठकले राष्ट्रिय सेवा दल विधेयक, २०८३ सम्बन्धी प्रतिवेदन सर्वसम्मत रूपमा पारित गरेको हो ।

विधेयकको प्रतिवेदन तयार गर्न समितिले उपसमितिसमेत गठन गरेको थियो । उपसमितिले तयार पारेको प्रतिवेदनलाई सर्वसम्मत रूपमा पारित गरिएको समिति सभापति हरि ढकालले जानकारी दिए ।

उनका अनुसार समितिको प्रतिवेदन प्रतिनिधिसभाको बिहीवार नै बस्ने बैठकमा पेश गरिनेछ । प्रतिवेदनलाई अन्तिम रूप दिन सभापति ढकालले समिति सचिवलाई निर्देशनसमेत दिएका छन् ।

समितिले राष्ट्रिय सेवा दल विधेयक, २०८३ अध्ययन गर्न २०८३ भदौ ४ गते गठन गरेको उपसमितिमा सदस्यको जिम्मेवारीसमेत हेरफेर गरेको छ ।

समितिले दिपकराज बोहराको स्थानमा गजला समिम मिकरानीलाई २०८३ भदौ २२ गतेदेखि लागू हुने गरी जिम्मेवारी तोकेको हो ।

राज्य व्यवस्था तथा सुशासन समितिको कार्यविधि, २०८३ को दफा ५ को उपदफा ३ बमोजिम जिम्मेवारी हेरफेर गरिएको समितिले जनाएको छ ।

सहकारी संस्थाले सदस्यलाई प्रवाह गर्ने ऋणको अधिकतम ब्याजदर १३ प्रतिशत कायम गरिएको छ ।

सहकारी रजिष्ट्रारको कार्यालयले सहकारी ऐन, २०७४ को दफा ५१ बमोजिमको समितिको सिफारिसमा सन्दर्भ ब्याजदर पुनरावलोकन गर्दै आजैदेखि लागू हुने गरी ऋणको अधिकतम ब्याजदर १३ प्रतिशत निर्धारण गरेको हो ।

यसअघि सहकारी संस्थाका लागि ऋणको अधिकतम ब्याजदर १६ प्रतिशत तोकिएको थियो । नयाँ व्यवस्थाअनुसार अब सहकारी संस्थाले १३ प्रतिशतभन्दा बढी ब्याज लिन पाउने छैनन् । सहकारी रजिष्ट्रारको कार्यालयका अनुसार संस्थाले आफ्नो कारोबारको अवस्था, आवश्यकता र औचित्यको विश्लेषण गरी १३ प्रतिशतभन्दा कम ब्याजदरसमेत निर्धारण गर्न सक्नेछन् ।

त्यस्तै, बचतमा दिने र ऋणमा लिने ब्याजदरबीचको अन्तर भने छ प्रतिशतभन्दा बढी हुन नहुने व्यवस्था गरिएको छ । कार्यालयले सहकारी संस्थाले सदस्यलाई प्रदान गरेको ऋणमा लागेको ब्याजलाई मूल ऋणमा पुँजीकृत गरी त्यसमा पुनःब्याज लगाउन नपाउने कानुनी व्यवस्थाको पूर्ण पालना गर्नसमेत निर्देशन दिएको छ ।

यस्तै, संस्थाले हर्जाना रकम लिने निर्णय गरेको अवस्थामा असुल हुन बाँकी ब्याज रकमको पाँच प्रतिशतभन्दा बढी हर्जाना लिन नपाउने व्यवस्था गरिएको छ ।

ऋणसँग सम्बन्धित सम्पूर्ण लागत ब्याजदरमै समावेश हुने भएकाले सहकारी संस्थाले प्रशासनिक शुल्क, सेवा शुल्क, नवीकरण शुल्क, फाराम दस्तुर वा यस्तै अन्य कुनै शीर्षकमा थप रकम लिन नपाउने कार्यालयले स्पष्ट गरेको छ ।

नयाँ निर्देशनअनुसार सहकारी संस्थाले निर्धारण गरेको ब्याजदर सबै सदस्यले जानकारी पाउने गरी आफ्नो वेबसाइट वा अन्य माध्यमबाट अनिवार्य रूपमा सार्वजनिक गर्नुपर्नेछ ।

एकै प्रकृतिको बचत वा ऋणमा ब्याजदर कायम गर्दा सदस्य, सञ्चालक समिति तथा पदाधिकारी, लेखा सुपरीवेक्षण समितिका संयोजक तथा सदस्य, विभिन्न उपसमितिका संयोजक तथा सदस्य, व्यवस्थापक र कर्मचारीबीच कुनै विभेद गर्न नपाइने व्यवस्था पनि गरिएको छ ।

यस्तै, सहकारी संस्थाले ऋण प्रवाह गर्दा सम्बन्धित ऋणी सदस्यको व्यक्तिगत खातामा रकम जम्मा गर्नुपर्नेछ । सदस्यले व्यक्तिगत रूपमा लिएको ऋण दायित्वभन्दा बढी हुने गरी संस्थाको दायित्वसँग जोडेर ऋणी सदस्यमाथि थप ऋणभार सिर्जना गर्न नपाइने निर्देशनमा उल्लेख छ ।

नवलपुरको हुप्सेकोट गाउँपालिका–६, पेलेगास्थित घाँगी भिरमा जमिनमुनिबाट लगातार निस्किरहेको धुवाँमा कार्बन मोनोअक्साइड ग्यास रहेको पुष्टि भएको छ। खानी तथा भूगर्भ विभागका प्रतिनिधिले स्थलगत अध्ययनका क्रममा धुवाँमा कार्बन मोनोअक्साइड ग्यास रहेको बताएका हुन्।

धुवाँ निस्किनुको कारणबारे थप अध्ययन गर्न विभागको टोलीले घटनास्थलबाट माटो, ढुंगा तथा धुवाँका अवशेषका नमुना संकलन गरेको छ। संकलित नमुनाहरू प्रयोगशालामा परीक्षण गरेपछि जमिनमुनिबाट धुवाँ निस्किनुको वास्तविक कारणबारे थप तथ्य पत्ता लाग्ने विभागले जनाएको छ।