नेपाल प्रिमियर लिग (एनपीएल) अन्तर्गत आइतबारको खेलमा जनकपुर बोल्ट्सले पोखरा एभेन्जर्सलाई ९ रनले पराजित गरेको छ । योसँगै जनकपुरले प्रतियोगितामा दोस्रो जित निकालेको छ ।
कीर्तिपुरस्थित त्रिभुवन अन्तर्राष्ट्रिय क्रिकेट मैदानमा जनकपुरले दिएको १ सय ४८ रनको लक्ष्य पछ्याएको पोखराले निर्धारित २० ओभरमा ९ विकेट गुमाउँदै १ सय ३८ रन मात्रै बनाउन सक्यो ।
पोखराका लागि कप्तान कुशल भुर्तेलले सर्वाधिक ३५ रन बनाए । बिपिन आचार्यले २०, बिपिन खत्रीले अविजित १७ र किरण ठगुन्नाले १५ रन जोडे । शाकिब अल हसनले ९, महेदी हसनले ८, अर्जुन घर्तीले ७, चमिका करुणारत्नेले ४ र दिनेश खरेलले ३ रन बनाए । मोहम्मद सैफुद्दिनले खाता खोल्न सकेनन् । प्रतीक पोखरेल २ रनमा अविजित रहे ।
पोखराको पहिलो विकेट दिनेश खरेलका रूपमा झरेको थियो । उनलाई मोइन अलीले अनिल शाहको हातबाट क्याच गराए । त्यसपछि महेदी हसनलाई पनि मोइनले अभिषेक तिवारीको हातबाट क्याच गराए ।
कप्तान कुशल भुर्तेललाई ललित राजवंशीले अभिषेक तिवारीको हातबाट क्याच गराए । शाकिब अल हसन र अर्जुन घर्तीलाई सैफ हसनले आउट गरे । किरण ठगुन्नालाई हरमित सिंहले बोल्ड गरे भने मोहम्मद सैफुद्दिनलाई मोइन अलीले बोल्ड गरे । चमिका करुणारत्नेलाई हरमित सिंहले आफैँ क्याच लिएर आउट गरे । बिपिन आचार्यलाई जिम्मीले राहुल यादवको हातबाट क्याच गराए ।
जनकपुरका लागि मोइन अली, हरमित सिंह, ललित राजवंशी र सैफ हसनले समान २ विकेट लिए । जिम्मीले १ विकेट हात पारे ।
यसअघि टस हारेर पहिले ब्याटिङ गरेको जनकपुरले निर्धारित २० ओभरमा ७ विकेट गुमाउँदै १ सय ४७ रन बनाएको थियो । जनकपुरका लागि त्रित राज दासले सर्वाधिक ६१ रन बनाएका थिए । मोइन अलीले २१ र अभिषेक तिवारीले अविजित २४ रन जोडेका थिए ।
यो जितसँगै जनकपुरले दुई खेलमा जित संख्या दुई पुर्याएको छ । पोखराले भने प्रतियोगितामा लगातार दोस्रो हार बेहोरेको छ ।
प्रधानमन्त्री बालेन्द्र शाह (बालेन) ले सामाजिक सञ्जालमार्फत ‘सही समय आएपछि सबैको गलत समय आउँछ’ भन्दै चेतावनी दिएका छन् ।
प्रधानमन्त्री बालेनले आइतबार फेसबुकमा स्टाटस लेख्दै एकदुई जना उम्किन्छु भनेर सपना नदेख्न चेतावनी दिएका हुन् ।
उनले लेखेका छन्, ‘सही समय आएपछी, सबैको गलत समय आउछ, एकदुई जना उम्किन्छु भनेर सपना नदेखे हुन्छ !’
शुक्रबार विभिन्न सञ्चारमाध्यममा प्रवेश गरेर पत्रकार पक्राउ गरिएको र केही मिडिया हाउसमा धरपकड भएको घटनापछि सरकारको आलोचना भइरहेको छ । समाचार लेखेकै आधारमा पत्रकार पक्राउ गरिएको भन्दै पत्रकार, सञ्चारकर्मी तथा विभिन्न क्षेत्रबाट विरोध भइरहेको छ ।
पक्राउ परेका पत्रकार केही घण्टामै रिहा भए पनि घटनाबारे सरकारको जवाफदेहिता माग भइरहेको छ । पत्रकार पक्राउ प्रकरणमा प्रधानमन्त्री बालेन, उनको सचिवालय र गृहमन्त्री सुधन गुरुङको भूमिकामाथि प्रश्न उठिरहेका बेला प्रधानमन्त्रीको यस्तो अभिव्यक्ति आएको हो ।
यसअघि प्रधानमन्त्रीका प्रमुख सल्लाहकार कुमार बेनले २८ जना पत्रकारको सूचीबारे व्यङ्ग्यात्मक टिप्पणी गरेका थिए । उक्त पोस्टमा प्रधानमन्त्री बालेनले पनि ‘कुपण्डोल जाने मात्र पत्रकार, अरू कलाकार’ भन्दै प्रतिक्रिया दिएका थिए ।
पत्रकार पक्राउ प्रकरणको विरोध भइरहेका बेला प्रधानमन्त्रीले दिएको पछिल्लो अभिव्यक्तिको आशय र लक्षित समूहबारे भने खुलाएका छैनन् ।
जनकपुर बोल्ट्सका तृतराज दास राजधानीमा जारी तेस्रो संस्करणको नेपाल प्रिमियर लिग (एनपीएल)मा अर्धशतक हिर्काउने छैटौं खेलाडी बनेका छन् ।
तृतले पोखरा एभेन्जर्सविरूद्धको खेलमा ५१ बलमा ५० रन पूरा गरे। उनको अर्धशतकमा ६ चौका र १ छक्का सामेल छन् ।
यसअघि जारी प्रतियोगितामा पाँचौ अर्धशतक हिर्काउने खेलाडीमा कर्णाली याक्सका कप्तान सोमपाल कामी बनेका थिए । उनले विराटनगर किङ्सकाविरूद्ध २७ बलमा अर्धशतक पूरा गरेका हुन् ।
यस्तै कर्णालीकैविरूद्ध विराटनगरका किङ्सका लोकेश बमले ३२ बलमा अर्धशतक हिर्काएका थिए । जारी एनपीएलमा लोकेश अर्धशतक हिर्काउने चौथो खेलाडी बने ।
प्रतियोगिताको तेस्रो अर्धशतक जनकपुर बोल्ट्सका मोइन अलीको नाममा छ । अलीले काठमाडौं गोर्खाजकाविरूद्ध ४९ बलमा अर्धशतक पूरा गरेका थिए ।
यसअघि एनपीएलको दोस्रो अर्धशतक सुदूरपश्चिमका कप्तान दीपेन्द्रसिंह ऐरीको नाममा छ । ऐरीले पोखरा एभेन्जर्सकाविरूद्ध ३६ बलमै अर्धशतक पूरा गरेका थिए । जारी एनपीएलको पहिलो अर्धशतक भने चितवन राइनोजका डेभिड मलानको नाममा छ । मलानले विराटनगर किङ्ग्सका विरुद्ध ४१ बलमै अर्धशतक हिर्काएका थिए ।
प्रधानमन्त्रीका प्रमुख राजनीतिक सल्लाहकार कुमार बेनले पत्रकार पक्राउ परेको विषयमा व्यंग्यात्मक टिप्पणी गरेका छन् ।
सरकारले गत शुक्रबार विभिन्न मिडिया हाउसमा प्रवेश गरेर केही पत्रकारलाई पक्राउ गरेको थियो भने केही सञ्चारमाध्यममा धरपकड गरेको थियो । चौतर्फी आलोचना भएपछि केही घण्टामै पक्राउ परेका पत्रकार रिहा भएका थिए ।
समाचार लेखेकै आधारमा पत्रकार पक्राउ गरिएको भन्दै प्रधानमन्त्री बालेन्द्र शाह, उनको सचिवालय तथा गृहमन्त्री सुधन गुरुङको आलोचना भइरहेको छ ।
यसैबीच, सञ्चारमाध्यममा २८ जना पत्रकारलाई पक्राउ गर्न प्रधानमन्त्री कार्यालयले सूची तयार पारेको समाचार सार्वजनिक भएको थियो । प्रधानमन्त्रीका राजनीतिक सल्लाहकार कुमार बेनकै निर्देशन तथा योजनामा पत्रकार पक्राउ परेको बताइन्छ ।
आफूमाथि पत्रकार पक्राउको आरोप लागेपछि बेनले सामाजिक सञ्जालमार्फत टिप्पणी गरेका हुन् । उनले विभिन्न सञ्चारमाध्यममा कार्यरत पत्रकारलाई ट्याग गर्दै २८ जनाको सूचीमा नपरेकालाई पत्रकार भन्नु कि नभन्नु भन्ने आशयको टिप्पणी गरेका छन् ।
‘यो २८ जना पत्रकारमा को को पर्या हो । २८ मा नपर्ने नि के पत्रकार भन्नू हैन साथी हो,’ उनले फेसबुकमा लेखेका छन् ।
न्यायपालिकामा भइरहेको भनिएको ‘सेटिङ’ र भ्रष्टाचारविरुद्ध स्वतन्त्र नागरिक अभियानले काठमाडौँको माइतीघर मण्डलामा प्रदर्शन गरेको छ ।
हालै चर्चामा आएको इनाम सापकोटा प्रकरणलाई आधार बनाउँदै अभियानका अगुवाहरूले न्यायालयको स्वच्छता र पारदर्शिताका लागि उच्चस्तरीय छानबिन समिति गठन गर्न माग गरेका छन् ।
प्रदर्शनमा सहभागी पूर्वराजदूत डा. निर्मल विश्वकर्माले न्यायालयभित्र सेटिङका माध्यमबाट न्याय किनबेच भइरहेको भन्दै गम्भीर आशंका व्यक्त गरे ।
आन्दोलनरत समूहले न्यायाधीशहरूको कार्यशैलीमाथि प्रश्न उठाउँदै भ्रष्टाचारमा संलग्न न्यायका अधिकारीहरूलाई तत्काल छानबिनको दायरामा ल्याउन माग गरेको छ । न्यायालयलाई स्वच्छ, स्वतन्त्र र जनउत्तरदायी बनाउन अविलम्ब स्वतन्त्र छानबिन समिति गठन गर्नुपर्ने उनीहरूको जोड छ ।
आम नागरिकले सहज र निष्पक्ष न्याय पाउने वातावरण नबनेसम्म अभियान जारी राख्ने चेतावनीसमेत उनीहरूले दिएका छन् ।
नेपाली कांग्रेसका सभापति गगन थापाले सरकारको गैरकानुनी कामले हद नाघेको आरोप लगाउँदै लोकतन्त्र, नागरिक अधिकार र प्रेस स्वतन्त्रतामाथि हस्तक्षेप भए कांग्रेस चुप लागेर नबस्ने बताएका छन् ।
पार्टी कार्यालय सानेपामा आयोजित पत्रकार सम्मेलनमा थापाले सञ्चारमाध्यममा प्रहरी प्रवेश गरेर पत्रकार पक्राउ गरिएको घटनाप्रति आपत्ति जनाएका हुन् । समाचार प्रकाशित भएकै आधारमा प्रहरी मिडिया हाउसमा प्रवेश गरी पत्रकार पक्राउ गर्नु गम्भीर विषय भएको उनको भनाइ थियो ।
उनले प्रेस स्वतन्त्रता, नागरिक अधिकार र लोकतान्त्रिक मूल्य–मान्यतामाथिको हस्तक्षेपलाई सामान्य रूपमा लिन नहुने बताए । कांग्रेसले आवश्यक पर्दा सरकारलाई सहयोग गर्ने र राष्ट्रिय संकटका बेला साथ दिने भए पनि लोकतन्त्र तथा नागरिक अधिकारका विषयमा सरकारको गलत कदमको प्रतिवाद गर्ने उनको भनाइ थियो ।
पत्रकार पक्राउको घटनाले शाही शासनकालमा मिडिया हाउसमा सुरक्षाकर्मी प्रवेश गरेको घटनाको स्मरण गराएको थापाले बताए । नागरिक दबाबपछि पक्राउ परेका पत्रकार रिहा भए पनि घटनालाई केही पत्रकार पक्राउ परेको विषयमा मात्रै सीमित गर्न नहुने उनले उल्लेख गरे ।
थापाले भने, ‘केही समाचारहरू प्रकाशित भएको आधारमा प्रहरीहरू केही मिडिया हाउसहरूमा प्रवेश गरेर पत्रकारहरूलाई गिरफ्तार गरेको हामीले देख्यौँ । यो घटनाले हामी सबैलाई केही वर्ष अगाडिको एउटा अप्रिय घटनाको याद दिलायो, शाही कालको याद दिलायो, जतिखेर मिडिया हाउसमा सुरक्षाकर्मीहरू प्रवेश गर्नुभएको थियो । यो घटना पछाडि विरोध भयो, प्रश्नहरू उठ्यो र त्यस पछाडि पत्रकार साथीहरू रिहाइ हुनुभयो । केही साथीहरू पक्राउ पर्नुभयो, छुट्नुभयो, सकियो अब ? यहाँ सकिँदैन र सकिनु हुँदैन भन्ने नेपाली कांग्रेसको धारणा हो ।’
उनले उक्त घटनाले सरकारले राज्य, आफ्नो अधिकार, नागरिकको मौलिक हक, अभिव्यक्ति स्वतन्त्रता र प्रेस स्वतन्त्रतालाई कसरी बुझिरहेको छ भन्ने गम्भीर प्रश्न उठाएको बताए । प्रहरी राजनीतिक तथा प्रशासनिक नेतृत्वको निर्देशनबिना सञ्चारमाध्यमका कार्यालयमा प्रवेश गरेको भन्नेमा विश्वास गर्न कठिन रहेको उनको टिप्पणी थियो ।
थापाले सरकारमा रहेका केही व्यक्तिले राज्यका निकायलाई निजी आदेश पालना गर्ने कार्यालयका रूपमा बुझ्न थालेको भन्दै यस्तो प्रवृत्ति शक्तिको स्वेच्छाचारी प्रयोग भएको बताए । ‘डेमोक्रेसीमा सरकारसँग अधिकार हुन्छ, हामी त्यसलाई मान्छौँ । त्यसैले त हामी सरकारले भनेका कुरा मान्छौँ । तर सरकारको अधिकार कहाँबाट उत्पन्न हुन्छ ? कानूनबाट उत्पन्न हुन्छ । तर जब सरकारको इच्छा नै सरकारमा बसेको मानिसहरूलाई मेरो इच्छा नै कानुन हो भन्ने लाग्न थाल्छ, त्यसपछि समस्या सुरु हुन्छ । अहिले भएको त्यही नै हो’ उनले भने ।
सरकारको कार्यशैलीमा देखिएको प्रवृत्तिलाई सामान्यीकरण नगर्न उनले सञ्चारमाध्यम, नागरिक समाज र राजनीतिक दलहरूलाई आग्रह गरे । सरकारको अधिकार कानुनी सीमाभित्र रहेर प्रयोग हुनुपर्नेमा जोड दिँदै थापाले लोकतन्त्र, नागरिक अधिकार र प्रेस स्वतन्त्रताका विषयमा कांग्रेसले निरन्तर प्रश्न उठाउने र आवश्यक परे प्रतिवाद तथा प्रतिरोध गर्ने बताए ।
जिल्ला कारागार डोल्पाबाट कैदी फरार घटना छानबिनका लागि समिति गठन गरिएको छ । प्रहरी निरीक्षक विनय सिंहको नेतृत्वमा तीन सदस्यीय छानबिन समिति गठन गरिएको जिल्ला प्रहरी कार्यालय डोल्पाका प्रमुख तथा डीएसपी अनिलराज गिरीले जानकारी दिए ।
उनका अनुसार समितिमा जिल्ला प्रशासन कार्यालय डोल्पाका एक जना प्रतिनिधि र राष्ट्रिय अनुसन्धान विभागका एक कर्मचारी सदस्य छन् । समितिले प्रतिवेदन दिएपछि घटनाको सत्यतथ्य बाहिर आउने उनले बताए । शुक्रबार राति कारागारबाट सुरुङ खनेर कैदीहरु फरार भएका थियो । कैदीबन्दी ४ मिटर ६३ सेन्टिमिटर लामो सुरुङ खनेर कारागारबाट भागेका थिए ।
फरार हुनेमा करणी मुद्दाका पाँच जना र चोरी मुद्दाका तीन जना रहेका छन् । करणी मुद्दाका रुकुमपश्चिमको आठबिसकोट नगरपालिका–१० का राम विक, डोल्पाको त्रिपुरासुन्दरी नगरपालिका–७ का कालीप्रसाद रोकाया, वडा नम्बर ४ का धनबहादुर बुढा भनिने हरिबहादुर बुढा, सल्यानको कुमाख गाउँपालिका–५ का रेशम राना, जाजरकोटको बारेकोट गाउँपालिका–१ का यज्ञ विक चोरी मुद्दाका जाजरकोटको नलगाड नगरपालिका–९ का कैलाश भनिने कपिल परियार, रुकुमपश्चिमको आठबिसकोट नगरपालिका–५ का तिलक भण्डारी र वडा नम्बर ३ का आदेश भण्डारी फरार भएका छन् ।
भोलि सोमबारदेखि देशभरका सरकारी कार्यालयमा जाडोयामको समयतालिका लागू हुने भएको छ। कात्तिक १६ गतेदेखि सरकारी कार्यालय बिहान ९ बजे खुल्ने र अपराह्न ४ बजे बन्द हुनेछन्।
नेपाल राजपत्रमा यसअघि प्रकाशित गृह मन्त्रालयको सूचनाअनुसार कात्तिक १६ देखि माघ १५ गतेसम्म सरकारी कार्यालय तथा सम्बन्धित सार्वजनिक निकायमा जाडोयामको कार्यालय समय लागू हुनेछ।
नयाँ समयतालिका अनुसार यसअघि बिहान ९ बजेदेखि अपराह्न ५ बजेसम्म सञ्चालन हुँदै आएका कार्यालय अब अपराह्न ४ बजेसम्म मात्रै खुल्नेछन्। यससँगै दैनिक कार्यालय समय एक घण्टा घट्नेछ।
यो व्यवस्था शैक्षिक संस्थाबाहेकका सम्बन्धित सरकारी कार्यालय तथा सार्वजनिक निकायमा लागू हुनेछ।
सरकारले हरेक वर्ष जाडोयाममा कार्यालय सञ्चालनको समय समायोजन गर्दै आएको छ। सोही व्यवस्था अनुसार यस वर्ष पनि कात्तिक १६ गतेदेखि माघ १५ गतेसम्म परिवर्तित समयतालिका कायम रहनेछ।
बाँकेको जानकी गाउँपालिका–५, बकसपुरस्थित अम्बे स्टिल सरिया कम्पनीमा आगलागी हुँदा ८ जना घाइते भएका छन्। घाइतेमध्ये दुई जनाको अवस्था मध्यम रहेको छ भने थप उपचारका लागि भारतको लखनउ रिफर गरिएको छ।
आज बिहान करिब ५:४० बजे कम्पनीभित्र फलाम पगाल्ने तीनवटा भट्टीमा विद्युत् सर्ट सर्किट भई अचानक आगलागी भएको प्रहरीले जनाएको छ। प्रत्येक भट्टीको क्षमता २५ टन रहेको बताइएको छ।
आगलागीमा परी घाइते हुनेमा बाँकेका ५ जना र भारतको बहराइच जिल्लाका ३ जना रहेका छन्। उनीहरूलाई उपचारका लागि भेरी अस्पताल, नेपालगञ्ज पठाइएको थियो।
घाइतेमध्ये बाँकेको जानकी गाउँपालिका–५ का २८ वर्षीय शिवप्रसाद चमार र २२ वर्षीय रामदिन हरिजनको अवस्था मध्यम रहेको छ। त्यस्तै, २४ वर्षीय प्रेम धोबी, २९ वर्षीय दिलीपकुमार यादव र ३५ वर्षीय लक्ष्मीराम यादव घाइते भएका छन्।
यस्तै, भारतको बहराइच जिल्लाका २९ वर्षीय राजकुमार निषाद, २४ वर्षीय नशिव कुमार निषाद र २५ वर्षीय विनोद कुमार निषाद पनि आगलागीमा परी घाइते भएका छन्। उनीहरूको अवस्था सामान्य रहेको प्रहरीले जनाएको छ।
आगलागीको सूचना प्राप्त हुनासाथ इलाका प्रहरी कार्यालय खजुरा खुर्दबाट प्रहरी वरिष्ठ नायब निरीक्षक लुद्रबहादुर केसीको कमान्डमा ५ जनाको प्रहरी टोली घटनास्थलमा खटिएको थियो।
नेपालगञ्ज उपमहानगरपालिकाका दुईवटा र कोहलपुर नगरपालिकाको एउटा दमकल, नेपाल प्रहरी, सशस्त्र प्रहरी बल तथा स्थानीयवासीको सहयोगमा बिहान ८:१५ बजे आगो पूर्ण रूपमा नियन्त्रणमा लिइएको थियो।
बिहान ८:४५ बजे घाइते शिवप्रसाद चमार र रामदिन हरिजनलाई थप उपचारका लागि भारतको लखनउ रिफर गरिएको प्रहरीले जनाएको छ।
आगलागीबाट भएको अन्य भौतिक क्षतिको विवरण भने खुल्न बाँकी रहेको छ।
राष्ट्रिय स्वतन्त्र पार्टी (रास्वपा) ले आगामी स्थानीय तह निर्वाचनका लागि उम्मेदवार छनोट गर्न विभिन्न सात वटा उपसमिति गठन गरेको छ।
पार्टीको केन्द्रीय कार्यालय वनस्थलीमा महामन्त्री एवं समिति संयोजक विपिनकुमार आचार्यको सभापतित्वमा बसेको ‘स्थानीय तह निर्वाचन उम्मेदवार छनोट रूपरेखा कार्यान्वयन तथा समन्वय समिति’को बैठकले विभिन्न निर्णयहरू गरेको छ।
बैठकले उम्मेदवार छनोट रूपरेखालाई चुस्त रूपमा कार्यान्वयन गर्न विभिन्न जिम्मेवारीसहितका उपसमितिहरू गठन गर्नुका साथै उम्मेदवारी आवेदन खुला गर्ने निर्णयसमेत गरेको छ।
उम्मेदवार छनोट प्रक्रियालाई पारदर्शी र व्यवस्थित बनाउन समिति सदस्यहरूको संयोजकत्वमा ७ वटा उपसमितिहरू गठन गरिएको छ । क्यान्डिडेट क्लबमा कविन्द्र बुर्लाकोटी, प्रविधिमा सुशान्त वैदिक, गुनासो समन्वयमा जनकसिंह धामी, समावेशिता तथा महिला सहभागितामा डा. तोशिमा कार्की, क्षमता विकास समन्वयमा टासी ल्हाजोम, व्यवस्थापनमा रहबर अन्सारी र प्रचारप्रसारको संयोजक मिलन लिम्बूलाई नियुक्त गरिएको छ ।
बैठकले महानगरपालिका तथा उपमहानगरपालिकाका वडाध्यक्ष र वडा सदस्य पदका लागि पार्टीका तर्फबाट उम्मेदवार बन्न इच्छुक तथा योग्य व्यक्तिहरूलाई लक्षित गर्दै आवेदन खुला गर्ने निर्णय गरेको छ।
उम्मेदवारी दिन चाहने आकांक्षीहरूले पार्टीको ‘क्यान्डिडेट क्लब’ मार्फत आफ्नो आवेदन पेस गर्न सक्नेछन्।
