वीरगन्ज । धनुषाको धन्कवलमा रहेको एक मस्जिदमा अज्ञात व्यक्तिहरूले गरेको तोडफोडको विरोधमा पर्साको वीरगन्जमा मुस्लिम समुदायले उग्र प्रदर्शन गरेका छन् । आइतबार भएको उक्त प्रदर्शनका क्रममा प्रहरी र प्रदर्शनकारीबीच झडप हुँदा वीरगन्जको स्थिति केही समय तनावपूर्ण बनेको थियो ।

वीरगन्ज वडा नम्बर २ बाट निस्किएको प्रदर्शनकारीको जुलुसलाई रोक्ने क्रममा प्रहरीले करिब ५ राउन्ड अश्रु ग्यास प्रहार गरेको थियो ।प्रदर्शनकारीहरूले धनुषा घटनाको विरोध गर्दै नाराबाजीसहित बजार क्षेत्रतर्फ बढ्न खोजेपछि प्रहरीले हस्तक्षेप गरेको हो ।

प्रहरी बिटमा तोडफोड प्रदर्शनका क्रममा आक्रोशित भीड र प्रहरीबीच भएको भागदौड र झडपमा प्रदर्शनकारीले ढुङ्गामुढा गरेका थिए । सो क्रममा छपकैयास्थित सामुदायिक प्रहरी बिटको झ्याल र बोर्डमा क्षति पुगेको छ । प्रदर्शनकारीहरूले वीरगन्जको छपकैया, इदगाह चोक, घण्टाघर र मुड्ली लगायतका मुख्य स्थानहरूमा टायर बालेर सडक अवरुद्ध गर्दै विरोध जनाएका थिए ।

दुई प्रहरी घाइते, एक जना नियन्त्रणमा झडपका क्रममा ढुङ्गा लागेर २ जना प्रहरी सामान्य घाइते भएका छन् । प्रहरीले स्थिति नियन्त्रणमा लिन एक जना प्रदर्शनकारीलाई नियन्त्रणमा लिएको थियो । यद्यपि, स्थिति सहज बनाउन उनीहरुलाई पछि रिहा गरिएको जिल्ला प्रहरी कार्यालय पर्साले जनाएको छ ।

जिल्ला प्रहरी कार्यालय पर्साका प्रवक्ता राजु कार्कीले हाल वीरगन्जको अवस्था सामान्य रहेको जानकारी दिए । ‘अहिले अवस्था नियन्त्रणमा छ,’ प्रवक्ता कार्कीले भने, ‘हामीले नियन्त्रणमा लिएका एक जना प्रदर्शनकारीलाई छाडिसकेका छौँ । अवस्थाको गम्भीरतालाई मध्यनजर गर्दै सुरक्षा व्यवस्था कडा पारिएको छ र आवश्यक स्थानमा प्रहरी परिचालन गरिएको छ ।’ अप्रिय घटना हुन नदिन वीरगन्जका संवेदनशील क्षेत्रहरूमा प्रहरीले सुरक्षा गस्ती बढाएको छ ।

काठमाडौं । नेकपा एमालेका अध्यक्ष केपी शर्मा ओली र नेपाली कम्युनिष्ट पार्टीका संयोजक पुष्पकमल दाहाल प्रचण्डबीच आज वार्ता भएको छ ।

आतइबार ललितपुरको च्यासमा उनीहरुबीच भेटवार्ता भएके हो । उनीहरुबीच जेनजी आन्दोलनपछिको पहिलो भेटवार्ता हो ।

दुई नेताबीच आसन्न प्रतिनिधिसभा निर्वाचन, राष्ट्रियसभा निर्वाचन र समसामयिक विषयमा छलफल भएको प्रचण्डको प्रमुख स्वकीय सचिव गोविन्द आचार्यले जानकारी दिए ।

आगामी ११ माघमा राष्ट्रिय सभाको निर्वाचन हुँदैछ । त्यस्तै फागुन २१ मा प्रतिनिधिसभा सदस्यको निर्वाचन हुँदैछ । प्रमुख तीन दल तालमेल गरी चुनावमा जाने तयारी रहेको समेत बताइएको छ ।

काठमाडौं । नेकपा एमालेले अमेरिकाले भेनेजुएलाका राष्ट्रपतिलाई नियन्त्रणमा लिनु आपत्तिजनक भएको बताएको छ ।

महासचिव शंकर पोखरेलले आज सामाजिक संजाल फेसवुक मार्फत संयुक्त राष्ट्रसंघ गायत विश्व संस्थाहरूको औचित्य नै समाप्त गर्ने गरी कुनै एउटा देशका जननिर्वाचित राष्ट्र प्रमुखलाई अर्को देशको राष्ट्र प्रमुखको आदेशमा सैन्य हस्तक्षेपमार्फत नियन्त्रणमा लिने र अभियोग लगाउने कार्य संयुक्त राष्ट्रसंघको वडापत्रको ठाडो उल्लङ्घन गरेको उल्लेख गरेका छन् । उनले अमेरिकाको यस्तो कदम आधुनिक विश्व र सभ्य समाजका लागि स्वीकार्य विषय हुन नसक्ने समेत बताएका छन् ।

‘भेनेजुएलामा भएको अमेरिकी हस्तक्षेप र राष्ट्रपति निकोलस मादुरोलाई नियन्त्रणमा लिइएको सन्दर्भले अन्तर्राष्ट्रिय कानुन, सार्वभौमिकता र लोकतान्त्रिक मूल्यहरूमाथि गम्भीर प्रश्न उठाएको छ ।’ उनले लेखेका छन् । ‘यसप्रकारका विषयमा स्वयं अमेरिकी समाजभित्रै गम्भीर र जिम्मेवार बहस आवश्यक देखिन्छ ।’

काठमाडौं । सर्लाहीको सागरनाथ वन विकास परियोजनामा कार्यरत वन संरक्षकको हत्या भएको छ । वन संरक्षक रामेश्वर महतोको बन्चरोले घाँटी छिनाइ बीभत्स रूपमा हत्या गरेर फालिएको अवस्थामा शव भेटिएको हो ।

शनिबार बिहान ५ बजे नै जंगलमा रुख काटिएको आवाज आएपछि उनी साइकल लिएर निस्किएका थिए । त्यसपछि सम्पर्कविहीन भएका महतोको दिनभर परियोजनाका कर्मचारी तथा सशस्त्र प्रहरी सागरनाथ बेसको संयुक्त टोलीले खोजी गर्दा उनको शव भेटिएको हो ।

गाउँबाट करिब २ सय मिटर भित्र झाडीमा उनको हत्या गरिएको अवस्थामा शवव भेटिएको र घटनाबारे अनुसन्धान भइरहेको प्रहरीले जनाएको छ ।

काठमाडौं । अमेरिकाका राष्ट्रपति डोनाल्ड ट्रम्पले भेनेजुएलाका राष्ट्रपति निकोलस मादुरोको तस्बिर सार्वजनिक गरेका छन् ।

गिरफ्तार गरिएको दाबीपछि गएराति ट्रम्पले आफ्नो सामाजिक सञ्जाल ट्रुथ सोसलमार्फत मादुरको तस्बिर सार्वजनिक गरेका हुन् ।

मादुरोकी पत्नीसमेत पक्राउ गरिएको भनिए पनि तस्बिरमा भने उनी छैनन् । तस्बिरमा मादुरोले आँखामा लगाउने मास्क, खैरो ट्र्याकसुट र हेडफोन लगाएका छन् ।

मादुरोको तस्बिरसहित ट्रम्पले क्याप्सनमा लेखेका छन्, ‘निकोलस मादुरो यूएसएस इवो जिमा (युद्धपोत) मा ।’ घटनापछि ट्रम्पले फ्लोरिडामा पत्रकार सम्मेलन गरेका छन् ।

जहाँ उनले भने, ‘शक्तिको सुरक्षित, सही र समझदारीपूर्ण नयाँ सरकार नबनेसम्म भेनेजुएला संयुक्त राज्य अमेरिकाले चलाउनेछ ।’ यस क्रममा उनले अमेरिकी सेनाको प्रशंसा पनि गरे ।

ट्रम्पले भने, ‘तयार अवस्थामा भए पनि भेनेजुएलाको सेना पूर्ण रूपमा आत्तियो र चाँडै पराजित भयो ।’

उनले थपे, ‘अपरेसनका क्रममा कुनै पनि अमेरिकी सैनिक मारिएनन्, न त उनीहरूको हतियार वा उपकरणमा क्षति पुगेको छ ।’

ट्रम्पले अमेरिकाले ‘समुद्रबाट आउने ९७ प्रतिशत लागुपदार्थको ओसारपसार समाप्त पारेको’ दाबी गरेका छन् ।

यसअघि शनिबार ट्रम्पले भेनेजुएलाका राष्ट्रपति निकोलस मादुरो र उनकी पत्नीलाई पक्राउ गरी देशबाहिर लगिएको बताएका थिए ।

यस्तै अमेरिकी महान्यायाधिवक्ता पामेला बोन्डीले अब उनीहरूविरुद्ध मुद्दा चलाइने घोषणा गरेकी थिइन् ।

अख्तियार दुरुपयोग अनुसन्धान आयोगका प्रमुख आयुक्त प्रेमकुमार राईलाई धम्की दिने प्रकाश पाठक पक्राउ परेका छन् ।

नेपाल प्रहरीको अनुरोधमा अन्तर्राष्ट्रिय अपराध प्रहरी संगठन (इन्टरपोल) मा डिफ्युजन नोटिस जारी भएका पाठकलाई फिलिपिन्सको ब्युरो अफ इमिग्रेसन (बीआई) अन्तर्गतको फरार अभियुक्त खोजी युनिटले मालोलोस सहरबाट पक्राउ गरेको हो ।

बीआईले पाठकको फोटोसहित विवरण आफ्नो वेबसाइटमा सार्वजनिक गरेको छ । जिल्ला अदालत, काठमाडौँले १ डिसेम्बर २०२५ मा आपराधिक विश्वासघातको कसुरमा पक्राउ पुर्जी जारी गरेको थियो । सो विवरण बीआईसम्म पुगेको जनाइएको छ । पाठकविरुद्ध जबरजस्ती असुली र आपराधिक षड्यन्त्रको आरोपमा इन्टरपोलमा पनि डिफ्युजन नोटिस जारी गरिएको थियो ।

‘फिलिपिन्सको अध्यागमनले प्राप्त गरेको आधिकारिक सूचना अनुसार उनले फरार कैदीहरुलाई आत्मसमर्पण नगर्न उक्साउने, आर्थिक सहयोग दिने तथा हतियारसम्म पहुँच रहेको संकेत दिने अभिव्यक्ति दिएका थिए,’ अध्यागमनको वेबसाइटमा भनिएको छ, ‘उनी एक उच्चपदस्थ विदेशी सरकारी अधिकारीको हत्या गर्ने षड्यन्त्रसँग पनि जोडिएको पाइएको छ ।’

फिलिपिन्सको अध्यागमन रेकर्ड अनुसार पाठक १८ अगस्ट २०२५ मा त्यहाँ पुगेका थिए । उनलाई १८ डिसेम्बरसम्म बसोबासको अनुमति थियो । डिपोर्ट प्रक्रिया पूरा नभएसम्म उनलाई अध्यागमनको हिरासतमा राखिने बताइएको छ ।

पाठकले आफूलाई उग्रवादी संगठनको प्रमुख भएको बताउँदै राईसहित अन्य व्यक्तिको हत्या गर्ने धम्की दिएको आरोप छ । यस घटनासँग सम्बन्धित उनका तीन जना साथीलाई काठमाडौं प्रहरीले यसअघि नै पक्राउ गरिसकेको छ ।

वासिङ्टन डीसी । संयुक्त राज्य अमेरिकाका राष्ट्रपति डोनाल्ड ट्रम्पले शनिबार अमेरिकाले भेनेजुएलाको बिरूद्ध ठूलो आक्रमण गरेको उल्लेख गर्दै वर्तमान राष्ट्रपति निकोलस मादुरो र उनकी श्रीमतीलाई पक्राउ गरी देश निकाला गरिएको बताएका छन्।

“संयुक्त राज्य अमेरिकाले भेनेजुएला र राष्ट्रपति निकोलस मादुरो विरुद्ध सफलतापूर्वक आक्रमण गरी पत्नीसहित पक्राउ गरी देश बाहिर निकालिएको अमेरिकी राष्ट्रपति डोनाल्ड ट्रम्पले सामाजिक सञ्जाल मार्फत जनाएका हुन्।

मादुरोको पक्राउ ट्रम्पद्वारा पुष्टि गरिए अनुसार, संयुक्त राज्य अमेरिका र भेनेजुएला बिच तीव्र तनावको बीचमा आएको छ। अमेरिकी राष्ट्रपति डोनाल्ड ट्रम्पले भेनेजुएलाका राष्ट्रपतिलाई बारम्बार “नार्को-आतंकवादी“ सरकारको अध्यक्षता गरेको आरोप लगाएका थिए।

अमेरिकाले भेनेजुएलाको तेल ओसारपसारमा संलग्न रहेको दाबी गर्ने जहाजहरूमा पनि प्रतिबन्ध लगाएको थियो। सोही समयमा, अमेरिकी सेनाले लागुऔषध तस्करीमा संलग्न भएको आरोप लगाउँदै यस क्षेत्रमा भेनेजुएलाका डुङ्गाहरू विरुद्ध कारबाही बढाएको छ। भेनेजुएलाले अमेरिकाविरुद्ध काम गरेको आरोप लगाउँदै ट्रम्पले मादुरोलाई पदबाट हट्न आह्वान गरेको जनाइएको छ।

यसैबीच, भेनेजुएला सरकारले शनिबार विज्ञप्ति जारी गर्दै संयुक्त राष्ट्र संघको बडापत्र उल्लंघन गरेको र क्षेत्रीय शान्ति र स्थिरतालाई खतरा पुर्याएको आरोप लगाउँदै भेनेजुएलाको भूभागविरुद्ध अमेरिकाले गरेको सैन्य आक्रमणको निन्दा गरेको छ।

आधिकारिक विज्ञप्तिमा, अमेरिकाले काराकास र मिरान्डा, अरागुआ र ला गुएराका नागरिक र सैन्य स्थानहरूमा आक्रमण गरी संयुक्त राष्ट्रको बडापत्र र अन्तर्राष्ट्रिय कानूनको उल्लंघन गरेको उल्लेख गरिएको छ।

भेनेजुएला सरकारले आक्रमणको उद्देश्य देशको रणनीतिक स्रोतहरू, विशेष गरी तेल र खनिजहरू कब्जा गर्नु र भेनेजुएलाको राजनीतिक स्वतन्त्रतालाई कमजोर पार्नु रहेको बताएको छ।

विज्ञप्तिमा भेनेजुएलाका जनताले साइमन बोलिभर र अन्य राष्ट्रिय नेताहरूको विरासतलाई आह्वान गर्दै एक पटक फेरि आफ्नो स्वतन्त्रताको रक्षा गर्ने सबै सामाजिक र राजनीतिक शक्तिहरूलाई “साम्राज्यवादी आक्रमणको अस्वीकार गर्न आग्रह गरेको छ।

बोलिभेरियन राष्ट्रिय सशस्त्र बलहरू सार्वभौमिकता र शान्तिको ग्यारेन्टी गर्न राष्ट्रव्यापी रूपमा तैनाथ गरिएको छ। जबकि कूटनीतिक च्यानलहरू संयुक्त राष्ट्र सुरक्षा परिषद, संयुक्त राष्ट्र महासचिव, समक्ष उजुरी गर्ने जनाइएको छ। राष्ट्रपति निकोलस मादुरोले संविधान र सान्दर्भिक राष्ट्रिय सुरक्षा कानुन अनुरूप राष्ट्रिय योजनाहरू कार्यान्वयन गर्न आदेश दिई भेनेजुएलामा सङ्कटकालको आदेशमा हस्ताक्षर गरेको जनाइएको छ।

हाल राज्य र नगरपालिकाहरूमा व्यापक राष्ट्रिय रक्षा कमान्ड संरचनाहरू तैनाथ गरिएको बताएको छ। संयुक्त राष्ट्रको बडापत्रको धारा ५१ लाई आह्वान गर्दै भेनेजुएला सरकारले आफ्ना जनता, क्षेत्र र स्वतन्त्रताको रक्षा गर्न आत्मरक्षा गर्ने अधिकार सुरक्षित राखेको र विश्वव्यापी सरकार र जनतालाई एकता व्यक्त गर्न आह्वान गरेको छ।

भेनेजुएलाको राजधानी काराकासमा शनिबार ठूलो विस्फोट भएको रिपोर्टको बीचमा यो विज्ञप्ति जारी गरिएको थियो, जसले धेरै क्षेत्रमा बिजुली कटौती गरेको सिएनएनले जनाएको छ।

घटनाक्रममा प्रतिक्रिया दिँदै कोलम्बियाका राष्ट्रपति गुस्ताभो पेट्रोले भेनेजुएलाविरुद्ध अमेरिकी कारबाहीबारे छलफल गर्न संयुक्त राष्ट्र सुरक्षा परिषद् बोलाउन आह्वान गरेका छन्।

काठमाडौँ । भद्रपुर विमानस्थलमा शुक्रवार राती बुद्ध एयरको जहाज दुर्घटना भएपछि रनवे घटाएर विमानस्थल सञ्चालनमा ल्याइएको छ ।

विमानस्थल प्रमुख किशोरकुमार खत्रीले रनवे घटाएर विमानस्थललाई सञ्चालनमा ल्याएको जानकारी दिए ।

उनकाअनुसार दुर्घटनाग्रस्त जहाजको पछाडिको भाग अफ–ट्रयाकमा परेकोले हाल १ हजार ५ सय मिटरको रनवे घटाएर १ हजार ४ सय मिटरमा विमान सञ्चालन भइरहेको छ । रनवे छोट्याएर विमान स्थल सञ्चालन गरिएकोले त्यसको बारेमा जानकारी सबै पाइलटलाई नियमित रूपमा गराइँदै आएको उनले जानकारी दिए ।

हाल प्रयोगमा रहेको १ हजार ४ सय मिटर रनवे जहाज सञ्चालनको लागि पर्याप्त रहेको उनको भनाई छ । उनले विमान दुर्घटनाको यकिन कारण हालसम्म नखुलेको बताए । उनकाअनुसार शुक्रवार राती ९ बजेर १० मिनेटमा ल्याण्ड गर्ने क्रममा जहाज रनवेबाट बाहिर गएको थियो । मौसम सफा रहेकोले मौसमको कारण दुर्घटना नभएको उनले बताए । प्राविधिक कारणले दुर्घटना भएको हुनसक्ने उल्लेख गर्दै उनले अनुसन्धानपछि मात्रै वास्तविक कारण खुल्ने जानकारी दिए ।

काठमाडौँबाट भद्रपुरका लागि उडेको बुद्ध एयरको एटीआर ७२ जहाज अवतरणका क्रममा रनवेको पूर्वतर्फ करिब ३०० मिटर ओभर रन भई दुर्घटनामा परेको थियो । उक्त जहाजमा ५१ जना यात्रु, चार जना चालक दलका सदस्य र एक जना इन्जिनियर सवार थिए । जहाज दुर्घटना भएको आवाज सुनेपछि स्थानीयहरूले यात्रुको उद्धार गरेको भद्रपूरका स्थानीय मित्रप्रसाद अधिकारीले जानकारी दिए । उनकाअनुसार तीन जना यात्रु भने विमानभित्र रहेका थिए ।

दुर्घटनामा परी विमानका को–पाइलट सुशान्त श्रेष्ठसहित सात जना यात्रु घाइते भएका छन् । घाइतेमध्ये को–पाइलट श्रेष्ठको टाउको र अनुहारमा चोट लागेको र भद्रपुरस्थित ओमसाई पाथिभरा अस्पतालमा उपचार भइरहेको छ । अन्य ६ जना यात्रुहरू भने सामान्य उपचारपछि डिस्चार्ज भइसकेका छन् । दुर्घटनाग्रस्त विमानलाई रनवेबाट हटाउने कार्य भइरहेको छ ।

काठमाडौँ । प्रतिनिधिसभा निर्वाचनका लागि झापा-५ बाट एमाले अध्यक्ष केपी शर्मा ओलीको एकल नाम सर्वसम्मत रूपमा सिफारिस भएको छ ।

आज बसेको नेकपा एमाले झापा निर्वाचन क्षेत्र नम्बर ५ को बैठकले प्रत्यक्ष तर्फ उम्मेदवारको रूपमा ओलीको एकल नाम सिफारिस गरेको हो ।

यस अघि २०७९ र २०७४ को निर्वाचनमा ओली सो क्षेत्रबाट उम्मेदवार बन्दै विजयी भएका थिए ।

झापामा ५ वटा निर्वाचन क्षेत्र रहेको छ ।

मोरङ क्षेत्र नं. ३ का निवर्तमान प्रतिनिधिसभा सदस्य तथा नेपाली कांग्रेसका लोकप्रिय युवा नेता डा. सुनिलकुमार शर्माले आफूले अध्ययन गरेको मोरङको रतुवामाई नगरपालिका–९ स्थित श्री जनता माध्यमिक विद्यालयलाई करोडौँ रुपैयाँ बराबरको भवन बनाइदिने भएका छन् ।

आफ्ना मातापिताको नाम सदैव अमर रहोस् भन्ने उद्देश्यका साथ डा. शर्माको सहयोगपछि उक्त भवनको आज भव्य कार्यक्रमका बिच शिलान्यास गरेका छन् ।

साथै उक्त विद्यालयको नाम अब श्री जनता लोकनाथ होमादेवी माध्यमिक विद्यालय राखिएको छ। करिब चार करोड रुपैयाँको लागतमा विद्यालय हाताभित्र १० कोठे अत्याधुनिक कम्प्युटर ल्याब तथा शौचालयसहितको भवनको आज शिलान्यास गरिएको छ। उक्त भवन ६ हजार ४ सय वर्गफुट क्षेत्रफलमा निर्माण हुने जनाइएको छ।

शिलान्यास कार्यक्रमकै अवसरमा डा. शर्माले एमबीबीएस, बीडीएसलगायत काठमाडौं मेडिकल कलेजमा उपलब्ध सबै विषयहरूमा पीएचडीसम्म अध्ययन गर्न थप एक करोड रुपैयाँ बराबरको छात्रवृत्ति घोषणा गरेका छन्।

Kathmandu Medical College अन्तर्गत अध्यापनहुने MBBS, BDS लगायत सम्पूर्ण विषयहरूमा PHD तहसम्म अध्ययन गर्न सकिने रु. १ करोड बराबरको छात्रवृत्ति (Medical Scholarship) व्यवस्था गरेका छौ । उक्त छात्रवृत्तिमा रु. ५० लाख, विद्यालयलाई जग्गा दान गर्नुहुने स्वर्गीय नरेन्द्र बहादुर थापा नाममा, रु. २५ लाख डा. शर्माका हजुरबुवा गुणलाल न्यौपाने स्वर्गीय जी. बा. गणपति न्यौपाने नाममा र रु. २५ लाख नाममा स्थापना गरिएको हो।

शिक्षामा गरिएको लगानी नै राष्ट्र निर्माणको सबैभन्दा दिगो आधार हो भन्ने विश्वासका साथ, यस पहलले स्थानीय समुदाय तथा भावी पुस्ताको उज्ज्वल भविष्य निर्माणमा महत्वपूर्ण योगदान पुर्‍याउनेछ

विद्यालयको नाम परिवर्तन गर्ने प्रक्रिया रतुवामाई नगरपालिकाको आधारभूत तथा माध्यमिक शिक्षा ऐन २०७२ (तेस्रो संशोधनसहित) को दफा २६ को उपदफा २, ३ र ४ अनुसार सम्पूर्ण कानुनी प्रक्रिया पूरा गरेर गरिएको जनाइएको छ।
कार्यक्रममा डा. शर्माले आफू पढेको विद्यालय र शिक्षकहरुले गरेको न्यानो स्वागतले भावुक बनाएको उल्लेख गर्दै यही विद्यालयका संस्थापकहरूले दुःख र संघर्षका बीच खोलेको शैक्षिक संस्थाले आफूलाई आजको स्थानसम्म पुर्‍याएको बताए। “एउटा असल मानिसको योगदानले हजारौँको भविष्य निर्माण हुन सक्छ,” उनले भने।
साथै उनले विद्यालयका संस्थापकहरूले अत्यन्त दुःख, अभाव र संघर्षका बीच खोलेको यही विद्यालयमा अध्ययन गरेर आफू आज यो स्थानसम्म आइपुगेको स्मरण गरे। आफूले पाएको शिक्षा, संस्कार र प्रेरणाको जड यही विद्यालय भएको उल्लेख गर्दै उनले समाजमा एउटा असल र जिम्मेवार मानिसको योगदानले हजारौँ मानिसको भविष्य निर्माण हुन सक्ने धारणा व्यक्त गरे। विद्यालयप्रतिको ऋण तिर्ने उद्देश्यले नै शिक्षा क्षेत्रमा यो सहयोग गरेको बताए।

कार्यक्रममा रतुवामाई नगरपालिकाका नगर प्रमुख नागेश्वर सिंहले डा. सुनिल शर्मालाई महान् दाताको रूपमा स्मरण गर्दै उनको योगदानको खुलेर प्रशंसा गरे। उनले धन हुने व्यक्ति धेरै भए पनि यति मनकारी, निस्वार्थ र समाजप्रति समर्पित दानवीर विरलै देखिने उल्लेख गरे। डा. शर्माको यो सहयोगले ग्रामीण भेगका सामुदायिक विद्यालयमा अध्ययन गर्ने विद्यार्थीहरूको भविष्य उज्यालो बनाउने विश्वास समेत व्यक्त गरे।

कार्यक्रममा बोल्दै कोशी प्रदेशसभा सदस्य गणेश उप्रेतीले डा. सुनिल शर्माको यो सहयोगले विद्यालयका विद्यार्थीहरूमा पढाइप्रति थप आत्मविश्वास र हौसला पैदा भएको बताए। आवश्यक पूर्वाधार, छात्रवृत्ति र प्रोत्साहन उपलब्ध भएपछि अब यस विद्यालयका विद्यार्थीहरूले निजी बोर्डिङ विद्यालयका नतिजालाई समेत चुनौती दिन सक्ने विश्वास आफूले लिएको उनले बताए। यस्तो सहयोगले सामुदायिक विद्यालयप्रतिको जनविश्वास अझ बलियो बनाउने उप्रेतीको भनाइ थियो।

स्थानीय जनप्रतिनिधि, विद्यालय व्यवस्थापन समिति, शिक्षक, अभिभावक तथा विद्यार्थीहरूको उपस्थितिमा सम्पन्न कार्यक्रममा डा. शर्माको योगदानलाई शिक्षा क्षेत्रमा उदाहरणीय र प्रेरणादायी कार्यका रूपमा लिइएको छ।