सरकार र आन्दोलनरत मिटरब्याज पीडितबीच ९ बुँदे सहमति भएको छ । पछिल्लोपटक ९ दिनदेखि आन्दोलनरत मिटरब्याज पीडितसँग सरकारले आज सहमति गरेको हो ।

प्रधानमन्त्री कार्यालयमा करिब ९ घण्टा चलेको वार्तापश्चात सहमतिपत्रमा सरकारी वार्ता टोलीका तर्फबाट सचिव पुष्कर सापकोटा र पीडित पक्षका तर्फबाट अवधेश कुशवाहाले हस्ताक्षर गरेका छन् ।

सहमतिअनुसार सरकारले मिटरब्याजलाई आर्थिक अपराध मान्दै यो कूप्रथाको पूर्ण उन्मूलन भएको घोषणा गर्न आगामी मन्त्रिपरिषद्‍मा प्रस्ताव लैजानेछ, जसबाट सम्पूर्ण फर्जी तमसुक, दृष्टिबन्धक, छिनुवा पास र बाध्यकारी चेकहरू स्वतः अवैध र खारेज हुनेछन् ।

त्यस्तै गृह मन्त्रालयले ३ महिनाभित्र विशेष विधेयकको मस्यौदा तयार गरी मिटरब्याज नियन्त्रणसम्बन्धी ऐन निर्माण गर्नेछ, जसमा मुद्दा हेर्न छुट्टै न्यायाधिकरण, पीडितको सम्पत्ति फिर्ता र उचित क्षतिपूर्तिको ग्यारेन्टी गर्नेछ । सहमतिअनुसार वडा कार्यालयमा लेनदेन प्रमाणीकरण गर्दा रकमको वैधानिक स्रोत र बैंक कारोबारको प्रमाण अनिवार्य गरिनुका साथै आपराधिक लाभ वा भ्रष्टाचारको रकम मिटरब्याजमा लगाउनेहरूमाथि कडा कारबाहीको व्यवस्था गरिनेछ ।

त्यस्तै, नयाँ ऐनमा वास्तविकभन्दा बढी रकमको कागज बनाउने, ब्याजलाई साँवामा जोड्ने, ऋणीलाई भर्पाई नदिने, बढी ब्याज लिने, धम्क्याउने, शारीरिक–मानसिक शोषण गर्ने, खाली चेक वा कागजमा जबर्जस्ती सही गराउने र सम्पत्ति हत्याउने कार्यलाई अपराध मानिनेछ ।

मिटरब्याजीहरूको अनुसन्धानका लागि लिखतहरूको फरेन्सिक ल्याब परीक्षण, सम्पत्तिको स्रोतको खोजी र सम्पत्ति शुद्धीकरण (मनी लाउन्डरिङ) अन्तर्गत छानबिन फौजदारी कार्यविधि बमोजिम हुनेछ भने अदालतमा विचाराधीन मुद्दाहरूको हकमा पीडितको न्यायका लागि कानुनी अड्चन फुकाइनेछ ।

यस्तै, सहमतिअनुसार जिल्लास्तरमा सहायक प्रमुख जिल्ला अधिकारीको संयोजकत्वमा (पीडितका ३ प्रतिनिधिसहित) सहजीकरण समिति गठन गरी ६ महिनाभित्र सबै उजुरी फछ्र्यौट गरिनेछ, जसको अनुगमन प्रमुख जिल्ला अधिकारी नेतृत्वको समितिले गर्नेछ। साथै, पुनः मिटरब्याजको चक्रमा पर्न नदिन वार्षिक बजेटमा आर्थिक सहायता तथा राहत प्याकेज ल्याउने सहमति भएसँगै पीडितहरूले आन्दोलनका सबै कार्यक्रमहरु स्थगित गरेका छन् ।

नेकपा एमालेका अध्यक्ष केपी शर्मा ओलीले २०५८ जेठ १९ गते राजा वीरेन्द्र शाहको वंशनाश हुने गरी भएको नारायणहिटी दरबार हत्याकाण्ड दीपेन्द्र शाहले नगरेको जिकिर गरेका छन्।

शुक्रबार पार्टी कार्यालय च्यासलमा आयोजित एक कार्यक्रममा आफ्ना आमाबुवासहित सबै परिवार नै सखाप बनाउने गरी दीपेन्द्रले दरबार हत्याकाण्ड गरी आत्महत्या गरेको भनी फैलाइएको हल्लामा कुनै सत्यता नरहेको बताएका हुन्।

‘२०५८ साल जेठ १९ गते दरबार हत्याकाण्ड भयो। दरबार हत्याकाण्ड हुने वित्तिकै विश्वव्यापी रूपमा एउटा फैलियो, फलानो फलानोको लभ थियो, त्यो लभमा यस्तो भएको थियो, एउटा यस्तो रेडिमेड स्टोरी र दीपेन्द्र युवराज दीपेन्द्रले बाबु, आमा, भाइ, बहिनी, काका, काकीसहित वंशनाश गरेर आफूले पनि आत्महत्या गरे भन्ने एउटा रेडिमेड कथा विश्वव्यापी रूपमा पुर्‍याइयो’, उनले भने।

ओलीले अहिलेसम्म त्यही गलत सूचनाले काम गरिरहेको बताए। ‘२०औँ वर्ष त्यसले एकछत्र त्यो गलत सूचनाले राज गर्‍यो। सही सूचना के हो अझै थाहा छैन । बिना अध्ययन त्यो कथाको रचनाकार को हो ? त्यो पनि थाहा छैन। त्यो कथाको मूल वाचक को हो? त्यो पनि थाहा छैन। तर एउटा कथा रचना भया र वाचन गरियो। त्यो एकैचोटी विश्वव्यापी रूपमा फैलियो ।’

अध्यक्ष ओलीले दरबार हत्याकाण्ड दीपेन्द्रले प्रेम असफल भएर गरिएको कथा त्यस षड्यन्त्रमा संलग्नले बनाएको दाबी गरे।

पच्चीस जना मानिसको ज्यान लिएको ‘धुर्वे’ हात्तीको गतिविधिमा निगरानी बढाउन निकुञ्ज प्रशासनले उच्च सतर्कता अपनाएको छ। पटक-पटक बस्ती पसेर आतंक मच्चाउँदै आएको सो हात्तीलाई बिहीबार राति चितवन राष्ट्रिय निकुञ्जको शुखिभार क्षेत्रमा नियन्त्रणमा लिई (डार्ट गरेर) रेडियो कलर जडान गरिएको छ। साथै, हात्तीको दुईवटै दाह्रा ६-६ इन्च काटिएको छ।

निकुञ्जका सूचना अधिकारी अविनाश थापा मगरका अनुसार, रेडियो कलर जडान भएसँगै अब उक्त हात्तीको स्थान र गतिविधिबारे प्रत्येक १०-१० मिनेटमा सूचना प्राप्त हुनेछ। सोही प्रविधिको सहयोगमा हात्ती हाल कसराको दक्षिणतर्फ तमोर ताल आसपासमा रहेको पत्ता लागेको छ। चौथो पटक दाह्रा काटिएको यस हात्तीलाई डार्ट गर्दा हर्मन नियन्त्रण गर्ने औषधिको समेत प्रयोग गरिएको छ।

बस्ती सुरक्षाका लागि विशेष संयन्त्र

हात्ती पुनः बस्ती पसेको सूचना प्राप्त हुनासाथ तुरुन्तै मध्यवर्ती उपभोक्ता समिति, सामुदायिक वन, स्थानीय टोल र वडा कार्यालयलाई जानकारी दिने व्यवस्था मिलाइएको छ। सूचना पाउनासाथ निकुञ्जको सुरक्षा निकायले तत्काल स्थलगत पुगेर हात्तीलाई निकुञ्जतर्फ धपाउने गरी तयारी गरिएको प्रमुख संरक्षण अधिकृत डिलबहादुर पुर्जा पुनले बताए। पछिल्लो पटक असार २० गते राति एकै परिवारका दुई जनाको ज्यान लिएपछि हात्तीको जोखिम नियन्त्रणका लागि यो कदम चालिएको हो।

विवादास्पद र त्रासद इतिहास

चितवन राष्ट्रिय निकुञ्जमा सबैभन्दा बढी मानिस मार्ने हात्तीका रूपमा कुख्यात धुर्वेले विसं २०६६ देखि मानिसमाथि आक्रमण सुरु गरेको हो। २०६९ सालमा माडी क्षेत्रमा लगातार ४ जनाको ज्यान लिएपछि उक्त हात्तीलाई मार्ने आदेशसमेत जारी गरिएको थियो, तर धुर्वे बारम्बार सेनाको गोली र सुरक्षा घेरा छल्न सफल हुँदै आएको छ।

सन् २०७४ मा एक नेपाली सेनाका मेजरको ज्यान लिएको यो हात्तीले हालसम्म २५ जनाको ज्यान लिइसकेको निकुञ्जको तथ्यांक छ। निकुञ्जमा ४५ देखि ५० वटा मत्ता हात्ती रहेकोमा रोनाल्डो र गोविन्दे जस्ता अन्य मत्ता हात्तीहरू पनि निकुञ्जमा सक्रिय छन्। रेडियो कलर र दाह्रा कटाईपछि धुर्वेको हिडडुलमा केही कमी आउने र स्थानीय बासिन्दाको सुरक्षा हुने अपेक्षा निकुञ्ज प्रशासनले गरेको छ।

बागमती प्रदेश सरकारले खर्च कटौती र प्रशासनिक संरचना चुस्त बनाउने उद्देश्यसहित मन्त्रालयको संख्या १४ बाट घटाएर ८ मा सीमित गरेको छ ।

सरकारले मन्त्रालय संख्या घटाएसँगै केही मन्त्री मन्त्रालयविहीन बनेका छन् । तर उनीहरूलाई तत्काल पदमुक्त नगरिने र केही समयका लागि विनाविभागीय मन्त्रीका रूपमा मुख्यमन्त्री तथा मन्त्रिपरिषद्को कार्यालयअन्तर्गत राख्ने तयारी गरिएको छ ।

मन्त्रालय नभए पनि केही समयका लागि मन्त्रीहरू विनाविभागीय रूपमा रहने र यसको निकास छिट्टै निकालिने बताइएको छ ।

बिहीबार बसेको मन्त्रिपरिषद् बैठकपछि नेकपा एमालेका तर्फबाट सरकारमा सहभागी ६ जना मन्त्रीले राजीनामा दिने तयारी गरेका थिए ।

तर नेपाली कांग्रेस र एमालेको केन्द्रीय नेतृत्वबाट स्पष्ट निर्देशन नआएको भन्दै अन्तिम समयमा राजीनामा रोकिएको जनाइएको छ । दुवै दलले केन्द्रको आधिकारिक निर्णय नआएसम्म सरकारलाई निरन्तरता दिने समझदारी गरेका छन् ।

सरकारको नयाँ संरचनाअनुसार अब बागमती प्रदेशमा ८ वटा मन्त्रालय मात्र रहनेछन् । तीमध्ये नेपाली कांग्रेसले पाँच र एमालेले तीन मन्त्रालयको नेतृत्व गर्नेछन्। कुन मन्त्रीलाई कुन मन्त्रालयको जिम्मेवारी दिने भन्ने अन्तिम निर्णय भने मुख्यमन्त्रीले गर्ने बताइएको छ ।

यस विषयमा सरकारका प्रवक्ता तथा आर्थिक मामिला तथा योजना मन्त्री प्रभात तामाङले कांग्रेस–एमाले नेतृत्वबीच सरकार सञ्चालन र गठबन्धनको भविष्यबारे छलफल भइरहेको तथा सहमतिमै सबै विषय टुंगिने बताएका छन् ।

मेष (चु, चे, चो, ला, लि, लु, ले, लो, अ) महत्त्वपूर्ण निर्णयमा सफलता मिल्नेछ। जिम्मेवारी कुशलतापूर्वक पूरा गर्नुहुनेछ। परिवारसँग भएको सानो छलफलले राम्रो निष्कर्ष निकाल्नेछ। अरूको कुरा सुन्नुहोस्, तर निर्णय आफ्नै विचारले गर्नुहोस्। आजको शुभ रंग पहेलो हो भने शुभ अंक ३ रहेको छ।
वृष (इ, उ, ए, ओ, वा, वि, वु, वे, वो) घरमा चहलपहल बढ्नेछ। आफन्तसँगको भेटले पुरानो दूरी घटाउनेछ र सम्बन्ध अझ नजिक बनाउनेछ। आफूले चाहेको काममा पनि समय दिन पाउनुहुनेछ। खर्च गर्दा आवश्यकता हेरेर अघि बढ्नु उचित हुनेछ। आजको शुभ रंग हरियो हो भने शुभ अंक ८ रहेको छ।
मिथुन (का, कि, कु, घ, ङ, छ, के, को, हा) सामाजिक कार्यमा सक्रियता बढ्नेछ। आफ्नो क्षमता देखाउने अवसर प्राप्त हुनेछ। बोलेको कुरा स्पष्ट राख्दा गलत बुझाइ हट्नेछ। अधुरो रहेको विषय टुङ्ग्याउने प्रयास गर्नुहोस्। आजको शुभ रंग पहेंलो हो भने शुभ अंक ५ रहेको छ।
कर्कट (हि, हु, हे, हो, डा, डि, डु, डे, डो) घरको आवश्यक काममा समय बित्नेछ। आम्दानी र खर्चको सन्तुलन मिलाउन सफल हुनुहुनेछ। परिवारको सल्लाहले सही बाटो देखाउनेछ। कुनै पनि निर्णयमा हतार नगर्नु राम्रो हुनेछ। आजको शुभ रंग सेतो हो भने शुभ अंक १ रहेको छ।

सिंह (मा, मि, मु, मे, मो, टा, टि, टु, टे) नयाँ अवसरले आत्मविश्वास बढाउनेछ। कसैले गरेको भरोसा निभाउने अवसर मिल्नेछ। आफ्नो बोलीमा नम्रता राख्नुभयो भने सम्मान बढ्नेछ। बेलुकातिर मन रमाउने समाचार प्राप्त हुनेछ। आजको शुभ रंग सुनौलो हो भने शुभ अंक ९ रहेको छ।

कन्या (टो, पा, पि, पु, ष, ण, ठ, पे, पो) घरका साना काम एकपछि अर्को गर्दै सकिनेछन्। धेरै दिनदेखि मिलाउन बाँकी रहेको विषय पनि समाधानतर्फ जानेछ। शरीरलाई आराम दिनु पनि आवश्यक हुनेछ। परिवारसँग बिताएको समय सम्झनलायक बन्नेछ। आजको शुभ रंग खैरो हो भने शुभ अंक ४ रहेको छ।

तुला (रा, रि, रु, रे, रो, ता, ति, तु, ते) साथीभाइसँग रमाइलो भेटघाट हुनेछ। सामान्य कुराकानीले पनि मन खुसी बनाउनेछ। अरूको सहयोगले एउटा काम सजिलै पूरा हुनेछ। हाँसिलो व्यवहारले सम्बन्ध अझ राम्रो बनाउनेछ। आजको शुभ रंग गुलाबी हो भने शुभ अंक २ रहेको छ।

वृश्चिक (तो, ना, नि, नु, ने, नो, या, यि, यु) शुभ समाचारले मन प्रसन्न बनाउनेछ। सोचेर गरेको निर्णयले पछि फाइदा दिनेछ। रिसलाई नियन्त्रणमा राख्दा धेरै कुरा मिल्नेछन्। आफ्नो योजना सबैलाई नबताउनु नै उचित हुनेछ। आजको शुभ रंग रातो हो भने शुभ अंक ७ रहेको छ।

धनु (ये, यो, भा, भि, भु, धा, फा, ढा, भे) घरबाहिर निस्कने अवसर मिल्नेछ। नयाँ ठाउँ वा नयाँ व्यक्तिसँगको भेटले दिनलाई रोचक बनाउनेछ। आफूलाई मनपर्ने कामका लागि पनि समय निकाल्नुहोस्। सानो परिवर्तनले नयाँ उत्साह ल्याउनेछ। आजको शुभ रंग केशरी हो भने शुभ अंक ६ रहेको छ।

मकर (भो,जा,जि,जु,जे,जो,ख,खि,खु,खे,खो,गा,गि) अधुरा रहेका काम पूरा गर्ने मन बन्नेछ। धेरै कुरा एकैपटक नगरी क्रम मिलाएर अघि बढ्नु राम्रो हुनेछ। घरका सदस्यले तपाईंलाई साथ दिनेछन्। बेलुकातिर आराम गर्ने समय निकाल्नुहोस्। आजको शुभ रंग निलो हो भने शुभ अंक ५ रहेको छ।

कुम्भ (गु, गे, गो, सा, सि, सु, से, सो, दा) घरमा महत्त्वपूर्ण विषयमा छलफल हुनेछ। सबैको विचार सुनेर निर्णय गर्दा राम्रो हुनेछ। साथीसँग मिलेर बनाएको योजना अघि बढ्नेछ। दिनको अन्त्यमा मनमा सन्तोष रहनेछ। आजको शुभ रंग निलो हो भने शुभ अंक १ रहेको छ।

मीन (दि, दु, थ, झ, ञ, दे, दो, चा, चि) खर्च र आम्दानीबीच सन्तुलन कायम रहनेछ। आफूले थालेको काम पूरा गर्दा ढुक्क महसुस हुनेछ। परिवारसँग बसेर बिताएको समयले खुसी थप्नेछ। आफ्ना आवश्यकतालाई पनि ध्यान दिनुहोस्। आजको शुभ रंग बैजनी हो भने शुभ अंक ८ रहेको है।

सम्पत्ति शुद्धीकरण (मनी लाउन्डरिङ) सम्बन्धी कसुरमा विशेष अदालतमा नेकपा एमालेका उपाध्यक्ष विष्णुप्रसाद पौडेलसहित ६ जना व्यक्ति र १० वटा कम्पनीसहित १६ प्रतिवादीविरुद्ध पूरक आरोपपत्र दायर गरिएको छ।

विशेष अदालतका अनुसार यसअघि दीपक भट्टसहितका प्रतिवादीविरुद्ध दर्ता भएको मुद्दामा थप अनुसन्धानपछि पूरक आरोपपत्र बिहीबार पेश गरिएको हो।

आरोपपत्रमा प्रतिवादीहरूले गैरकानुनी रूपमा आर्जित सम्पत्ति लुकाउन तथा त्यसको स्रोत छल्ने वातावरण सिर्जना गरी सम्पत्ति शुद्धीकरण निवारण ऐन, २०६४ बमोजिम सम्पत्ति शुद्धीकरणको कसुरमा मतियारको भूमिका खेलेको आरोप लगाइएको छ।

विशेषगरी प्रतिवादी पौडेलविरुद्ध २० करोड ९० लाख बिगो कायम गरिएको छ। यसका साथै, उनको नाममा रहेको एभरेष्ट बैंक लिमिटेडको खातामा मौज्दात रहेको ६ लाख ३४ हजार ५४५ रुपैयाँ ८४ पैसा जफत गर्न पनि अदालतसमक्ष मागदाबी गरिएको छ।

थप अनुसन्धानपछि दायर गरिएको पूरक आरोपपत्रमाथि अब विशेष अदालतमा कानुनी प्रक्रिया अगाडि बढ्ने विशेष अदालतले जनाएको छ।

वालेन्द्र शाह नेतृत्वको सरकारले संघीय सांसदले स्वकीय सचिव राख्न पाउने व्यवस्था फेरि फर्काएको छ। यससँगै तत्कालीन सुशीला कार्की नेतृत्वको अन्तरिम सरकारले खारेज गरेको सुविधा फेरि फर्किएको हो ।

मंगलबार बसेको मन्त्रिपरिषद् बैठकले संघीय संसद्का पदाधिकारी तथा सदस्यहरूको पारिश्रमिक तथा सुविधासम्बन्धी ऐन, २०७३ को अनुसूची संशोधन गर्दै सांसदलाई स्वकीय सचिव राख्न पाउने व्यवस्था पुनः लागू गर्ने निर्णय गरेको हो।

कानुन, न्याय तथा संसदीय मामिलामन्त्री सोविता गौतमले संघीय सांसदहरूले पुनःस्वकीय सचिव राख्न पाउने जानकारी दिइन्।

यसअघि २०८२ असोज ५ गते तत्कालीन अन्तरिम सरकारले सांसदको स्वकीय सचिवसम्बन्धी सुविधा खारेज गरेको थियो।

त्यसबेला जनदबाब र जेन–जी आन्दोलनपछि बनेको अन्तरिम सरकारले खर्च कटौतीका उपायस्वरूप उक्त सुविधा हटाएको थियो।

संघीय संसद् सचिवालय सञ्चालन तथा व्यवस्थापन समितिले २०८२ चैत ३० गते बसेको बैठकबाट स्वकीय सचिवको योग्यता निर्धारण गरी व्यवस्थालाई व्यवस्थित रूपमा सञ्चालन गर्न सरकारलाई सिफारिस गरेको थियो।

उक्त सिफारिसका आधारमा कानुन, न्याय तथा संसदीय मामिला मन्त्रालयले ऐनको अनुसूची संशोधनको प्रस्ताव मन्त्रिपरिषद्मा पेश गरेको थियो। केही समयदेखि विचाराधीन रहेको प्रस्तावलाई मन्त्रिपरिषद्ले मंगलबार स्वीकृति दिएको हो।

यसअघि संघीय सांसदहरूले शाखा अधिकृतसरह सेवा–सुविधा पाउने गरी स्वकीय सचिव राख्ने व्यवस्था रहेको थियो। अब पुनः सोही व्यवस्थाअनुसार सांसदले स्वकीय सचिव नियुक्त गर्न सक्ने भएका छन्।

प्रधानमन्त्री बालेन्द्र शाह र राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङदेनबीच भेटवार्ता भएको छ। प्रधानमन्त्री तथा मन्त्रिपरिषद्को कार्यालय सिंहदरबारमा बिहीबार दिउँसो उनीहरूबीच भेटवार्ता भएको हो।

समसामयिक राजनीतिक घटनाक्रम, मुलुकको पछिल्लो अवस्था लगायत विविध विषयहरूमा छलफल केन्द्रित रहेको प्रधानमन्त्रीको सचिवालयले जनाएको छ।

छलफलमा राप्रपाका अध्यक्ष लिङदेनसँगै वरिष्ठ उपाध्यक्ष बुद्धिमान तामाङ र केन्द्रीय सदस्य खुश्बु ओली पनि सहभागी थिइन्।

सरकारले अनुचित लेनदेन (मिटरब्याज) बाट प्रभावित नागरिकका माग सम्बोधन गर्न वार्ता टोली गठन गर्ने निर्णय गरेको छ ।

बिहीवार बसेको मन्त्रीपरिषद्को बैठकले प्रधानमन्त्री तथा मन्त्रिपरिषद्को कार्यालयका सचिव पुष्कर सापकोटाको संयोजकत्वमा वार्ता टोली गठन गरेको हो ।

बैठकका निर्णय सुनाउँदै सञ्चार तथा सूचना प्रविधिमन्त्री डा. विक्रम तिमिल्सिनाले वार्ता समितिमा अर्थ मन्त्रालय, गृह मन्त्रालय तथा भूमि व्यवस्था, सहकारी, संघीय मामिला तथा सामान्य प्रशासन मन्त्रालयका सहसचिव सदस्य रहने जानकारी दिए ।

बैठकले १ र २ रुपैयाँ दरका नयाँ डिजाइनका सिक्का टकमरी गर्न नेपाल राष्ट्र बैंकलाई स्वीकृति प्रदान गर्ने निर्णय पनि गरेको छ । त्यसैगरी, नेपाल कानून सूचना पाइलट प्रणाली स्थापना गर्न कोरिया सरकारबाट प्राप्त हुने १ दशमलव ८१ मिलियन अमेरिकी डलर अनुदान सहायता स्वीकार गर्ने निर्णय गरिएको मन्त्री डा. तिमिल्सिनाले जानकारी दिए ।

यसैगरी बैठकले संरक्षित क्षेत्रभित्रको राष्ट्रिय वन क्षेत्रमा रुख तथा पोल हटाउन यसअघि स्वीकृति प्राप्त क्षेत्रभित्र रहेका थप रुख तथा पोल हटाउन आवश्यक कानूनी प्रक्रिया पूरा भएपछि सम्बन्धित मन्त्रालयले स्वीकृति दिन सक्ने व्यवस्था गरेको छ ।

बैठकले विभिन्न मन्त्रालयको संगठन संरचना र दरबन्दी स्वीकृत गर्ने, नीति अनुसन्धान प्रतिष्ठान विकास समिति गठन (पहिलो संशोधन) आदेश, २०८३ स्वीकृत गर्ने तथा सेवा करारमा कार्यरत कर्मचारीको व्यवस्थापन सम्बन्धी व्यवस्था स्वीकृत गर्ने निर्णय गरेको पनि मन्त्री तिमिल्सिनाले जानकारी दिए ।

अब बैंकहरुले साउन १५ सम्म उठेको ब्याज असारकै नाफामा देखाउन पाउने भएका छन् । नेपाल राष्ट्र बैंकले बैंक तथा वित्तीय संस्थालाई आर्थिक वर्ष समाप्त भएको १५ दिनभित्र उठेको ब्याजलाई पनि सोही वर्षको आम्दानीमा गणना गर्न पाउने व्यवस्था गरेको हो ।

राष्ट्र बैंकले जारी गरेको सर्कुलरमा भनिएको छ– इजाजतपत्रप्राप्त संस्थाको लेखानीति बमोजिम लेखाङ्कन गरिएको कर्जाको ब्याज आम्दानीमध्ये यस बैंकको निर्देशन बमोजिम प्रोदभावी आधारमा लेखाङ्कन गरिने ब्याज आम्दानीमध्ये आर्थिक वर्ष समाप्त भएको १५ दिनभित्र प्राप्त भएको ब्याज रकम बाहेकका अन्य प्राप्त हुन बाँकी ब्याज आम्दानी बराबरको रकममा प्रचलित व्यवस्थाअनुसारको आयकर तथा कर्मचारी बोनस तथा बैधानिक कोष (साधारण जगेडा कोष र संस्थागत सामाजिक उत्तरदायित्व कोष) मा जम्मा गरेको रकम कट्टा गरी बाँकी रकमलाई सञ्चित मुनाफालाई खर्च गरी नियमनकारी कोषमा जम्मा गर्नु पर्नेछ । उक्त ब्याज रकम प्राप्त हुन आएमा नियमनकारी कोषबाट सञ्चित मुनाफामा फिर्ता गर्न सकिनेछ ।

यस नयाँ व्यवस्थाअनुसार आर्थिक वर्ष समाप्त भएको १५ दिनभित्र प्राप्त भएको ब्याज रकमलाई बैंकहरूले अघिल्लो आर्थिक वर्षकै नाफा नोक्सान हिसाबमा आम्दानीका रूपमा बाँध्न पाउनेछन् । यसअघि यस्तो ब्याज सोही आर्थिक वर्षको मसान्त (असार मसान्त) भित्रै उठिसक्नुपर्ने प्रावधान थियो ।