काठमाडौँ । राष्ट्रिय सुरक्षा परिषद्ले प्रतिनिधिसभा सदस्य निर्वाचन निष्पक्ष, भयरहित, शान्तिपूर्ण र त्रुटिरहित ढङ्गबाट सम्पन्न गर्न कुनै किसिमको अभाव हुन नदिने निर्णय गरेको छ ।
परिषद्का अध्यक्ष एवं प्रधानमन्त्री सुशीला कार्कीको अध्यक्षतामा आज सिंहदरबारमा भएको बैठकले निर्वाचन सुरक्षा व्यवस्थाको समीक्षा गर्दै निर्वाचनका लागि आवश्यक पर्ने सम्पूर्ण सुरक्षा व्यवस्था भएको निष्कर्ष निकालेको छ ।
बैठकले मुलुकमा शान्तिसुरक्षा र अमनचयन कायम गर्न सम्बन्धित सुरक्षा निकायलाई थप प्रभावकारी र समन्वयात्मक रूपमा परिचालन गर्ने निर्णय गरेको रक्षा मन्त्रालयका सचिव केदारनाथ शर्माले जानकारी दिए ।
राष्ट्रिय सुरक्षाका विविध चुनौती तथा राष्ट्रिय, क्षेत्रीय र अन्तर्राष्ट्रिय क्षेत्रमा विकसित घटनाक्रमले राष्ट्रिय सुरक्षामा पार्नसक्ने प्रभावका साथै भावी रणनीतिबारे छलफल भएको थियो । बैठकमा अर्थमन्त्री रामेश्वर खनाल, गृहमन्त्री ओमप्रकाश अर्याल, परराष्ट्रमन्त्री बालानन्द शर्मा, श्रम रोजगार तथा सामाजिक सुरक्षामन्त्री राजेन्द्रसिंह भण्डारी, मुख्यसचिव सुमनराज अर्याल र प्रधानसेनापति अशोकराज सिग्देल सहभागी थिए ।
काठमाठडौं । रास्वपाका सभापति रवि लामिछानेको फेसबुक अकाउन्ट पुनः संचालनमा आएको छ । यसअघि पटक–पटक ह्याक गर्ने प्रयास भएपछि उनको खाता लक गरिएको थियो ।
सभापति लामिछानेले आफ्नो फेसबुक खाता पुनः आफ्नै नियन्त्रणमा ल्याउन सफल भएको जानकारी दिएका छन् ।
रविका अनुसार केही समयदेखि अज्ञात समूह वा व्यक्तिबाट फेसबुक खातामा अनधिकृत पहुँच जमाउने प्रयास भइरहेको थियो । निरन्तरको प्रयासपछि अन्ततः खाता सुरक्षित रूपमा पुनः प्राप्त गरिएको उनले बताए ।
काठमाडौं- गृहमन्त्री ओमप्रकाश अर्यालले प्रहरी प्रधान कार्यालयमा रहेको निर्वाचन व्यवस्थापन सूचना प्रणाली (इलेक्सन म्यानेजमेन्ट इनफरमेसन सिस्टम) को बुधबार निरीक्षण गरेका छन् ।
गृहमन्त्री अर्याल, गृह सचिव राजकुमार श्रेष्ठ, मन्त्रालयका उच्चअधिकारीसहितको टोलीले निर्वाचन सम्बन्धी सूचना प्रणालीको निरीक्षण गरेको हो ।
उक्त प्रणालीमार्फत जनशक्ति पालिकास्तरसम्म कसरी परिचालन भएको छ, निर्वाचनमा खटिएका सबैको जानकारी प्राप्त गर्न सकिनेछ ।
यसले घटना र निर्वाचन विरोधी गतिविधिलाई नियमन गर्न सहज हुने जनाइएको छ । प्रहरी जनशक्ति, निर्वाचन प्रहरी जनशक्ति, मतदान स्थल र मतपेटिकाको अवस्था, मतगणना उम्मेदवारी विवरण र मतदाताको विवरण लिन सकिन्छ ।
मतदान स्थल र मतपेटिकाको अवस्थाको स्थलगत र संख्यात्मक अवस्थाबारे जानकारी लिइनेछ । निर्वाचनको हरेक गतिविधिको मनिटरिङ गर्न इलेक्सन म्यानेज्मेन्ट सिस्टम सफ्टवेरको विकास गरिएको हो ।
प्रहरी महानिरीक्षक दानबहादुर कार्कीको अध्यक्षता तथा गृहमन्त्रीको प्रमुख आतिथ्यतामा सुरक्षा निकायका सबै प्रमुखहरू, गृहमन्त्रालयका कर्मचारी र सुरक्षाकर्मीको उपस्थितिमा प्रहरी महानिरीक्षक कार्कीले सूचना प्रणालीबारे जानकारी दिए ।
उनका अनुसार मतदान स्थलमा मतपेटिका पुगे-नपुगे, मतदान प्रक्रिया सुरु भए-नभएको तथा मतदान रोकिएको लगायत मत गणनाको अवस्थादेखि विजयी उम्मेदवारसम्मको विवरण प्राप्त हुनेछ ।
अनुगमनमा केन्द्रीय सुरक्षा समितिका सबैलगायत मन्त्रालय र सुरक्षाकर्मीको उपस्थिति रहेको थियो ।
उक्त केन्द्रमा ४१ वटा रियल टाइम भिडियो क्यामेरा जडान गरिएको छ । जसबाट ४१ वटा मतदान केन्द्रमा प्रत्यक्ष अनुगमन गरिन्छ ।
उक्त अवसरमा गृहमन्त्री अर्यालले प्रविधि र यसको व्यवस्थापनमा ठूलो फड्को मारेको आभास भएको बताएका छन् ।
यो प्रणालीले निर्वाचनलाई महत्वपूर्ण सहयोग पुग्ने विश्वास व्यक्त गरे । गृहमन्त्री अर्यालले प्रविधिमा सबै अपडेट हुन आग्रह गर्दै आगामी दिनमा सूचना प्रविधिमैत्री हुनुपर्नेमा जोड दिए ।
उक्त सूचना प्रणाली मार्फत निर्वाचन सम्बन्धी नियमित गतिविधि, जनशक्ति परिचालनको जानकारी लिन सकिन्छ ।
निर्वाचन स्वच्छ, निष्पक्ष र भयरहित बनाउने सन्दर्भमा उपयोगी यो प्रणालीका माध्यमबाट देशका ७७ वटै जिल्लाका निर्वाचन गतिविधिको सहज रुपमा मनिटरिङ गर्न सकिन्छ ।
मतदान, निर्वाचन गतिविधि, सूचना संकलन व्यवस्थापन-अनुगमन र अनलाइन माध्यमबाट सूचना संकलन गरिनेछ ।
मतदानकेन्द प्रदेश कमाण्ड पोष्ट र जिल्ला सुरक्षा समितिबाट निर्वाचनका हरेक गतिविधिको मनिटरिङ गर्न सूचणा प्रणालीको विकास गरिएको हो ।
मोबाइल टीम, सीसीक्यामेराबाट लाईभ मनिटरिङ गर्न सकिन्छ । मतगणना केन्द्रको विवरण कल सेन्टर र अनलाइनको माध्यमबाट सूचना संकलन गरिन्छ ।
सीमा सुरक्षाको अवस्थाबारे पनि जानकारी लिन उपयोगी हुनेछ । यसका साथै गृहमन्त्री अर्यालले सात वटा प्रदेशका लागि कार्यरत सुरक्षाकर्मीको डेस्कको पनि जानकारी लिए ।
काठमाडौं– बिहीबार हुने प्रतिनिधिसभा सदस्य निर्वाचनमा मतदान गर्न मतदाता परिचयपत्र वा त्यसको विकल्पमा अन्य पाँच प्रकारका कागजातका आधारमा मतदान केन्द्र प्रवेश गर्न सकिने निर्वाचन आयोगले स्पष्ट पारेको छ ।
मतदाता परिचयपत्रको सक्कलप्रति नभएमा नेपाली नागरिकता, नागरिकता नभएमा सवारी चालक अनुमतिपत्र, चालक अनुमतिपत्र नभएमा राहदानी, राहदानी नभएमा राष्ट्रिय परिचयपत्र, राष्ट्रिय परिचयपत्र पनि नभएमा जग्गा धनी प्रमाण पुर्जाको सक्कलप्रति बोेकेर मतदान केन्द्र जान सकिने आयोगका सहायक प्रवक्ता कुलबहादुर जिसीले जानकारी दिए ।
आयोगले तोकेका छ प्रकारका कागजातमध्ये कुनै एक अनिवार्य लिएर मतदान केन्द्र गएमा मतदान गर्न सकिने उनले स्पष्ट पारे ।
भोलि हुने प्रतिनिधिसभा सदस्य निर्वाचनमा १० हजार ९६७ मतदानस्थलमा २३ हजार ११२ मतदान केन्द्र छन् भने १४३ अस्थायी मतदानस्थल छन् ।
ती केन्द्रमा एक करोड ८९ लाख तीन हजार ६८९ मतदाताले मतदान गर्ने आयोगले जनाएको छ ।
काठमाडौं । पर्सामा ९ वटा सुतली बम र सुँगुरको टाउको सहित ३ जनालाई प्रहरीले पक्राउ गरेको छ ।
चुनावको बेला हिंसा भड्काउने उद्देश्यले सुँगुरको टाउको र सुतली बम बोकेर हिँडेकाहरुलाई प्रहरीले गएराति पक्राउ गरेको हो ।
प्रहरीका अनुसार उनीहरु सुँगुरको टाउको मस्जिदमा लगेर फ्याँक्ने तयारीका साथ हिँडेका थिए ।
प्रहरीका अनुसार उनीहरुको साथबाट नौ थाल सुतली बम, केही तार लगायतका सामग्री पनि बरामद भएको छ ।
काठमाडौं । प्रतिनिधिसभा निर्वाचनको सरगर्मी र सुरक्षा सतर्कता बढिरहेका बेला प्रहरीले पर्सा र सिरहाबाट दुईजना उम्मेदवारलाई नियन्त्रणमा लिएको छ । नियमित सुरक्षा जाँच र निर्वाचन आचारसंहिता उल्लंघनको आशंकामा नेपाली कम्युनिस्ट पार्टी (नेकपा) र जनता समाजवादी पार्टी (जसपा) नेपालका उम्मेदवारहरू प्रहरी फन्दामा परेका हुन् ।
पर्सा क्षेत्र नम्बर २ बाट नेकपाका उम्मेदवार बनेका मनोज चौधरीलाई प्रहरीले बडनिहार क्षेत्रबाट नियन्त्रणमा लिएको छ । नियमित सुरक्षा जाँचका क्रममा चौधरी सवार सवारी साधनलाई रोकेर खानतलासी गर्दा शंकास्पद वस्तु फेला परेपछि उनीसहित चार जनालाई नियन्त्रणमा लिइएको जिल्ला प्रहरी कार्यालय पर्साका प्रवक्ता डिएसपी हरिबहादुर बस्नेतले जानकारी दिए ।
सुरक्षा संवेदनशीलतालाई मध्यनजर गर्दै प्रहरीले उक्त क्षेत्रलाई केही समय घेराबन्दी समेत गरेको थियो । डिएसपी बस्नेतका अनुसार पक्राउ परेकाहरूमाथि थप अनुसन्धान भइरहेको छ र यसबारे विस्तृत जानकारी पत्रकार सम्मेलनमार्फत सार्वजनिक गरिनेछ ।
यता सिरहामा पनि मौन अवधिको उल्लंघन गर्दै नगद र मतपत्रसहित एक उम्मेदवार पक्राउ परेका छन् । सिरहा क्षेत्र नम्बर ३ का जसपा उम्मेदवार अशेश्वर यादवलाई गएराति करिब १२:३० बजे शिवचोकबाट प्रहरीले नियन्त्रणमा लिएको हो । नेपाल-भारत सीमावर्ती क्षेत्र माडरबाट सदरमुकाम सिरहातर्फ आउँदै गरेको प्र. २-०२-००१ च ०८७ नम्बरको स्कारपियो गाडीलाई जाँच गर्दा स्रोत नखुलेको ४ लाख ८७ हजार रुपैयाँ नगद फेला परेको प्रहरीले जनाएको छ ।
जिल्ला प्रहरी कार्यालय सिरहाका अनुसार उम्मेदवार यादवको गाडीबाट नगदका साथै केही मतपत्र समेत बरामद भएको दाबी गरिएको छ । यादवसँगै गाडीमा सवार अन्य पाँच जनालाई पनि प्रहरीले हिरासतमा लिएको छ । उनीहरूलाई थप कानुनी कारबाहीका लागि मुख्य निर्वाचन अधिकृतको कार्यालयमा बुझाउने तयारी भइरहेको प्रहरीले बताएको छ ।
काठमाडौँ । बिहीबार हुन गइरहेको प्रतिनिधि सभा निर्वाचनलाई लक्षित गर्दै काठमाडौँ उपत्यकाबाट बाहिरिने यात्रुको सङ्ख्या बढिरहेको छ । निर्वाचनका दिन आ-आफ्नो गृह जिल्लामा पुगेर मतदान गर्न सर्वसाधारण उपत्यका छाड्ने क्रम बढेको हो ।
ट्राफिक प्रहरी नायव उपरीक्षक सुनिलजंग शाहले हालसम्म करिब सात लाख ५० हजारभन्दा बढी व्यक्तिले उपत्यका छाडिसकेको जानकारी दिए ।
“निर्वाचनका लागि उपत्यकाबाट बाहिरिने क्रम बुधबारसम्म जारी रहनेछ,” उनले भने, “सार्वजनिक यातायातका साधनहरू खचाखच भरिएका छन् भने निजी सवारीसाधनको आवागमन पनि उल्लेख्य रूपमा बढेको छ ।”
यात्रुको चाप बढेसँगै मुख्य राजमार्ग, बसपार्क तथा उपत्यकाबाट बाहिरिने नाकाहरूमा सवारीसाधनको लामो लाम देखिएको छ । शाहका अनुसार यातायात व्यवस्थालाई थप सुरक्षित र व्यवस्थित बनाउन ट्राफिक प्रहरीको जनशक्ति वृद्धि गरिएको छ ।
“सवारीसाधनको चाप बढी हुने क्षेत्रमा अतिरिक्त ट्राफिक प्रहरी परिचालन गरिएको छ भने आवश्यकताअनुसार सवारीसाधनको चाप व्यवस्थापनका लागि नजिकका प्रहरी इकाइसँग समन्वय गरी निगरानी बढाइएको छ,” ट्राफिक प्रहरी नायब उपरीक्षक शाहले भने, “निर्वाचन सुरक्षामा खटिएको प्रहरी टोलीले समेत यातायात व्यवस्थापनमा आवश्यक सहयोग गरिरहेको छ ।”
यात्रुको सुरक्षालाई प्राथमिकतामा राख्दै राजमार्गहरूमा गस्ती बढाइएको र आवश्यकता अनुसारका क्षेत्रहरूमा विशेष निगरानी गरिएको प्रहरीले जनाएको छ । ट्राफिक प्रहरीले सर्वसाधारणलाई सुरक्षित र संयमित यात्रा गर्न, क्षमताभन्दा बढी यात्रु नचढाउन तथा ट्राफिक नियमको पालना गर्न आग्रह गरेको छ । साथै, लामो दूरीको यात्रा गर्दा सवारीसाधनको अवस्था जाँच गर्न र सडक अवस्थाबारे जानकारी लिएर मात्र यात्रा गर्न सुझाव दिइएको छ ।
भदौ २४ गतेको जेनजी आन्दोलनमा राज्यका महत्त्वपूर्ण निकायमा तोडफोड र आगजनी गर्ने १३ जनाविरुद्ध मुद्दा दायर भएको छ ।
जिल्ला सरकारी वकिलको कार्यालय काठमाडौँले उपत्यका भित्रका प्रहरी कार्यालय, अदालत र सिंहदरबारमा आगजनी गर्ने व्यक्तिहरू विरुद्ध मुद्दा दायर गरेको हो ।
काठमाडौँ जिल्ला अदालतका सूचना अधिकारी दीपक श्रेष्ठका अनुसार सिंहदरबारमा तोडफोड तथा आगजनीमा संलग्न आशिष गुरुङविरुद्ध आपराधिक उपद्रो र डाँका सम्बन्धी कसुरमा मुद्दा दायर गरिएको छ ।
त्यस्तै, सर्वोच्च अदालतमा आगजनी गर्ने सुनिल श्रेष्ठ, ज्योति थापा, विनोदकुमार थापा मगर, कुमार पराजुली र राजु परियारविरुद्ध पनि मुद्दा दायर भएको छ। उनीहरूलाई आपराधिक उपद्रो मच्चाएको अभियोग लगाइएको छ ।
सर्वोच्च अदालतले भदौ २४ गतेको घटनामा संलग्न व्यक्तिहरूको अनुसन्धान गरी कारबाहीको माग गर्दै काठमाडौँ प्रहरी परिसरमा जाहेरी दिएको थियो। जाहेरीका आधारमा गरिएको अनुसन्धानपछि उनीहरूसँग सम्बन्धित मुद्दा दायर गरिएको हो।
अभियोग पत्र अनुसार उनीहरुले सर्वोच्च अदालतमा आगजनी गरेर एक अर्ब २३ करोड ६२ लाख ३८ हजार रुपैयाँ बराबरको क्षति पुर्याएको छ।
त्यसैगरी, प्रहरी वृत्त बौद्धमा तोडफोड गरेको आरोपमा समीर श्रेष्ठ र सुनिल तामाङविरुद्ध पनि मुद्दा दायर गरिएको छ। प्रहरी प्रभाग बलम्बुमा तोडफोड गरेको अभियोगमा निखिल कुसुले, सोहन चौधरी, विवेक रोक्का र छत्रबहादुर विकविरुद्ध पनि मुद्दा चलाइएको छ।
प्रतिवादीहरूलाई सरकारी वकिल कार्यालयले हाजिर जमानीमा रिहा गरेको छ । अब उनीहरूसँग म्याद जारी गर्नका लागि अदालतमा प्रक्रियाको कुरा गरिएको अधिकारीले जानकारी दिएका छन् ।
सरकारी वकिल कार्यालयले विष्णुप्रसाद ढुंगोलविरुद्ध भने मुद्दा नचल्ने निर्णय गरेको छ। उनलाई घटनास्थलमा उपस्थित भएको भिडियो र अन्य प्रतिवादीहरूले पोल नगरेको कारण मुद्दा नचल्ने निर्णय गरिएको हो ।
काठमाडौं । सर्वोच्च अदालतले पक्राउ परेका मेडिकल व्यवसायी दुर्गा प्रसाईंलाई २४ घण्टाभित्र अदालतमा उपस्थित गराउन प्रहरीलाई आदेश दिएको छ ।
सर्वोच्च अदालतका न्यायाधीश कुमार रेग्मीको एकल इजलासले मंगलबार (फागुन १९) बन्दीप्रत्यक्षीकरण रिट निवेदनमाथि सुनुवाइ गर्दै उक्त आदेश दिएको हो । अदालतले आदेश प्राप्त भएको मितिले २४ घण्टाभित्र लिखित जवाफसहित प्रसाईंलाई इजलाससमक्ष उपस्थित गराउन निर्देशन दिएको छ ।
प्रसाईंको हकमा अधिवक्ता सुरेश बोहराले सर्वोच्चमा बन्दीप्रत्यक्षीकरण रिट दर्ता गराएका थिए ।
प्रसाईंलाई फागुन १७ गते भक्तपुरबाट पक्राउ गरिएको थियो । उनीविरुद्ध निर्वाचन बिथोल्न खोजेको आरोप लगाइएको छ ।
अदालतले प्रसाईंलाई उपस्थित गराएपछि थुनामुक्त गर्ने वा नगर्ने विषयमा निर्णय लिने जनाएको छ । प्रसाईं यसअघि पनि पटक–पटक पक्राउ परेर छुट्दै आएका थिए । उनले फागुन २१ गतेको चुनाव बहिष्कार गर्ने घोषणा समेत गरेका छन् ।
काठमाडौं । मध्यपूर्व क्षेत्रमा विकसित पछिल्लो परिस्थितिका कारण अलपत्र नेपालीको विवरण संकलन तथा आवश्यक सहयोग एवं उद्धारका लागि सरकारले अनलाइन पोर्टल सञ्चालनमा ल्याएको छ ।
इजरायल-अमेरिका र इरानबीचको हवाई हमलापछि मध्यपूर्वी देशहरूमा रहेका नेपालीका लागि परराष्ट्र मन्त्रालय कन्सुलर सेवा विभागले अनलाइन पोर्टल सञ्चालनमा ल्याएको हो ।
उनीहरूको अवस्था सम्बन्धी सूचना संकलन तथा आवश्यक परेको खण्डमा उद्धार गर्न अनलाइन पोर्टल सञ्चालनमा ल्याइएको हो ।
युनाइटेड अरब इमिरेट्स (यूएई), ओमान, बहराइन, कतार, साउदी अरब लगायत देशमा रहेका नेपालीका लागि विभागले अनलाइन पोर्टल सञ्चालनमा ल्याएको हो ।
यो लिंकमार्फत विभागले सम्बन्धित देशमा रहेका नेपालीको विवरण संकलन थालेको हो । त्यसका लागि सम्बन्धित देशमा रहेका नेपाली दूतावासहरूले नेपालीलाई यथाशीघ्र विवरण अद्यावधिक गर्न अनुरोध गरेका छन् ।
पहिलो चरणमा विभिन्न देशबाट नेपाल फर्कने क्रममा सम्बन्धित देशका विमानस्थलमा अलपत्र परेका व्यक्ति, भिसा समाप्त भइसकेका वा कम्पनीबाट भिसा क्यान्सिल गरी नेपाल फर्कन टिकट काटिसकेपछि असहज परिस्थितिमा परेका नेपालीलाई पोर्टल मार्फत आफ्नो व्यक्तिगत विवरण, सम्पर्क ठेगाना र अवस्था सम्बन्धी जानकारी प्रविष्ट गर्न अनुरोध गरिएको छ ।
त्यसरी अनलाइन पोर्टल मार्फत जानकारी दिएपछि सम्बन्धित निकायले समन्वय गरी आवश्यक सहयोग गर्न सकिने छ ।
मध्यपूर्व क्षेत्रमा जारी तनावका कारण यूएई लगायत खाडी क्षेत्रमा रहेका नेपाली श्रमिक तथा यात्रुमा चिन्ता बढिरहेका बेला सरकारले पोर्टल मार्फत व्यवस्थित रूपमा तथ्यांक संकलन र उद्धार समन्वय पहल थालेको हो ।
सम्बन्धित देशमा रहेका दूतावासले आपतकालीन अवस्थाका नेपालीलाई अफवाहमा नलागी आधिकारिक च्यानल मार्फत मात्र सम्पर्क गर्न अनुरोध गर्दै आएका छन् ।
