राष्ट्रिय स्वतन्त्र पार्टी (रास्वपा) को प्रथम अधिवेशनअन्तर्गत पदाधिकारी चयनका लागि आजै निर्वाचन हुने भएको छ।

पार्टीका प्रवक्ता मनिष झाले केन्द्रीय सदस्यहरूको निर्वाचन परिणाम सार्वजनिक भएपछि अपराह्‍न ४ बजेदेखि पदाधिकारी पदका लागि मतदान प्रक्रिया सुरु हुने जानकारी दिए ।

पार्टी विधानअनुसार पदाधिकारी पदमा उम्मेदवारी दिन केन्द्रीय सदस्यमा निर्वाचित भएको हुनुपर्ने व्यवस्था छ। त्यसैले केन्द्रीय सदस्यको नतिजापछि मात्रै पदाधिकारीको निर्वाचन प्रक्रिया अघि बढ्नेछ।

रास्वपाको विधानमा कुल १९ पदाधिकारी रहने व्यवस्था छ। तीमध्ये केही पदाधिकारी निर्वाचनमार्फत चयन हुनेछन् भने बाँकी पदाधिकारी सभापतिले मनोनयन गर्ने व्यवस्था रहेको छ।

महाधिवेशनमा छ पदका लागि निर्वाचन हुने जनाइएको छ। जसअनुसार एक महिला उपसभापति, एक खुला उपसभापति, एक खुला महामन्त्री, दुई खुला सहमहामन्त्री र एक महिला सहमहामन्त्री पदका लागि मतदान हुनेछ।

पार्टी नेतृत्व चयनको महत्वपूर्ण चरण मानिएको पदाधिकारी निर्वाचनका लागि उम्मेदवारहरू आन्तरिक तयारीमा जुटेका छन्।

केन्द्रीय सदस्यको अन्तिम परिणाम आएपछि पदाधिकारी पदका आकांक्षीहरूले उम्मेदवारी दर्ता गर्ने र त्यसपछि मतदान प्रक्रिया अघि बढ्ने निर्वाचन समितिले जनाएको छ।

कैलाली बिहीबार एक सैनिक तालिमका क्रममा ग्रिनेड विस्फोट हुँदा नेपाली सेनाका एक हुद्दाले ज्यान गुमाएका छन् । घटनामा एकजना सहसेनानी घाइते भएका छन्।

कैलालीको मोहन्याल गाउँपालिका–७ स्थित जालपा सामुदायिक वन क्षेत्रमा सञ्चालित फायरिङ अभ्यासका क्रममा ग्रिनेड विस्फोट भएको हो ।

त्यसक्रममा हुद्दा हिमाल विक्रम विष्टको मृत्यु भएको जिल्ला प्रहरी कार्यालय कैलालीका प्रवक्ता एवम् डीएसपी योगेन्द्र तिमिल्सिनाले बताए ।

गम्भीर घाइते विष्टको लम्कीस्थित लालरत्न अस्पतालमा उपचारका क्रममा बिहीबार मध्याह्न १२ बजे मृत्यु भएको हो। विस्फोटका क्रममा विष्टको दाहिने हातको हत्केला र शरीरका विभिन्न भागमा छर्रा लागेको थियो ।

उक्त घटनामा नजिकै रहेका सहसेनानी हिमराज जोशी पनि छर्रा लागेर घाइते भएका छन्। जोशीको अवस्था सामान्य छ। थप उपचारका लागि नेपाली सेनाको हेलिकोप्टरमार्फत काठमाडौं पठाइएको डीएसपी तिमिल्सिनाले बताए।

बिहीबार बिहान सवा ९ बजे सुदूरपश्चिम पृतना तालिम शिक्षालय, गोराङ्गे ब्यारेकबाट फायरिङ अभ्यासमा गएको टोली तालिमकै क्रममा दुर्घटनामा परेको हो ।

राष्ट्रिय स्वतन्त्र पार्टी (रास्वपा)को केन्द्रीय सदस्य पदका लागि भएको मतदान सम्पन्न भएको छ । आज बिहानबाट सुरु भएको मतदान केहीबेरअघि सकिएको हो ।

नेता गणेश पराजुलीका अनुसार करिब ६० प्रतिशत मतदान भएको अनुमान गरिएको छ ।

गत ७ असारदेखि जारी महाधिवेशन अन्तर्गत चितवनको भरतपुरमा पहिलो चरणमा केन्द्रीय सदस्यका लागि मतदान गरिएको हो । सोही चरणको मतदानपछि नतिजा सार्वजनिक गर्ने तयारी गरिएको छ ।

विधानअनुसार रास्वपामा कुल १५८ जना केन्द्रीय सदस्य रहने व्यवस्था छ । तीमध्ये ९९ जना निर्वाचित हुनेछन् भने ५१ जना सभापति रवि लामिछानेले मनोनीत गर्नेछन्। साथै सातै प्रदेशका सभापतिहरू स्वतः केन्द्रीय सदस्य हुने प्रावधान रहेको छ ।

सभापतिमा रवि लामिछाने निर्विरोध निर्वाचित भइसकेका छन् ।

मतदान सकिएको करिब दुई घण्टाभित्र नतिजा सार्वजनिक हुने अपेक्षा गरिएको छ । त्यसपछि पदाधिकारी चयनको दोस्रो चरणको निर्वाचन प्रक्रिया अघि बढ्ने बताइएको छ ।

काठमाडौँ । ड्युटीमा खटिएका ट्राफिक प्रहरी अब सेवाग्राही तथा चालक, सहचालकसँग हात मिलाउन नपाउने भएका छन् ।

काठमाडौँ उपत्यका ट्राफिक प्रहरी कार्यालय रामशाहपथले एक परिपत्र गर्दै मातहतका सबै ट्राफिक युनिटलाई यसबारे निर्देशन दिएको छ । ट्राफिक प्रहरीले ड्युटीको समयमा सवारी सेवाग्राहीहरूसँग हात मिलाएका भिडियोहरू सामाजिक सञ्जालमा आएपछि काठमाडौँ उपत्यका ट्राफिक प्रहरी कार्यालयले यस्तो निर्देशन जारी गरेको हो।

‘ट्राफिक प्रहरीले चेकिङ तथा अन्य ड्युटीको समयमा सवारी चालक लगायत अन्य सेवाग्राहीहरुसँग हात मिलाएका दृश्यहरू सम्बन्धमा सामाजिक सञ्जाल तथा आम नागरीहरूबाट समेत विभिन्न गुनासो प्राप्त हुन आएको हुँदा अब उप्रान्त कुनै पनि ट्राफिक प्रहरी कर्मचारीले ड्युटीको समयमा सवारी चालक लगायत अन्य सेवाग्राहीसँग हात मिलाउने कार्यलाई पूर्णरुपमा अस्वीकार गरी टाढैबाट नमस्कार मात्र भनी सम्मान गर्न–गराउन हुन निर्देशानुसार अनुरोध गरिएको छ,’ पत्रमा भनिएको छ ।

निर्वाचन पर्यवेक्षण समिति नेपालले २०८२ सालको प्रतिनिधिसभा निर्वाचनको निर्वाचन खर्चसम्बन्धी अध्ययन प्रतिवेदन बुधबार सार्वजनिक गरेको छ । यो प्रतिवेदनले मुलुकभरका १ सय ६५ निर्वाचन क्षेत्रमध्ये छानिएका १० निर्वाचन क्षेत्रका ३ हजार ४ सय ६ उम्मेदवारमध्ये १ सय ४४ नमुना उम्मेदवारको खर्चको विश्लेषण गरेको छ ।

विश्लेषणअनुसार विजयी उम्मेदवारले निर्वाचन प्रचारप्रसारमा औसत ८८ लाख खर्च गरेको पाइएको छ भने उपविजेताले त्यसको लगभग तीन गुणा बढी, औसत २ करोड ८३ लाख रुपैयाँ खर्च गरेका रिपोर्टमा उल्लेख गरेको छ ।

कुल निर्वाचन खर्चको करिब ६७ प्रतिशत रकम जित्न नसकेका पराजित उम्मेदवारहरूले खर्च गरेका अध्ययनले देखाएको छ । यस प्रश्नको नतिजाले स्रोत व्यवस्थापनमा गम्भीर असन्तुलन रहेको देखाउँछ ।

खर्चको सीमाको बेवास्ता

निर्वाचन आयोगले प्रत्यक्ष निर्वाचन प्रणालीका उम्मेदवारका लागि २५ लाखदेखि अधिकतम ३३ लाख रुपैयाँसम्म खर्चको सीमा तोकेको थियो । तथापि, गत निर्वाचनमा औसतमा उम्मेदवारले ७२ लाख अर्थात् कानुनी सीमाभन्दा ११८ प्रतिशत बढी खर्च गरेको पाइएको अध्ययन प्रतिवेदनमा उल्लेख गरेको छ ।

डिजिटल प्रचारमा खर्च

तथ्यांकअनुसार पछिल्लो निर्वाचनमा देखिने भन्दा बढी नदेखिने डिजिटल खर्च भएको छ । ब्यानर, र्‍याली, कोणसभा, भोजभतेरमा भन्दा बढी यसपटक नदेखिने च्यानल (अदृश्य तर प्रभावशाली सूचना तथा संचार प्रणाली, डिजिटल प्रचार, सामाजिक सञ्जाल, अनौपचारिक परिचालन) तर्फ सरेको देखिएको तथ्यांकले देखाएको छ, जसले अनुगमनलाई थप कठिन बनाएको तथ्यांकले देखाएको छ ।

मित्थ्या सूचना, दुश्प्रचार, चरित्रहत्या जस्ता प्रणालीगत दुश्प्रचार तथा प्रयोग रोकथाम तथा नियन्त्रणमा आवश्यक कानुनी प्रबन्धको अभाव देखिएको रिपोर्टले जनाएको छ । कुल खर्चको ८२ प्रतिशत प्रचार अभियान अवधिमा भएको पाइयो भने ४ प्रतिशत खर्च निर्वाचनको दिनमै भएको पनि रिपोर्टमा देखिएको छ, जुन कानुनी रूपमा निषेधित अवधि हो ।

ईकोसी–नेपालले परिचालन गरेका ४० जना लामो अवधिका पर्यवेक्षकहरू मध्येबाट १० जना अनुभवी पर्यवेक्षकलाई अनुसन्धानका लागि तालिम दिई खटाइको थियो । प्रतिस्पर्धा बढी भएका र चर्चित उम्मेदवार रहेका १० निर्वाचन क्षेत्र छनोट गरी विजेता, उपविजेता र नजिकका तीन प्रतिस्पर्धीहरूसहित सम्बन्धित निर्वाचन व्यवस्थापकसँग प्रत्यक्ष अन्तर्वार्ता र प्रश्नावलीका माध्यमबाट तथ्याङ्क संकलन गरिएको थियो ।

स्थानीय राजनीतिक कार्यकर्ता र सूचनादातासँगको अन्तर्क्रियाबाट प्राप्त जानकारीलाई क्रस भेरिफिकेशन गरी आँकडाको शुद्धता सुनिश्चित गरिएको थियो । सीमित स्रोत र समयका कारण यो अध्ययन सम्पूर्ण १ सय ६५ निर्वाचन क्षेत्रलाई प्रतिनिधित्व नगर्न सक्छ, तर यसले निर्वाचन खर्चको प्रवृत्ति र ढाँचा पहिचान गर्न पर्याप्त आधार दिन्छ भन्ने अध्ययनको निश्कर्ष रहेको जनाएको छ ।

नेपाल प्रहरीको तलबभत्ता अब प्रत्येक महिनाको १५ दिनमा भुक्तानी गर्ने व्यवस्था कार्यान्वयन गर्न मातहतका कार्यालयहरूलाई निर्देशन दिइएको छ।

नेपाल प्रहरी प्रधान कार्यालय, प्रशासन विभाग (बजेट शाखा) ले जारी गरेको परिपत्रमा अर्थ मन्त्रालयको निर्णय तथा महालेखा नियन्त्रक कार्यालयको पत्रअनुसार आर्थिक वर्ष २०८३/८४ देखि राष्ट्रसेवक कर्मचारीहरूको तलबभत्ता अर्धमासिक (आधा महिनाको) रूपमा भुक्तानी गर्ने व्यवस्था मिलाइएको उल्लेख गरिएको छ।

प्रहरी अतिरिक्त महानिरीक्षक हिमालयकुमार श्रेष्ठद्वारा हस्ताक्षरित पत्रमा आगामी आर्थिक वर्षदेखि प्रत्येक महिनाको १५ दिन बितेपछि तलबभत्ता भुक्तानी गर्न आवश्यक व्यवस्था मिलाउन सबै बजेट सञ्चालन गर्ने कार्यालयहरूलाई निर्देशन दिइएको हो।

नेपाल प्रहरी प्रधान कार्यालयको कल्याण महाशाखालाई समेत सम्बन्धित आर्थिक प्रणालीहरू नयाँ व्यवस्थाअनुसार अद्यावधिक तथा व्यवस्थित गर्न परिपत्रमा अनुरोध गरिएको छ।

राष्ट्रिय स्वतन्त्र पार्टी (रास्वपा)ले विदेशमा रहेका आफ्ना प्रतिनिधिहरूलाई मोबाइल एपमार्फत मतदान गर्ने व्यवस्था गरेको छ ।

पार्टीका अनुसार विदेशस्थित नेपाली सम्पर्क विभागबाट प्रतिनिधि बनेका सदस्यहरूले महाधिवेशनमा भौतिक रूपमा उपस्थित हुन नसकेमा मोबाइल एपबाटै मतदान गर्न सक्नेछन् ।

रास्वपाका विदेशस्थित कुल १६३ प्रतिनिधिमध्ये महाधिवेशनमा उपस्थित हुन नसक्ने प्रतिनिधिहरूलाई लक्षित गर्दै उक्त व्यवस्था गरिएको पार्टीले जनाएको छ ।

यता, महाधिवेशनमा प्रत्यक्ष सहभागी हुने प्रतिनिधिहरूका लागि विद्युतीय मतदान प्रणाली अपनाइने भएको छ । मतदानका लागि ८० वटा विद्युतीय मेसिनको व्यवस्था गरिएको रास्वपाले जानकारी दिएको छ ।

पार्टीले महाधिवेशनलाई व्यवस्थित, सहज र प्रविधिमैत्री बनाउन स्वदेश तथा विदेशमा रहेका प्रतिनिधिहरूका लागि छुट्टाछुट्टै मतदान प्रणाली लागू गरेको जनाएको छ ।

बजारमा आक्रामक विज्ञापन, आकर्षक उपहार योजना र व्यापक प्रचारप्रसारमार्फत आफ्नो पहुँच विस्तार गर्दै आएको ‘एक्सट्रिम इनर्जी ड्रिंक्स’ अहिले राजश्व छलीको आरोपमा तानिएको छ। सार्वजनिक स्थान, किराना पसल, सार्वजनिक सवारी साधनदेखि स्टार होटलसम्म व्यापक रूपमा बिक्री वितरण हुँदै आएको यो पेय पदार्थमाथि काभ्रेपलाञ्चोकमा बिलबिनाका हजारौं बोतल फेला परेपछि प्रश्न उठेको हो।

जिल्ला प्रहरी कार्यालय काभ्रेपलाञ्चोकका अनुसार विशेष सूचनाका आधारमा बनेपा नगरपालिका–७ स्थित तरकारी बजार क्षेत्रबाट बा.प्र.०२–०२५ च २२२३ नम्बरको बोलेरो गाडी नियन्त्रणमा लिइएको थियो। प्रहरी निरीक्षक कुमार पटेलको नेतृत्वमा खटिएको टोलीले गाडी जाँच गर्दा कुनै बिल बिजक नभएका ‘Xtreme Energy Drink’ का १५० कार्टुन बरामद गरेको थियो। प्रत्येक कार्टुनमा २४ वटा बोतलका दरले जम्मा ३ हजार ६ सय बोतल इनर्जी ड्रिंक्स फेला परेका छन्। साथै ‘BAM BAM’ ब्राण्डका ६ कार्टुन जुससमेत बरामद गरिएको छ।

बरामद सामानको अनुमानित मूल्य १० लाख रुपैयाँभन्दा बढी रहेको प्रहरीले जनाएको छ। सामानसँग सम्बन्धित आवश्यक कागजात प्रस्तुत गर्न नसकिएपछि गाडी, चालक र सामानलाई थप अनुसन्धान तथा कारबाहीका लागि राजश्व अनुसन्धान विभाग, पुल्चोक पठाइएको छ।

एक्सट्रिम इनर्जी ड्रिंक्सले पछिल्लो समय ‘स्क्यानमा छ सुन’ तथा ‘वर्ल्ड कप एक्सट्रिम इनर्जी ड्रिंक फ्यान’ जस्ता आकर्षक योजनामार्फत उपभोक्तालाई तान्ने अभियान सञ्चालन गर्दै आएको छ। विशेषगरी युवा र बालबालिकालाई लक्षित गरी गरिने यस्ता प्रचार अभियानले ब्राण्डको बजार विस्तारमा सहयोग पुर्‍याएको भए पनि उत्पादनको पारदर्शिता र व्यावसायिक अभ्यासबारे प्रश्न उठ्न थालेका छन्।

स्वास्थ्य क्षेत्रका विज्ञहरूले पनि इनर्जी ड्रिंक्सको अनियन्त्रित सेवनप्रति बारम्बार चेतावनी दिँदै आएका छन्। अत्यधिक क्याफिन, चिनी तथा अन्य उत्तेजक तत्वको प्रयोगले बालबालिका, किशोरकिशोरी र युवाको स्वास्थ्यमा नकारात्मक असर पार्न सक्ने उनीहरूको भनाइ छ। यस्ता चेतावनीका बाबजुद पनि एक्सट्रिमको बजार विस्तार र प्रचार अभियान निरन्तर बढिरहेको देखिन्छ।

बनेपामा बिल बिजकबिना ठूलो परिमाणमा एक्सट्रिम इनर्जी ड्रिंक्स फेला परेपछि कम्पनीको कारोबार प्रणालीमाथि नै प्रश्न उठेको छ। यदि अनुसन्धानबाट राजश्व छली, कर छल्ने उद्देश्य वा अन्य गैरकानुनी गतिविधि पुष्टि भए सम्बन्धित व्यक्ति तथा कम्पनीमाथि कानुनी कारबाही हुन सक्ने अधिकारीहरू बताउँछन्।

काठमाडौँ । गृहमन्त्री सुधन गुरुङले खाएको अमलेटमा माछाको काँडा भेटिएको होटललाई ३ लाख जरिबाना लगाइएको छ । चितवनको लड्स प्जालामा खाना खाँदा यस्तो घटना भएको थियो । अम्लेटमा माछाको काँडा भेटिएपछि होटलका दुई कर्मचारीलाई नियन्त्रणम लिएर प्रहरीले सोधपुछसमेत गरेको थियो।

राष्ट्रिय स्वतन्त्र पार्टीको महाधिवेशनमा सहभागी हुन चितवन पुगेका गृहमन्त्री गुरुङले भरतपुर विमानस्थल नजिकै रहेको उक्त होटलमा खाना खाएका थिए।

घटनापछि खाद्य तयारी प्रक्रियामा लापरबाही भएको हो वा अन्य कुनै कारणले यस्तो भएको हो भन्ने विषयमा प्रहरीले थप अनुसन्धान अघि बढाएको जनाएको थियो।

काठमाडौं । राष्ट्रिय स्वतन्त्र पार्टी (रास्वपा) सभापतिमा रवि लामिछाने निर्विरोध निर्वाचित भएका छन् । 

बन्द सत्र पछि निर्वाचन आयोगले लामिछाने निर्विरोध निर्वाचित घोषणा गरेको (रास्वपा) निर्वाचन आयोगका उप—प्रमुख राम गुरुङले जानकारी दिएका हुन् । उनले प्रधानमन्त्री समेत रहेका वरिष्ठ नेता बालेन शाहको प्रस्ताव र ५१ जना सदस्यहरूको समर्थनमा लामिछाने निर्विरोध निर्वाचित भएको गुरुङले जानकारी दिए । 

सभापतिमा अन्य उम्मेदवारी नपरेपछि लामिछाने निर्विरोध निर्वाचित भएको बताए ।

अव केन्द्रीय समिति सदस्यका लागि भने मतदान प्रकृयाबाट अगाढि बढ्ने उप—प्रमुख राम गुरुङले जानकारी दिए ।