२०८३ मंसिर ३ गते बुधबार
२०८३ मंसिर ३ गते बुधबार

नेपाली कांग्रेसका महासमिति सदस्य डा. सुनिल कुमार शर्माले विगतका गल्तीहरूप्रति गहिरो आत्मसमीक्षा गर्दै अब भ्रष्टाचार, अन्याय र अनियमितताविरुद्ध कठोर कदम चाल्नुपर्ने बताएका छन् । उनले राजनीति सेवा, समर्पण र त्यागको माध्यम हो भन्ने मूल भावनाबाट विचलन भएको स्वीकारेका छन् ।

‘हामी यो यथार्थ लुकाउँदैनौँ, बरु विनम्रताका साथ क्षमा माग्छौँ,’डा. शर्माले भनेका छन्, ‘गल्ती दोहोरिने छैन। सत्य र न्यायको पक्षमा दृढताका साथ उभिन्छौँ ।’

उनले पार्टीभित्रका केही नेताको भ्रष्ट आचरणले संस्थाको छवि धुमिल बनाएको उल्लेख गरेका छन् । ‘इमान्दार कार्यकर्तामाथि अरूको पापको बोझ थोपर्नु अन्याय हो । अब सच्चा नेताहरूको आत्मसम्मान जोगाउने संकल्प लिएका छौँ ।’

डा. शर्माले देशको वर्तमान अवस्था राजनीतिक नेताहरूको असफलताको प्रतिफल भएको उल्लेख गरेका छन् । ‘कुनै पार्टीको मात्र होइन, सबै पार्टीका केही शीर्ष नेताहरू र उनीहरूका परिवारकै कारण आज देश यस्तो संकटमा छ’ उनले भने ।

उनले विगतका नेतृत्वले देखाएको आदर्श स्मरण गर्दै लोकतन्त्रको मूल्यलाई फेरि जगेर्ना गर्नुपर्नेमा जोड दिए । ‘बी.पी. कोईरालाको दृष्टिमा लोकतन्त्र जनताको आत्मसम्मान थियो, त्यो आत्मसम्मान आज धमिलिँदै गएको छ,’ उनले भने ।

डा. शर्माले अबको कांग्रेस आत्मसमीक्षा, पारदर्शिता र पुस्तान्तरणको नयाँ जोशसाथ अगाडि बढ्ने दाबी गरे । उनले भने, ‘हाम्रो लक्ष्य केवल पार्टी पुनर्जीवन होइन, समृद्ध नेपाल निर्माण हो। समान अवसरमा आधारित अर्थतन्त्र, न्यायपूर्ण समाज र सक्षम शासन प्रणालीको पुनर्निर्माण नै हाम्रो अन्तिम लक्ष्य हो ।’

विजयादशमीको अवसरमा डा. शर्माले सम्पूर्ण नेपालीहरूलाई शुभकामना दिँदै चाडले राष्ट्रिय ऐक्यबद्धता र विश्वासको भावना बलियो बनाओस् भन्ने कामना व्यक्त गरे । ‘नेपालको पुनर्निर्माण र गौरवशाली भविष्यका लागि हामी सबै मिलेर अघि बढ्न सकौँ,’ उनले शुभकामना सन्देशमा उल्लेख गरेका छन् ।

काठमाडौं। आज बडा दशैंको छैटौं दिन, हिन्दूधर्मालम्बीहरूले कात्यायनीदेवीको पूजा-आराधना गरेर मनाउँदैछन्।

आजको दिनमा कात्यायनी देवीको पूजा गरे रोग, शोक, भय, दुःख र दरिद्रता नाश भई प्रगतिको मार्गमा अगाडि बढ्न सकिने धार्मिक विश्वास रहेको छ। शास्त्रीय मान्यताअनुसार महर्षि कात्यायनको तपस्याबाट प्रसन्न भई भगवती उनकी पुत्रीका रूपमा जन्मिएपछि उनी कात्यायनी नामले परिचित भएकी हुन्।

त्रिलोकमा आतंक मच्चाएका महिषासुरको वधका लागि ब्रह्मा, विष्णु र महेश्वरको तेजबाट उत्पन्न भएकी देवी कात्यायनीले आश्विन शुक्ल सप्तमीदेखि नवमीसम्म पूजा ग्रहण गरेर दशमीका दिन महिषासुरको संहार गरेकी थिइन्। त्यसपछि उनी धर्म र न्यायको प्रतीकका रूपमा प्रतिष्ठित भएकी भन्ने पुराणमा उल्लेख गरिएको छ।

अदृश्य जगतको शासनसत्ता यिनै कात्यायनी देवीले चलाउने विश्वास गरिन्छ। कात्यायनीको हामीले देख्ने स्वरुप सोही अदृष्य जगतलाई जनाउने सूचक हो। त्यसैले कात्यायनीलाई दिव्यताको अतिगुप्त रहस्यहरुको प्रतीक मान्ने गरिन्छ।

क्रोध पनि कुनै समय सकारात्मक बलको प्रतीक हुन्छ। कुनै समय यही क्रोध नकारात्मक आसुरी शक्तिको प्रतीक बन्ने गर्दछ। यी दुईमा एकदमै गहिरो भेद पाईन्छ। क्रोध केवल नकारात्मक गुण या शक्ति होईन। सकारात्मकताका साथ देखिएको क्रोध बुद्धिमत्तासँग जोडिएको हुन्छ।

सकारात्मक क्रोध एक प्रौढ बुद्धिबाट उत्पन्न हुन्छ। क्रोध यदि अज्ञान र अन्यायकोप्रति छ भने यसले सकारात्मकतालाई सञ्चार गराउने गर्दछ। अतः यहि सकारात्मक क्रोध जुन अज्ञान र अन्यायकोप्रति रहेको हुन्छ। त्यो नै देवी कात्यायनीको विशेषता हो।

महर्षि कात्यायनको तपस्याबाट प्रसन्न भएर आदिशक्तिले उनको पुत्रीको रुपमा जन्म लिएकोले ती देवीको नाम नै कात्यायनी राखिएको हो। कात्यायनीको उपासनाबाट यस लोकमा स्थित भएर पनि अलौकिक तेज एवं प्रभावबाट युक्त हुँदै रोग, शोक, सन्ताप, भय आदि सर्वथा विनष्ट हुने धार्मिक विश्वास छ।

देवी कात्यायनीसँग जोडिएको कथा अनुसार कुनै समय एक कत नाम गरेका प्रसिद्ध ऋषि थिए। उनको पुत्र ऋषि कात्य नामले प्रसिद्ध थिए। उनकै नामबाट प्रसिद्ध कात्य गोत्रबाट नै विश्वप्रसिद्ध ऋषि कात्यायन उत्पन्न भएका थिए।

ऋषि कात्यायनले भगवती पराम्बराको उपासना गर्दै कठिन तपस्या समेत गरेका थिए। उनको इच्छा थियो भगवतीले आफ्नो घरमा पुत्रीको रुपमा जन्म लिऊन्। भगवतीले उनको यो प्रार्थना स्वीकार गरिन्।

मेष : आजको दिनले गम्भीरता र सतर्कताको माग गर्दछ । स्वास्थ्यप्रति ध्यान दिनुपर्ने समय हो । अनावश्यक रिस वा आवेग नियन्त्रण गर्नुहोस् । गोप्य कुराहरु प्रकट हुन सक्छन्, त्यसैले सावधानी अपनाउनु हितकर हुनेछ ।

वृष : व्यावसायिक साझेदारी वा वैवाहिक सम्बन्धमा केही असमझदारी देखिन सक्छ । आजको दिन संवादमा संयमता आवश्यक छ । पार्टनरसँग सहकार्य गर्दा स्पष्टता अपनाउनु उत्तम हुनेछ ।

मिथुन : प्रतिस्पर्धामा विजय प्राप्त हुने सम्भावना छ । पुराना ऋण तिर्ने वा स्वास्थ्य सम्बन्धी समस्या समाधान हुने संकेत मिल्दछ । शत्रुहरू कमजोर हुनेछन् । कामकाजी क्षेत्रबाट सन्तोषजनक समाचार प्राप्त हुनसक्छ ।

कर्कट : मनमा सिर्जनात्मकता जाग्नेछ । विद्यार्थी वा कलाकार वर्गका लागि यो दिन उत्साहजनक रहनेछ । प्रेम सम्बन्धमा उर्जा बढ्न सक्छ, यद्यपि भावना नियन्त्रणमा राख्नु आवश्यक हुनेछ ।

सिंह : घरपरिवार तथा मानसिक शान्तिको पक्षमा अलिकति उतारचढाव देखिन सक्छ । माताको स्वास्थ्यप्रति सचेत हुनु उपयुक्त हुनेछ । घर जग्गा सम्बन्धी विषयमा चासो बढ्न सक्छ । आत्मविश्वास घट्न सक्छ, तर धैर्य आवश्यक छ ।

कन्या : धैर्य, साहस र आत्मबलमा बृद्धि हुनेछ । सन्देश सम्प्रेषण वा सञ्चार माध्यममा संलग्न व्यक्तिका लागि समय लाभदायक छ । नयाँ विचार कार्यान्वयन गर्न सकिने छ । भाइबहिनीसँग सम्बन्ध राम्रो रहनेछ ।

तुला : वाणी संयमित राख्नुपर्ने दिन हो । आर्थिक पक्ष औसत रहनेछ । परिवारजनसँग सम्बन्धमा अलिक गहिराइ देखिन सक्छ । खाद्यपदार्थमा ध्यान दिनु राम्रो हुनेछ । अनावश्यक खर्च बढ्न सक्छ ।

वृश्चिक : भावनात्मक चञ्चलता देखिन सक्छ । निर्णयमा दुविधा उत्पन्न हुनसक्छ । आत्ममूल्यांकन र गम्भीर चिन्तनको समय हो । स्वाभिमान र अधिकारको विषय उठ्न सक्छ ।

धनु : खर्चको योग प्रबल छ । अनावश्यक यात्राबाट बच्नुहोस् । निद्रामा बाधा वा मानसिक बेचैनी हुन सक्छ । विदेशसम्बन्धी योजना बनिरहेको छ भने, आज विशेष पहलकदमी गर्नु उपयुक्त हुन्छ ।

मकर : धनलाभको प्रबल योग छ । इच्छाहरु पूर्ण हुने सम्भावना छ । मित्र वा सामाजिक सञ्जालबाट लाभ मिल्नेछ । आजको दिन तपाईंका लागि वरिष्ठ व्यक्तिबाट समर्थन प्राप्त हुन सक्छ ।

कुम्भ : कर्म क्षेत्रमा उत्साहजनक प्रगति हुनेछ । पद प्रतिष्ठा वा मान सम्मान प्राप्त हुने सम्भावना छ । सामाजिक उत्तरदायित्व बढ्न सक्छ । अधिकारी वर्गको साथ पाइनेछ । अवसरको पहिचान गरी अगाडि बढ्न सकिने समय हो ।

मीन : भाग्यबलमा वृद्धि हुनेछ । धार्मिक कार्यमा मन लाग्नेछ । गुरु वा पिताको साथ वा प्रेरणा प्राप्त हुने सम्भावना छ । यात्रा लाभदायक हुनेछ । उच्च अध्ययन वा अनुसन्धानका लागि उपयुक्त दिन छ ।

सरकारले जेनजी आन्दोलनका क्रममा घाइते भएका व्यक्तिहरूको सहज र प्रभावकारी उपचारका लागि काठमाडौं र उपत्यकाबाहिर ‘जेनजी क्लिनिक’ सञ्चालन गर्ने निर्णय गरेको छ ।

गृह मन्त्रालयका अनुसार घाइतेहरूको पहिचान, वर्गीकरण र उपचार प्रक्रिया सहज बनाउन स्वास्थ्य तथा जनसंख्या मन्त्रालयमार्फत तोकिएका अस्पतालहरूमा क्लिनिक स्थापना गरिनेछ।

यस कार्यका लागि गृह तथा स्वास्थ्य मन्त्रालयले सम्पर्क व्यक्ति तोक्नेछ, जसले अस्पताल र पीडितबीच समन्वय गर्ने जिम्मेवारी लिनेछन् ।

उपचारमा संलग्न अस्पतालका विषयविज्ञ चिकित्सकको संयोजकत्वमा कार्यदल गठन गरी, सम्बन्धित अस्पतालमार्फत उपचार प्रक्रिया प्रारम्भ गरिने मन्त्रालयले जनाएको छ।

घाइतेहरूको पहिचान र सेवा पहुँच सुनिश्चित गर्न असोज १२ गतेदेखि गृह मन्त्रालयमा सहायता कक्ष स्थापना गरिनेछ। उक्त कक्षमार्फत घाइतेहरूलाई परिचयपत्र वितरण गरिनेछ, जसको आधारमा उनीहरूले विभिन्न सेवामा पहुँच पाउनेछन्।

फलोअप उपचार आवश्यक हुने घाइतेहरूको लागि एम्बुलेन्स सेवा पनि उपलब्ध गराइने छ । घाइतेले परिचयपत्र देखाएर नि:शुल्क रूपमा अस्पताल आउजाउ गर्नका लागि सो एम्बुलेन्सको व्यवस्था गरिएको मन्त्रालयले जनाएको छ ।

नेपाल प्रहरीले चाडपर्व सुरक्षाका लागि देशभर करिब ५० हजार सुरक्षाकर्मी परिचालन गरिएको जनाएको छ ।

नेपाल प्रहरीका केन्द्रीय प्रवक्ता, प्रहरी नायब महानिरीक्षक विनोद घिमिरेले देशभरका सुरक्षा युनिटले विशेष चाडपर्व सुरक्षा योजना बनाई लागू गरिसकेको र सबै गरेर करिब ५० हजार सुरक्षाकर्मी परिचालन गरिएको जानकारी दिए ।

‘भयरहित वातावरणमा चाडपर्व मनाउनका लागि शान्ति सुरक्षा अमन चयन कायम गर्न अन्य सुरक्षा निकायसँग समन्वय र नागरिकसँग हातेमालो गर्दै सुरक्षाको प्रबन्ध गरेका छौँ । सम्भावित जोखिम क्षेत्रसमेत पहिचान गरी विशेष निगरानी बढाइएको छ,’ उनले भने ।

प्रवक्ता घिमिरेका अनुसार आवश्यकताका आधारमा ड्रोन र तालिमप्राप्त कुकुरको प्रयोग गरिने छ भने सादा पोसाकमा प्रहरी परिचालन हुनेछन् । काठमाडौँ उपत्यकामा मात्रै छ हजारभन्दा बढी सुरक्षाकर्मी परिचालन हुने र आवश्यकताअनुसार थप जनशक्ति परिचालन हुने गरी तयारी गरिएको छ ।

मुख्यगरी सवारीसाधनको आवागमन सहज बनाउने तथा चाडपर्वमा हुने भेला, जमघटमा मदिरा खाएर होहल्ला, झगडा गर्ने तथा चोरी तस्करीलगायत आपराधिक घटना बढी हुने भएकाले त्यसतर्फ विशेष निगरानी गरिएको प्रहरीले जनाएको छ ।

यस्तै, कालोबजारी र तोकिएभन्दा बढी सावारी भाडा लिनेलगायत गतिविधिको पनि निगरानी भइरहेको प्रहरीले जनाएको छ ।

सरकारले जेनजी आन्दोलनका घाइतेहरुलाई परिचय पत्र वितरण गर्ने भएको छ।

घाइतेहरुको पहिचान र उपचारमा सहजीकरण गर्न आइतबारदेखि परिचय पत्र वितरण गरिने गृहमन्त्रालयले बताएकोछ।

त्यस्तै घाइतेहरुको उपचारका लागि काठमाडौँ उपत्यका र बाहिर अस्पताल तोक्ने र त्यहाँ जेनजी क्लिनिक सञ्चालन गर्ने समेत मन्त्रालयले बताएको छ।

त्यस्तै घाइतेहरुको वर्गिकरणका लागि उपचारका संलग्न चिकित्सको संयोजकत्वमा कार्यदल गठन हुने भएको छ।

पुनः चेकजाँचका लागि घाइतेहरुलाई एम्बुलेन्स सेवा पनि उपलब्ध गराउने सरकारले निर्णय गरेको छ।

नेकपा एमालेका अध्यक्ष केपी शर्मा ओलीले वर्तमान सरकार तोडफोड र आगजनीको माध्यमबाट बनेको आरोप लगाएका छन् ।

शनिबार भक्तपुरको गुण्डुमा राष्ट्रिय युवा संघ, नेपालको आयोजना गरेको खुला भेटघाट कार्यक्रममा उनले जेनजी भनिएको यो सरकार संवैधानिक बाटो र जनताको अभिमतबाट नबनेको बताए ।

आफूले देश र जनताको पक्षमा काम गरेको दाबी गर्दै त्यसको विवरण प्रकाशित गरेर देखाउन ओलीले सरकारलाई चुनौती दिए ।

आफूले सुशासनको पक्षमा काम गरेको जिकिर गर्दै अध्यक्ष ओलीले भ्रष्टाचार गरेको भए देखाउन सरकारलाई चुनौती दिए ।

‘मैले कर्मचारीलाई दिएको निर्देशनहरू रेकर्डेट छन् । ती कुराहरू सरकारले बाहिर ल्याओस्, प्रहरीलाई दिएको निर्देशन रेकर्डेट छन्,’उनले भने, ‘अरू क्षेत्रमा गरेका कामहरू रेकर्डेट छन् । बाहिर ल्याओस् । हामी कुनै षड्यन्त्र गर्दै गर्दैनौँ ।’

अध्यक्ष ओलीले एमालेले सधैँ सरकारको नेतृत्व गर्दा छलछाम र षड्यन्त्रका कुनै पनि गतिविधि नगरेको पनि दोहोर्‍याए ।

काठमाडौं । नेपाली कांग्रेसकी नेतृ तथा निवर्तमान परराष्ट्रमन्त्री आरजु राणा देउवाले युलेन्स स्कुलको व्यवस्थापन समितिको अध्यक्ष पदबाट राजीनामा दिएकी छन् ।

गत भदौ २४ गते जेनजी आन्दोलनका क्रममा ललितपुरस्थित युलेन्स स्कुलमा तोडफोड र आगजनी भएको थियो। त्यसयता उनलाई अभिभावकले अध्यक्षबाट राजीनामा दिन दबाब दिइरहेका थिए । राणाले शुक्रबार अध्यक्ष पदबाट राजीनामा दिएको युलेन्स फाउन्डेसन स्रोतले बताएको छ । स्रोतका अनुसार राणाले अभिभावकको दबाब राजीनामा दिएकी हुन् ।

आरजु राणाको लगानी रहेको भन्ने आधारमा जेनजी आन्दोलनका क्रममा २४ भदौमा युलेन्स स्कुलका ललितपुरको खुमलटार र काठमाडौँको बाँसबारीस्थित भवनहरूमा आगो लगाएर ध्वस्त बनाइएको थियो । आगजनीबाट ध्वस्त स्कुललाई नयाँ ढंगले सञ्चालन गर्ने तयारी युलेन्स फाउन्डेसनले गरेको छ ।

काठमाडौँ- अमेरिकी डाइभर्सिटी भिसा (डीभी) कार्यक्रमका लागि अबदेखि आवेदन फारम भर्दा एक अमेरिकी डलर शुल्क तिर्नुपर्ने भएको छ। यसअघि फारम भर्दा कुनै शुल्क लाग्दैनथ्यो।

अमेरिकी विदेश मन्त्रालयले फेडरल रजिष्टरमार्फत सार्वजनिक गरेको सूचना अनुसार, धोकाधडी नियन्त्रण गर्न र प्रशासनिक खर्च व्यवस्थापन गर्न विश्वभरका सबै आवेदकबाट न्यूनतम शुल्क लिने निर्णय गरिएको हो।

यो नियम सन् २०२७ को डिभी लट्री कार्यक्रमदेखि लागू हुनेछ, जसको आवेदन प्रक्रिया सन् २०२५ को अक्टोबरमा सुरु हुनेछ। फारम भर्दा पासपोर्ट अनिवार्य हुने र भिसा पाउँदा तिर्नुपर्ने ३३० डलरको शुल्क भने यथावत रहनेछ।

भुक्तानी प्रक्रियामा अमेरिकी सरकारको आधिकारिक अनलाइन पोर्टलमार्फत भिसा कार्ड, मास्टर कार्ड, पेपल वा अमेरिकन एक्सप्रेस प्रयोग गर्न सकिने व्यवस्था हुनेछ। नेपालमा भने प्राय: भिसा वा मास्टर कार्ड नै प्रयोगयोग्य हुने बताइएको छ। शुल्क तिरेपछि मात्र फारम सबमिट हुने भएकाले आवेदकले पहिले नै कार्डको भुक्तानी सीमाबारे स्पष्ट हुनुपर्ने मन्त्रालयले जनाएको छ।

काठमाडौं । एसईई पूरक परीक्षाको नतिजा सार्वजनिक भएको छ । राष्ट्रिय परीक्षा बोर्डले शनिबार प्रकाशित गरेको नतिजाअनुसार ८३ हजार ५६४ परीक्षार्थी उत्तीर्ण भएका छन् ।

बोर्डका अध्यक्ष डा महाश्रम शर्माका अनुसार परीक्षामा सहभागी भएका १ लाख ४३ हजार २५७ परीक्षार्थीमध्ये ५९ हजार ६९३ जना अनुत्तीर्ण अर्थात् अवर्गीकृत भएका छन् ।

परीक्षा साउन २९ देखि भदौ ६ गतेसम्म सञ्चालन भएको थियो । गत वैशाखमा सञ्चालित वार्षिक परीक्षामा दुई विषयसम्म ‘नन ग्रेडेड’प्राप्त गरेका वा अनुपस्थित भएका विद्यार्थीहरूका लागि बोर्डले पूरक परीक्षाको अवसर दिएको हो।

ताजा अपडेट

Login

कृपया ध्यान दिनुहोस्:

  • अब तपाइले कमेन्ट गर्नका लागि अनिवार्य रजिस्ट्रेसन गर्नुपर्ने छ ।
  • आफ्नो इमेल वा गुगल, फेसबुक र ट्वीटरमार्फत् पनि सजिलै लगइन गर्न सकिने छ ।
  • यदि वास्तविक नामबाट कमेन्ट गर्न चाहनुहुन्न भने डिस्प्ले नेममा सुविधाअनुसारको निकनेम र प्रोफाइल फोटो परिवर्तन गर्नुहोस् अनि ढुक्कले कमेन्ट गर्नहोस्, तपाइको वास्तविक पहिचान गोप्य राखिने छ ।
  • रजिस्ट्रेसनसँगै बन्ने प्रोफाइमा तपाइले गरेका कमेन्ट, रिप्लाई, लाइक/डिसलाइकको एकमुष्ठ बिबरण हेर्नुहोस् ।