२०८३ मंसिर ३ गते बुधबार
२०८३ मंसिर ३ गते बुधबार

काठमाडौं । शिक्षा विज्ञान तथा प्रविधिमन्त्री महावीर पुनले आइतबार (असोज १२ गते) सम्म शिक्षकहरूलाई तलब नदिने विद्यालयका प्रधानाध्यापकलाई कारबाही गर्ने चेतावनी दिएका छन्।

शिक्षकले तलब नपाएको ब्यापक गुनासो आएपछि मन्त्री पुनले आइतबारसम्म तलब उपलब्ध गराउन निर्देशन दिएका हुन् ।

शनिबार बिहान सामाजिक सञ्जालमा लेख्दै मन्त्री पुनले शिक्षा मन्त्रालयबाट तलब पहिले नै विद्यालयहरूमा पठासकेको स्पष्ट पारेका छन् ।

उनले आइतबारसम्म शिक्षकहरूलाई पारिश्रमिक उपलब्ध नगराए सम्बन्धित प्रधानाध्यापकलाई नियमानुसार कारबाही गरिने बताएका छन्।

मन्त्री पुनले भनेका छन्, ‘तलब नख्वाउने प्रअहरूलाई सूचना- दसैँ-तिहारको अवसरमा विद्यालय व्यवस्थापन समितिले र प्रधानाध्यापकले तलब निकासा गरिदिएन भनेर धेरै गुनासो आएको छ। शिक्षा मन्त्रालयबाट तलब पहिले नै विद्यालयहरूमा पठाइसकेको छ। भोलि सम्ममा कुनै नाजायज र अन्यायपूर्ण तरिकाले तलब नपाएको शिक्षकहरूको तलब निकास नगरेमा त्यस्ता विद्यालयका प्रधानाध्यापकलाई नियमानुसार कारबाही गरिनेछ।’

काठमाडौं । नेकपा (एमाले) का अध्यक्ष केपी शर्मा ओलीले गत भदौ २४ गतेको घटनाबारे एक सनसनीपूर्ण खुलासा गरेका छन् । भक्तपुरको गुण्डुस्थित आफ्नो डेरामा लोकतान्त्रिक आदिवासी जनजाति महासंघ नेपालका अध्यक्ष पासाङ शेर्पासहितको समूहसँगको भेटमा ओलीले आफूलाई मार्ने र नेपाली कांग्रेसका सभापति शेरबहादुर देउवालाई घाइते बनाउने ‘योजना’ रहेको बताएका हुन् ।

अध्यक्ष ओलीका अनुसार, यदि उनी बालुवाटारबाट पाँच मिनेट मात्रै ढिला निस्केका भए, ‘मार्ने नै थिए ।’ उनले थपे, ‘शेरबहादुरजीलाई घाइते बनाउने र मला ई मार्ने खालकै योजना थियो ।’

ओलीले आफूले यस्तो ‘हठात् सत्ता नै पल्टाउने’ घटनाको तयारी गर्न समेत नपाएको बताए । ‘मैले आफ्नो तयारी पनि गर्न पाइनँ,’ उनले भने । सुरक्षा संयन्त्रमाथि भरोसा भए पनि प्रदर्शन चर्किंदै गएपछि उनीहरूले केही गर्न नसक्ने बताएको ओलीको भनाइ छ । ‘सेक्युरिटीमाथि मलाई अलिकति भरोसा भयो, सेक्युरिटीले हामी केही पनि गर्न सक्दैनौं, केही पनि गर्दैनौं भन्यो,’ उनले भने ।

अन्तिममा नेपाली सेनाले आफूलाई त्यहाँबाट ‘भगाइसम्म दिएको’ ओलीले उल्लेख गरे । गत भदौ २४ गते दिउँसो २ बजे राजीनामा दिएलगत्तै उनलाई नेपाली सेनाले हेलिकोप्टरमार्फत् उद्धार गरी शिवपुरी पुर्‍याएको थियो । ‘अन्तिममा सेनाले भगाइसम्म दियो । त्यहाँबाट निकाल्यो एकछिनमा । पाँच मिनेटभित्रमा हामी हिँड्यौं,’ उनले स्मरण गरे ।

ओलीले यस्तो ‘परिघटना’ बाट विचलित नभई उच्च मनोबलका साथ अगाडि बढ्न कार्यकर्तालाई आग्रह गरे । ‘कमजोर मनोबल बनाएर यसका विरूद्ध हामीले केही पनि गर्न सक्दैनौं । यस षड्यन्त्रबाट देशलाई जोगाउनचाहिँ उच्च मनोबल गर्नैपर्छ,’ उनले भने ।

उनले यो ‘देशै जलाउने खालको महाआपराधिक घटना’ भएको टिप्पणी गरे । अध्यक्ष ओलीले एमाले देशको नेतृत्वमा हुँदासम्म यस्ता घटना अब कुनै पनि हालतमा हुन नदिने प्रतिबद्धता व्यक्त गरे । ‘हामी एमाले हुँदाहुँदै अब कुनै पनि हालतमा हुन दिँदैनौं । एमाले हुँदाहुँदै सिंहदरबार जलाउने ?,’ उनले प्रश्न गरे ।

उनले यसपटक एमालेको ‘कमजोरी’ भएको र देशका सम्पत्तिको रक्षा गर्न चुकेको स्वीकार गरे । ‘यसपल्ट हाम्रो अलिकति कमजोरी भयो । यो हदसम्म देशै जलाउँछन् भन्ने खालको त्यस्तो लाग्या थिएन,’ उनले भने ।

ओलीले ‘देशद्रोही, अपराधी तत्वहरू’ विभिन्न ठाउँमा, पद र ओहोदामा पुगेको टिप्पणी गरे । ‘छद्म तत्वभित्र पसेका रहेछन् । तर वास्तवमा देशलाई माया नै नगर्ने तत्वहरू शेर पल्टेर बसेका रहेछन् यसपटक हामीले देख्यौं । त्यस्ता तत्व हामीले चिनेका छौं। त्यस्ता तत्वलाई विस्तारै नियन्त्रण गर्दै लगिनेछ,’ उनले चेतावनी दिए । यस घटनाले नेपाली राजनीतिमा थप तरंग पैदा गरेको छ ।

काठमाडौं– आज आश्विन शुक्ल पञ्चमी । दिनका हिसाबले आज छैटौँ दिन भए पनि तिथिका हिसाबले आज नवरात्रको पाँचौँ दिन हो ।

नवरात्रको पाँचौँ दिन नवदुर्गामध्येकी पाँचौँ रूप स्कन्दमाताको पूजाआराधना गरिँदैछ। स्कन्दकुमार (कुमार) की माता भएकीले यिनको नाम स्कन्दमाता रहेको बताइन्छ ।

गोरो वर्ण, चार हात भएकी यिनको काखमा ६ मुख भएका स्कन्दकुमार छन् । यिनको यो स्वरूपलाई मातृरूप मानिन्छ । कमलको आसनमा बसेकी हुनाले स्कन्दमातालाई पद्मासना पनि भनिन्छ ।

नवरात्रमा प्रत्येक दिन एक एक देवीको आराधना गर्ने परम्परा छ। दुर्गा पक्ष समेत भनिने दशैँको पहिलो दिन शैलपुत्री, दोस्रो दिन ब्रह्मचारिणी, तेस्रो दिन चन्द्रघण्टा, चौथो दिन कुष्माण्डा, पाँचौं दिन स्कन्दमाता, छैटौँ दिन कात्यायनी, सातौँ दिन कालरात्री, आठौँ दिन महागौरी, र नवौँ दिन सिद्धिदात्रीको पूजा आराधना गर्ने गरिन्छ। यिनै नौवटा दुर्गाका रूपलाई नवदुर्गा पनि भनिन्छ ।

नवरात्रका नौ दिन घटस्थापना गरिएको स्थलमा दुर्गा सप्तशती ९चण्डी०, श्रीमद्देवीभागवत लगायत देवी स्तोत्र पाठ गरिन्छ।

नवरात्रका अवसरमा देवीको आराधना गरी पूजा गरेमा शक्ति, ऐश्वर्य र विद्या प्राप्त हुने धार्मिक विश्वास छ। यसै आधारमा वैदिक सनातन धर्मावलम्बीले प्रत्येक वर्ष आश्विन शुक्ल प्रतिपदादेखि नवमीसम्म दुर्गा देवीको विशेष आराधना गर्छन्।

नौ दिनसम्म पूजा आराधना गरेको प्रसाद विजयादशमीदेखि कोजाग्रत पूर्णिमाका दिनसम्म लगाइन्छ। यसरी १५ दिनसम्म नेपालीले बडादशैँ पर्व मनाउँछन्।

नवरात्रभर महाकाली, महालक्ष्मी, महासरस्वतीरूपिणी शक्तिस्वरूपा भगवतीको आराधना गर्ने परम्परा छ।

यसै अवसरमा काठमाडौं उपत्यकाका गुह्येश्वरी, दक्षिणकाली, नक्साल भगवती, भद्रकालीलगायत देशभरका मन्दिर र शक्तिपीठहरुमा पूजाअर्चना गर्नेहरूको भीड लागेको छ ।

नेपाली कांग्रेसका नेता भूपेन्द्रजंग शाहीले मंसिरमा पार्टीको नियमित महाधिवेशन गर्न सबै एकजुट भएर लाग्नु पर्ने बताएका छन्।

नेपाली कांग्रेसलाई यथास्थितिबाट अघि बढाउन र विग्रहबाट रोक्न सबै जिम्मेवार हुनुपर्ने शाहीले बताए। 

‘सबै जिम्मेवार भएर मंसिरमै नियमित महाधिवेशन गर्न एकजुट हुनुपर्छ,’ उनले भने, ‘मेरो गोरूको बाह्रै टक्का भनेर मात्र हुँदैन, सबैको भावना र विचारलाई सम्मान गर्दै सहमतिसाथ मिलनविन्दुको खोजी गर्दै मंसिरमा नियमित महाधिवेशनमा जानुपर्छ।’

उनले विशेष महाधिवेशनको जटिलताबारे प्रस्ट पार्दै भने, ‘अहिले विशेष महाधिवेशन भनेर कुरा गर्दा क्रान्तिकारी विचार त सुनिएला तर यसका लागि तीन महिना लाग्छ। त्यसबेलासम्म त चुनाव आइसक्छ त्यसैले मंसिरमा नियमित महाधिवेशन गर्दा झनै छिटो र छरितो पार्टिले नया नेत्तृत्व प्राप्त गर्छ।’

अहिलेको बिसम परिस्थितिमा युवा पुस्तामा आक्रोश देखिएका बेला पुरानै प्रतिनिधिबाट पार्टी नेतृत्व चयन गर्ने कुरा झन टालटुले मात्रै हुने उनले बताए।

‘अहिले युवाको यत्रो आक्रोश देखियका बेला पुरानै प्रतिनिधिबाट नेतृत्व चयन गर्ने कुराले युवा पुस्तालाइ पार्टीमा आउने बाटो रोक्छ। नयाँ सदस्यतालाई बन्द गरेर, जेनजीलाई पार्टीमा आउने प्रक्रिया बन्देज गरेर कसरी पार्टी परिवर्तन र रुपान्तरण गर्न सकिन्छ?’ उनले प्रश्न गरे।
अवको महाधिवेशन वाट युवा पुस्तालाइ पनि पार्टिको मुलधारमा जोड्न पनि पुरानै प्रतिनिधि नभयर नया सदस्य र नया प्रतिनिधि मार्फत अब नियमित महाधिवेशन गर्दा उत्तम हुने उनले बताए।

‘पार्टी यथास्थितिमा चल्दैन, पार्टीमा अपरेसन जरूरी छ, युवाको आक्रोश र जनताको भावना बुझ्न सकेन भने त पार्टी चल्न सक्दैन, अहिले पार्टी संकटको घडीमा छ, भावनामा बहकिएर निर्णय गर्ने छुट कसैलाई छैन, एकताबद्ध भएर जानुपर्छ,’ उनले भने, ‘मंसिरमा कार्यकाल सकिने भएकोले अब सबैको सहमतिमा नियमित महाधिवेशन गरेर अगाडि बढ्नु पर्छ। विशेष महाधिवेशन भनेर विवाद गर्दा झनै मंसिरमा हुने महाधिवेशन पनि पछाडि धकेलिने खतरा हुन सक्छ। विशेष महाधिवेशन
विधानअनुसार ३ महिनामा भन्ने छ, मंसिर कट्छ, चुनाव आउँछ।’

काठमाडौं । नेकपा (माओवादी केन्द्र) का संयोजक पुष्पकमल दाहाल ‘प्रचण्ड’ ले अब आफू अध्यक्ष नरहेको बताएका छन् । केन्द्रीय कमिटी बैठक समापन गरेर बाहिरिँदै गर्दा सञ्चारकर्मीलाई संक्षिप्त प्रतिक्रिया दिँदै प्रचण्डले आफू अध्यक्ष नरहेको बताएका हुन् ।

‘अब म अध्यक्ष रहिन । संयोजक भएँ’ उनले भने । शुक्रवारदेखि बसेको माओवादी केन्द्रीय कमिटीको बैठक प्रचण्डको राजनीतिक प्रस्ताव पारित गर्दै आज सकिएको छ ।

शुक्रवारदेखि प्रज्ञा प्रतिष्ठान, कमलादीमा बसेको बैठकले प्रचण्डको प्रस्ताव पारित गरेको छ भने नारायणकाजी श्रेष्ठको पूरक प्रस्ताव र उपमहासचिव जनार्दन शर्माको फरक मतलाई समेट्दै महाधिवेशनसम्म छलफल गर्दै जाने निर्णय गरेको छ ।

काठमाडौं । राष्ट्रिय स्वतन्त्र पार्टी (रास्वपा)को केन्द्रीय कार्यालय रहेको भवनको घरधनीले खाली गरिदिन आग्रह गरेका छन् ।

बनस्थलीस्थित उक्त भवनका घरधनी, भरतमणि देवकोटाले रास्वपालाई तीन महिनाभित्र घर खाली गर्न भनेका हुन् ।

देवकोटा वर्तमानमा अमेरिका रहेका छन्, आफ्नो घर भाडामा दिने सम्झौतामा लामो समयदेखि भाडा नपाएको र सुरक्षासम्बन्धी समस्याका कारण घर छोड्न रास्वपालाई सूचित गरेका छन् ।

‘१० महिनाको भाडावापतको रकम पाएको छैन । पार्टीलाई सापट दिएको रकम पनि पाएको छैन । सापट दिएको ठूलो रकम छ । के कति अहिले नभनौं’ उनले भने ।

उक्त घर मासिक तीन लाख पचास हजार रुपैयाँमा भाडामा दिने सम्झौता भएको देवकोटाले जानकारी दिएका छन् ।

काठमाडौं । गृहमन्त्री ओमप्रकाश अर्यालले राजनीतिक कनेक्शनका आधारमा रोकिएका सबै अनुसन्धान फाइल खोल्ने घोषणा गरेका छन् ।

नेपाल प्रहरीको केन्द्रीय अनुसन्धान ब्युरो (सीआईबी) को अनुगमन गरेपछि पत्रकारसँग कुरा गर्दै मन्त्री अर्यालले यस्तो महत्त्वपूर्ण निर्णय लिएको जानकारी दिएका छन् ।

उनले आगामी चुनाव सम्पन्न गर्न शान्ति सुरक्षा र सुशासनलाई प्राथमिकता दिने बताए । सो क्रममा राजनीतिक कनेक्शनका आधारमा थन्किएका फाइलहरू खुलाउनुपर्ने आवश्यकता रहेको बताएका छन् । गृहमन्त्री अर्यालले भने, ‘पोलिटिकल कनेक्सनका आधारमा जे कुरा रोकिएको थियो, जे कुरा बिथोलिएको थियो, त्यस्तो अब हुँदैन ।’

उनले थपे, ‘यो सरकारको म्यान्डेट नै सुशासन हो । सुशासनविना शान्ति सुरक्षा हुन सक्दैन। शान्ति सुरक्षा भएन भने ६ महिनाभित्र निर्वाचन गर्न पनि सकिँदैन ।’

गत भदौ २४ गते जेनजी युवाको प्रदर्शनको क्रममा महाराजगञ्जस्थित सीआईबीको कार्यालयमा क्षति पुगेको थियो ।

सो घटनाको अवलोकन गरेपछि गृहमन्त्री अर्यालले अपराध अनुसन्धानमा रोकिएका फाइलहरूको पुनः परीक्षण हुने बताएको छ ।

काठमाडौँ- नेपाल राष्ट्र बैंकले दसैं, तिहार तथा छठजस्ता महत्वपूर्ण चाडपर्वहरूलाई लक्षित गर्दै डिजिटल वालेट प्रयोगकर्ताहरूका लागि ठूलो सुविधा दिएको छ।

भुक्तानी प्रणाली विभागले एक परिपत्र जारी गर्दै वालेटमा एक दिनमा रकम जम्मा गर्न सकिने संख्यालाई अस्थायी रूपमा वृद्धि गरेको हो।

दसैंमा विशेषगरी दक्षिणा आदानप्रदानमा सहज बनाउन राष्ट्र बैंकले यो कदम चालेको हो। 

अहिले एक ग्राहकको वालेटमा एक दिनमा १० पटकसम्म रकम जम्मा गर्न सकिने व्यवस्था रहेको छ। तर, चाडपर्वको अवसरमा यो व्यवस्थामा अस्थायी संशोधन गरिएको छ।

आगामी २०८२ असोज १३ गतेदेखि २०८२ कात्तिक ११ गतेसम्म ग्राहकहरूले एक दिनमा आफ्नो वालेटमा ४० पटकसम्म रकम जम्मा गर्न सक्नेछन्।

राष्ट्र बैंकले चाडपर्वको बेला हुने भुक्तानीको चापलाई सहज बनाउन यो निर्णय लिएको हो।

यद्यपि, रकम जम्मा गर्ने संख्या बढे पनि यी सबै कारोबारहरूको कुल रकमको सीमा भने यथावत नै राखिएको छ। यस निर्णयले चाडपर्वको किनमेल र आर्थिक कारोबारलाई डिजिटल माध्यमबाट थप सहज बनाउने सहयोग पुग्ने देखिन्छ।

काठमाडौँ । राष्ट्रको शान्ति सुरक्षा र अमनचयन कायम राख्ने महत्वपूर्ण जिम्मेवारी बोकेको नेपाली प्रहरीमा नयाँ जनशक्तिको आवश्यकता पूर्ति गर्नका लागि विशाल भर्ना प्रक्रिया सुरु भएको छ । प्रहरी प्रधान कार्यालयले आज सूचना जारी गर्दै कुल १५९४ पदका लागि दरखास्त आह्वान गरेको हो । 

भर्नामा प्रहरी जवानतर्फ १५५३ पद छुट्याइएको छ, जसका लागि मान्यता प्राप्त शिक्षण संस्थाबाट कम्तीमा आठ कक्षा उत्तीर्ण गरेको हुनुपर्नेछ । यसका अतिरिक्त, प्रहरी कार्यालय सहयोगीका विभिन्न पदहरूमा पनि दरखास्त आह्वान गरिएको छ । जसमा हजामका लागि ११ जना, कुचीकारका लागि १५ जना र विभिन्न खेल विधाका खेलाडीका लागि १५ जनाको माग गरिएको छ । यी पदहरूका लागि साधारण लेखपढ गर्न जान्ने योग्यता तोकिएको छ ।

इच्छुक र योग्यता पुगेका नेपाली नागरिकहरूले यस अवसरको सदुपयोग गर्नका लागि असोज १९ गतेदेखि कात्तिक २८ गतेसम्मको अवधिमा तोकिएका दरखास्त केन्द्रहरूमा स्वयं उपस्थित भई आवेदन फाराम बुझाउन सक्नेछन् ।

 

   

काठमाडौं । गत भदौ २३ र २४ गते काठमाडौं लगायत मुलुकका विभिन्न भागमा भएका प्रदर्शनका क्रममा सुरक्षा निकायबाट हराएका हतियार तथा खरखजाना बुझाउन गृह मन्त्रालयले सर्वसाधारणलाई आग्रह गरेको छ । मन्त्रालयले एक सूचना जारी गर्दै ती हतियारहरु नजिकको सुरक्षा निकायमा फिर्ता गर्न अनुरोध गरेको हो ।

 

मन्त्रालयका अनुसार, प्रदर्शनका क्रममा विभिन्न स्थानमा सुरक्षाकर्मीबाट केही हातहतियार र खरखजाना हराएका थिए । यस सम्बन्धमा प्रहरीले त्यस्ता हातहतियार फेला पार्ने व्यक्तिहरूलाई आगामी असोज मसान्तसम्मको समय दिएको छ । सूचनामा भनिएको छ, ‘विभिन्न ठाउँमा रहेका सुरक्षा निकायबाट हराएको हातहतियार र खरखजाना कही कसैले फेला पारेको भए नजिकको सुरक्षा निकायमा फिर्ता गर्न आग्रह गरिन्छ ।’

मन्त्रालयले तोकिएको मितिभित्र (असोज मसान्तसम्म) हातहतियार र खरखजाना बुझाउन ल्याएमा वा त्यसको जानकारी दिएमा त्यस्ता व्यक्तिलाई उचित सम्मान गरिने प्रतिबद्धता व्यक्त गरेको छ । 

यद्यपि, मन्त्रालयले चेतावनी पनि दिएको छ । तोकिएको मितिपश्चात कोही कसैसँग ती हराएका हातहतियार र खरखजाना फेला परेमा कानुनबमोजिम कडा कारबाही हुने स्पष्ट पारेको छ ।

ताजा अपडेट

Login

कृपया ध्यान दिनुहोस्:

  • अब तपाइले कमेन्ट गर्नका लागि अनिवार्य रजिस्ट्रेसन गर्नुपर्ने छ ।
  • आफ्नो इमेल वा गुगल, फेसबुक र ट्वीटरमार्फत् पनि सजिलै लगइन गर्न सकिने छ ।
  • यदि वास्तविक नामबाट कमेन्ट गर्न चाहनुहुन्न भने डिस्प्ले नेममा सुविधाअनुसारको निकनेम र प्रोफाइल फोटो परिवर्तन गर्नुहोस् अनि ढुक्कले कमेन्ट गर्नहोस्, तपाइको वास्तविक पहिचान गोप्य राखिने छ ।
  • रजिस्ट्रेसनसँगै बन्ने प्रोफाइमा तपाइले गरेका कमेन्ट, रिप्लाई, लाइक/डिसलाइकको एकमुष्ठ बिबरण हेर्नुहोस् ।