नेपाली कांग्रेसको नयाँ नेतृत्व चयनका लागि भइरहेको मतदानमा साँझ ४:३० बजेसम्म प्राप्त विवरणअनुसार ४ हजार ५७५ मत खसेको छ।

मतदानका लागि यसअघि तोकिएको समय साँझ ५ बजेलाई बढाएर ७ बजेसम्म पुर्‍याइएको छ।

साँझ ४:३० बजेसम्मको विवरणअनुसार बागमती प्रदेशमा १ हजार ६३, मधेस प्रदेशमा ७९०, लुम्बिनी प्रदेशमा ७०० र गण्डकी प्रदेशमा ६५१ मत खसेको छ। त्यस्तै, कर्णाली र जनसम्पर्क समितिबाट ४९१ तथा सुदूरपश्चिम प्रदेशबाट ४५० मत खसेको छ।

कोशी प्रदेशको मतदान विवरण संशोधन गरी ४३० मत कायम गरिएको छ। सबै प्रदेश तथा समूहको विवरण जोड्दा कुल ४ हजार ५७५ मत खसेको छ।

गण्डकी प्रदेशमा कुल ७७६ मत खस्नुपर्नेमा ६५१ मत खसेको विवरण प्राप्त भएको छ।

मतदानको समय थपिएसँगै बाँकी प्रतिनिधिले पनि मतदान गर्न पाउने भएका छन्। कांग्रेसको नयाँ नेतृत्व चयनका लागि राष्ट्रिय सभागृहमा मतदान भइरहेको छ।

नेपाली कांग्रेसको १५औँ महाधिवेशनअन्तर्गत नयाँ केन्द्रीय कार्यसमिति चयनका लागि जारी मतदानको समय आज बेलुका ७ बजेसम्मका लागि थप गरिएको छ ।  

नेपाली कांग्रेस केन्द्रीय निर्वाचन समितिले एक सूचना जारी गर्दै मतदानको समय दुई घण्टा थप गरिएको जानकारी दिएको हो । 

यसअघि प्रकाशित निर्वाचन तालिका अनुसार बिहानदेखि सुरु भएको मतदानको समय दिउँसो ५ बजेसम्मका लागि निर्धारण गरिएको थियो । 

निर्वाचन समितिका सदस्य सचिव राजु कटुवालद्वारा जारी सूचना अनुसार मतदान प्रक्रियालाई सहज बनाउन र सम्पूर्ण प्रतिनिधिहरूलाई मताधिकार प्रयोग गर्ने अवसर सुनिश्चित गर्न समय बढाइएको जनाइएको छ । समितिले सम्पूर्ण केन्द्रीय महाधिवेशन प्रतिनिधि, मतदाता तथा सरोकारवालाहरूलाई संशोधित समय अनुसार मतदानमा सहभागी हुन अनुरोध गरेको छ ।

काठमाडौंको बूढानीलकण्ठमा घर भाडामा लिएर सुनको अवैध कारोबार गरिरहेको आरोपमा पक्राउ परेका तीन चिनियाँ नागरिकले योजनाबद्ध रूपमा आफ्नो गतिविधि अघि बढाएको प्रारम्भिक विवरणबाट खुलेको छ। उनीहरूले अमेरिका बस्ने एक व्यक्तिको घरलाई आफ्नो गतिविधिको केन्द्र बनाएका थिए। उक्त घरबाट प्रहरीले २१ किलोभन्दा बढी सुन र सुन प्रशोधनमा प्रयोग हुने विभिन्न उपकरण बरामद गरेको छ।

प्रहरी स्रोतका अनुसार चिनियाँ समूहले बूढानीलकण्ठमा विष्ट थर भएका व्यक्तिको घर गत साउनदेखि भाडामा लिएको थियो। घरको मासिक भाडा ३ लाख ३० हजार रुपैयाँ तय गरिएको थियो। समूहले घरधनीलाई चार महिनाको भाडा एकैपटक अग्रिम भुक्तानी गरेको खुलेको छ।

घर भाडामा लिएर सुनको अवैध कारोबार भइरहेको सूचना पाएपछि प्रहरीले बिहीबार छापा मारेको थियो। त्यसक्रममा तीन जना चिनियाँ नागरिक पक्राउ परेका हुन्। प्रहरीले उनीहरूको साथबाट करिब २१ किलो ७५०.६८ ग्राम सुन तथा विभिन्न मेसिन र उपकरण बरामद गरेको जनाएको छ।

प्रहरीको प्रारम्भिक जानकारीअनुसार समूहका एक सदस्य पहिले नेपाल आएका थिए। उनले यहाँको बजार र कारोबारको अवस्था बुझेर चीन फर्किएपछि समूहका अन्य दुई सदस्य नेपाल आएको प्रहरी स्रोतको भनाइ छ। यसले उनीहरू नेपालमा आएर कारोबार सुरु गर्नुअघि नै यहाँको अवस्था बुझ्ने प्रयास गरेको देखाउँछ।

नेपाल आएपछि पनि उनीहरू तीनदेखि चार पटकसम्म विमानस्थल हुँदै आवतजावत गरेको स्रोतले जनाएको छ। उनीहरूको पटकपटकको नेपाल आगमन, घर भाडामा लिएर सञ्चालन गरिएको गतिविधि र बरामद सुनको स्रोतबारे प्रहरीले अनुसन्धान अघि बढाएको छ।

काठमाडौं । नेपाली कांग्रेसको १५औँ महाधिवेशनमा महामन्त्री पदका उम्मेदवार डा. सुनिल कुमार शर्माले मतदान गरेका छन्। महामन्त्री पदका उम्मेदवार शर्माको मतपत्रमा क्रमसंख्या ८ रहेको छ।

शुक्रबार बिहान ७ बजेदेखि सुरु हुने भनिएको मतदान एक घण्टा ढिला गरी सुरु भएको हो।

खुलामञ्चमा ६ प्रदेश र विदेशस्थित नेपाली जनसम्पर्क समितिबाट निर्वाचित महाधिवेशन प्रतिनिधिहरूले मतदान गरिरहेका छन्। बागमती प्रदेशका प्रतिनिधिहरूले भने प्रदर्शनी मार्गस्थित राष्ट्रिय सभा गृहमा मतदान गरिरहेका छन्।

नयाँ नेतृत्व चयनका लागि भइरहेको मतदानमा महाधिवेशन प्रतिनिधिहरू सहभागी भइरहेका छन्।

सशस्त्र प्रहरी बलका अतिरिक्त प्रहरी महानिरीक्षक (एआईजी) वंशीराज दाहाललाई पदबाट बर्खास्त गर्न छानबिन समितिले गृह मन्त्रालयसमक्ष सिफारिस गरेको छ ।

सुरक्षासँग सम्बन्धित संवेदनशील सूचना चुहाएको आरोपमा निलम्बनमा परेका दाहाललाई सेवाबाटै हटाउन समितिले सुझाव दिएको हो ।

गृह मन्त्रालय स्रोतका अनुसार समितिले बिहीबार आफ्नो प्रतिवेदन बुझाउँदै दाहाललाई बर्खास्त गर्न सिफारिस गरेको हो । अब प्रतिवेदनका आधारमा गृहमन्त्री सुधन गुरुङले बर्खास्तीसम्बन्धी निर्णय लिन सक्नेछन् ।

दाहालमाथि लागेको आरोपबारे छानबिन गर्न गृह मन्त्रालयले गत सोमबार समिति गठन गरेको थियो । मन्त्रालयले उनलाई निलम्बन गर्दै तीन दिनभित्र अनुसन्धान पूरा गरी प्रतिवेदन पेस गर्न छानबिन अधिकृत तोकेको थियो ।

सशस्त्र प्रहरी बल, नेपालबाट दाहालले सुरक्षासँग सम्बन्धित संवेदनशील सूचना चुहाएर पदीय आचरणविपरीत कार्य गरेको भन्दै कारबाहीका लागि मन्त्रालयमा सिफारिस आएपछि छानबिन प्रक्रिया अघि बढाइएको थियो ।

गृह मन्त्रालयले छानबिन समिति गठन गर्ने क्रममा सार्वजनिक गरेको सूचनामा सुरक्षासँग सम्बन्धित गोप्य सूचनाको संरक्षण तथा गोपनीयता कायम गर्नु प्रत्येक सशस्त्र प्रहरी कर्मचारीको कानुनी दायित्व भएको उल्लेख गरेको थियो ।

मन्त्रालयका प्रवक्ता आनन्द काफ्लेद्वारा जारी विज्ञप्तिमा कर्मचारीबाट हुने पदीय आचरणविपरीतका गतिविधि, संवेदनशील गोप्य सूचनाको चुहावट तथा शान्ति सुरक्षामा प्रतिकूल असर पार्ने गतिविधिमाथि मन्त्रालयले सूक्ष्म निगरानी र विश्लेषण गरिरहेको जनाइएको थियो ।

विज्ञप्तिमा कानुनविपरीतका गतिविधि वा घटनामा संलग्न जोसुकैलाई पनि प्रचलित कानुनबमोजिम कारबाही गरिने स्पष्ट पारिएको थियो ।

नेपाली कांग्रेसको नयाँ नेतृत्व चयनका लागि भइरहेको मतदानमा दुई घण्टामा १ हजार २९३ मत खसेको छ।

बिहान ८:३० बजेदेखि १०:३० बजेसम्मको विवरणअनुसार विभिन्न प्रदेशबाट उक्त संख्यामा मत खसेको हो।

मतदानको विवरणअनुसार कोशी प्रदेशबाट २२२, सुदूरपश्चिम र कर्णालीबाट २५७, लुम्बिनीबाट २०२, गण्डकीबाट १८८ र बागमती प्रदेशबाट २१७ मत खसेको छ।

मतदान प्रक्रिया निर्वाध रूपमा चलिरहेको छ। नेपाली कांग्रेसको नयाँ नेतृत्व चयनका लागि भइरहेको मतदानमा सभापतिसहित केन्द्रीय कार्यसमितिका पदाधिकारी तथा सदस्य चयन गर्न महाधिवेशन प्रतिनिधिहरूले मतदान गरिरहेका छन्।

पोखरा महानगरपालिका–२८ कालिकामा आज बिहान भएको स्कुल बस दुर्घटनामा पाँच जनाको मृत्यु भएको छ भने अन्य १४ जना घाइते भएका छन् ।

कास्की जिल्ला प्रहरी कार्यालयका प्रहरी उपरीक्षक नवीन कार्कीका अनुसार तीन जना बालिका, एक बालक र एक स्थानीयको मृत्यु भएको हो । मृतकको सनाखत हुन बाँकी छ । हाल पोखरा स्वास्थ्य विज्ञान प्रतिष्ठानमा १४ जनाको उपचार जारी छ । दुर्घटनाग्रस्त बसमा १७ जना बालबालिका र एक स्थानीय सवार थिए ।

 नेपाली कांग्रेसको १५औं महाधिवेशनमा आज मतदान सुरु भएको छ । 

तराई–मधेस हलमा झापाका ७७ वर्षीय महाधिवेशन प्रतिनिधि सुधीर शिवाकोटीले पहिलो मतदान गरेका छन । 

दशैं मनाउन घर जाने यात्रुलाई लक्षित गर्दै सरकारले आजदेखि सार्वजनिक यातायातको अग्रिम टिकट बुकिङ खुला गरेको छ।

टिकट बुकिङ खुल्ने अघिल्लो रातिदेखि नै काठमाडौंको नयाँ बसपार्कमा यात्रुको भीड लागेको छ।

यात्रुको चाप व्यवस्थापन गर्न लोत्से बहुउद्देश्यीय प्रालिले नयाँ बसपार्क क्षेत्रमा १५ वटा टिकट काउन्टर थप गरेको छ। यात्रुलाई सहज रूपमा टिकट उपलब्ध गराउन आवश्यक सुरक्षा प्रबन्धसमेत मिलाइएको कम्पनीले जनाएको छ।

यातायात व्यवस्था विभाग, नेपाल प्रहरी, यातायात व्यवसायी तथा मजदुर प्रतिनिधिबीच असोज २० गते विभागमा बसेको बैठकले असोज २३ गतेदेखि दशैंका लागि अग्रिम टिकट बुकिङ खुला गर्ने निर्णय गरेको थियो।

नेपाली कांग्रेसको १५औँ महाधिवेशनअन्तर्गत नयाँ केन्द्रीय कार्यसमिति चयनका लागि आज (शुक्रबार) मतदान हुँदैछ।

बिहीबारका लागि तय गरिएको मतदान आवश्यक तयारी पूरा हुन नसकेको र अन्य व्यवस्थापकीय कठिनाइका कारण एक दिन पछि सारिएको हो।

आज बिहान ७ बजेदेखि मतदान प्रक्रिया सुरु हुनेछ।

बिहीबार बिहान १० बजेदेखि सुरु गर्ने भनिएको मतदान पटकपटक सारिए पनि हुन सकेको थिएन। मतदानको समय अनिश्चित भएपछि निर्वाचन समितिले शुक्रबार बिहानका लागि नयाँ समय निर्धारण गरेको हो।

आज हुने मतदानबाट कांग्रेसको आगामी नेतृत्वसहित नयाँ केन्द्रीय कार्यसमिति चयन हुनेछ।