आज अप्रिल १ अर्थात् ‘अप्रिल फुल’ । कसैलाई झुक्याउँदा वा मूर्ख बनाउँदा नराम्रो नमानिने दिन।
आजका दिन धेरैले एकअर्कालाई झुक्याउँछन् र जिस्क्याउँछन् । अन्य दिन जसरी मजाक गर्ने वा झुक्याउने व्यक्तिसँग आज कोही रिसाउँदैन । यही नै यो दिनको विशेषता हो ।
अरुले त आज अप्रिल फुल मनाउँछन् नै। प्रहरीले पनि मनाएको छ। नेपाल प्रहरीले आफ्नो आधिकारिक फेसबुक पेजमा क्युआर कोडसहित आज एउटा पोष्ट राखेको छ। पोष्टमा भनिएको छ- तपाईं विरुद्ध कतै कुनै उजुरी परेको त छैन ? सुनिश्चित गर्नको लागि एकपटक क्युआर कोड स्क्यान गर्नुहोस्।
आफूविरुद्ध कसैले उजुरी हालेको पो छ कि भनेर सबैलाई जिज्ञासा हुनु स्वाभाविक हो। त्यसैले मानिसहरुले धमाधम क्युआर कोड स्क्यान गरिरहेका छन् ।
स्क्यान गर्दा बल्ल थाहा हुन्छ- प्रहरीले त अप्रिल फुल पो मनाएको रहेछ । स्क्यान गरेपछि यस्तो म्यासेज आउँछ-
APRIL FOOL
तपाईंले स्क्यान गर्नुभएको क्युआर कोड सचेतना अभियानको लागि हो। आज हामीले मजाक गरेका थियौं तर भोलि यस्तै क्युआरबाट तपाईं स्क्याममा पनि पर्न सक्नुहुन्छ।
याद गर्नुस्
– आफूले नचिनेको व्यक्ति वा अज्ञात स्रोतबाट प्राप्त भएको क्युआर कोड स्क्यान नगर्नुस्
– आफूसँगै आफ्नो परिवारका सदस्यहरुलाई पनि सम्झाउनुस्
– स्क्यान गर्नुअघि सधैं भेरिफाइ गर्नुस्
– सुरक्षित रहनुस्
आज विश्व मूर्ख दिवस मनाइँदै छ । आज अप्रिल १ तारिख अर्थात ‘विश्व मूर्ख दिवस’ नेपालसहित विश्वभर अरूलाई मुर्ख बनाएर मनाइँदै छ ।
आज नेपालमा मात्र नभइ संसारभरका मानिसहरूले अरुलाई फूल अर्थात् ‘मूर्ख’ बनाउने गर्दछन् । ‘विश्व मूर्ख दिवस’ प्रत्येक वर्ष १ अप्रिल (चैत्र १९) मा मनाइने गरिन्छ ।
पहिले यो दिवस फ्रान्स र अन्य युरोपेली देशहरूमा मनाइने गरिए पनि बिस्तारै अन्य देशहरूले पनि यो दिवस मनाउन थालेका हुन् । यो दिन एकअर्कासँग रमाइलो गरेर मनाइन्छ ।
काठमाडौं । आजदेखि सपना प्रधान मल्ल सर्वोच्च अदालतकाे कायम मुकायम (कामु) प्रधानन्यायाधीश भएकी छन् ।
प्रधानन्यायाधीश प्रकाशमानसिंह राउत ६५ वर्षे उमेर हदले मंगलबार अवकाश भएपछि वरिष्ठ अधिवक्ता एवं पहिलो संविधानसभा सदस्य मल्लले कामु प्रधानन्यायाधीशको जिम्मेवारी सम्हालेकी हुन् ।
नेपालको संविधानको धारा १२९(९) मा प्रधानन्यायाधीशको पद रिक्त भएमा सर्वोच्च अदालतको वरिष्ठतम न्यायाधीशले कायममुकायम प्रधानन्यायाधीशको जिम्मेवारी सम्हाल्ने उल्लेख छ । प्रधानन्यायाधीश अवकाश भएपछि वरिष्ठतम न्यायाधीश स्वतस् कामु प्रधानन्यायाधीश हुने व्यवस्था छ ।
मल्ल १७ साउन २०७३ मा सर्वोच्च अदालतको न्यायाधीश भएकी थिइन् । उनले सर्वोच्च अदालतमा करिब एक दशक कार्यरत रहँदा लैंगिक न्याय, लैंगिक एवं घरेलु हिंसा एवं संवैधानिक मामिला जोडिएका कैयौँ मुद्दामा दूरगामी असर पार्ने नजिर प्रतिपादन गरेकी छन् ।
काठमाडौं । मध्यपूर्वमा जारी द्वन्द्वका कारण अन्तर्राष्ट्रिय बजारमा पेट्रोलियम पदार्थको मूल्य निरन्तर बढिरहेको छ ।
नयाँ मूल्यअनुसार पेट्रोलमा प्रतिलिटर ४१ रुपैयाँ र डिजेलमा प्रतिलिटर ९४ रुपैयाँ सम्म मूल्य बढेको छ ।
केही दिनअघि मात्र पेट्रोल र डिजेलमा न्यूनतम मूल्य समायोजन गरिएकाले उपभोक्तालाई थप आर्थिक भार नपरो भन्ने उद्देश्यले यी प्रमुख इन्धनहरूको खुद्रा मूल्य यथावत राखिएको निगमले जनाएको छ ।
काठमाडौंका पूर्वप्रमुख जिल्ला अधिकारी छवि रिजाल हाजिरी जमानीमा रिहा भएका छन् ।
अपराध अनुसन्धान कार्यालयको टोलीले रिजाललाई मंगलबार बिहान सुविधानगरबाट पक्राउ गरेको थियो । जेन–जी घटनासम्बन्धी जाँचबुझ आयोगको सिफारिसका आधारमा उनलाई प्रहरीले पक्राउ गरेको हो ।
गत २३ र २४ भदौमा ठूलो मानवीय क्षति हुने गरी भएको विद्रोहका बेला रिजाल जिल्ला प्रशासन कार्यालय काठमाडौंको नेतृत्वमा थिए ।
रिजाललाई बोलाएको समयमा उपस्थित हुनेगरी रिहा गर्ने निर्णय गरिएको जिल्ला प्रहरी परिसरले जनाएको छ ।
काठमाडौँ । सम्पत्ति शुद्धीकरणसम्बन्धी कसुरमा विस्तृत अनुसन्धान तीव्र बनेसँगै विवादास्पद व्यापारी दीपक भट्टलाई अध्यागमन विभागले कालोसूचीमा राखेको छ ।
सम्पत्ति शुद्धीकरण अनुसन्धान विभागको पत्रका आधारमा भट्टलाई सोमबार कालोसूचीमा राखिएको हो । सम्बन्धित अधिकारीहरूका अनुसार उनी भाग्ने सम्भावना देखिएकाले उक्त निर्णय गरिएको हो। अब भट्टले विदेश यात्रा गर्नुअघि सरकारको स्वीकृति लिनुपर्नेछ ।
अध्यागमनको कालोसूचीमा परेसँगै भट्टको विदेश यात्रा स्वतः रोकिएको छ । यस्तो सूचीमा परेका व्यक्तिहरूले सम्बन्धित निकाय वा नेपाल सरकारको पूर्व अनुमति बिना देश बाहिर जान पाउँदैनन् ।
भट्ट इन्फिनिटी होल्डिङ्सका प्रमुख हुन् । उनीमाथि सत्ता–शक्तिमा रहेका राजनीतिक दलका नेता तथा सार्वजनिक पदाधिकारीसँग निकट सम्बन्ध बनाएर सार्वजनिक खरिद, जलविद्युत् आयोजना, बैंक तथा बिमा कम्पनीका लाइसेन्स र कर नीतिमा प्रभाव पार्ने प्रयास गरेको आरोप लाग्दै आएको छ ।
२०७९ मंसिरदेखि नै उनी सम्पत्ति शुद्धीकरण अनुसन्धान विभागको छानबिनमा परेका थिए । त्यसक्रममा २०७९ पुसमा प्रारम्भिक बयान समेत लिइएको थियो । तर त्यसबेला अनुसन्धान दबाइएको आरोप लाग्दै आएको थियो । पछिल्लो राजनीतिक परिवर्तनसँगै उक्त फाइल पुनः सक्रिय बनाइएको स्रोतले जनाएको छ ।
नेपाल राष्ट्र बैंकको वित्तीय जानकारी इकाई (एफआईयू)ले २०७९ मै भट्टसँग सम्बन्धित शंकास्पद आर्थिक कारोबारबारे विवरण पठाएको थियो । विवरणअनुसार उनको खातामा अर्बौँ रुपैयाँ बराबरको असामान्य कारोबार भएको देखिएको छ, जसले थप अनुसन्धान आवश्यक भएको संकेत गरेको थियो ।
भट्ट र उनी आबद्ध कम्पनी इन्फिनिटी होल्डिङ्समाथि सुरक्षा निकायका लागि हतियार खरिद, जलविद्युत् आयोजना, कर छुट तथा वित्तीय नीतिमा प्रभाव पार्ने लगायतका विभिन्न विवादित प्रकरणमा संलग्न रहेको आरोप पनि लाग्दै आएको छ ।
नेकपा एमालेले पार्टी अध्यक्ष केपी शर्मा ओली पक्राउको विरोधमा देशव्यापी आन्दोलन कार्यक्रम गर्ने घोषणा गरेको छ ।
मंगलबार पार्टी कार्यालय च्यासलमा बसेको सचिवालय बैठकले अध्यक्ष ओली पक्राउको विरोधमा देशव्यापी आन्दोलन कार्यक्रम गर्ने निर्णय गरेको महासचिव शंकर पोखरेलले जानकारी दिए ।
उनको अनुसार चैत २५ गतेसम्म जिल्ला तहमा आन्दोलनकेन्द्रित बृहत भेला गर्ने, चैत २८ गते सबै पालिकामा विरोध प्रदर्शन गर्ने, वैशाख ३ गते वडा तहमा भेला गर्ने, वैशाख ७ गते प्रदेश राजधानीहरूमा प्रदर्शन गर्ने र वैशाख १२ गते राजधानीमा विशाल विरोध प्रदर्शन गर्ने कार्यक्रम तय भएको छ ।
सरकारद्वारा विद्यार्थी तथा पेशागत संगठनहरूसम्बन्धी गरिएका गतिविधिहरूका विषयसमेत समेटेर सबै जनसंगठनहरूले आ–आफ्नो ढंगले आन्दोलनका कार्यक्रम सञ्चालन गर्दै पार्टीद्वारा घोषित आन्दोलनलाई प्रभावकारी बनाउन सहयोग गर्ने पनि निर्णय भएको छ ।
साथै बैठकले नेकपा एमालेले संसदभित्र अन्य दलसँग सहकार्यका लागि उपाध्यक्ष रामबहादुर थापा र सचिव पद्मा अर्याललाई जिम्मेवारी तोक्ने निर्णय गरेको छ ।
काठमाडौं । प्रधानमन्त्री बालेन शाहले प्रदेशगत रुपमा प्रत्यक्ष निर्वाचित सांसदहरूसँग छलफल गरिरहेका छन् । सोमबार कोशी र कर्णालीका सांसदसँग छलफल गरेका प्रधानमन्त्रीले आज सुदूरपश्चिमका सांसदहरूसँग छलफल गरे ।
एमाले सांसद ऐनबहादुर महरसहित एमाले सांसदहरूले आफ्ना पार्टीका अध्यक्ष केपी शर्मा ओलीको रिहाइको माग गरेका थिए । तर, प्रधानमन्त्रीले कुनै प्रतिक्रिया नै नदिएको एक सांसदले जानकारी दिए ।
एमालेका सांसद महरले कर्मचारीतन्त्रका कारण सबै खत्तम भएको भन्दै यसमा सुधार गर्न प्रधानमन्त्रीलाई आग्रह गरेका थिए । त्यसमा बालेनको जवाफ थियो, ‘यसको जड नै तपाईंहरु हो । कांग्रेस र एमालेले नै यसबाट सुरु गर्नुस् ।’
त्यसबाहेक गेटा अस्पताल निर्माणको विषय उठाउँदा प्रधानमन्त्रीले आफू यसको विकासका लागि तयार रहेको बताएका थिए ।
बालेनले भने, ‘गेटाको विषयमा अहिले हस्ताक्षर गर्नुपरे पनि तयार छु । कहिले गरौँ ?’
सांसदहरूले सेती लोकमार्गको विषयमा पनि चासो राखेका थिए । उनीहरूले कैलाली-खक्रौला नाकादेखी चीनको सिमाना ताक्लाकोटसम्मको बाटो निर्माणको काम अघि बढाउन सुझाव दिएका छन् ।
यसबारे प्रधानमन्त्रीले चासो राखेको ती सांसदले जानकारी दिए ।
राष्ट्रिय स्वतन्त्र पार्टीका सभापति रवि लामिछाने राजनीतिक भेटघाटमा सक्रिय भएका छन् ।
बालेन्द्रसँगको सहमतिअनुसार पार्टीको कमान्ड सम्हालेका रविले मंगलबार मधेशवादी दुई नेतालाई भेटेका छन् ।
गत फागुन २१ गतेको चुनावमा ठूला दलसँगै मधेशवादीले पनि नराम्रो धक्का व्यहोरेका थिए । प्रतिनिधि सभामा एक सिट पनि जित्न नसकेका मधेशसवादी गुमनाम भएको अवस्थामा रविले मंगलबार दुई नेतासँग भेटे।
उनले मंगलबार राष्ट्रिय सभा सदस्य तथा जनता समाजवादी पार्टी नेपालका संरक्षक महन्थ ठाकुरसँग भेटवार्ता गरे ।
रविले बूढानीलकण्ठस्थित आफ्नो निवासमै बोलाएर ठाकुरसँग संवाद गरेका हुन् । त्यस भेटका क्रममा देशको वर्तमान राजनीति, मधेशको विकास र प्राथमिकता दिनुपर्ने योजनालगायत विषयमा कुराकानी भएको रविको सचिवालयले जनाएको छ ।
भेटका क्रममा फागुन २१ गते मिलेको पछिल्लो जनादेशअनुसार समग्र विकासका निम्ति सहकार्य गरेर अघि बढ्ने कुरामा दुवै नेता एकमत भएको दाबी उनको सचिवालयले गरेको छ।
रविले मंगलबार नै फागुन २१ को चुनावमा नराम्रोसँग पराजित भएको अर्को दल आमजनता पार्टीका अध्यक्ष प्रभु साहसँग पनि संवाद गरेका छन् ।
साहलाई पनि रवीले बूढानीलकण्ठस्थित निजी निवासमै बोलाएर संवाद गरेका हुन् ।
उक्त भेटका क्रममा सभापति लामिछानेले मधेशलाई सरकारले प्राथमिकतामा राखेर काम गर्ने जानकारी गराएको उनको सचिवालयले जनाएको छ।
रविले देश र अझ विशेषगरी मधेशले परिवर्तन चाहेको जनमतबाट स्पष्ट देखिएकाले यसलाई आत्मसात गरि पारस्परिक सहयोगमार्फत् अघि बढ्नुपर्नेमा जोड दिएको बताइएको छ।
भेटका क्रममा अध्यक्ष साहले रास्वपा र सभापति लामिछानेलाई फागुन २१ को चुनावमा निकालेको ऐतिहासिक जितका लागि बधाई पनि दिएका छन् ।
काठमाडौं । ऊर्जा, जलस्रोत तथा सिँचाइ मन्त्रालयले आज (मंगलबार)देखि प्लास्टिकजन्य सामग्रीको प्रयोग पूर्ण रूपमा प्रतिबन्ध गर्ने निर्णय कार्यान्वयनमा ल्याएको छ ।
वातावरण संरक्षण, स्वच्छता प्रवद्र्धन तथा दिगो विकासप्रतिको प्रतिबद्धतालाई व्यवहारमा उतार्ने उद्देश्यले मन्त्रालयले प्लास्टिकजन्य सामग्रीको प्रयोग पूर्ण रूपमा प्रतिबन्ध लगाएको हो ।
प्लास्टिकजन्य वस्तुको अत्यधिक प्रयोगका कारण वातावरणमा परेको नकारात्मक असरलाई न्यूनीकरण गर्दै वैकल्पिक तथा वातावरणमैत्री सामग्रीको प्रयोगलाई प्रोत्साहन गर्ने नीतिअनुरूप यो निर्णय गरिएको जनाइएको छ ।
उक्त निर्णयलाई सफल बनाउन मन्त्रालयले सम्बन्धित सबै निकाय र कर्मचारीलाई निर्देशित गरिसकेको छ ।
