नेपाली कांग्रेसका नेता डा. सुनिल शर्माले महामन्त्री पदमा उम्मेदवारी दर्ता गराएका छन् ।
नेपाली कांगसको १५औँ महाधिवेशनअन्तर्गत मंगलबार उनले काठमाडौंको राष्ट्रिय सभागृहस्थित मनोनयन दर्ता स्थल पुगेर महामन्त्री पदमा उम्मेदवारी दर्ता गराएका हुन्।
डा.शर्माले कांग्रेस महामन्त्रीका लागि उम्मेदवारी दर्ता गराएका हुन्।
नेपाली कांग्रेसको १५औँ महाधिवेशन अन्तर्गत नयाँ नेतृत्व चयनका लागि उम्मेदवारी दर्ता शुरू भएसँगै निर्वाचन समितिले उम्मेदवारी रुजुका लागि आवश्यक कागजात र प्रक्रिया स्पष्ट गरेको छ।
उम्मेदवारी दर्ता गर्न इच्छुक उम्मेदवारले आफूले उम्मेदवारी दिन चाहेको पदअनुसारको उम्मेदवारी फारम पूर्ण रूपमा भरेर बुझाउनुपर्नेछ। फारममा सम्बन्धित पदका लागि तोकिएका महाधिवेशन प्रतिनिधिमध्येबाट प्रस्तावक र समर्थक राख्नुपर्ने व्यवस्था गरिएको छ। उम्मेदवार आफैँ भने आफू उम्मेदवार भएको पदका लागि प्रस्तावक वा समर्थक बन्न पाउने छैनन् ।
उम्मेदवारी दर्ताका क्रममा सम्बन्धित पदका लागि तोकिएको शुल्क बुझाएको बैंक भौचर वा रसिदसमेत अनिवार्य रूपमा संलग्न गर्नुपर्नेछ। बैंक भौचरमा उम्मेदवारको नाम स्पष्ट रूपमा खुलेको हुनुपर्ने निर्वाचन समितिले जनाएको छ।
त्यस्तै उम्मेदवारले आफू महाधिवेशन प्रतिनिधिमा निर्वाचित भएको प्रमाणपत्र र नेपाल सरकारले जारी गरेको आधिकारिक परिचयपत्रको प्रतिलिपि पनि साथमा राख्नुपर्नेछ। समावेशी क्लस्टरबाट उम्मेदवारी दिने उम्मेदवारले आफू सम्बन्धित क्लस्टरमा पर्ने प्रमाणित गर्ने प्रमाणपत्रको प्रतिलिपिसमेत पेश गर्नुपर्नेछ।
उम्मेदवारी रुजुका क्रममा उम्मेदवारको क्रियाशील सदस्यताको निरन्तरतासम्बन्धी सिफारिससमेत आवश्यक पर्नेछ। क्रियाशील सदस्यताको निरन्तरता प्रमाणित गर्ने सम्बन्धित सिफारिस उम्मेदवारी फारमसँगै बुझाउनुपर्ने व्यवस्था गरिएको छ।
निर्वाचन समितिले उम्मेदवारी दर्ताका क्रममा फारम, प्रस्तावक–समर्थक, शुल्कको भौचर, महाधिवेशन प्रतिनिधि प्रमाणपत्र, आधिकारिक परिचयपत्र, क्लस्टर प्रमाणपत्र र क्रियाशील सदस्यताको निरन्तरता सिफारिसलगायत सबै कागजात पूरा भए–नभएको रुजु गर्नेछ ।
यसअनुसार कांग्रेसको केन्द्रीय नेतृत्वमा उम्मेदवारी दिन चाहनेहरूले फारमदेखि आवश्यक प्रमाणपत्र र शुल्कको भौचरसम्म सबै कागजात पूरा गरेर मात्रै उम्मेदवारी दर्ता गर्नुपर्नेछ ।
काठमाडौंमा जारी नेपाली कांग्रेसको १५औं महाधिवेशनमा केन्द्रीय सदस्य पदमा उम्मेदवारी दिएका नवराज त्रिपाठीले मत माग्नका लागि रोबोटको प्रयोग गरेका छन् ।
नेविसंघबाट पार्टी राजनीतिमा सक्रिय रहँदै आएका त्रिपाठीले टेक्नोलोजीको प्रयोग गरेर चुनावी अभियान चलाएका हुन् । इन्जिनियर समेत रहेका त्रिपाठीले मंगलबार विहान प्रदर्शनीमार्ग क्षेत्रमा रोबोटको प्रयोग गरेका थिए ।,
उनले कांग्रेसको प्राकृतिक स्रोत विभाग सदस्य सचिव र निर्वाचन ब्युरो सदस्यका रूपमा पनि काम गरेका थिए। सभापति गगन थापा निकट रहेर काम गर्दै आइरहेका उनी सामाजिक अभियानमा पनि सक्रिय छन् ।
नेपाली कांग्रेसको १५औँ महाधिवेशनअन्तर्गत केन्द्रीय कार्यसमिति चयनको प्रक्रिया जारी छ । हाल उम्मेदवारी मनोनयन दर्ता भइरहेको छ ।
राष्ट्रिय सभागृहमा उम्मेदवारी मनोनयनपत्र दर्ताका क्रममा निर्वाचन समितिका संयोजक प्रेमबहादुर खड्काले मंगलबार बिहान १० बजेदेखि दिउँसो १ बजेसम्म उम्मेदवारीका लागि दरखास्त फारम वितरण गरिने बताए ।
दिउँसो १ बजेपछि उम्मेदवारी दर्ता प्रक्रिया सुरु हुने जानकारी दिए । उनले दर्ता भएका उम्मेदवारहरूको नामावली प्रकाशन गरिने बताए । उनले प्रकाशित नामावलीमाथि तोकिएको प्रक्रियाअनुसार दाबी–विरोध गर्न समय दिइने बताए ।
उनले भने, ‘कांग्रेसको १५औँ महाधिवेशनमा १० देखि १ बजेसम्म दरखास्त फारम वितरण गर्ने समय राखेका छौँ । १ बजेपछि दर्ता हुन्छ । त्यसपछि दर्ता भएको नामावली प्रकाशित गछौँ । नामावली अनुसार दाबी—विरोध गर्ने मौका दिएको र त्यसको निर्णय गरिसकेपछि बुधवार विहान अन्तिम नामावली प्रकाशित गर्छौं । त्यसपछि बुधबार दिनभर चुनाव गर्नेछौं ।’
अन्तिम नामावली प्रकाशन भएसँगै भोलि नै नेपाली कांग्रेसको केन्द्रीय कार्यसमितिका लागि निर्वाचन सम्पन्न गर्ने तयारी रहेको उनले जानकारी दिए ।
गृहमन्त्री सुदन गुरुङले गृह मन्त्रालय र मातहतका निकायमा रहेका पदाधिकारी तथा कर्मचारीले पदीय हैसियत भुलेर गोप्य तथा संवेदनशील सूचना अनाधिकृत व्यक्ति वा निकायलाई चुहाउने प्रवृत्तिबारे आफूले लामो समयदेखि निगरानी गरिरहेको बताएका छन् ।
मंगलबार सामाजिक सञ्जाल फेसबुकमार्फत गृहमन्त्री गुरुङले राज्यका संवेदनशील सूचना कसैको निजी सम्पत्ति नभई सार्वजनिक जिम्मेवारी भएको बताए ।
पदले सूचनामा पहुँच दिने भएपनि त्यसको दुरुपयोग गर्ने अधिकार नदिने गुरुङले उल्लेख गरे । गृह मन्त्रालय तथा मातहतका निकायबाट प्राप्त हुने सानोभन्दा सानो सूचना, सुराक वा गुप्त जानकारीले समेत अपराध रोक्न, अनुसन्धान अघि बढाउन तथा भविष्यमा हुने गम्भीर घटनाको सत्यतथ्य स्थापित गर्न निर्णायक भूमिका खेल्ने उनले बताए ।
गुरुङले राज्यले सुम्पिएको गोपनीयतामाथि जानाजान विश्वासघात गर्ने जोसुकै भए पनि उन्मुक्ति नपाउने चेतावनी दिएका छन् ।
उनले लेखेका छन्, ‘गृह मन्त्रालय र मातहतका निकायमा जिम्मेवारीमा रहेका कुनै पनि पदाधिकारी वा कर्मचारीले आफ्नो पदीय हैसियत भुलेर गोप्य वा संवेदनशील सूचना अनधिकृत व्यक्ति वा निकायलाई चुहाउने प्रवृत्ति लामो समयदेखि नियालिरहेको छु । राज्यको संवेदनशील सूचना कसैको निजी सम्पत्ति होइन, सार्वजनिक जिम्मेवारी हो । पदले सूचनामा पहुँच दिन्छ, तर दुरुपयोग गर्ने अधिकार दिँदैन । यहाँ प्राप्त हुने सानोभन्दा सानो सूचना, सुराक वा गुप्त जानकारीले समेत अपराध रोक्न, अनुसन्धान अघि बढाउन वा भविष्यमा कुनै गम्भीर घटनाको सत्यतथ्य स्थापित गर्न निर्णायक भूमिका खेल्छ।राज्यले सुम्पिएको गोपनीयतामाथि जानाजान आफ्नो देश र सङ्गठनमाथि विश्वासघात गर्ने जोसुकै होस्, कुनै उन्मुक्ति पाउने छैन, कानुनको कठघरामा ल्याइनेछ।’
कांग्रेसको १५औं महाधिवेशनको आज (मंगलबार) तेस्रो दिन पनि जारी रहेको छ । आज केन्द्रीय कार्यसमितिका विभिन्न पदका लागि निर्वाचन हुने भएको हो ।
आज उम्मेदवारी मनोनयनपत्र दर्ताका लागि बिहान १० देखि दिउँसो ३ बजेसम्मको समय तोकिएको छ ।
दिउँसो ४ः३० बजे उम्मेदवारहरूको प्रथम नामावली प्रकाशन, ४ः३० देखि ५ः३० बजेसम्म दाबी विरोध, ५ः३० देखि ६ः३० बजेसम्म जाँचबुझ गरी बेलुका ७ बजे दोस्रो नामावली प्रकाशन गरिनेछ ।
नेपाली कांग्रेसको १५ औँ महाधिवेशन नजिकिँदै गर्दा पार्टीभित्र नयाँ नेतृत्व, सांगठनिक पुनर्संरचना र पुस्तान्तरणबारे तीव्र बहस सुरु भएको छ ।
यसैबीच, नेपाल विद्यार्थी संघका पूर्वकेन्द्रीय अध्यक्ष एवं कांग्रेसका केन्द्रीय कार्यसमिति सदस्य नैनसिंह महरले महामन्त्री पदमा आफ्नो सशक्त उम्मेदवारी रहने घोषणा गर्दै अभियान तीव्र पारेका छन् ।
प्रतिनिधिसभा एवं प्रदेशसभा क्षेत्रीय अधिवेशन गृह जिल्ला डडेल्धुरा कांग्रेसले महरलाई सर्वसम्मत रूपमा महामन्त्रीको उम्मेदवारका रूपमा अघि बढाउने निर्णय गरेपछि उनको उम्मेदवारीले औपचारिक र मजबुत राजनीतिक आधार पाएको छ ।
सुदूरपश्चिमको विकटताबाट सुरु भएको राजनीतिक यात्रा २०३१ साल साउन १४ गते डडेल्धुराको भागेश्वर गाउँपालिका–३ लामिकान्डेमा जन्मिएका महरले २०४६ सालको प्रजातान्त्रिक आन्दोलनबाट राजनीतिक यात्रा सुरु गरेका थिए ।
सुदूरपश्चिमको ग्रामीण र विकट परिवेशबाट उठेर विद्यार्थी हकहित र प्रजातन्त्रका लागि भएका हरेक आन्दोलनमा उनी अग्रपंक्तिमा रहे ।
स्ववियु राजनीति हुँदै नेविसंघको सांगठनिक तह चढेका महर २०७३ सालको ११ औँ महाधिवेशनबाट नेविसंघको केन्द्रीय अध्यक्षमा निर्वाचित भएका थिए । २०७३ सालदेखि २०७५ सम्म उनको नेतृत्वमा नेविसंघले क्याम्पसहरूमा डिजिटल शिक्षा, निःशुल्क वाई–फाई, निजी शिक्षण संस्थाको मनपरी शुल्क वृद्धि नियन्त्रण र त्रिविको शैक्षिक क्यालेन्डर नियमित बनाउने जस्ता महत्त्वपूर्ण सुधारका मुद्दाहरूमा देशव्यापी दबाब सिर्जना गरेको थियो ।
नेविसंघको सफल नेतृत्वपछि नेपाली कांग्रेसको १४ औँ महाधिवेशनबाट उनी खुलातर्फ भारी मतका साथ केन्द्रीय सदस्य बने । पार्टीमा उनले केन्द्रीय शिक्षा विभाग प्रमुखको जिम्मेवारी समेत सम्हालिसकेका छन् ।
राजनीतिक सक्रियताका बीच पनि महरले आफ्नो अध्ययनलाई निरन्तरता दिँदै पार्टीभित्र प्राज्ञिक र वैचारिक नेताको छवि बनाएका छन् ।
त्रिभुवन विश्वविद्यालयबाट राजनीतिशास्त्रमा स्नातकोत्तर, कानुनमा स्नातक, तथा राजनीतिशास्त्रमै एम.फिल उत्तीर्ण गरेका महर हाल राजनीतिक अर्थशास्त्रमा विद्यावारिधि अध्ययनरत छन् ।
उनी नेपाल पत्रकार महासंघ डडेल्धुरा शाखाका संस्थापक सभापति हुन् । लोकतान्त्रिक मूल्य, सुशासन र युवा सशक्तीकरणका लागि काम गर्ने संस्था ’स्कूल अफ डेमोक्रेसी’ को नेतृत्व समेत उनले गर्दै आएका छन् ।
वैचारिक विश्लेषकका रूपमा उनका ’शिक्षाका चुनौतीहरू’, ’नेपाली कांग्रेस र भ्रातृ संगठन’, ’अबको कांग्रेस’, ’संकल्प’ र ’काण्डैकाण्ड–महाकाण्ड’ जस्ता पुस्तकहरू प्रकाशित छन् ।
यसका साथै राष्ट्रिय भावनाले ओतप्रोत चेतनामूलक गीतहरू पनि उनले रचना गरेका छन् ।
’नयाँ सोच, डिजिटल कांग्रेस’ १५ औँ महाधिवेशनलाई केवल नेतृत्व छान्ने मेला मात्र नभई कांग्रेस बदल्ने र सुदृढ बनाउने ऐतिहासिक अवसरका रूपमा लिनुपर्ने महरको तर्क छ ।
उम्मेदवारी घोषणासँगै उनले पार्टीको परम्परागत संरचनालाई विस्थापित गरी प्रविधिमा आधारित पारदर्शी र आधुनिक ’डिजिटल कांग्रेस’ बनाउने ।युवाहरूलाई राजनीतिप्रति आकर्षित गर्दै नीति निर्माण र पार्टीका प्रमुख संरचनाहरूमा उनीहरूको सुनिश्चित सहभागिता गराउने । बिपी कोइरालाको प्रजातान्त्रिक समाजवादलाई २१ औँ शताब्दीको आर्थिक समृद्धि, रोजगारी र प्रविधिसँग जोडेर परिमार्जन गर्ने । गुटबन्दी अन्त्य गर्दै सुशासन, पारदर्शी राजनीति र भ्रष्टाचारविरुद्ध शून्य सहनशीलता कायम गर्ने ।लगायतका मुख्य संकल्प अगाडी सारेका छन् ।
डडेल्धुरा कांग्रेसको सर्वसम्मत समर्थन पाएपछि उत्साहित बनेका महर हाल देशव्यापी जिल्ला दौडाहा र प्रदेशस्तरीय राजनीतिक भेटघाटमा व्यस्त छन् । उनले भविष्यको जिम्मेवारी लिने भरोसायोग्य कांग्रेसको निम्ति महामन्त्री पदमा प्रतिष्पर्धा गरेको स्पष्ट पार्दै साथ सहयोग र समर्थनको लागि कांग्रेसजनमा अपिल गरेका छन् ।
विचार, संगठन र पुस्तान्तरणको मुद्दालाई अघि सारेका महरको महामन्त्री पदको दाबेदारीलाई १५औँ महाधिवेशनमा चासोका साथ हेरिएको छ ।
नेपाली कांग्रेसको १५ औं अधिवेशन काठमाण्डौको खुलामंचमा चलिरहेको छ। सभापतिमा गगन थापाको जित अकाट्य जस्तै देखिंदा यता विधान संशोधन गरेर वरिष्ठ उपसभापति देखि महामन्त्री र सह-महामन्त्री सम्म कोटा थपिएका छन्। त्यसमध्य पनि कांग्रेस भित्र शक्तिशाली मानिने महामन्त्री पदमा कसले वाजी मार्छ भन्ने बहस चलेको छ।
तिन महामन्त्री मध्य एउटा नाम शक्तिशाली सम्भावित उम्मेदवारको नामका रुपमा सुनिल शर्माको नाम अहिले सबै भन्दा चर्चामा छ। त्यसो त सुकुम्वासी परिवारमा जन्मिएका डा सुनिल शर्माको जीवनको संघर्षको लामो कथा बन्न सक्छ । स्वास्थ्य सेवा क्षेत्रको टाइकोनको रुपमा आफ्नो परिचय बनाएका सुनिलको राजनीतिक पृष्ठ भूमि र योगदानको विगत पनि राजनैतिक आन्दोलनको रापबाट आएको व्यक्तिका रुपमा समेत परिचित छ । शसस्त्र द्वन्दकालमा गिरिजा प्रसाद कोइराला र प्रचण्डको वार्तालाप गराउने प्रमुख सूत्राधार पात्र भएर डा सुनिलले महत्वपूर्ण भूमिका मात्रै निर्वाहा गरेनन् । राजाको प्रत्यक्ष शासनमा गिरिजा प्रसाद कोइराला र सुजाता कोइरालालाई भारतको नयाँ दिल्ली सम्म लैजाने भूमिकामा समेत सुनिलले नै महत्वपूर्ण भूमिका निर्वाह गरेका थिए । युद्दको आगोको लप्कामा जलिरहेको देशलाई निकास दिन कांग्रेसको सिपाही भएर गिरिजाप्रसाद कोइराला र प्रचण्ड सम्म भेटघाटको चाजोपाजो मिलाएका सुनिलले कहिल्यै नेतृत्वको नजिक भएकै आधारमा राजनैतिक लाभ लिएनन् ।
व्यावसायिक यात्रा संगै काङ्ग्रेसको सक्रिय राजनीतिमा होमिएका सुनिलले २०८९ सालको निर्वाचनमा कांग्रेसबाट सबै भन्दा लोकप्रिय मत सहित मोरङ ३ बाट निर्वाचित भएका थिए। जुन निर्वाचन क्षेत्र कम्यूनिष्टको आधार इलाकाको रुपमा परिचित थियो । सुनिल शर्माले कांग्रेस सरकारमा हुँदा समेत मन्त्री बन्न र शासन सत्ताको लाभ लिन कांग्रेस नेतृत्व संग कुनै सम्झौता गरेनन्। बरु कांग्रेस भित्रकै प्रतिपक्षको भूमिकामा आफूलाई शशक्त रुपमा उभ्याए। सत्ता सिन नेताका भ्रष्टाचारका काण्डको बारेमा भण्डाफोर गर्दा बहालवाल सांसदलाई सिआइवी लगाएर हिरासतमा लिने काम समेत तत्कालिन सत्ताले सुनिल माथि गर्यो। जसको संसदमा तत्कालिन समयको प्रतिपक्षले नै चर्को विरोध गरेपछि प्रचण्ड नेतृत्वको कांग्रेस सम्मेलित सरकार लज्जित हुनुपरेको थियो।
डा सुनिल सर्माले आफ्नो ब्यक्तिगत फाइदाका लागि कहिल्यै कसैसंग सम्झौता गरेनन्। हिरासत भित्रको चिसो छिडिमा सुत्नु पर्दा समेत जनता र मूलुकका लागि बोले,सत्ता संग न डराए न झुके।
डा सुनिल शर्मा स्वास्थ्य सम्बन्धी सार्वजनिक महत्वको प्रस्ताव संसदमा टेवल गराए जुन विधेयक पारित भएको खण्डमा संविधानले सुरक्षीत गरेको निशुल्क स्वास्थ्य सम्बन्धी अधिकार नेपाली जनताले पाउने लगालग फिक्स थियो। तर अफसोस उक्त विषय जेनजी आन्दोलन पछि गुमनाम पारियो।
नेपालका आद्नोलन होस् या प्राकृतिक विपत्ति सबैमा घाइते देखि अशक्त र गरि असाहयको उपचार निशुल्क गरिदिने दया र करुणाका पर्याय सुनिल शर्मा बनेका छन्।
बादी समुदाय पहिलो डाक्टर बनाउने सुनिल शर्मा भोटेकोशी बाढीमा पैसा बगाएर श्रीमतीको किड्नी ट्रान्सप्लाण्ट गर्न नपाएर छट्पटाएकाको निशुल्क उपचार गरिदिने सुनिल शर्मा देशका दुरदराजमा स्वास्थ्य शिविर निशुल्क चलाएर देश स्वस्थ बनाउने आन्दोलन चलाउने सुनिल शर्मा।
डा सुनिल शर्मा मेडिकल उधमी र भन्दा अधिक राजनीतिज्ञ भएका छन्। विशेष महाधिवेशनको मन्चबाट परिवर्तनको शंघघोष गर्ने डा सुनिल पुस्तान्तर र रुपान्तरणका बलियो पक्षधर बनेर मात्रै उभिएनन बरु आफै नेतृत्व हाक्ने कसरतमा हिमोएका छन्।
कांग्रेस पार्टी भित्र होस् या वाहिर भ्रष्टाचार र कुशासनको विरुद्ध शक्तिशाली आवाज सडक देखि सदन सम्म बोल्ने सुनिल शर्मा महामन्त्री पदका सबै भन्दा बलिया उम्मेदवार भनिएको छ। त्यसो त कांग्रेसका महाधिवेशन प्रतिनिधि विवेक र राजनैतिक चेतनाका हिसावले अव्वल हुने भएकाले पनि महामन्त्रीमा डा सुनिल शर्माले जित्ने सम्भावना प्रवल भएको आंकलन गर्न सकिन्छ। कांग्रेसका कार्यकर्ताले न्याय गर्छन्। समयको पदचापलाई बुझ्छन् भनिन्छ। सोहि कारण पनि ८० बर्षको शेरबहादुर देउवा बाट नेतृत्व ५० बर्षमा गगनमा रुपान्तरण गरे। पुस्तान्तरण गरे। परिवर्तनको पक्षमा उभिए। कांग्रेसी कार्यकर्ताको न्यायको तराजुमा डा सुनिल शर्माको पल्ला कति भारि छ त्यो भने हेर्न बाकि छ।
सुरक्षासँग सम्बन्धित संवेदनशील सूचना चुहावट गरी पदीय आचरणविपरीत कार्य गरेको आरोप लागेका सशस्त्र प्रहरी बल, नेपालका अतिरिक्त महानिरीक्षक (एआईजी) वंशीराज दाहाल निलम्बनमा परेका छन्।
गृह मन्त्रालयले सोमबार जारी गरेको विज्ञप्तिअनुसार दाहालले सुरक्षासँग सम्बन्धित संवेदनशील सूचना चुहावट गरी आचरणविपरीत कार्य गरेको भन्ने विषयमा सशस्त्र प्रहरी बल, नेपालबाट कारबाहीका लागि मन्त्रालयमा सिफारिस प्राप्त भएको थियो।
सोही सिफारिसका आधारमा मन्त्रालयले दाहालमाथि लागेको अभियोगको जाँचबुझ प्रक्रिया अघि बढाएको हो। मन्त्रालयको असोज १९ गतेको निर्णयअनुसार उक्त विषयमा जाँचबुझ गर्न जाँचबुझ अधिकृतसमेत तोकिएको छ।
गृह मन्त्रालयले तोकिएका जाँचबुझ अधिकृतलाई दाहालमाथि लागेको अभियोगका सम्बन्धमा आवश्यक जाँचबुझ गरी तीन दिनभित्र प्रतिवेदन मन्त्रालयमा पेस गर्न निर्देशन दिएको छ।
मन्त्रालयले निजामती तथा प्रहरी कर्मचारीले पालना गर्नुपर्ने पदीय आचरणसम्बन्धी व्यवस्था प्रचलित कानुनमा स्पष्ट रहेको जनाएको छ। प्रत्येक सशस्त्र प्रहरी कर्मचारीले आफ्नो सेवा र पदअनुसारको आचरण पालना गर्नुपर्ने तथा सुरक्षासँग सम्बन्धित संवेदनशील सूचनाको संरक्षण र गोपनीयता कायम गर्नुपर्ने कानुनी व्यवस्था रहेको मन्त्रालयले उल्लेख गरेको छ।
गृह मन्त्रालयले मातहतका कर्मचारीबाट हुने पदीय आचरणविपरीतका गतिविधि, संवेदनशील तथा गोप्य सूचनाको चुहावट र शान्ति सुरक्षामा प्रतिकूल असर पार्न सक्ने गतिविधिमाथि सूक्ष्म निगरानी तथा विश्लेषण भइरहेको जनाएको छ।
कानुन विपरीत हुने हरेक गतिविधि वा घटनामा संलग्न जोसुकैलाई प्रचलित कानुनबमोजिम कारबाही गरिने मन्त्रालयले स्पष्ट पारेको छ।
मन्त्रालयले विधिको शासन, कानुनको परिपालना तथा सार्वजनिक शान्ति सुरक्षाको संरक्षणप्रति प्रतिबद्ध रहेकोसमेत जनाएको छ।
दाहालको पदावधि थपका लागि यसअघि सशस्त्र प्रहरी मुख्यालयले गृह मन्त्रालयमा पत्राचार गरेको थियो। सशस्त्र प्रहरी नियमावलीअनुसार उनको चार वर्षे पदावधि सकिन लागेको र सरकारले चाहेमा एक वर्ष थप गर्न सक्ने व्यवस्था रहेको छ।
यसअघि दाहाललाई ‘चेन अफ कमान्ड’ उल्लंघन गरेको विषयमा स्पष्टीकरण सोधिएको विवरणसमेत सार्वजनिक भएको थियो।
नेपाली कांग्रेसको १५ औँ महाधिवेशनको सरगर्मी चुलिँदै गर्दा पार्टीको भावी दिशा तय गर्ने नेतृत्वका लागि नयाँ र रूपान्तरणकारी अनुहारहरूको खोजी तीव्र बनेको छ । यही वैचारिक र सांगठनिक मन्थनका बीच इञ्जिनियरिङ शिक्षाका बौद्धिक व्यक्तित्व, नेविसङ्घका पूर्वअध्यक्ष एवं पूर्वसभासद रञ्जित कर्णले महामन्त्री पदमा आफ्नो सशक्त दाबेदारी प्रस्तुत गर्दै कांग्रेस राजनीतिमा छुट्टै उत्साह र तरङ्ग पैदा गरिदिएका छन् ।
सप्तरीको राजविराजबाट सुरु भएको निष्ठावान् राजनीतिक यात्रा, पुलचोक क्याम्पसबाट हासिल गरेको सहरी योजनाको प्राविधिक ज्ञान, अनि संविधान सभा र राष्ट्रियसभामा खेलेको परिपक्व संसदीय भूमिका—यी तीन मुख्य खम्बा नै कर्णलाई समकालीन कांग्रेस राजनीतिमा अन्य दाबेदारभन्दा भिन्न, बौद्धिक र नतिजामुखी नेताका रूपमा उभ्याउने बलिया आधार हुन् ।
सप्तरीको राजविराजबाट सुरु भएको राजनीतिक पृष्ठभूमि, बौद्धिक क्षमता र उच्च संसदीय अनुभवका आधारमा कर्णले पार्टीभित्र सांगठनिक पुनर्जागरण र पुस्तान्तरणको एजेन्डासहित महामन्त्रीमा आफ्नो दाबेदारी प्रस्तुत गरेका हुन् ।
रञ्जित कर्ण केवल राजनीतिक कार्यकर्ता मात्र होइनन्, उनी प्राविधिक रूपमा दक्ष र बौद्धिक व्यक्तित्व पनि हुन् । त्रिभुवन विश्वविद्यालय, इन्जिनियरिङ अध्ययन संस्थान पुलचोक क्याम्पसबाट आर्किटेक्चरमा स्नातक, र सहरी योजनामा स्नातकोत्तर तह पूरा गरेका कर्णले अध्ययन र राजनीतिलाई सँगसँगै अघि बढाएका हुन् ।
उनको राजनीतिक यात्रा २०४० को दशकको उत्तरार्धबाट सुरु भएको हो । २०४४ सालमा राजविराजस्थित राजदेवी माध्यमिक विद्यालयमा नेविसङ्घको एकाइ अध्यक्ष, २०४६ मा ठाकुरराम बहुमुखी क्याम्पस वीरगन्जको विज्ञान संकाय अध्यक्ष र २०५१ मा त्रि–चन्द्र क्याम्पस काठमाडौँमा स्वतन्त्र विद्यार्थी युनियन (स्ववियु) सदस्यका रूपमा उनको राजनीतिक जग बस्यो ।
पुलचोक क्याम्पसमा २०५३ मा स्ववियु सचिव र २०५६ देखि २०५८ सम्म स्ववियु अध्यक्ष निर्वाचित भई उनले प्राविधिक विद्यार्थीहरूको हकहित र शैक्षिक सुधारमा नेतृत्वदायी भूमिका निर्वाह गरे ।
२०५८ सालमा नेविसङ्घको केन्द्रीय सदस्य बनेका कर्ण, (२०६०–२०६२ सम्म उपाध्यक्ष , ६४ सालसम्म महामन्त्री हुँदै २०६९ देखि २०७३ सम्म नेविसङ्घको केन्द्रीय अध्यक्ष बने ।
उनको नेतृत्वमा नेविसङ्घले देशभरका क्याम्पसहरूमा शैक्षिक समानता, स्ववियु निर्वाचनको नियमितता, त्रिभुवन विश्वविद्यालयको प्रशासनिक सुधार र विद्यार्थी हकहितका पक्षमा सशक्त आन्दोलन सञ्चालन ग¥यो ।
लामो समयदेखि हुन नसकेको नेविसङ्घको महाधिवेशन सम्पन्न गराई भ्रातृ संस्थाभित्र सांगठनिक अनुशासन र गतिशीलता ल्याउन कर्णले खेलेको भूमिकालाई पार्टीभित्र महत्त्वपूर्ण मानिन्छ।
नेपाल बाहिर पनि अन्तर्राष्ट्रिय युवा तथा शैक्षिक कार्यक्रमहरूमा नेपालको प्रतिनिधित्व गरिसकेका कर्णसँग अन्तर्राष्ट्रिय सम्बन्ध र सांगठनिक अनुभव रहेको छ ।
उनले सन् २००१ मा जर्मनीको इलुमानियाबादमा आयोजित ’इन्टरनेसनल युथ फेस्टिभल’मा सहभागिता जनाए । २०१२ मा ’डेमोफिनल्यान्ड’द्वारा आयोजित ’नेपाल–फिनल्यान्ड विद्यार्थी नेता अन्तरक्रिया कार्यक्रम’ र सोही वर्ष लन्डनमा आयोजना भएको ’अन्तर्राष्ट्रिय विद्यार्थी नेता शिखर सम्मेलन’मा सहभागिता जनाएर अनुभव बटुलेका छन् ।
यसबाहेक फिनल्यान्ड, संयुक्त अधिराज्य, जर्मनी, भारत, अस्ट्रेलिया र संयुक्त राज्य अमेरिका जस्ता देशहरूको भ्रमण गरिसकेका कर्ण पत्रपत्रिकाहरूमा राजनीतिक अर्थशास्त्र, लोकतान्त्रिक मूल्य–मान्यता र पार्टीको आन्तरिक लोकतन्त्रका विषयमा विश्लेषणात्मक लेखहरू लेख्ने बौद्धिक नेताका रूपमा चिर परिचित छन् ।
कर्ण सडक र संगठनका नेता मात्र नभई संसद्मा नीतिगत बहस र कानुन निर्माण प्रक्रियामा प्रभावकारी भूमिका निर्वाह गर्ने परिपक्व राजनीतिज्ञ हुन् ।दोस्रो संविधानसभामा समानुपातिक प्रणालीमार्फत सभासद बनेका उनले नेपालको संविधान २०७२ निर्माणका क्रममा समावेशी लोकतन्त्र, मधेसी तथा पछाडि पारिएका समुदायको अधिकार र युवा नेतृत्वको प्रतिनिधित्व सुनिश्चित गराउन महत्त्वपूर्ण भूमिका खेले ।
संसद्को माथिल्लो सदन राष्ट्रियसभामा जनसरोकारका मुद्दा, सुशासन, संघीयताको प्रभावकारी कार्यान्वयन र नीतिगत सुधारका विषयमा उनले निरन्तर प्रखर आवाज उठाउँदै आएका छन् ।
“वैचारिक स्पष्टता, सांगठनिक सुदृढीकरण र समावेशी कांग्रेस“ को नारासहित १५ औँ महाधिवेशनमा महामन्त्री पदका लागि अघि सरेका कर्णले सांगठनिक चुस्तता, २१ औँ शताब्दीको समाजवाद, युवा सहभागिता, अनुसन्धान र विचारमा आधारित राजनीतिलाई आफ्नो मुख्य एजेण्डा बनाएका छन् ।
विद्यार्थी राजनीति, इञ्जिनियरिङ क्षेत्रको प्राविधिक ज्ञान, संविधान सभा र राष्ट्रियसभाको लामो अनुभव, मधेस तथा राष्ट्रिय राजनीतिमा बलियो पकड एवं वैचारिक स्पष्टताका कारण नेपाली कांग्रेसको १५ औँ महाधिवेशनमा रञ्जित कर्णको महामन्त्री पदको दाबेदारीलाई पार्टीभित्र विशेष चासो र सम्भावनाका साथ हेरिएको छ ।
