अर्थ समितिका सभापति कृष्णहरि बुढाथोकीले नेपालको पूँजी बजारलाई आधुनिक, प्रविधिमैत्री, व्यवस्थित, पारदर्शी, विश्वसनीय र लगानीमैत्री बनाउन नयाँ कानुनी व्यवस्था आवश्यक रहेको बताएका छन् ।
बुधबार बसेको अर्थ समिति बैठकमा बोल्दै उनले धितोपत्र निष्कासन, सूचीकरण, बजार सञ्चालन तथा नियमनसँगै लगानीकर्ताको हित संरक्षण हुने गरी नयाँ धितोपत्रसम्बन्धी विधेयक तयार गर्नुपर्ने बताएका हुन् ।
सभापति बुढाथोकीले नेपाल धितोपत्र बोर्ड (सेबोन) र नेपाल स्टक एक्सचेन्ज (नेप्से)को भूमिका, जिम्मेवारी तथा जवाफदेहिता स्पष्ट हुने गरी नयाँ विधेयक तर्जुमा गरेर संघीय संसद्मा तत्काल प्रस्तुत गर्न अर्थ मन्त्रालय र सेबोनलाई निर्देशन दिनुपर्ने बताए ।
बैठकमा कम्पनीहरूले प्राथमिक सेयर (आईपीओ) निष्कासन गर्दा कम्पनीको अवस्था, पूर्वाधार, नेटवर्क, प्रतिफललगायतका आधारमा वर्गीकरण गरी प्राथमिकता निर्धारण गर्ने व्यवस्था गर्नुपर्ने विषयमा पनि छलफल भएको थियो ।
त्यसैगरी, आईपीओ निष्कासनका क्रममा संस्थापकले धारण गर्नुपर्ने सेयरसम्बन्धी व्यवस्थाको समेत पुनरावलोकन गर्न सेबोनलाई निर्देशन दिने विषयमा छलफल भएको छ ।
मंगल ग्रहमा कुनै समय जीवन अनुकूल वातावरण रहेको र सूक्ष्मजीवसँग सम्बन्धित जैविक प्रक्रियाका सम्भावित संकेत भेटिएको नयाँ अध्ययनले देखाएको छ । नासाको नेतृत्वमा गरिएको अध्ययनमा इम्पेरियल कलेज लन्डनका वैज्ञानिकहरूको समेत महत्वपूर्ण भूमिका रहेको छ ।
अध्ययनका क्रममा मंगल ग्रहको जेजेरो क्रेटरस्थित ‘ब्राइट एन्जल’ नाम दिइएको चट्टानी संरचनामा विभिन्न खनिज र जैविक पदार्थ भेटिएका छन् । वैज्ञानिकहरूका अनुसार यी संरचनाहरू जैविक कार्बनसँग सम्बन्धित देखिन्छन् र विगतमा जीवन रहेको सम्भावनाको ‘बायोसिग्नेचर’ अर्थात् जैविक संकेत हुन सक्ने देखिएको छ ।
इम्पेरियल कलेजका पृथ्वी विज्ञानका प्राध्यापक सञ्जीव गुप्ताले यो सम्भावित जैविक संकेतको महत्वपूर्ण खोज भए पनि मंगल ग्रहमा जीवन भेटिएको निष्कर्षमा पुग्न नसकिने बताएका छन् । नमुना पृथ्वीमा ल्याएर थप परीक्षण गरेपछि मात्र त्यहाँ देखिएका संरचना जैविक प्रक्रियाबाट बनेका हुन् वा होइनन् भन्ने पुष्टि गर्न सकिने उनको भनाइ छ ।
नासाको ‘पर्सिभरेन्स’ रोभरले सन् २०२१ देखि करिब ४५ किलोमिटर चौडा जेजेरो क्रेटरको अध्ययन गर्दै आएको छ । कुनै समय ठूलो ताल र नदीको डेल्टा रहेको मानिएको यस क्षेत्रमा प्राचीन जीवनका संकेत खोज्न रोभर परिचालन गरिएको हो ।
अध्ययनमा ‘ब्राइट एन्जल’ क्षेत्र प्राचीन नदी उपत्यका ‘नेरेट्भा भालिस’मा रहेको र त्यहाँ सूक्ष्म कणयुक्त माटो तथा माटो मिसिएका ढुंगाका तह भेटिएको उल्लेख छ । यी संरचनाको अध्ययन गर्दा तीव्र गतिमा बग्ने नदीको भन्दा कम ऊर्जाको ताल वातावरणमा ती तहहरू बनेको संकेत वैज्ञानिकहरूले पाएका छन् । अर्थात्, प्राचीन नदी उपत्यकाको तल्लो भागमा कुनै समय ताल बनेको हुन सक्ने देखिएको छ ।
चट्टानमा गरिएको रासायनिक विश्लेषणमा फलाम–फस्फेट र फलाम–सल्फाइड खनिजसँग सम्बन्धित संरचना भेटिएका छन् । नासाका अनुसार तीमध्ये भिभियानाइट र ग्रेगाइटजस्ता खनिज पहिचान भएका छन् । पृथ्वीमा यस्ता खनिज केही अवस्थामा सूक्ष्मजीवका चयापचय प्रक्रियासँग सम्बन्धित हुन सक्छन् । तर यी खनिज जीवनबिना हुने रासायनिक प्रक्रियाबाट पनि बन्न सक्ने भएकाले वैज्ञानिकहरूले जैविक उत्पत्तिको सम्भावना अझै पुष्टि गरिसकेका छैनन् ।
पर्सिभरेन्सले ‘ब्राइट एन्जल’ क्षेत्रबाट ‘सफायर क्यानियन’ नाम दिइएको चट्टानको नमुना ड्रिल गरी सुरक्षित राखेको छ । उक्त नमुनासहित रोभरले संकलन गरेका अन्य नमुना भविष्यको ‘मार्स स्याम्पल रिटर्न’ अभियानमार्फत पृथ्वीमा ल्याउने योजना छ । पृथ्वीका प्रयोगशालामा थप संवेदनशील उपकरणबाट परीक्षण गरेपछि मात्र यी संरचनाको वास्तविक उत्पत्ति र सम्भावित जैविक सम्बन्धबारे थप स्पष्ट हुने वैज्ञानिकहरूको भनाइ छ ।
नेपाली काँग्रेसले पार्टीको १५औँ महाधिवेशनका लागि नयाँ कार्यतालिका सार्वजनिक गरेको छ ।
भारी वर्षाका कारण केही निर्वाचन क्षेत्रमा क्षेत्रीय अधिवेशन तथा महाधिवेशन प्रतिनिधि चयन प्रक्रिया प्रभावित भएपछि आज महाधिवेशनका लागि नयाँ कार्यतालिका सार्वजनिक गरिएको सो पार्टीले जनाएको छ । केन्द्रीय निर्वाचन समितिका सदस्य सचिव राजु कटुवालले क्षेत्रीय अधिवेशन सम्पन्न गरी महाधिवेशन प्रतिनिधिको नामावली यही असोज १५ गतेसम्म केन्द्रमा पठाइसक्नुपर्ने बताए ।
केन्द्रीय निर्वाचन समितिका अनुसार महाधिवेशन प्रतिनिधिको रजिष्ट्रेसन असोज १६ र १७ गते गरिने छ । महाधिवेशनको उद्घाटन समारोह यही असोज १८ गते दिउँसो २ बजे काठमाडौँको खुलामञ्चमा हुने समितिले जनाएको छ ।
महाधिवेशनको बन्द सत्र तथा अन्य कार्यक्रम असोज १९ र २० गते सञ्चालन हुनेछन् । यस्तै, असोज २१ र २२ गते निर्वाचन कार्यक्रम सञ्चालन गरिने केन्द्रीय निर्वाचन समितिले जनाएको छ ।
गृह मन्त्रालयले विभिन्न ६ जिल्लाका प्रमुख जिल्ला अधिकारी (सीडीओ) को सरुवा गरेको छ।
बङ्गालको खाडीमा विकसित न्यून चापीय प्रणालीका कारण यही असोज ८ देखि ११ गतेसम्म परेको अविरल वर्षा, बाढी र पहिरोमा परी देशभर २७ जनाको मृत्यु भएको छ भने ४ जना अझै बेपत्ता रहेका छन् ।
राष्ट्रिय विपद् जोखिम न्यूनीकरण तथा व्यवस्थापन प्राधिकरणले असोज १२ गते जारी गरेको स्थिति प्रतिवेदनअनुसार देशभर विपद्का ५४२ वटा घटना घटेका छन् ।
प्राधिकरणको तथ्याङ्कअनुसार पहिरोका ३०४ घटनामा २० जना, बाढीका ८७ घटनामा ४ जना र भारी वर्षाका १५१ घटनामा ३ जनाले ज्यान गुमाएका छन्। विपद्मा परी ८ जना घाइते भएका छन् भने १ हजार ८२ परिवार प्रत्यक्ष प्रभावित भएका छन्। भौतिक क्षतितर्फ २२७ वटा घर पूर्ण रूपमा तथा १४२ वटा घरमा आंशिक क्षति पुगेको छ । त्यस्तै, ३१ वटा पुल र १० वटा गोठमा क्षति पुग्नुका साथै ११४ वटा पशु चौपाया नष्ट भएका छन् ।
चार दिनको निरन्तर वर्षाका क्रममा देशभरका १८६ वटा मापन केन्द्रमा १०० मिलिमिटरभन्दा बढी वर्षा रेकर्ड गरिएको छ । नवलपरासी (बर्दघाट सुस्तापूर्व) को डेढगाउँमा सबैभन्दा बढी ५४४.२ मि.मि., कास्कीको पञ्चासेमा ५००.२ मि.मि. र तनहुँको अत्रौलीटारमा ४७२ मि.मि. वर्षा मापन भएको प्राधिकरणले जनाएको छ ।
विपद्पछि सरकारका सम्पूर्ण संयन्त्र परिचालन गरी प्रभावित क्षेत्रबाट करिब २ हजार जनालाई सुरक्षित स्थानमा स्थानान्तरण गरिएको छ । दुर्गम तथा जोखिमयुक्त स्थानबाट नेपाली सेना, नेपाल प्रहरी र सशस्त्र प्रहरी बलका ४,६६० जना सुरक्षाकर्मी परिचालन गरी खोज तथा उद्धार कार्य जारी राखिएको छ । असोज ११ गते म्याग्दीको पाउद्धारबाट जोखिममा परेका ७८ जना, जाजरकोटको कुदुस्थित भेरी नदीको टापुबाट ४ जना तथा रसुवा, दैलेख, हुम्ला र मुगुबाट घाइते तथा बिरामीहरूको हेलिकप्टरमार्फत उद्धार गरिएको थियो । यता, हिमलुङ हिमालमा क्याम्प स्थापना गर्न गएका २२ जना नेपालीमध्ये ४ जनाको शव फेला परेको र थप खोजी तथा उद्धार कार्य जारी रहेको प्रतिवेदनमा उल्लेख छ ।
विपद् पूर्वतयारीका लागि प्राधिकरणको ‘सिचुएसन रुम’ निरन्तर ७६ घण्टा सक्रिय राखिएको थियो । सम्भावित बाढी र पहिरोको जोखिमबारे टेलिकममार्फत ९ लाख ८० हजारभन्दा बढी नागरिकलाई सतर्कता एसएमएस, ४७ घण्टासम्म रिङ ब्याक टोन तथा ५ हजारभन्दा बढी रेस्पोन्डरहरूलाई अलर्ट सन्देश पठाइएको थियो ।
हाल मनाङ, म्याग्दी, बागलुङ, पर्वत, नवलपरासी लगायतका जिल्लाहरूमा स्थानीय तह, प्रशासन तथा सुरक्षा निकायको समन्वयमा विस्थापितहरूलाई अस्थायी आवास (विद्यालय, होल्डिङ सेन्टर, टेन्ट) तथा खाद्यान्नको व्यवस्था मिलाइएको छ । नदीहरूको जलसतह क्रमैसँग घट्दै गई स्थिति सामान्यतर्फ उन्मुख भइरहेको र अवरुद्ध सडक तथा पूर्वाधार खुलाउने प्रयास जारी रहेको प्राधिकरणले जनाएको छ ।
कबि थापा मगर
खुँडा प्रहार गरेर ग्याङस्टारको हात छिन्नभिन्न पार्ने गुण्डा नाइके कसरी पटक–पटक प्रदेशको मन्त्री बन्छ ? ज्यान मार्ने उद्योगमा अदालतबाट कैद सजाय पाएका व्यक्तिलाई दलहरूले पालैपालो काँधमा थापेर किन स्वागत गरिरहन्छन् ?नेपाली राजनीति बन्यो अपराध छोप्ने अखडा । एमाले, नेकपा, एकीकृत समाजवादी हुँदै असोज १३ मा नेपाली कांग्रेसको देउवा समूहको फेरो समात्न पुगेका दिपक मनाङे गुन्डा नाइकेको ‘अपराधदेखि सांसद हुँदै मन्त्रीसम्मको यात्रा ।
हजारौं पटक रंग फेर्ने छेपारो पनि लजाउने गरी पार्टी फेरेका, गण्डकी सरकारमा सत्ताको साँचो मानिएका दिपक मनाङेको राजनीतिक यात्राको बारेमा चर्चा गर्दैछौं । ठमेलको हप्ता असुली, चक्रे मिलनको हात छिन्ने गरी खुँडा प्रहार, डिल्लीबजारको जेल जीवन अनि ६–६ पटक मन्त्रीपदको चास्नी चाखेका पात्र हुन् । दीपक मनाङे उर्फ राजीव गुरुङ ।
सिद्धान्त, निष्ठा र राजनीतिक आदर्शलाई तिलाञ्जली दिँदै केवल सत्ता, शक्ति र कानुनी संरक्षणका लागि दल बदल्नमा दीपक मनाङे नेपालकै नम्बर एक पात्र सावित भएका छन् ।
काठमाडौँका गल्लीमा हप्ता असुली र गुन्डागर्दीबाट आफ्नो आपराधिक यात्रा सुरु गरेका मनाङे आज राजनीतिलाई ढाल बनाएर पटक–पटक सत्ताको चास्नीमा रमाउने ’सदाबहार’ खेलाडी बनेका छन् ।
छेपारोले आफ्नो जीवनकालमा रङ नफेर्ने गतिमा गतिविधि र पार्टी फेर्दै आएका मनाङेको पछिल्लो अवतरण नेपाली कांग्रेसको देउवा समूहमा भएको छ । कांग्रेसका निवर्तमान सभापति शेरबहादुर देउवाले पनि नेताहरुले आफ्नो साथ छाडेपछि गुण्डा नाइकेको छवि बनाएका, पटक पटक मन्त्री बनेका पात्रको हात थामेका हुन् ।
मंगलबार देउवा समूहका महाधिवेशन आयोजक समितिका संयोजक डा. शशांक कोइरालाले उनलाई खादा ओढाएर मनाङ जिल्लाको महाधिवेशन आयोजक समिति संयोजकको जिम्मेवारी सुम्पिए । चुनदेवीस्थित सम्पर्क कार्यालयमा पुगेर देउवालाई भेटेका मनाङेको यो कदम कुनै राजनीतिक निष्ठा होइन, केवल शक्तिमा टिक्ने र राजनीतिक ढाल कायमै राख्ने अर्को रणनीतिक दाउपेच मात्र मानिएको छ ।
२०५० को दशकको सुरुवातमै मनाङबाट काठमाडौँ छिरेका राजीव गुरुङले ठमेल, दरबारमार्ग र नयाँ बसपार्क क्षेत्रलाई आफ्नो क्रीडास्थल बनाए । डान्स बार, ठेक्कापट्टा, र हप्ता असुलीबाट आफ्नो आपराधिक साम्राज्य खडा गरेका उनले ’दीपक मनाङे’को नाममा गुन्डागर्दीको त्रास फैलाए । उनको आपराधिक जीवनको सबैभन्दा चर्चित र भयानक घटना २०६१ साल वैशाख ३१ गते घट्यो । काठमाडौँको महाराजगञ्जमा अर्का गुन्डा नाइके ’चक्रे मिलन’ उर्फ मिलन गुरुङ माथि ज्यान मार्ने नियतले खुँडा प्रहार गरी हात छिन्नभिन्न पारियो । उक्त ज्यान मार्ने उद्योगमा मनाङे प्रमुख अभियुक्त थिए ।
यस प्रकरणमा लामो कानुनी लडाइँ चल्यो । २०६९ सालमा पुनरावेदन अदालत पाटनले मनाङेलाई ज्यान मार्ने उद्योगमा ५ वर्ष कैदको फैसला सुनायो । २०८१ कात्तिक २० गते सर्वोच्च अदालतको संयुक्त इजलासले पाटन उच्च अदालतको ५ वर्ष कैद सजायको फैसलालाई अन्तिम रूपमा सदर ग¥यो, जसलगत्तै उनी पक्राउ परी डिल्लीबजार कारागार चलान भएका थिए ।
ज्यान मार्ने उद्योगबाहेक सम्पत्ति शुद्धीकरण, हातहतियार तथा खरखजना र सार्वजनिक अपराधका दर्जनौँ मुद्दाहरू उनीमाथि लागेका थिए । काठमाडौँको अपराधबाट उम्किन र कानुनी कारबाहीबाट जोगिन मनाङेले राजनीतिलाई हतियार बनाए । त्यसपछि सुरु भयो उनको अद्भूत र बहुचर्चित ’पार्टी अदल–बदल’ को शृङ्खला ।२०७३ सालदेखि उनले औपचारिक राजनीतिक यात्रामा होमिए । उनी सुरुमा राष्ट्रिय प्रजातन्त्र पार्टी (राप्रपा) मा छिरेर मनाङ जिल्ला अध्यक्ष बने ।
त्यसैको अर्को साल राप्रपा खस्किएपछि केही समय सङ्घीय समाजवादीको फेरो समातेका उनले २०७४ को पहिलो प्रदेश सभा निर्वाचनमा मनाङ (ख) बाट स्वतन्त्र उम्मेदवारी दिए । तत्कालीन एमालेको सहयोगमा जिते पनि अदालतको मुद्दाका कारण उनी ८ महिना जेल परे ।
जेलबाट छुटेपछि कानुनी छिद्र प्रयोग गर्दै २०७५ सालमा सांसदको शपथ लिएलगत्तै उनी सत्तारूढ नेपाल कम्युनिष्ट पार्टी (नेकपा) मा प्रवेश गरे । जुन केपी शर्मा वली र पुष्पकमल दाहाल प्रचण्डले पार्टी एकता गरेर बनाएका पार्टी थियो ।
२०७९ को दोस्रो निर्वाचनमा एमालेलाई फकाएर र विरोधीलाई विभिन्न हत्कण्डा अपनाएर, पछाडि हटाएर मनाङ (ख) बाट निर्विरोध सांसद बनेका मनाङेले चुनाव जितेको केही दिनमै कित्ता बदले ।
स्वतन्त्र सांसदलाई मन्त्री बन्न कठिन हुने देखेपछि २०७९ मंसिर १९ गते माधवकुमार नेपालको हातबाट अबिर लगाएर नेकपा (एकीकृत समाजवादी) मा छिरे । त्यतिबेला उनले “राजनीति कमाउन होइन, निस्वार्थ सेवाका लागि हो“ भन्दै हाँस्यास्पद दाबी गरेका थिए ।
एकीकृत समाजवादी कमजोर बनेपछि र आफ्नो बार्गेनिङ पावर घट्दै गएपछि मनाङे अहिले नेपाली कांग्रेसको देउवा समूहमा प्रवेश गरी मनाङको संयोजक बन्न पुगे । उनको यो दल बदल यात्राले सबैभन्दा बढी रंग फेर्ने क्षमता भएका बोके छेपारोलाई पनि मात दिएको छ ।
६ पटकभन्दा बढी मन्त्रीः गण्डकीका ’किंगमेकर’
गण्डकी प्रदेश सभामा कुनै पनि दलको स्पष्ट बहुमत नरहने स्थिति उत्पन्न हुनु मनाङेका लागि वरदान साबित भयो । १–१ सिटको जोडघटाउमा उनी निर्णायक पात्र बने । उनी एमालेका पृथ्वीसुब्बा गुरुङ, कांग्रेसका कृष्णचन्द्र नेपाली पोखरेल, र सुरेन्द्रराज पाण्डेका सरकारमा ६ पटकभन्दा बढी मन्त्री बने । युवा तथा खेलकुद मन्त्रालय र भौतिक पूर्वाधार विकास मन्त्रालय जस्ता शक्ति र बजेट भएका मन्त्रालयहरू उनैले कब्जा गरे ।
मन्त्री छँदा पनि उनको गुन्डागर्दी शैली रोकिएन । कास्की जिल्ला फुटबल संघका अध्यक्षलाई कुटपिट गरेको अभियोगमा उनी मन्त्री पदमा छँदै पक्राउ परेका थिए । मिडिया र कर्मचारीमाथि आक्रामक र धम्कीपूर्ण भाषा प्रयोग गर्नु उनको नियमित कार्यशैली बन्यो । यतिसम्म कि उनले मन्त्रालय नै बिक्रिमा राखेको विषय सार्वजनिक भयो । उनी आफैंले बार्गेनिङ गरिरहेको र सार्वजनिक थियो ।
यस्ता, विवादित उनको केही अन्य अभिव्यक्तिहरु यस प्रकार छन् ।
ठमेलको गल्लीमा खुँडा हान्ने गुन्डा नाइकेदेखि प्रदेश सभाको सांसद, पटक–पटकको मन्त्री र पार्टी फेर्ने ’च्याम्पियन’ बनेका दीपक मनाङेको यात्रा नेपाली राजनीतिमा व्याप्त दलगत स्वार्थको सबैभन्दा नग्न रूप भएको टिप्पणी भइरहेको छ । विचार, सिद्धान्त र निष्ठालाई पाइतालामुनि थिचेर सत्ताको चास्नीमा डुबिरहने मनाङेको यो देउवा समूहप्रतिको नयाँ ’निष्ठा’ कति दिन टिक्छ, त्यो त आगामी सत्ताको जोडघटाउले नै तय गर्ने देखिन्छ ।
दीपक मनाङे कुनै आकस्मिक राजनीतिक दुर्घटना होइनन् —उनी नेपाली राजनीतिले आफ्नै हातले हुर्काएको विषवृक्ष हुन् । सिद्धान्तको मलामी गएको हाम्रो राजनीतिमा जबसम्म ’जित्नु र सत्तामा टिक्नु’ नै एक मात्र योग्यता मानिन्छ, तबसम्म ठमेलका गल्लीमा हतियार चम्काउनेहरू नै सिंहदरबार र प्रदेश सभाको कुर्सीमा हुकुम चलाइरहनेछन् ।
प्रश्न केवल मनाङेको नियतमाथि मात्र होइन, अपराधको दाग पखाल्न आफ्नो झण्डा र चिह्न सुम्पिने ती शीर्ष दल र नेताहरूतर्फ पनि सोझिएको छ —जसले सत्ताको एक सिटका लागि लोकतन्त्रकै धज्जी उडाइरहेका छन् । छेपारोले रङ फेरेझैँ दल फेरेर सत्ताको चास्नी चाट्ने मनाङे त केवल एक मुखौटा हुन्; वास्तविक अपराधी त तिनलाई काँधमा हालेर लोकतन्त्रको उपहास गर्ने सिङ्गो राजनीतिक व्यवस्था र यसका नाइकेहरू हुन् ।
सरकारका प्रवक्ता एवं शिक्षामन्त्री सस्मित पोखरेलले पूर्वप्रधानन्यायाधीश चोलेन्द्रशमशेर जबरालाई पक्राउ वा नियन्त्रणमा नलिइएको बताएका छन् । उनले अपरिचित समूहबाट फोनमा टेक्स्टमार्फत धम्की आएपछि सुरक्षाका लागि सुरक्षित स्थानमा लगिएको स्पष्ट पारेका छन् ।
मंगलबार बसेको मन्त्रिपरिषद् बैठकका निर्णय सार्वजनिक गर्ने क्रममा मन्त्री पोखरेलले जबराको परिवारबाटै सुरक्षाको माग गर्दै प्रहरीमा निवेदन परेको बताए ।
उनले भने, ‘उहाँलाई पक्राउ गरिएको पनि होइन, नियन्त्रणमा लिएको पनि होइन। उहाँको आफ्नै परिवारबाट नै सुरक्षाको माग गरेर निवेदन प्रहरी कार्यालयमा पठाउनु भएको छ। बिल्कुलै उहाँको सुरक्षामा प्रश्न आइसकेपछि उहाँलाई सुरक्षा प्रदान गर्नको लागि त्यहाँबाट रेस्क्यु गरेर लगिएको हो ।’
जबरालाई धम्की आएपछि सुरक्षित स्थानमा लगिएको र त्यसपछि पनि सुरक्षा खतरा रहेको जानकारी परिवारबाट आएको उनले बताए ।
उनले भने, ‘सुरुमा नै थ्रेटहरू आइसकेको थियो। थ्रेटहरू आइसकेपछि सुरक्षित स्थानतर्फ लगियो । त्यसपछि सुरक्षा थ्रेट भएको छ भन्ने कुरा परिवारबाट आइसकेको हो।’
जबरालाई ‘जेनजी’ समूहबाट धम्की आएको भन्ने विषय सरकारबाट नआएको पनि उनले स्पष्ट पारे ।
मन्त्री पोखरेलले भने, ‘जेनजीबाट त्यस्तो थ्रेट आएको होइन। एउटा अपरिचित समूहमार्फत फोनमा टेक्स्टमार्फत नै थ्रेट आइसकेपछि सुरक्षित स्थानमा लगिएको हो । जेनजी समूहबाट भन्ने होइन । त्यसबारे प्रहरीले अनुसन्धान गर्दैछ ।’
यस्तै, एन्फासँग सम्बन्धित विषयमा लामो समयदेखि विभिन्न प्रश्न उठ्दै आएको र अहिले दुई जना नियन्त्रणमा लिएर अनुसन्धान भइरहेको मन्त्री पोखरेलले बताए ।
उनका अनुसार एन्फासम्बन्धी विषयमा प्राकृतिक प्रक्रियाबाटै अनुसन्धान अघि बढ्नेछ ।
फिफाको निलम्बन तत्काल नखुलेमा घरेलु फुटबल लिग सञ्चालनमा जोड दिने सरकारको तयारी रहेको मन्त्री पोखरेलले बताए ।
सरकार घरेलु लिगसँगै निजी फ्रेन्चाइज प्रतियोगितालाई पनि सकारात्मक रूपमा हेर्ने उनको भनाइ थियो ।
यसैगरी कसैलाई सरकारले निगरानी गरेको भन्ने दाबीबारे मन्त्री पोखरेलले त्यस्तो कुनै व्यवस्था नरहेको बताए ।
सचिवालय तथा सल्लाहकार नियुक्तिमा पनि कानुनी प्रावधानभन्दा बाहिर गएर ठूलो टोली नराखिएको उनले दाबी गरे ।
सरकारले सङ्घीय निजामती सेवा सम्बन्धी कानूनलाई संशोधन र एकीकरण गर्न बनेको विधेयक सङ्घीय संसदसमक्ष पेश गर्न स्वीकृति दिने भएको छ ।
मंगलबार बसेको मन्त्रिपरिषद्को बैठकका निर्णयहरु सार्वजनिक गर्दै सरकारका प्रवक्ता सस्मित पोखरेलले निजामती सेवा सम्बन्धी विधेयक सङ्घीय संसदसमक्ष पेश गर्न स्वीकृति दिने जानकारी दिएका हुन् ।
बैठकको मुख्य निर्णयहरूः
१.अमेरिकी सरकारबाट स्वास्थ्य सेवा सुधारका लागि प्राप्त हुने २०.७ मिलियन अमेरिकी डलर बराबरको अनुदान सहायता स्वीकार गर्ने ।
२.पूर्व–पश्चिम राजमार्ग अन्तर्गतको कमला–ढल्केवर–पथलैया सडक खण्ड, गजार्ड खोला साना जलविद्युत आयोजना, बलेफी खोला जलविद्युत आयोजना (४० मे.वा.) र सशस्त्र प्रहरी बल, नेपाललाई तालिम शिक्षालय, गुल्महरू तथा सिमा सुरक्षा पोष्टहरू निर्माण गर्न राष्ट्रिय वन क्षेत्र उपयोग गर्न स्वीकृति प्रदान गर्ने ।
३.पशु वधशाला र मासु जाँच ऐन, २०५५ लाई संशोधन गर्न बनेको विधेयक संङ्घीय संसद समक्ष पेश गर्न स्वीकृति प्रदान गर्ने ।
४.सङ्घीय निजामती सेवा सम्बन्धी कानूनलाई संशोधन र एकीकरण गर्न बनेको विधेयक सङ्घीय संसदसमक्ष पेश गर्न स्वीकृति दिने ।
५. अपाङ्गता भएका व्यक्तिको अधिकार सम्बन्धी ऐन, २०७४ लाई संशोधन गर्न बनेको विधेयक संघीय संसदसमक्ष पेश गर्न स्वीकृति प्रदान गर्ने ।
६.नेपाल प्रशासन सेवा समूहीकरण तर्फको राजपत्राङ्कित विशिष्ट श्रेणीको पदमा सहसचिव श्री आभा श्रेष्ठ कर्णलाई बढुवा गरी मुख्यमन्त्री तथा मन्त्रिपरिषद्को कार्यालय, गण्डकी प्रदेशको प्रमुख सचिव पदमा र नेपाल इन्जिनियरिङ सेवा समूहीकरण तर्फको राजपत्राङ्कित विशिष्ट श्रेणीको पदमा डा. जगदीश्वर कर्माचार्यलाई बढुवा गरी ऊर्जा, जलस्रोत तथा सिँचाइ मन्त्रालयको सचिव पदमा पदस्थापना गर्ने ।
गण्डकी प्रदेशका पूर्वमन्त्री राजीव गुरुङ ‘दीपक मनाङे’ नेपाली कांग्रेसमा प्रवेश गरेका छन्।
निवर्तमान सभापति शेरबहादुर देउवा पक्षले सोमबार मनाङेलाई कांग्रेसमा प्रवेश गराएको हो। पार्टी प्रवेशसँगै उनलाई मनाङ संयोजकको जिम्मेवारी दिइएको छ।
१५औँ महाधिवेशन तयारी समिति, सचिवालय समन्वय समितिका संयोजक दीपकप्रसाद कुइँकेलले मनाङे कांग्रेस प्रवेश गरेको पुष्टि गरेका छन्।
उनका अनुसार मनाङेलाई १५औँ महाधिवेशन तयारी समितिका संयोजक एवं पूर्वमहामन्त्री डा. शशांक कोइरालाले मनाङ संयोजकको जिम्मेवारी दिएका हुन्।
मनाङे यसअघि दुई पटक स्वतन्त्र उम्मेदवारका रूपमा मनाङबाट प्रदेशसभा सदस्यमा निर्वाचित भएका थिए। त्यसपछि उनी नेकपा (एकीकृत समाजवादी) मा समेत सक्रिय भएका थिए। नेकपा बनेपछि भने उनी निष्क्रिय रहेका थिए।
यसअघि साउन २८ गते निवर्तमान सभापति देउवा स्वदेश फर्किँदा मनाङे उनलाई स्वागत गर्न त्रिभुवन अन्तर्राष्ट्रिय विमानस्थल पुगेका थिए।
मनाङे विगतमा नेपाली कांग्रेसको भ्रातृ संस्था नेपाल तरुण दलमा रहेर समेत काम गरेका थिए।
