काठमाडौँ । सङ्घीय मामिला तथा सामान्य प्रशासन मन्त्रालयले ७५३ वटै स्थानीय तह र ७७ वटै जिल्ला समन्वय समितिलाई निर्वाचन आचारसंहिता, २०८२ लागू गर्न, गराउन ‘सर्कुलर’ गरेको छ ।

निर्वाचन आयोगले २०८२ साल माघ ४ गते राति १२ बजेदेखि लागू गरेको आचारसंहिता सम्बन्धित स्थानीय तह र जिल्ला समन्वय समितिले पनि आ–आफ्नो क्षेत्रमा लागू गराउन पत्राचार गरेको मन्त्रालयका शाखा अधिकृत दीपेश कट्टेलले सबै स्थानीय तह र सबै जिल्ला समन्वय समितिलाई जारी गरेको पत्रमा उल्लेख छ ।

सरकारले २०८२ साल पुस १२ गतेको नेपाल राजपत्रमा सूचना प्रकाशित गरी आचारसंहिता सार्वजनिक गरेको थियो । निर्वाचन आयोगले अर्को सूचना जारी नभएसम्मका लागि निर्वाचन आचारसंहिता लागू गरेको हो ।

यही माघ ११ गते सम्पन्न राष्ट्रियसभा निर्वाचन र आगामी फागुन २१ गते हुने प्रतिनिधिसभा सदस्य निर्वाचनका लागि आचारसंहिता लागू गरिएको हो ।

मन्त्रालयले आवश्यक जानकारी तथा कार्यार्थ भन्दै सबै स्थानीय तह र सबै जिल्ला समन्वय समितिलाई पत्राचार गरी निर्वाचन आचारसंहिता लागू गराउन ध्यानाकर्षण गराएको हो । निर्वाचन आचारसंहितामा परिच्छेद १०, अनुसूची ५ र दफा ५५ रहेको छ ।

काठमाडौँ । नेपाल स्कटल्यान्डसँग ७२ रनले पराजित हुँदै आईसीसी टी–२० महिला विश्वकप छनोटको समूह चरणबाटै बाहिरिएको छ । स्कटल्यान्डले दिएको १४१ रनको लक्ष्य पछ्याएको नेपाल १३.५ ओभरमा ६८ रनमा अलआउट भयो ।

समूह चरणमा तीन खेलमा जित र एक खेलमा हार भोगेसँगै नेपाल ग्लोबल छनोटबाटै बाहिरिएको हो । नेपालका लागि ओपनर बिन्दु रावलले सर्वाधिक १४ रन बनाइन्। रोमा थापा १४ रनमा अविजित रहिन्। रुबिना क्षेत्रीले १० रन थपिन्।

अन्य ब्याटरले दोहोरो अंकको स्कोर छुन सकेनन् । त्यसअघि कीर्तिपुरस्थित त्रिवि क्रिकेट मैदानमा नेपालले टस जितेर फिल्डिङ रोजेपछि ब्याटिङ गरेको स्कटल्यान्डस निर्धारित २० ओभरमा १ सय ४० रन बनाउँदा अलआउट भयो ।

काठमाडौँ । नेपाल प्रहरीले ‘फेक रेस्क्यू’ गरी नक्कली कारोबार गर्ने र पर्यटकलाई ठगी गर्ने ६ जनालाई पक्राउ गरेको छ । प्रहरीको केन्द्रीय अनुसन्धान ब्यूरो (सिआइबी) ले फेक रेस्क्यूमा संलग्न विभिन्न ट्राभल कम्पनीका सञ्चालक पक्राउ गरी आइतबार पत्रकार सम्मेलनमार्फत सार्वजनिक गरेको हो ।

पक्राउ पर्नेमा जयराम रिमाल, विवेक पाण्डे, रवीन्द्र अधिकारी, विवेकराज थपलिया, मुक्ति पाण्डे र सुभाष केसी रहेका छन् । पक्राउ परेका रिमाल र पाण्डे माउन्टेन रेस्क्यू सर्भिसमा, अधिकारी र थपलिया नेपाल चार्टर सर्भिस प्रालिमा र पाण्डे र कसी एभरेष्ट एक्सपिरियन्स एन्ड एसिस्टेन्स प्रालिमा आबद्ध रहेका थिए ।

पत्रकार सम्मेलनमा ब्यूरोका प्रमुख, प्रहरी अतिरिक्त महानिरीक्षक (एआइजी) डा मनोज केसीले पक्राउ परेका छ जनामाथि राष्ट्रहितविरुद्धको कसुर, आपराधिक लाभ, सङ्गठित अपराध र सम्पत्ति शुद्धीकरणको मुद्दामा अनुसन्धान जारी रहेको बताए ।

उनले माउन्टेन रेस्क्यू सर्भिस प्रालिले एक हजार २४८ जनामध्ये १७१ जनाको फेक रेस्क्यू गरेको अनुसन्धानबाट खुलेको जानकारी दिए । सोवापत उक्त कम्पनीले १० करोडभन्दा बढी अमेरिकी डलर बीमा दाबी गरेको पाइएको ब्यूरोले जनाएको छ ।

यस्तै, नेपाल चार्टर सर्भिस प्रालिले ४७१ जना रेस्क्यू गर्दा ७५ जनाको फेक रेस्क्यू गरेको खुलेको छ । त्यसबाट उक्त कम्पनीले ८२ लाख डलर माग दाबी गरेको पाइएको छ ।

यसैगरी, एभरेस्ट एक्सपिरियन्स एन्ड एसिस्टेन्स प्रालिले ६०१ जनामध्ये ७१ पर्यटकको शङ्कास्पद रेस्क्यु गरेको खुलेको छ । त्यसबाट उक्त कम्पनीले ११ लाख ५३ हजार अमेरिकी डलर माग दाबी गरेको ब्यूरोले जनाएको छ ।

ब्यूरो प्रमुख केसीले फेक रेस्क्यूको उजुरी अझै आइरहेको बताए ।“विशेषगरी उच्च हिमाली क्षेत्रमा आउने विदेशी पर्यटकको उद्धार र उपचारको आवरणमा गैरकारोबार भएकाबारे उजुरी र विभिन्न सञ्चारमाध्यममा आएको खबरलाई लिएर अनुसन्धान सुरु गरेका थियौँ,” उनले भने,“साढे दुई महिनाको अनुसन्धान गर्दा फेक रेस्क्यूबारे धेरै पाटा खुलेको छन् । थप अनुसन्धान जारी छ ।”

राष्ट्रियसभा निर्वाचनमा नेविसंघका पूर्व केन्द्रीय अध्यक्ष रञ्जित कर्ण र एमाले नेतृ रेखा झाले विपक्षीहरूलाई भारी मतान्तरले पराजित गर्दै विजयको झण्डा गाडेका छन्।

नेपाली कांग्रेसका युवा नेता रञ्जित कर्ण अल्पसंख्यक तथा मधेशी कोटाबाट ८ हजार ९३ मतभार प्राप्त गर्दै निर्वाचित भएका छन्। कांग्रेसभित्र प्रखर वक्ता र जुझारु छविका रूपमा चिनिने कर्णको यो जितलाई युवा पुस्ताको विजयका रूपमा हेरिएको छ। नेविसंघको नेतृत्व गरिसकेका कर्ण अब संघीय संसदको माथिल्लो सदनमा मधेशका मुद्दा र युवाका आवाज उठाउने नयाँ भूमिकामा देखिनेछन्।संविधानसभा सदस्यसमेत रहिसकेका कर्णको यो जितसँगै मधेशमा युवा पुस्ताको नेताको रुपमा स्थापित हुन पुगेका छन् ।

महिला क्लस्टरतर्फ नेकपा एमालेकी नेतृ रेखा झाले ७,२२२ मतभारसहित सानदार जित हासिल गरेकी छन्। उनको जितले मधेशमा एमालेको सांगठनिक शक्ति अझै कसिलो रहेको प्रमाणित गरेको छ। झाले ७ हजारभन्दा बढी मत पाउँदा उनकी निकटतम प्रतिस्पर्धी नेकपाकी शमी कुमारी अग्रवालले १,९४४ मतभारमा चित्त बुझाइन्।

राष्ट्रियसभा निर्वाचनमा सातै प्रदेशमा गठबन्धनले क्लिन स्वीप गर्दा विपक्षी दलहरुको पत्तासाफ भएको छ ।

नेपाली कांग्रेस, नेकपा एमाले र जसपाले गठबन्धन गर्दा विपक्षी नेपाली कम्युनिष्ट पार्टी नेकपाको पत्तासाफ भएको हो ।

कोशीमा गठबन्धनका उम्मेदवारहरु दलित समुहबाट सोमनाथ पोर्तेल, महिलामा रोशनी मेचे र अन्य समुहमा कांग्रेसका सुनिलबहादुर थापा निर्वाचित भएका छन् ।
मधेशमा कांग्रेसका प्रभावशाली नेता रञ्जित कर्ण अल्पसंख्यक तथा मधेशी समुहबाट, एमाले नेतृ रेखा झा महिला कलस्टरतर्फ निर्वाचित भएका छन् । दलितर्फ धमेन्द्र पासवान र अन्य कलस्टर तर्फ जसपाका महन्थ ठाकुर विजयी भएका छन् ।

बागमतीमा पनि गठबन्धनकै उम्मेदवारको बर्चस्व देखिएको छ । जहाँ अन्य कलस्टरतर्फ एमालेका डा. प्रेम प्रसाद दंगाल र महिला समुह तर्फ कांग्रेसकी गिता देवकोटा भारी मतान्तरले जितेका छन् ।
गण्डकीमा कांग्रेसका जगत तिमल्सेना र एमालेकी सम्झना देवकोटाले महिला समुहमा विपक्षीलाई निल्नु न ओकल्नु बनाउँदै राष्ट्रिय सभा सदस्यमा बाजी मारे ।

लुम्बिनीमा पुर्वमन्त्री रामकुमारी झाँक्री एमालेबाट, अपाङ्गतातर्फ कांग्रेसका बासुदेव घिमिरे जंगली र अन्य समुहमा कांग्रेस कै चन्द्रबहादुर केसीले जित हात पारेका छन् ।

कर्णालीमा अन्यतर्फ कांग्रेसका ललितजंग शाही र महिला क्लस्टरबाट एमालेकी मिनासिंह रखाल निर्वाचित भए ।

र सुदुरपश्चिममा अन्य समुहतर्फ कांग्रेसका खम्मबहादुर खाती र महिला कोटा तर्फ एमालेकी लिला कुमारी भण्डारीले बाजी मारेका छन् ।

राष्ट्रिय स्वतन्त्र पार्टीका वरिष्ठ नेता एवं भावी प्रधानमन्त्रीका उम्मेदवार बालेन्द्र शाह (बालेन) सुदूरपश्चिमको चुनावी भ्रमण गर्ने भएका छन्। उनी सोमबार नेपालगन्ज हुँदै कैलाली पुग्ने कार्यक्रम रहेको रास्वपाले जनाएको छ।

बालेनले कैलाली क्षेत्र नं २ मा आयोजना हुने चुनावी सभामा सहभागी बन्नेछन्। रास्वपाबाट कैलाली २ मा उम्मेदवारी दिएका केपी खनालले सोमबार बालेन आफ्नो क्षेत्रमा आउने पुष्टि गरे। ‘उहाँ (बालेन) हाम्रो क्षेत्रबाटै सुदूरपश्चिमको भ्रमण गर्दै हुनुहुन्छ। मेरो क्षेत्रमा आयोजना हुने कार्यक्रममा पनि उहाँ सरिक बन्नुहुन्छ,’ अन्नपूर्णसँग उनले भने।

बालेन फागुन २१ मा हुने प्रतिनिधिसभा निर्वाचनमा झापा ५ मा उम्मेदवारी दिएका छन्। उनले नेकपा एमालेका अध्यक्ष केपी शर्मा ओलीसँग प्रतिस्पर्धा गर्न लागेका हुन्। झापामा उम्मेदवारी दिएपछि पूर्वी पहाडी जिल्लाको चुनावी अभियानमा उनी सहभागीसमेत बनेका थिए।

नेकपा एमालेका अध्यक्ष केपी शर्मा ओलीले सामाजिक सञ्जाल फेसबुकमार्फत पब्लिक डिबेटका लागि आफू तयार रहेको घोषणा गरेपछि बालेनले त्यसमा प्रतिक्रिया दिएका छन्।

बालेनले सामाजिक सञ्जालमा प्रतिक्रिया दिँदै आफूलाई आतङ्कवादी कहिले स्वीकार्ने भनी प्रश्न समेत गरेका हुन् ।

उनले लेखेका छन्, ‘आफूलाई देश जलाउनेको रूपमा स्वीकार गरेको ठिकै छ, हुन पनि नेताहरूको घर कता कता छन् तपाईंहरूलाई नै थाहा थियो। तपाईंहरूले आफैं २३ गते बच्चाहरू मारेको आतङ्कवाद लुकाउन २४ गते जलाएको हो। आफूलाई आतङ्कवादी चाहिँ कहिले स्वीकार्ने होरुरु। त्यसपछि अरू कुरा गरौँला।’

उनले थपे, ‘७६ जना बच्चाको हत्यारा र उसको मतियारसँग एउटै मञ्चमा उभिनु भनेको म पनि त्यसमा सामेल भएको बुझिनेछ।’

बालेनको यो प्रतिक्रिया केपी ओलीको पब्लिक डिबेट प्रस्ताव र चुनावी बहसको अवसरमा आएको हो, जसले सामाजिक सञ्जाल तताएको छ ।

काठमाडौं– नेकपा एमालेका अध्यक्ष केपी शर्मा ओलीले सार्वजनिक बहस (पब्लिक डिबेट) का लागि आफू तयार रहेको बताएका छन्।

सामाजिक सञ्जाल फेसबुकमार्फत धारणा सार्वजनिक गर्दै उनले चुनावी प्रतिस्पर्धालाई देश बनाउने र देश जलाउने पक्षबीचको प्रतिस्पर्धाको रूपमा चित्रण गरेका छन्।

अध्यक्ष ओलीले अहिले नयाँ र पुराना सबै दल निर्वाचनमा होमिएको उल्लेख गर्दै आफ्नो पार्टी नेकपा एमाले देश बनाउने पक्षबाट मैदानमा उत्रिएको दाबी गरेका छन्।

पछिल्लो समय सार्वजनिक बौद्धिक वृत्तबाट प्रमुख नेताहरूबीच पारदर्शी बहसको माग उठिरहेकोप्रति संकेत गर्दै उनले त्यसलाई सकारात्मक रूपमा लिएको बताएका छन्।

‘फ्रेमिङ गरेर सामाजिक सञ्जालमा ल्याइएका प्रचार सामग्री देखाएर आफ्नो वास्तविक चरित्र लुकाउने प्रवृत्ति बढेकाले पब्लिक डिबेटको माग आएको हुन सक्छ,’ ओलीले लेखेका छन्।

उनका अनुसार यसपटकको निर्वाचनमा ऐतिहासिक भूमिका खेलेका दलदेखि अघिल्लो निर्वाचनपछि खुलेका र हालै गठन भएका नयाँ दलहरू समेत प्रधानमन्त्रीको उम्मेदवार तोकेर मैदानमा उत्रिएका छन्।

देशको नेतृत्व गर्न चाहने दलहरूले अघिल्लो कार्यकालमा के काम गरे, अब के गर्ने योजना र रोडम्याप के हो भन्ने विषयमा आमनेसामने बहस हुनुपर्ने ओलीको धारणा छ ।

‘यस्ता प्रश्नहरूमा आमनेसामने बहसको माग अत्यन्त सकारात्मक छ,’ ओलीले लेखेका छन्, ‘पब्लिक डिबेटमा उभिएर हामीले के ग¥यौं र अब कसरी काम गर्छौं भन्ने एजेण्डा प्रस्तुत गर्न म तयार छु।’

उनले चुनावपछि प्रधानमन्त्रीको उम्मेदवार बनेका सबै नेतासँग सिधा प्रश्न सोध्ने र आफ्ना एजेण्डा सार्वजनिक रूपमा राख्ने प्रतिबद्धता पनि व्यक्त गरेका छन्। साथै, यस्तो पब्लिक डिबेट आयोजना गरी सबै पक्षलाई सहभागी गराउन आयोजकहरूलाई आग्रह गरेका छन्।

काठमाडौँ । राष्ट्रिय स्वतन्त्र पार्टीका वरिष्ठ नेता बालेन्द्र साहले पूर्वी नेपालका विभिन्न जिल्लामा केन्द्रित राजनीतिक भेटघाट तथा पार्टीगत गतिविधि पूरा गरी काठमाडौँ फर्किएका छन्।

उनको भ्रमण साविक मेची अञ्चलका तीन जिल्ला र कोशी अञ्चलका तीन जिल्लामा केन्द्रित रहेको पार्टी स्रोतले जनाएको छ। यस क्रममा उनले स्थानीय कार्यकर्ता, उम्मेदवार तथा सर्वसाधारणसँग प्रत्यक्ष संवाद गरेका थिए।

बालेन्द्र शाहले माघ ६ गते झापा निर्वाचन क्षेत्र नम्बर ५ बाट उम्मेदवारी दर्ता गराएपछि भोलिपल्ट काठमाडौँस्थित निवासमा आएका शुभेच्छुकहरूसँग छलफल गरेका थिए। माघ ८ गते बिहान इलाम पुगेका उनले त्यहाँ पार्टीका उम्मेदवार र स्थानीय नागरिकसँग संवाद गरेपछि पाँचथर र ताप्लेजुङ पुगेर समर्थक तथा शुभचिन्तकसँग भेटघाट गरेका थिए।

शुक्रबार बिहान पाथिभराको दर्शनपछि उनी तेह्रथुम हुँदै म्याग्लुङ बजार पुगेका थिए। सचिवालयका अनुसार मध्यपहाडी लोकमार्ग आसपासका विभिन्न बजारमा स्थानीय बासिन्दासँग भेटघाट गरिएको थियो। शनिबार बिहान म्याग्लुङमा संक्षिप्त छलफलपछि उनी संखुवासभाको चैनपुर पुगेका थिए।

चैनपुरमा प्रतिनिधि सभा सदस्यका उम्मेदवार मिङ्मा शेर्पासहित पार्टी पदाधिकारी र स्थानीय व्यक्तिहरूसँग छलफल गर्दै शाहले पार्टीका उम्मेदवारलाई विजयी गराउन आग्रह गरेका थिए। सो अवसरमा उनले पूर्वी नेपाल पर्यटन, कृषि र पूर्वाधार विकासका दृष्टिले सम्भावनायुक्त क्षेत्र रहेको उल्लेख गर्दै निर्वाचित जनप्रतिनिधिले यी क्षेत्रमा प्राथमिकता दिनुपर्ने धारणा व्यक्त गरेका थिए।

फर्किने क्रममा उनले धनकुटामा पनि संक्षिप्त भेटघाट गरेका थिए। इलाम, पाँचथर, ताप्लेजुङ, तेह्रथुम, संखुवासभा र धनकुटा समेटिएको भ्रमण पूरा गरी उनी शनिबार साँझ विराटनगर विमानस्थलबाट यति एयरलाइन्सको उडानमार्फत काठमाडौँ फर्किएका हुन्।

काठमाडौँ । प्रतिनिधिसभा सदस्य निर्वाचन २०८२ अन्तर्गत समानुपातिक निर्वाचन प्रणालीबमोजिम राजनीतिक दलले पेस गरेको बन्द सूचीमा सूचीकृत तीन जना उम्मेदवारकाविरुद्ध उजुरी परेका छन् ।

निर्वाचन आयोगले शनिबनर जारी गरेको विज्ञप्तिमा नेपाल कम्युनिष्ट पार्टी (एमाले) को तर्फबाट बन्द सूचीको क्रम सङ्ख्या ९७ मा नाम रहेका सिरहाका चन्दे्रश्वर मण्डल, नेपाली कम्युनिष्ट पार्टीको तर्फबाट बन्दसूचीको क्रम सङ्ख्या ६२ मा नाम रहेका ललितपुरका जीवन लामा र राष्ट्रिय प्रजातन्त्र पार्टीको तर्फबाट बन्द सूचीको क्रम सङ्ख्या ३७ मा नाम रहेका पाख्रिबास–८, धनकुटाका कुमारबहादुर थापाका बारेमा आयोगमा उजुरी परेको उल्लेख छ ।

विज्ञप्तिमा मण्डल आदिवासी तर्फको व्यक्ति भएकाले उनको नाम मधेसी समुदायमा राख्न नमिल्ने भनी पिपरा गाउँपालिका–१ महोत्तरीका सन्तोषकुमार साहले उजुरी गरेको जनाइएको छ ।

यस्तै, ललितपुरका लामा अपाङ्गता नभएको व्यक्ति भए पनि अपाङ्ग भनिएको उल्लेख गरिएको भनी तेमाल–२ काभ्रेपलाञ्चोकका रहरसिंह तामाङले उजुरी गरेका हुन् ।

धनकुटाका थापाले उत्तरपानी चियाबगानको जग्गा अनधिकृत रूपमा बेचबिखन गरेको विषयमा अख्तियार दुरुपयोग अनुसन्धान आयोगमा उजुरी परी विचाराधीन रहेको भनी पाख्रिबास–५, धनकुटाकी पवित्रा श्रेष्ठले उजुरी गरेको विज्ञप्तिमा उल्लेख छ ।

सम्बन्धित पक्षले आ–आफ्नो सबुद प्रमाणसाथ माघ १३ गते बिहान १० बजेदेखि दिउँसो ४ बजेभित्र आयोगमा अनिवार्य रूपमा उपस्थित हुन सूचित गरिएको आयोगले जनाएको छ ।

आयोगले बोलाएको समयमा उपस्थित नभए कानुनले व्यवस्था गरेबमोजिम हुने जनाइएको छ ।