काठमाडौँ। प्रतिनिधिसभा सदस्यका लागि उम्मेदवारी दिएका उम्मेदवारले आज दिउँसो १ः०० बजेसम्म नाम फिर्ता लिन सक्ने निर्वाचन आयोगले जनाएको छ ।
निर्वाचन कार्यतालिकाअनुसार आज बिहान १०ः०० देखि दिउँसो १ः०० बजेसम्म उम्मेदवारी फिर्ता लिन सक्नेछन् । यस्तै आजै दिनको १ः०० देखि ३ः०० बजेसम्ममा उम्मेदवारको अन्तिम नामावली प्रकाशन गरिनेछ । आयोगका अनुसार अपराह्न ४ः०० देखि साँझ ७ः०० बजेसम्ममा उम्मेदवारलाई निर्वाचन चिह्न प्रदान गरिनेछ ।
पहिलो हुने निर्वाचित हुने निर्वाचन प्रणालीतर्फको निर्वाचन कार्यक्रमअनुसार माघ ७ गते दाबीविरोधमा उजुरी दिने अवधि तोकिएको थियो । त्यस दिन बिहान १०ः०० देखि दिउँसो ३ः०० बजेसम्मका लागि समय तोकिएको छ । सोही दिन दिउँसो ३ः०० बजेदेखि बिहीबार बेलुका ५ः०० बजेसम्ममा मनोनयनपत्र र उजुरीउपर जाँचबुझ एवं निर्णय गरी उम्मेदवारको नामावली प्रकाशन गरिएको छ ।
देशभरका एक सय ६५ निर्वाचन क्षेत्रमा तीन हजार ४८६ उम्मेदवारी दर्ता भएको छ । यही माघ ६ गते देशभर एकैपटक मनोनयनपत्र दर्ता सम्पन्न भएको हो । कुल उम्मेदवारीमध्ये तीन हजार ८९ पुरुष, तीन सय ९६ महिला तथा अन्य एक जना रहेका छन् ।
प्रतिनिधिसभाको निर्वाचन आगामी फागुन २१ गते हुँदैछ । कुल दुई सय ७५ सदस्यीय प्रतिनिधिसभामा समानुपातिक निर्वाचन प्रणालीमार्फत एक सय १० जना र प्रत्यक्ष निर्वाचन प्रणालीमार्फत एक सय ६५ सदस्य निर्वाचित हुनेछन् ।
काठमाडौं । विद्या, बुद्धि, कला र संगीतकी अधिष्ठात्री देवी सरस्वतीको विशेष आराधना गर्दै आज देशभर उल्लासका साथ श्रीपञ्चमी (वसन्त पञ्चमी) पर्व मनाइँदै छ । ऋतुहरूको राजा मानिने ‘वसन्त ऋतु’ को आगमनको सन्देश दिने आजको दिनलाई ज्ञान र सिर्जनाको उत्सवका रूपमा लिने गरिन्छ ।
आज बिहानैदेखि देशभरका सरस्वती मन्दिरहरूमा विद्यार्थी, शिक्षक, साहित्यकार तथा कलाकर्मीहरूको बाक्लो उपस्थिति रहेको छ । काठमाडौं उपत्यकाभित्रका ऐतिहासिक तथा धार्मिक महत्त्व बोकेका शक्तिपीठहरूमा बिहानैदेखि दर्शनार्थीको लामो लाइन लागेको छ ।
विशेषगरी ललितपुरको लेलेस्थित सरस्वती कुण्ड, भक्तपुरको थिमीस्थित सरस्वतीखेल, काठमाडौंको विशालनगरस्थित नील सरस्वती, पशुपति आर्यघाटको सरस्वती मन्दिर, मैतिदेवी तथा स्वयम्भूस्थित सरस्वती स्थानमा पूजाअर्चना गर्नेहरूको घुइँचो देखिएको छ ।
वैदिक कालदेखि नै सरस्वतीलाई ज्ञानकी देवीका रूपमा पूजा गर्ने परम्परा रहिआएको छ । आजको दिनलाई ‘श्रीपञ्चमी’ वा ‘सरस्वती जयन्ती’ का रूपमा मनाउँदै बालबालिकाहरूलाई अक्षराम्भ (पहिलो अक्षर लेख्न सिकाउने) गराउने प्रचलन छ । अभिभावकहरू आफ्ना नानीबाबुहरूलाई विद्यालय वा मन्दिरमा लगेर अक्षर चिनाउन व्यस्त देखिन्छन् । आजबाट सुरु गरिएको शिक्षा वा कुनै पनि कला साधना पूर्ण हुने जनविश्वास रहिआएको छ ।
त्यस्तै, आजको दिन बालबालिकाको नाक-कान छेडाउनका लागि पनि उत्तम मानिन्छ । विद्यालयहरूमा आज विशेष पूजा समारोह आयोजना गरिएका छन् भने संगीत र कला प्रशिक्षण केन्द्रहरूमा वाद्ययन्त्र, रङ र पुस्तकलाई सरस्वतीकै प्रतीक मानेर पूजा गर्ने परम्परा छ ।
श्रीपञ्चमीको अवसरमा राज्यका तर्फबाट गरिने विशेष परम्परा ‘वसन्त श्रवण’ आज हनुमानढोका दरबारमा हुँदैछ । दरबारस्थित नासलचोकमा आयोजना हुने विशेष समारोहमा राष्ट्रपतिले वसन्त श्रवण गर्ने कार्यक्रम तय भएको छ । उक्त समारोहमा उपराष्ट्रपति, प्रधानमन्त्री लगायतका विशिष्ट व्यक्तित्वहरूको सहभागिता रहने चलन छ ।
काठमाडौं – राष्ट्रिय स्वतन्त्र पार्टी (रास्वपा) वरिष्ठ नेता बालेन्द्र शाह (बालेन)ले पाथिभरा माताको दर्शन गरेका छन् । बिहीबार साँझ ताप्लेजुङ पुगेका बालेन शुक्रबार बिहान पाथिभराको मन्दिर दर्शन गर्न पुगेका हुन् ।
झापा–५ का प्रतिनिधि सभा सदस्य उम्मेदवार बालेन बिहीबार इलाम, पाँचथर हुँदै चुनावी अभियानका लागि ताप्लेजुङ पुगेका हुन्।
काठमाडौं । सरकारले गत भदौ २३ र २४ को जेनजी आन्दोलनका घटना छानबिन गर्न गठन गरेको जाँचबुझ आयोगको म्याद थप गर्ने निर्णय गरेको छ ।
बिहीबार दिउँसो बसेको मन्त्रिपरिषदको बैठकले आयोगको म्याद २० दिन थप गर्ने निर्णय गरेको गृहमन्त्री ओमप्रकाश अर्यालले जानकारी दिएका छन् ।
आयोगको म्याद दोस्रोपटक थपिएको हो । यसअघि पुस ३ गते बसेको मन्त्रिपरिषद् बैठकले आयोगको म्याद एक महिना थपेको थियो ।प्रतिवेदन लेखनको काम नसकिएकाले आयोगले म्याद थपका लागि आग्रह गरेको थियो ।
कैलाली-१ बाट उम्मेदवार रहेका नाउपा नेपालका संरक्षक रेशम चौधरीको उम्मेदवारी खारेज भएको छ । उनीविरुद्धको उजुरीमा छानबिन गर्दै निर्वाचन अधिकृतको कार्यालयले चौधरीको उम्मेदवारी खारेजीको निर्णय गरेको हो ।
निर्वाचन अधिकृत देवराज भारतीले गरेको निर्णय आदेशमा जन्मकैदको सजाय पाएका चौधरीलाई राष्ट्रपतिबाट माफी भएको देखिएता पनि मुलुकी फौजदारी कार्यविधि संहिता, २०७४ को दफा १५९ को उपदफा (१०) बमोजिम राष्ट्रपतिबाट माफी भएको कारणले अदालतको फैसला बदर हुने छैन भन्ने समेतको मौजुदा कानूनी व्यवस्था रहेको र निर्वाचन आयोगको मिति २०८०।११।२४ गतेको निर्णयबाट निज रेशमलाल चौधरी राजनीतिक दलको सदस्य समेत बन्न अयोग्य हुने उल्लेख छ ।
उनीविरुद्ध २०७२ भदौ ७ को टीकापुर हत्याकाण्डको मुख्य योजनाकारका रूपमा मुद्दा दायर भएको थियो । कैलाली जिल्ला अदालतले २०७५ फागुन २२ गते उनलाई दाेषी ठहर गरेको थियो ।
कैद भुक्तानीका लागि उनी कारागार कार्यालय डिल्लीबजारमा राखिएका थिए । १५ वर्ष कैद माफी गर्न सरकारले गरेको सिफारिस बमोजिम राष्ट्रपतिले आममाफी दिएर उनी रिहा भए । गणतन्त्र दिवसको अवसरमा उनलाई २०८० जेठ १५ गते रिहा गरिएको हो । संविधानको धारा २७६ र मुलुकी फौजदारी कार्यविधि संहिताको दफा १५९ अनुसार उनी रिहा भएका हुन् ।
काठमाडौं- नेपाली कांग्रेसका नेता डा. शेखर कोइरालाले पार्टीको एकता जोगाउन आफूले मध्यमार्गी बाटो रोजेको जिकिर गरेका छन् ।
बिहीबार मोरङ क्षेत्र नम्बर ६ स्थित सुन्दरहरैँचामा कांग्रेसका समर्थकहरूसँग कुराकानीका क्रममा कोइरालाले आफू दोस्रो विशेष महाधिवेशनमा नगएर पार्टी विभाजन रोक्न भूमिका खेलेको बताए ।
त्यसबेला एउटा समूह विशेष महाधिवेशन र अर्को नियमित महाधिवेशन भनेर हिँड्दा आफूले मध्यमार्गी बाटो रोजेको उनले बताएका छन् । ‘त्यसैले पार्टी नफुटोस् भनेर मैले बीचको बाटो लिएँ’, उनले भने ।
आफू विशेष महाधिवेशनको हलमा गएको भए पार्टी दुई टुक्रा हुने निश्चित रहेको उनले सुनाए । ‘म त्यो हलमा गएको भए पार्टी दुई टुक्रा हुन्थ्यो,’ उनले भने ।
विशेष महाधिवेशनको हलमा जाँदा सभापति बन्ने अवसर पनि पाउने अवस्था रहेको उनको भनाइ थियो । तर पार्टी दुई टुक्रा हुने देखेपछि त्यहाँ नगएको उनले जिकिर गरे । ‘त्यहाँ गएको भए म पार्टी सभापति म बन्थेँ, बन्दैनथे त्यो बेग्लै कुरा हो। तर, पार्टी दुई टुक्रा हुन्थ्यो,’ कोइरालाले भने ।
काठमाडौं- राष्ट्रिय प्रजातन्त्र पार्टी (राप्रपा) बाट झापा क्षेत्र नम्बर २ का उम्मेदवार स्वागत नेपाललाई नेपाल प्रहरीको साइबर ब्यूरोले बोलाएको छ।
पार्टीका प्रवक्ता मोहनकुमार श्रेष्ठले झापा–२ का पार्टी उम्मेदवार नेपाललाई सरकारी संयन्त्रले दबाब दिन खोजेको आरोप लगाएका छन् ।
श्रेष्ठले स्वागत नेपाल अब एक्लो नरहेको उल्लेख गरेका छन् । उनले दिवंगत वरिष्ठ नेता दीपक बोहोराले अस्वस्थ अवस्थामै एक शब्द नबोली चुनाव लडेर बहालवाला गृहमन्त्रीलाई पराजित गरेको इतिहास राप्रपासँग रहेको स्मरण गराए ।
श्रेष्ठले भने, ‘झापा–२ का उम्मेदवार, अधिवक्ता स्वागत नेपालले विगतमा दिएको अभिव्यक्तिका आधारमा अहिले सरकारी संयन्त्रले निरुत्साहित गर्ने प्रयास गरिरहेको छ, जुन आपत्तिजनक छ ।’ उनले स्वागत नेपाल नबोल्ने वा कानुन नजान्ने व्यक्ति नभएको स्पष्ट पारे ।
राप्रपाले देशभर उम्मेदवारी दिएर कुशासन र भ्रष्ट व्यवस्थाविरुद्ध वैकल्पिक धार सिर्जना गरेपछि सरकार राप्रपाका उम्मेदवारविरुद्ध अनावश्यक र पुराना विषय उठाएर आक्रमणमा उत्रिएको श्रेष्ठको आरोप छ ।
यसैक्रममा झापा–२ का उम्मेदवार स्वागत नेपाललाई साइबर ब्यूरो भोटाहिटीबाट फोन गरी उपस्थित हुन भनिएको उनले बताएका छन् ।
स्वागत नेपाल पार्टीमा समाहित हुनुअघि दिएका अभिव्यक्ति र राष्ट्रिय एकता दिवसका अवसरमा भृकुटीमण्डपमा भएको कार्यक्रममा बोलेका विषयलाई आधार बनाएर पक्राउ गर्न खोजिएको उनले बताए । ती अभिव्यक्ति दिँदा स्वागत नेपाल राप्रपामा आबद्ध भइनसकेको पनि उनले उल्लेख गरेका छन् ।
सिंहदरबार जलाउने अभिव्यक्ति दिनेहरूले व्यवहारमै त्यस्तो काम गरिसक्दा पनि स्वागत नेपाललाई बोलेकै आधारमा दुःख दिने नियत अवाञ्छित भएको श्रेष्ठको भनाइ छ ।
प्रवक्ता श्रेष्ठले दलको टिकट लिएर चुनावमा होमिएका उम्मेदवार पार्टीले तोकेको तालिकाअनुसार अघि बढ्नुपर्ने उल्लेख गरेका छन् ।
स्वागत नेपाल अहिले झापा–२ को चुनावी प्रचारमा व्यस्त रहेको श्रेष्ठले बताए । यदि सरकार प्रचारमा सहयोग गर्न लागेको हो भने स्वागतयोग्य भए पनि अनावश्यक दुःख दिएर चुनावी गतिविधि अवरुद्ध गर्ने प्रयास सह्य नहुने चेतावनी उनले सरकारलाई दिएका छन् ।
काठमाडौँ । नेकपा एमालेका सचिव महेश बस्नेतले राष्ट्रिय स्वतन्त्र पार्टीका वरिष्ठ नेता बालेन्द्र साहले प्रयोग गरेको भाषिक अभिव्यक्तिलाई लिएर आफूबाट सार्वजनिक रूपमा भएको टिप्पणीप्रति क्षमा व्यक्त गरेका छन्।
जनकपुरमा आयोजित रास्वपाको चुनावी सभामा साहले मैथिली भाषामा सम्बोधन गर्ने क्रममा ‘मधेसी छौरा प्रधानमन्त्री बन्ने’ भन्ने भावको अभिव्यक्ति दिएका थिए। सोही सन्दर्भमा मैथिली भाषाको अर्थ के लाग्छ भन्ने विषयमा बस्नेतले राखेको जिज्ञासालाई केही व्यक्तिहरूले गलत आशयका साथ प्रस्तुत गरेको उनको भनाइ छ।
बस्नेतले बिहीबार सामाजिक सञ्जालमार्फत आफ्नो धारणा सार्वजनिक गर्दै मधेस, मैथिली भाषा, संस्कृति र पहिचानप्रति आफू सधैँ सम्मानशील रहेको स्पष्ट पारे। आफूले नबोलेका वा फरक आशय निहित नभएका विषयलाई तोडमोड गरी प्रचार गरिएकोप्रति आपत्ति जनाउँदै उनले यस्ता प्रचारबाट भ्रमित नहुन आग्रह गरेका छन्।
उनले उक्त प्रक्रियामा कसैको भावना अनाहकमा आहत भएको भए त्यसप्रति आत्मालोचना गर्दै क्षमायाचना गरेका छन्।
काठमाडौँ । आइसिसी महिला टी-२० विश्वकप ग्लोबल छनोटको आफ्नो दोस्रो खेलमा पनि नेपाल पराजित भएको छ । नेपाल २ रनले पराजित भएको हो ।
१४१ रनको लक्ष्य पछ्याएको नेपालले २० ओभरमा ७ विकेट गुमाएर १३८ रन मात्र बनाउन सक्यो । अन्तिम ओभरमा १३ रन आवश्यक हुँदा रुबिना क्षेत्री र सीता राना मगर मिलेर १० रन मात्र जोड्न सके ।
त्यसअघि नेपाललाई २४ बलमा ४८ रन आवश्यक हुँदा सीता र रुबिना मिलेर खेललाई अन्तिम ओभरसम्म पुर्याएका थिए । रुबिनाले अविजित ३७ रन, सीता रानामगरले अविजित २७ रन बनाइन् । बिन्दु रावलले १८ रन बनाइन् ।
नेदरल्यान्ड्सका लागि इसाबेल भान डर वोनिङले ३ विकेट लिइन् । सिल्भर सिगर्स, रोबिन रिके र कारोलिन डे लाङले १-१ विकेट लिए ।
त्यसअघि टस जितेर पहिले ब्याटिङ गरेको नेदरल्यान्ड्सले २० ओभरमा ५ विकेट गुमाएर १४० रन बनाउँदै नेपाललाई १४१ रनको लक्ष्य दिएको थियो।
नेदरल्यान्ड्सका लागि कप्तान बाबेट डे लिडले सर्वाधिक ४९ रन बनाइन् । स्टेर कालिसले ३० रन बनाइन् । रोबिन रिके १९ तथा आइरिस ज्विलिङ १४ रनमा अविजित रहे ।
नेपालका लागि रुबिना क्षेत्रीले २ विकेट लिइन् भने रिया शर्मा, सुमन विष्ट र पूजा महतोले १-१ विकेट लिए ।
नेपाल यसअघि पहिलो खेलमा थाइल्यान्डसँग पराजित भएको थियो । नेदरल्यान्ड्स आजको जितसँगै सुपर सिक्समा पुगेको छ ।
काठमाडौं । काठमाडौं उपत्यकाका सार्वजनिक सवारी साधनमा आजदेखि सिसी क्यामरा जडान सुरु गरिएको छ । काठमाडौं उपत्यका ट्राफिक प्रहरी कार्यालयका प्रवक्ता नरेशराज सुवेदीले आज एक समारोहकाबीच काठमाडौं उपत्यका प्रहरी कार्यालय प्रमुख, प्रहरी अतिरिक्त महानिरीक्षक ईश्वर कार्कीबाट उक्त क्यामरा जडानको थालनी भएको जानकारी दिए ।
उनले भने, “यातायात व्यवसायीसँगको छलफलपछि आजदेखि गाडीमा सिसी क्यामरा राख्ने अभियान थालिएको हो, यसलाई तीव्र गतिमा अघि बढाउने छौँ, जसले सवारी दुर्घटना न्यूनीकरण, अपराध नियन्त्रण तथा दुव्र्यवहार र चोरी नियन्त्रणमा सहयोग पुग्ने अपेक्षा छ ।”
उनले सिसी क्यामरासँगै ड्यासबोर्ड क्यामरा पनि जडान थालनी गरिएको बताए । दुर्घटनापछि चालक भाग्ने, बसभित्रै पनि कूटपिटका घटना हुने तथा यात्रुमाथि दुव्र्यवहारलगायत घटना भएका गुनासा व्यापक आइरहेकाले क्यामरामार्फत निगरानी हुने र तथ्य थाहा पाइने हुँदा सवारीसाधनमा सिसी क्यामरा राख्ने विषयलाई प्राथमिकतामा राखिएको प्रवक्ता सुवेदीले बताए ।
यस्तै ड्यासबोर्डमार्फत बाहिरका गतिविधिका साथै दुर्घटनामा कसको कमजोरी भएको हो भनेर समेत पत्ता लाग्ने हुँदा यसलाई तीव्रताका साथ अघि बढाइने उनले बताए । सो समारोहमा प्रहरी अतिरिक्त महानिरीक्षक कार्कीले सार्वजनिक यातायातमा सबैभन्दा बढी नागरिकको पहुँच हुने भएकाले यसलाई प्रविधियुक्त बनाउँदा थप सुरक्षित हुने बताए ।
आजै काठमाडौँ उपत्यकाका विभिन्न स्थान र मितिमा चोरी भएका ५० ओटा मोटरसाइकल र स्कुटर खोजतलास गरी प्रहरीले धनीलाई बुझाएको छ ।
