नेपाली कांग्रेसका निवर्तमान सभापति शेरबहादुर देउवाले आफूविरुद्ध भइरहेका षड्यन्त्र र कानुनी उल्झनहरूबाट आफू विचलित नहुने बताएका छन् ।

बिहीबार पाँच महिनापछि स्वदेश फर्किएका देउवाले त्रिभुवन अन्तर्राष्ट्रिय विमानस्थलबाट आफ्नो निवास चुनदेवीमा पुगेपछि नेता कार्यकर्तालाई सम्बोधन गर्दै त्यस्तो बताएका हुन् ।

उनले आफ्नो ५० वर्ष लामो राजनीतिक जीवनमा भ्रष्टाचारको कुनै दाग नलागेको दाबी गरेका छन् ।

देउवाले आफूविरुद्ध भएका विभिन्न उजुरी र छानबिनमा अदालत जान आफू नडराउने बताए । ‘अदालतसम्म गाको छ, १० पटकसम्म आउनू भन्छ । १० पटक आयो, केही छैन भन्छ । ११ पटक आयो, २० पटक आयो, केही छैन । किनभने अहिलेसम्म ५० वर्ष काम गर्‍या छ, एक रुपैयाँ कतैबाट तलमाथि भन्या कुरा छैन,’ उनले भने । 

मन्तव्यका क्रममा उनले पूर्वराजा ज्ञानेन्द्रको विषय पनि उल्लेख गरे । ‘राजा ज्ञानेन्द्रले त सकेनन्, अरुले सक्लान् यहाँ ?,’ उनले लोकतन्त्र र गणतन्त्रलाई कसैले पनि उल्ट्याउन नसक्ने दाबी गरे । 

मुलुकमा गणतन्त्र आफूले चाहेर मात्र नभई जनताले चुनेको संविधानसभाले ल्याएको दाबी देउवाले गरे । गणतन्त्रको रक्षाका लागि जनता नै सचेत रहेको उनले बताए । ‘मैले चाहेर आउने र मैले चाहेर जाने कुरा होइन । यो देशको सबैभन्दा ठूलो कुरा हो । यो देशका जनता नेपालका मालिक हुन् । यो मालिकले जे भन्छ त्यही हुन्छ,’ उनले भने । 

नेपाली कांग्रेसका नेता डा. शशांक कोइरालाले पार्टीका वैधानिक सभापति शेरबहादुर देउवा नै रहेको दाबी गरेका छन्।

स्वास्थ्योपचारपछि बिहीबार स्वदेश फर्किएका देउवालाई त्रिभुवन अन्तर्राष्ट्रिय विमानस्थलमा स्वागत गर्न पुगेका कोइरालाले सभापतिको जिम्मेवारीका विषयमा कुनै कानुनी अड्चन वा ‘स्टे अर्डर’ नरहेको बताएका हुन्।

उनले देउवाकै नेतृत्वमा कांग्रेसलाई बलियो बनाउनुपर्नेमा जोड दिँदै पार्टीभित्रको आन्तरिक एकता कायम गर्नुपर्ने बताए। पार्टीबाट बाहिरिएका पक्षलाई पुनः मूलधारमा ल्याउन आफूहरूको प्रयास जारी रहने उनको भनाइ थियो।

संस्थापन पक्षप्रति लक्षित गर्दै कोइरालाले कांग्रेस विभाजित अवस्थामा रहेको टिप्पणी गरे।“सानेपा कांग्रेस छुट्टिएर गएको छ, उनीहरू आउनुपर्ने हो। उनीहरूले अनादर गर्छन्, के गर्छन् उनीहरूको कुरा हो। देउवा पार्टीको सभापति नै हो। अहिले पनि नेपाली कांग्रेसका सभापति शेरबहादुर देउवा नै हो। उहाँ नै सभापति हो। स्टे अर्डर आएको छ कि छैन ? हाम्रो प्रयास एक गर्न रहन्छ,” उनले भने।

कोइरालाले पार्टीभित्र देखिएको असन्तुष्टि संवादमार्फत समाधान गर्नुपर्ने उल्लेख गर्दै ढिलोचाँडो सबै पक्ष एक ठाउँमा आउनुको विकल्प नरहेको बताए।

रोल्पाको थबाङ गाउँपालिका–५ कोटलबारामा अविरल वर्षापछि गएको पहिरोमा परी मृत्यु हुनेको संख्या ७ पुगेको छ । पहिरोमा परी अझै ५ जना बेपत्ता छन् भने दुई जना घाइते भएका छन्।

साउन २७ गते साँझ गएको पहिरोमा परी स्थानीय १८ वर्षीया शान्ति पुन मगर, ६५ वर्षीय कमलबहादुर पुन मगर, ४० वर्षीया जुनकुमारी पुन मगर, ९ वर्षीय अशिम पुन मगर, ६ वर्षीय अशोक पुन मगर, ७५ वर्षीय दलबहादुर पुन मगर र ७१ वर्षीया मनरखी पुन मगरको मृत्यु भएको हो।

बेपत्ता हुनेमा ८० वर्षीय अजम्बर पुन मगर, ७८ वर्षीय बलबहादुर पुन मगर, ७२ वर्षीय लिलबहादुर पुन मगर, ७१ वर्षीया मनि पुन मगर र ६७ वर्षीया हस्तकला पुन मगर छन्।

पहिरोमा परी घाइते भएका २२ वर्षीय हिमाल पुन मगर र २५ वर्षीय संजय घर्ती मगरलाई थबाङ स्वास्थ्य चौकीबाट थप उपचारका लागि बुटवल पठाइएको छ।

बेपत्ताको खोजीका लागि नेपाली सेना, सशस्त्र प्रहरी र नेपाल प्रहरीको संयुक्त टोली परिचालन गरिएको छ। पहिरोबाट बगेका तीन जनाको शव प्यूठानको स्वर्गद्वारी नगरपालिका र माण्डवी गाउँपालिका क्षेत्रमा पर्ने माडी खोलाको किनारमा फेला परेपछि प्यूठानबाट समेत विपद् व्यवस्थापन टोली खोजीमा खटिएको छ।

लगातार वर्षासँगै लेदोसहित पहिरो खसिरहेकाले उद्धार तथा खोजी कार्यमा कठिनाइ भइरहेको प्रहरीले जनाएको छ। पहिरोले कमलबहादुर पुन मगरको घरसहित अन्य घर तथा गोठ पुरिएका छन् भने पशुचौपायासमेत बेपत्ता भएका छन्।

नेपाली कांग्रेसका पूर्वसभापति शेरबहादुर देउवाले आफू शक्ति प्राप्त गर्न नभई राष्ट्रिय एकता सुदृढ गर्न फर्किएको बताएका छन्।

स्वास्थ्य उपचारपछि स्वदेश फर्किएलगत्तै बिहीबार सामाजिक सञ्जालमार्फत धारणा सार्वजनिक गर्दै देउवाले आफ्नो स्वास्थ्यबारे चासो राख्ने, चिन्ता गर्ने तथा स्वास्थ्यलाभको कामना गर्ने सबैप्रति आभार व्यक्त गरेका छन्।

देउवाले नेपाली कांग्रेसले युवा पुस्ताले माग गरेको परिवर्तनलाई आत्मसात् गर्नुपर्ने बताएका छन्। गत भदौमा भएको जेनजी आन्दोलनका जायज माग सम्बोधन गर्नुपर्ने धारणा आफूले त्यतिबेलै राखेको पनि उनले उल्लेख गरेका छन्।

उनले परिवर्तनको अर्थ विगतको संघर्ष र योगदानलाई नकार्नु नभएको भन्दै आफ्नो पुस्ताले लोकतन्त्र, स्वतन्त्रता तथा विभिन्न समुदायको अधिकारका लागि गरेको संघर्षलाई सम्मान गर्नुपर्ने बताएका छन्।

वर्तमान सरकारले जनतामा देखिएको परिवर्तनको आकांक्षालाई सम्बोधन गर्नुपर्ने उल्लेख गर्दै देउवाले राजनीतिक आग्रह–पूर्वाग्रहभन्दा माथि उठेर जनताको चाहना पूरा गर्न सरकार अघि बढ्नुपर्ने बताएका छन्।

देउवाले नेपाली कांग्रेसभित्र देखिएको असहमति र निराशा तत्काल समाधान गर्नुपर्नेमा जोड दिएका छन्। कांग्रेस एकताबद्ध भएर अन्य राजनीतिक दलसँग सहमति र सहकार्य गर्दै राष्ट्रियता र लोकतन्त्र सुदृढ गर्नुपर्ने उनको भनाइ छ।

वर्तमान संविधान नेपालीको लामो संघर्ष र बलिदानबाट प्राप्त भएको उल्लेख गर्दै उनले यसको संरक्षण तथा संशोधन राष्ट्रिय सहमतिका आधारमा हुनुपर्ने बताएका छन्।

युवा पुस्ता अघि बढ्नुपर्ने तर पाका र अनुभवी पुस्तालाई पूर्ण रूपमा खराब देखाउने भाष्य उचित नभएको देउवाले बताएका छन्। आफ्नो लामो राजनीतिक अनुभव नयाँ पुस्तालाई हस्तान्तरण गर्नु आफ्नो दायित्व भएको उनले उल्लेख गरेका छन्।

देउवाले अन्त्यमा आफू ‘शक्ति प्राप्त गर्न होइन, राष्ट्रिय एकता सुदृढ गर्न फर्किएको’ बताएका छन्। उनले प्रतिशोधको बाटो नभई मेलमिलापको मार्ग रोज्नुपर्नेमा जोड दिँदै राष्ट्रिय एकताका लागि सर्वपक्षीय सहकार्य आवश्यक रहेको बताएका छन्।

पूर्वप्रधानमन्त्री एवं नेपाली कांग्रेसका निवर्तमान सभापति शेरबहादुर देउवा स्वदेश फर्किएका छन् ।

गत फागुन १३ मा पूर्वमन्त्रीसमेत रहेकी श्रीमती आरजु राणासहित सिंगापुर उडेका देउवा बिहीबार साढे ५ महिनापछि नेपाल फर्किएका हुन् । उनी उपचारका लागि भन्दै सिंगापुर गएका थिए ।

उनलाई विमानस्थलमा बाजागाजा र झाँकीसहित भव्य स्वागत गरिएको छ । संस्थापनइतर समूहको राष्ट्रिय भेलामा सहभागी हुन काठमाडौं आएका देशभरका कार्यकर्ता उनको स्वागतका लागि विमानस्थल पुगेका थिए ।

देउवाको स्वागतमा पुगेका कार्यकर्ताले उनको समर्थनमा नाराबाजी गरेका थिए ।

प्रहरीले आज बिहान जनआस्था साप्ताहिकको कार्यालयमा छापा मारेको छ । सम्पादक किशोर श्रेष्ठ पक्राउ परेको भोलिपल्ट बिहीबार बिहान जनआस्था कार्यालयमा छापा मारिएको हो ।

हिजो राति घरबाटै श्रेष्ठ पक्राउ परेपछि राति १ बजे फेरि प्रहरीको टोली उनको ललितपुरस्थित घर पुगेर छापा मारेको थियो । उनको पक्राउको विरोधमा नेपाल पत्रकार महासंघलगायतका पत्रकारका संस्थाहरुले मध्यराति प्रहरी कार्यालयमा धर्ना दिएका थिए ।

प्रहरीका अनुसार, जिल्ला प्रहरी परिसर काठमाडौंमा उनीविरुद्ध वैयक्तिक गोपनीयतासम्बन्धी ऐनको कसुरमा जाहेरी दर्ता भएपछि प्रहरीले श्रेष्ठलाई पक्राउ गरेको हो ।

जनआस्थाले गत साउन २५ गते सप्तरी क्षेत्र नम्बर–३ का सांसद अमरकान्त चौधरीसँग सम्बन्धित एक समाचार प्रकाशन गरेकोमा थियो । समाचारमा फोटो र पहिचानसमेत खुल्ने गरी प्रकाशन भएपछि ती युवतीले जिल्ला प्रहरी परिसर काठमाडौंमा जाहेरी दिएकी थिइन् । युवतीको जाहेरी दर्ता भएलगत्तै प्रहरीले हिजो बुधबार श्रेष्ठलाई पक्राउ गरेको हो ।

त्यसो त उजुरी दिने युवती आफैले आफ्नो सामाजिक सञ्जाल फेसबुकबाट तस्बिर सार्वजनिक गरेकी थिइन् । त्यही तस्बिर बाहिर आएपछि जनआस्थाका सम्पादक श्रेष्ठले सो विषयलाई समाचार बनाएका थिए ।

समाचार प्रकाशनपछि ती युवतीले सो तस्बिर एआईबाट बनाइनुका साथै आफ्नो फेसबुकसमेत ह्याक भएको दाबी गरेकी थिइन् । तर युवतीले आफ्नो सामाजिक सञ्जालमा सो तस्बिर पोस्ट गर्दा एआई तस्बिर भनिएको छैन । अहिले फेसबुकले नै एआईबाट बनाएको तस्बिरलाई एआई कन्टेन्ट भनी उल्लेख गर्ने गरेको छ ।

उनको फेसबुक ह्याक भएको हो होइन ? सो पोस्ट उनी आफैले गरेकी हुन् कि अन्य कसैले गरेका हुन् भनेर प्राविधिक परीक्षण पनि भएको छैन ।
समाचार प्रकाशनलाई लिएर अस्ति मंगलबार साइबर ब्युरोले उनलाई सम्झाउने प्रयास पनि गरेको थियो । तर उनले जाहेरी दर्ता गरी तत्काल श्रेष्ठलाई पक्राउ गर्न भनेकी थिइन् । ब्युरो स्रोतका अनुसार युवतीले सो तस्बिर सक्कली हो कि एआई हो र फेसबुक ह्याक भएको हो कि होइन भन्दा पनि आफूलाई अप्ठेरो परेकाले जाहेरी दर्ता गरी समाचार हटाउन लगाउन आग्रह गरेको स्रोतको भनाइ छ ।

रोल्पाको थबाङ गाउँपालिका ५ कोटलबारामा अविरल वर्षासँगै आएको पहिरोले घर तथा गोठ पुरिँदा २ जनाको मृत्यु भएको छ भने १० जना बेपत्ता भएका छन् । २ जना घाइते भएका छन् ।

बुधबार राति करिब ८:४० बजे पहिरो खस्दा स्थानीय कमलबहादुर पुन मगरको घरसहित करिब ६ वटा घर तथा गोठ पुरिएका छन् ।

हिलोमा पुरिएको अवस्थामा ६० वर्षीय कमलबहादुर पुनमगर र १८ वर्षीया शान्ति पुनमगरलाई मृत फेला पारेको जिल्ला प्रहरी कार्यालय रोल्पाका डीएसपी पञ्चकुमार बाखुले जानकारी दिए ।

स्थानीय समेतको सहयोगमा २२ वर्षीय हिमाल पुनमगर र २५ वर्षीय संजय घर्तीमगरलाई घाइते अवस्थामा उद्धार गरिएको छ ।

घटनाको खबर राति ९:३० बजे प्राप्त भएपछि इलाका प्रहरी कार्यालय उवाबाट प्रहरी टोली घटनास्थलमा खटिएको थियो ।

थप उद्धारका लागि बिहीबार बिहान ४ बजे जिल्ला प्रहरी कार्यालय रोल्पाबाट प्रहरी नायब उपरीक्षक पञ्चकुमार बाखुको कमाण्डमा विपद् उद्धार सामग्रीसहित १३ जनाको प्रहरी टोली घटनास्थलतमा खटिएको छ ।

साथै बिहान ४:३० बजे रोल्पाका प्रमुख जिल्ला अधिकारी गंगा बहादुर क्षेत्रीसमेत घटनास्थल पुगेका छन् । घटनास्थलमा उद्धार तथा खोजी कार्य जारी रहेको प्रहरीले जनाएको छ ।

प्रारम्भिक विवरणअनुसार पहिरोमा पुरिएका मानिसको संख्या १० जना पुगेको खुलेको छ । घटनास्थलमा फोन सम्पर्क हुन नसकेको कारण र थप विवरण आउन बाँकी छ ।

काठमाडौं । नेपाली कांग्रेसका निवर्तमान सभापति शेरबहादुर देउवा स्वदेश फर्किँदै छन् ।

देउवा थाइल्याण्डबाट थाई एयरको विमानमार्फत आज (बिहीबार) मध्यान्ह १२ बजे त्रिभुवन अन्तर्राष्ट्रिय विमानस्थलमा अवतरण गर्ने छन् ।

देउवालाई स्वागत गर्न पार्टीका निवर्तमान कार्यवाहक सभापति पूर्णबहादुर खड्का, नेता डा. शेखर कोइरालासहित पूर्वपदाधिकारी र केन्द्रीय सदस्यहरूको ठूलो टोली विमानस्थल पुग्ने तयारी रहेको छ । देउवा स्वास्थ्य उपचारका लागि गत फागुन १३ गते सिंगापुर गएका थिए । त्यहाँको उपचारपछि चैत ७ गते थप उपचारका लागि हङकङ पुगेका थिए । उनी थाइल्याण्ड हुँदै नेपाल फर्कन लागेका हुन् ।

मेष (चु, चे, चो, ला, लि, लु, ले, लो, अ)
नयाँ कामको प्रस्ताव आउन सक्छ। व्यापारमा ग्राहकको चाहना बुझेर अघि बढ्नु राम्रो हुनेछ। विद्यार्थीले पढाइमा ध्यान दिन सक्नेछन्। स्वास्थ्यमा घाँटीको ख्याल गर्नुहोस्। आजको शुभ रंग हल्का रातो हो भने शुभ अंक ७ रहेको छ।

वृष (इ, उ, ए, ओ, वा, वि, वु, वे, वो)
घरमा आवश्यक काम थपिन सक्छ। आम्दानीसँगै खर्च पनि बढ्न सक्छ। काममा नयाँ जिम्मेवारी आउन सक्छ। टाढाका आफन्तसँग कुरा हुने सम्भावना छ। आजको शुभ रंग फिका हरियो हो भने शुभ अंक ४ रहेको छ।

मिथुन (का, कि, कु, घ, ङ, छ, के, को, हा)
नयाँ जानकारीले सोच बदल्न सक्छ। व्यापारमा बिक्री बढ्ने मौका छ। विद्यार्थीलाई अभ्यासबाट राम्रो लाभ हुनेछ। यात्रामा नयाँ ठाउँ पुग्ने अवसर मिल्न सक्छ। आजको शुभ रंग सुनौलो हो भने शुभ अंक ९ रहेको छ।

कर्कट (हि, हु, हे, हो, डा, डि, डु, डे, डो)
घरमा तपाईंको आवश्यकता बढ्नेछ। पुरानो बचत काम लाग्न सक्छ। काम गर्ने तरिकामा सुधार आउनेछ। साथीसँग पढ्दा नयाँ कुरा बुझिनेछ। व्यक्तिगत रूपमा खुसी मिल्नेछ। आजको शुभ रंग सेतो हो भने शुभ अंक २ रहेको छ।

सिंह (मा, मि, मु, मे, मो, टा, टि, टु, टे)
सामाजिक भेटघाट बढ्नेछ। व्यापारमा प्रचार बढाउने सोच बन्नेछ। विद्यार्थीले आज नोट तयार गर्नु राम्रो हुनेछ। शरीरमा थकान भए आराम गर्नुहोस्। आजको शुभ रंग गुलाबी हो भने शुभ अंक ६ रहेको छ।

कन्या (टो, पा, पि, पु, ष, ण, ठ, पे, पो)
कागजी काम पूरा गर्न सकिनेछ। आम्दानी बढाउने उपाय भेटिन सक्छ। कामको बीचमा आफ्नो समय पनि निकाल्नुहोस्। यात्रामा नयाँ व्यक्तिसँग भेट हुन सक्छ। पढाइमा लक्ष्य बनाएर चल्नुहोस्। आजको शुभ रंग फिका निलो हो भने शुभ अंक १ रहेको छ।

तुला (रा, रि, रु, रे, रो, ता, ति, तु, ते)
प्रिय व्यक्तिबाट खुसीको खबर आउन सक्छ। साझेदारीमा राम्रो सहमति बन्नेछ। पढाइमा ठाउँ परिवर्तन गर्दा ध्यान बढ्नेछ। आँखालाई आराम दिनुहोस्। आजको शुभ रंग कलेजी हो भने शुभ अंक ८ रहेको छ।

वृश्चिक (तो, ना, नि, नु, ने, नो, या, यि, यु)
अनुभवले कठिन काम मिलाउन सहयोग गर्नेछ। विद्यार्थीले छुटेको पाठ पूरा गर्नेछन्। यात्रामा समयको ख्याल गर्नुहोस्। आफ्नै निर्णयमा भरोसा बढ्नेछ। आजको शुभ रंग बैजनी हो भने शुभ अंक ३ रहेको छ।

धनु (ये, यो, भा, भि, भु, धा, फा, ढा, भे)
बाहिरको कामले व्यस्तता बढाउनेछ। नयाँ ठाउँ जाने अवसर मिल्नेछ। विद्यार्थीले नयाँ विषय सुरु गर्न सक्नेछन्। लामो समय भोकै नबस्नुहोस्। आजको शुभ रंग केशरी हो भने शुभ अंक ५ रहेको छ।

मकर (भो,जा,जि,जु,जे,जो,ख,खि,खु,खे,खो,गा,गि)
अनुभवी व्यक्तिको सुझाव काम लाग्नेछ। आर्थिक निर्णयमा परिवारसँग सल्लाह गर्नु राम्रो हुन्छ। काममा नयाँ बाटो भेटिन सक्छ। भविष्यबारे सकारात्मक सोच बढ्नेछ। आजको शुभ रंग खैरो हो भने शुभ अंक १ रहेको छ।

कुम्भ (गु, गे, गो, सा, सि, सु, से, सो, दा0
साथीबाट नयाँ प्रस्ताव आउन सक्छ। कामपछि मनोरञ्जनको समय मिल्नेछ। विद्यार्थीले साथीलाई पढाउँदा आफूले पनि राम्रो बुझ्नेछन्। यात्रामा कागजपत्र साथमा राख्नुहोस्। आजको शुभ रंग पहेलो हो भने शुभ अंक ५ रहेको छ।

मीन (दि, दु, थ, झ, ञ, दे, दो, चा, चि)
रुचिको काम गर्ने मौका मिल्नेछ। आर्थिक रूपमा सानो लाभ हुन सक्छ। नयाँ सीप सिक्ने इच्छा बढ्नेछ। बाहिर जाँदा मौसमको ख्याल गर्नुहोस्। आफ्नो निर्णयबाट सन्तुष्टि मिल्नेछ। आजको शुभ रंग हल्का गुलाबी हो भने शुभ अंक १२ रहेको छ।

सम्पत्ति शुद्धीकरणको मुद्दामा आरोपित व्यवसायी दीपक भट्ट र शुलभ अग्रवाललाई थुनामा राख्न विशेष अदालतले आदेश दिएको छ । अदालतका अध्यक्ष बासुदेव आचार्य र सदस्य हेमन्त रावलको इजलासले बयान र थुनछेक बहसपछि दुवै अभियुक्तलाई थुनामा पठाउने निर्णय गरेको हो । पूर्वअर्थमन्त्री विष्णु पौडेललाई सोही मुद्दामा साधारण तारिखमा छाड्न आदेश दिएको छ । उनीहरूलाई बुधबार अर्को मुद्दामा विशेष अदालतमा उपस्थित गराइएको थियो ।

दुवैजनाको बयान र थुनछेक बहसपछि विशेष अदालतले उनीहरुलाई थुनामा पठाउने आदेश गरेको हो ।
पूर्वअर्थमन्त्री विष्णु पौडेललाई प्रतिवादी बनाइएको सम्पत्ति शुद्धीकरणको दोस्रो मुद्दामा भट्ट र अग्रवाललाई पनि मुद्दा चलाइएको थियो ।