राष्ट्रिय स्वतन्त्र पार्टी (रास्वपा)ले प्रतिनिधिसभा निर्वाचनका लागि समानुपातिकतर्फको बन्द सूची अद्यावधिक गरेको छ ।
उज्यालो नेपाल पार्टीसँगको एकता औपचारिक रूपमा टुंगिएपछि आइतबार निर्वाचन आयोगमा पुगेर सूची अद्यावधिक गरिएको रास्वपाका प्रवक्ता मनीष झाले जानकारी दिए।
दुई दलबिच भएको एकता शनिबार साँझ अन्त्य भएको थियो। एकता भंग भएसँगै कुलमान घिसिङ उज्यालो नेपाल पार्टीको अध्यक्ष बनेका छन्। यसअघि सहमतिअनुसार दुवै दलले समानुपातिकतर्फ साझा सूची निर्वाचन आयोगमा बुझाएका थिए। तर, अब एकता समाप्त भएपछि उज्यालो नेपाल पार्टीले रास्वपाको तर्फबाट बुझाएको सूची स्वतः खारेज भएको छ।
यससँगै फागुन २१ गते हुने निर्वाचनमा उज्यालो पार्टी नेपालको समानुपातिकतर्फ कुनै पनि उम्मेदवार नहुने भएको छ।
नेपाली कांग्रेसका बरिष्ठ नेता डा.शेखर कोइरालाले पार्टी एकता आजको आवश्यक्ता भएको बताएका छन् । उनले आफूलाई सभापति वा प्रधानमन्त्री बन्ने कुनै लोभ नभएको पनि बताए ।
पार्टीको महाधिवेशन र आगामी निर्वाचनको सन्दर्भमा सन्दर्भमा एक भिडियो सन्देश जारी गर्दै कोइरालाले आफ्नो निजी महत्त्वाकाङ्क्षा नभएको स्पष्ट पारेका हुन् । उनले कांग्रेसको समग्र एकताको पक्षमा शान्त आवाज उठाइरहने प्रष्ट पारेका छन् ।
उनले आफूलाई मन्त्री वा महामन्त्री हुने लोभले विगतमा कहिल्यै आकर्षित नगरेको र सभापति वा प्रधानमन्त्री हुने कुराले पनि नलोभ्याउने दावी गर्दै आफ्नो परिवारबाट पाएको शिक्षा नै आफ्नो जीवन दर्शन भएको स्पष्ट पारेका छन् ।
परिवारकै दर्शनबाट अभिप्रेरित भएर पार्टी एकताका लागि लागिरहेको बताउँदै उनले कांग्रेस रूपान्तरणको अभियानमा आफू आक्रोशित र अधैर्य भएर अगाडि बढ्न नचाहेको उल्लेख गरे।
डा. कोइरालाले पार्टीको विशेष महाधिवेशनको अभियान चलिरहँदा आफ्नो मत केन्द्रीय कार्यसमितिमा लिखित रूपमै राखेको तर पार्टी विभाजनको सन्देश नजाओस् भनेर सतर्कता अपनाएको जिकिर गरे।
कांग्रेस संक्रमणमा पर्दा कसरी र कसले त्याग र अपमान सहनुपर्छ भन्ने आफूलाई थाहा भएको भन्दै उनले अन्तिमसम्म पार्टीको भावनात्मक एकतामा अगाडि बढिरहने प्रण गरे।
देश आसन्न निर्वाचनको संघारमा रहेको र संविधान छतविक्षत अवस्थामा पुगेको भन्दै उनले चिन्ता व्यक्त गरे। जनआन्दोलनबाट निर्वाचित सरकारको ठाउँमा अनिर्वाचित सरकार गठन भएको र संविधानहीनताको अवस्था सिर्जना भएको भन्दै उनले लोकतन्त्रको रक्षाका लागि सबै एक हुनुपर्ने बताए।
महाधिवेशन प्रतिनिधिहरूलाई पार्टीको धरोहर भन्दै कोइरालाले विधिको प्रभावकारिता र नीतिको सान्दर्भिकता स्थापित गर्न काठमाडौँ आएका प्रतिनिधिहरूले ऐतिहासिक दायित्व निर्वाह गर्ने विश्वास व्यक्त गरे।
कोइरालाले बीपी कोइरालाको मेलमिलापको नीति कुनै कानुनको पन्ना वा विधानबाट नभई अन्तरआत्माको आवाज भएको स्मरण गराए। त्यस्तै सहमति, सहकार्य र सहअस्तित्वलाई एकाकार गर्दै समग्र कांग्रेस एकताको बिगुल फुक्ने महाधिवेशन गरेर जानुपर्नेमा उनले जोड दिए।
काठमाडौँ । गायक प्रशान्त तामाङको निधन भएको छ । चलचित्रकर्मी राजेश घतानीले प्रशान्तको दिल्लीस्थित आफ्नै निवासमा आइतबार निधन भएको जानकारी दिए ।
हृदयघातका कारण उनको निधन भएको बताइएको छ । इन्डियन आइडल विजेता बनेपछि तामाङ चर्चामा थिए । तामाङले नेपाली फिल्म, ‘गोर्खा पल्टन’, ‘परदेशी’, ‘परदेशी २’ लगायतमा अभिनयसमेत गरेका छन् । उनले थुप्रै चर्चित गीत दिएका छन् ।
प्रतिनिधिसभा निर्वाचनलाई स्वच्छ, निष्पक्ष र मर्यादित बनाउन निर्वाचन आयोगले सामाजिक सञ्जालमा हुने गतिविधिलाई पनि निर्वाचन आचारसंहिताको दायरामा ल्याएको छ । आयोगले सामाजिक सञ्जाल दुरुपयोग रोक्न कडा व्यवस्था गरेको हो।
आगामी फागुन २१ गते प्रतिनिधिसभाको निर्वाचन हुँदै छ । आयोगका अनुसार निर्वाचनलाई प्रतिकूल असर पार्ने उद्देश्यले सामाजिक सञ्जालमा एकाउन्ट सञ्चालन गर्न वा नक्कली साइट खोल्न पाइने छैन ।
आचारसंहितामा सामाजिक सञ्जालमा ‘आर्टिफिसियल इन्टिलिजेन्स’ (एआई) प्रयोग गरी वा नगरी निर्वाचनलाई प्रभावित पार्ने गतिविधि गर्न नपाइने व्यवस्था गरिएको छ। कसैलाई होच्याउने, दुष्प्रचार गर्ने, भ्रामक सूचना फैलाउने, अपमान गर्ने वा द्वेषपूर्ण भाषणजस्ता सामग्री सम्प्रेषण गर्न वा गराउन निषेध गरिएको छ।
त्यस्तै, कुनै प्रयोजनका लागि प्रकाशित वा प्रसारित सामग्रीलाई एआई प्रयोग गरी वा नगरी तोडमोड गरेर निर्वाचनमा प्रभाव पार्ने उद्देश्यले सामाजिक सञ्जालमा पोष्ट, रिपोस्ट, कमेन्ट–प्रतिकमेन्ट, लाइभ स्ट्रीमिङ, ट्याग वा मेन्सन गर्न पाइने छैन ।
निर्वाचनको विश्वसनीयता, आयोग, आयुक्त वा कर्मचारीको प्रतिष्ठामा असर पर्ने गरी अवाञ्छित लाञ्छना लगाउन नपाइने प्रबन्ध पनि आचारसंहितामा समावेश गरिएको छ । कसैको चरित्र हत्या गर्ने, व्यक्तिगत लाञ्छना लगाउने, मानहानी गर्ने वा यस्तै प्रकृतिका सामग्री उत्पादन, प्रकाशन वा प्रसारण गर्न निषेध गरिएको आयोगले जनाएको छ ।
मतदाता तथा मतदाताको गोपनीयता भङ्ग गर्ने, निर्वाचनको स्वच्छता र निष्पक्षतालाई प्रभावित पार्ने कुनै पनि गतिविधि गर्न नपाइने व्यवस्था गरिएको छ। आयोगले आगामी माघ ३ गतेदेखि आचारसंहिता लागू गर्ने तयारी गरेको छ ।
राष्ट्रनिर्माता पृथ्वीनारायण शाहको ३०४औँ जन्म जयन्ती विभिन्न कार्यक्रम गरी मनाइँदैछ । विसं १७७९ मा जन्मिएका शाहको जन्म जयन्ती तथा राष्ट्रिय एकता दिवस आज मुलुकभर विभिन्न कार्यक्रम आयोजना गरी मनाउन लागिएको हो ।
आधुनिक नेपालको एकीकरण अभियानका नेतृत्वकर्ता शाहले राष्ट्रको एकीकरण अभियानमा पुर्याएको योगदानको स्मरण गर्दै सधैँजस्तै आइतबार पनि प्रमुख प्रशासनिक भवन सिंहदरबार पश्चिम ढोका अगाडिको पृथ्वीनारायणको सालिकमा पुष्पहार अर्पण गरी सम्मान व्यक्त गरिन्छ ।
पृथ्वी जयन्तीका अवसरमा राष्ट्रिय प्रजातन्त्र पार्टी (राप्रपा)ले चियापान समारोहको आयोजना गरेको छ । राप्रपाले सो समारोहमा प्रधानमन्त्री, विभिन्न राजनीतिक दलका शीर्ष नेता, पूर्वप्रधानमन्त्री र विभिन्न व्यक्तित्वलाई आमन्त्रण गरेको छ । शाहको जन्मस्थान गोरखामा हरेक वर्ष यो दिवस विशेष कार्यक्रम गरी मनाउने गरिएको छ ।
नेपाली सेनाले पनि पृथ्वी जयन्तीका अवसरमा हरेक वर्ष सैनिक मुख्यालय भवन जङ्गी अड्डा परिसरमा रहेको राष्ट्र निर्माताको पूर्णकदको सालिकमा माल्यार्पण गरी सम्मान प्रकट गर्दै आएको छ ।
तत्कालीन गोरखाका राजा शाहले विभिन्न सामाजिक, आर्थिक र भौगोलिक चुनौतीबीच जनताको उत्साहजनक सहयोग तथा सहभागितामा छरिएर रहेका बाइसे, चौबीसे राज्यलाई एकीकृत गरेका शाहको १८३१ सालमा ५२ वर्षको उमेर निधन भएको थियो । उनले २० वर्षको उमेरमा गद्दी आरोहण गर्दै तत्कालीन आन्तरिक तथा बाह्य शक्तिलाई पराजित गरेर एकीकरण अभियान सञ्चालन गरेका थिए ।
यस दिवसले साझा इतिहास, संस्कृति र गौरवलाई स्मरण गराउँदै विविधताबीचको एकतालाई थप सबल बनाउन प्रेरणा दिने र मुलुकलाई एक सूत्रमा बाँध्ने महान् प्रयत्न गर्ने पुर्खाहरूको योगदानलाई सम्मान गर्ने गरिन्छ । यो दिवसमा व्यक्तिगत हितभन्दा माथि उठेर राष्ट्रहितलाई प्राथमिकता दिनु नै सशक्त र समावेशी मुलुक निर्माणको आधार भएको तथ्यलाई स्मरण गराउँदछ । युवापुस्तालाई मातृभूमिप्रति समर्पण, सेवा र जिम्मेवारीको भावना जागृत गर्नमा यस दिवसको विशेष महत्त्व छ ।
काठमाडौं । नेपाली कांग्रेसभित्रको आन्तरिक विवाद र रस्साकस्सीका बिच आजदेखि राजधानीमा ‘विशेष महाधिवेशन’ सुरु हुँदैछ । पार्टीको आधिकारिक संस्थापन पक्षले औचित्य नभएको भन्दै खारेज गरे पनि विशेष महाधिवेशन पक्षधर समूहले पूर्वघोषित कार्यक्रम अनुसार नै भृकुटीमण्डपमा महाधिवेशन गर्न लागेको हो ।
काठमाडौँको भृकुटीमण्डपस्थित खुला चौरमा दिउँसो १ः०० बजे महाधिवेशनको औपचारिक उद्घाटन हुनेछ । यसलाई असन्तुष्ट पक्षले आफ्नो शक्ति प्रदर्शनको रूपमा समेत लिएको देखिन्छ । मञ्च व्यवस्थापन समितिका संयोजक गोविन्द पुडासैनीका अनुसार, उद्घाटन सत्रका लागि ५० जना विशिष्ट अतिथि अटाउने मञ्च र सहभागीहरूका लागि ६ हजारभन्दा बढी कुर्सीको व्यवस्था गरिएको छ ।
कार्यक्रम स्थललाई कांग्रेसको चारतारे झण्डा, ब्यानर र स्वागत द्वारहरूले झकिझकाउ बनाइएको छ । उपत्यकाका विभिन्न स्थानबाट निस्कने र्यालीलाई व्यवस्थित रूपमा भृकुटीमण्डपमा उतार्ने तयारी आयोजकले गरेको छ । उद्घाटन सत्रको सभापतित्व कांग्रेस काठमाडौँका सभापति कृष्ण सबुज बानियाँले गर्ने तय भएको छ । महाधिवेशनमा अन्य राजनीतिक दलका नेताहरूलाई आमन्त्रण गरिएको छैन ।
महाधिवेशनमा भाग लिन देशैभरबाट कांग्रेस कार्यकर्ता र महाधिवेशन प्रतिनिधिहरू काठमाडौँ आइसकेका छन् । आयोजक समितिका अनुसार अधिकांश प्रतिनिधिहरूको उपस्थिति सुनिश्चित भइसकेको छ ।
आवास तथा भोजन व्यवस्थापन समितिका संयोजक रमेश धमलाले दिएको जानकारी अनुसार, हालसम्म ३ हजार ६०० प्रतिनिधिका लागि काठमाडौँका विभिन्न स्थानमा आवासको प्रबन्ध मिलाइएको छ । थप प्रतिनिधि आएमा तत्काल व्यवस्थापन गर्न सकिने गरी तयारी अवस्थामा राखिएको छ । प्रतिनिधिहरूले १ हजार दर्ता शुल्क बुझाएपछि खानाको कुपन र महाधिवेशन सामग्रीसहितको झोला प्राप्त गर्ने व्यवस्था मिलाइएको छ ।
उद्घाटन सत्र खुला चौरमा भए पनि बन्दसत्र भने भृकुटीमण्डपको सभाहलमा सञ्चालन हुनेछ । बन्दसत्रमा पेस हुने नीतिगत प्रस्ताव र दस्तावेजहरूका विषयमा भने आयोजकले हालसम्म गुपचुप नै राखेको छ ।
काठमाडौँ । नेपाली कम्युनिष्ट पार्टीका संयोजक पुष्पकमल दाहाल ‘प्रचण्ड’ले प्रतिनिधि सभाका आउँदो निर्वाचन रुकुम पूर्वबाट लड्ने घोषणा गरेका छन् ।
रुकुम पश्चिममा शनिवार आयोजित पार्टीको कार्यक्रममा दाहालले रुकुम पूर्वबाट आगामी प्रतिनिधिसभा चुनाव लड्ने घोषणा गरेका हुन् ।
‘अहिलेको चुनाव रुकुमबाटै लड्छु । म पूर्वी रुकुमबाट लड्ने छु,’ उनले भने, ‘पूर्वी रुकुमबाट चुनाव लड्ने भनेपछि पश्चिम रुकुम पनि आइरहन्छु भन्ने यो बुझिराख्नुहोला ।’
उनले पश्चिम रुकुमका जनताको विकासको चाहना पूरा गर्न आफू प्रतिबद्ध रहेकोसमेत बताए । उनले भने, ‘तपाईँहरूको लागि हेडक्वाटरको ढोका सधैँ खुला हुनेछ। पहिलेभन्दा बढी तपाईँहरूको दुख, सुख र विकास निर्माणको काममा बढी साथ रहनेछु।’ पार्टीको कार्यक्रममा दाहाल र पूर्व प्रधानमन्त्री तथा नेकपाका सहसंयोजक माधवकुमार नेपाल सहभागी भएका थिए । प्रतिनिधिसभा चुनाव आगामी फागुन २१ का लागि तोकिएको छ ।
काठमाडौँ । पूर्वराजा ज्ञानेन्द्र शाहले देश नै नरहने हो कि भन्ने चिन्ता पर्न थालेको बताएका छन्।
३०४ औँ पृथ्वी जयन्ती तथा राष्ट्रिय एकता दिवसको अवसरमा सन्देश जारी गर्दै उनले नारायणहिटी राजदरबारबाट बाहिरिएको करिब दुई दशक बितिसक्दा पनि देशले निरन्तर संकटको सामना गरिरहनु परेकोप्रति गहिरो चिन्ता व्यक्त गरेका हुन्।
सन्देशमा उनले भनेका छन्, ‘हिजो देश नबनेकोमा चिन्ता थियो, आज देश नै नबच्ने हो कि भन्ने निराशा पैदा भएको छ।’ पूर्वराजा शाहले सबै जात, धर्म र क्षेत्रका नेपालीको साझा प्रतिनिधिका रूपमा काम गरेको राजसंस्था जनताले सुम्पेको जिम्मेवारीबाट कहिल्यै विमुख नभएको उल्लेख गरेका छन्।
उनले सबै नेपालीलाई कर्तव्य बोधका साथ अघि बढ्न आह्वान गर्दै भनेका छन्, ‘सबै नेपालीले यो कर्तव्य बोध गरी ‘पृथ्वी पथ’ मा लाग्नुपर्दछ भन्ने हाम्रो धारणा र आह्वान छ। नेपाली विश्वमा जहाँ रहे पनि नेपाली मूलको भन्ने नै हुन्छ। त्यसैले राष्ट्रको प्रतिष्ठासँग नेपालीको प्रतिष्ठा पनि सँगै जोडिएको हुन्छ।’
काठमाडौँ । कुलमान घिसिङ उज्यालो नेपाल पार्टीको अध्यक्षमा नियुक्त भएका छन् ।
रास्वपा नेपालसँग एकता भाँडिएसँगै घिसिङ पार्टीको अध्यक्षमा नियुक्त भएको पार्टी प्रवक्ता डा।राजु थापाले जानकारी दिए ।
उनका अनुसार उनेपाले अध्यक्ष कुलमानलाई नियुक्त गरेको हो ।
काठमाडौं- गत १४ पुसमा राष्ट्रिय स्वतन्त्र पार्टी (रास्वपा) र उज्यालो नेपाल पार्टीबीच भएको एकता सहमति दुई सातामै भाँडिएको छ । राष्ट्रिय स्वतन्त्र पार्टीका सभापति रवि लामिछाने र पूर्वमन्त्री कुलमान घिसिङबीच शुक्रबार र शनिबार भएको छलफल निष्कर्षविहीन भएपछि दुई सातामै सहमति भाँडिएको हो।
सुशीला कार्की नेतृत्वको नागरिक सरकारमा दलीय प्रतिनिधित्व गरेको भन्दै चर्को आलोचना भएपछि कुलमानले ऊर्जा, जलस्रोत तथा सिँचाइसहित तीन मन्त्रालयबाट राजीनामा दिएर रास्वपासँग वार्तामा बसेका थिए । पुस १४ मा उज्यालो नेपाल पार्टीका संरक्षक कुलमान र रास्वपा सभापति लामिछानेबीच पार्टी एकतामा सहमति भएको थियो।
त्यही सहमतिअनुसार कुलमानलाई रास्वपाको उपसभापति बनाउने निर्णय गरिएको थियो। तर कुलमानले रास्वपासँग पार्टीको विचारधारा परिवर्तन गर्नुपर्ने, लोकतान्त्रिक होइन वामपन्थी पार्टी बनाउनु पर्ने र केन्द्रीय सदस्य ३३ जना चाहिने माग गरेका थिए । त्यसैगरी वरिष्ठ उपसभापति पद र एक महामन्त्री पद पनि कुलमनले मागेका थिए ।
उनले पार्टीको विचारधारा समाजवाद राख्नुपर्ने प्रस्ताव पनि गरेका थिए । सुदन गुरूङले बौद्धबाट उठाएर एकताको सहमति गराए पनि विचारधारासहितका मुद्दामा विवाद चर्किएसँगै कुलमान र रास्वपाको एकता सहमति भाँडिएको हो। शुक्रबार कुलमान रविलाई भेट्न उनकै निवास पुगेका थिए।
कुलमानले सहमति कार्यान्वयन गर्दै आफूलाई जिम्मेवारी दिन भनेका थिए। तर रविले त्यसमा स्पष्ट नभई टार्न खोजेपछि कुलमान बिच्किएका थिए। त्यहीकारण शनिबारको निर्णायक वार्ता भाँडिएको हो । रविसँग कुरा नमिलेपछि कुलमानले शुक्रबार नै रास्वपाबाट बाहिरिने मनस्थिति बनाएका थिए ।
उनीनिकट एक नेताका अनुसार रास्वपाबाट अलग भएपछि उज्यालो नेपाल पार्टीलाई नै सक्रिय रूपमा अघि बढाउने तयारी गरेका छन् । उज्यालो नेपालका ७५ प्रतिशत नेताहरूले रास्वपासँगको एकतामा नजाने अडान लिएपछि कुलमान दबाबमा परेका थिए ।
कुलमानले फागुन २१ को प्रतिनिधि सभा निर्वाचनका लागि समानुपातिक सांसद सूची र केन्द्रीय सदस्यलगायत विषयमा पनि गम्भीर असहमति राखेका थिए । यद्यपि उज्यालो नेपालको समानुपातिक सूची रास्वपाबाटै निर्वाचन आयोगमा बुझाइएको छ ।
