काठमाडौँ । पर्साको वीरगञ्जमा निषेधाज्ञा जारी भएको छ । सोमबार दिउँसो १ बजेदेखि अर्को आदेश नभएसम्मका लागि कुनै किसिमको भेला गर्न, सभा, जुलुस तथा प्रदर्शन गर्न नपाउने गरी निषेधाज्ञा जारी भएको हो ।

वीरगञ्ज महानगरपालिका क्षेत्र अन्तर्गत पूर्वमा बसपार्क, पश्चिममा सिर्सिया पुल, उत्तरमा पावर हाउस चोक र दक्षिणमा शंकराचार्य गेटसम्म कुनै किसिमको भेला गर्न, सभा, जुलुस तथा प्रदर्शन गर्न नपाउने गरी निषेधाज्ञा जारी गरिएको पर्साका प्रमुख जिल्ला अधिकारी भोला दाहालले जारी गरेको सूचनामा उल्लेख छ ।

आदेशको उल्लंघन गर्नेलाई नियन्त्रणमा लिई कानुन बमोजिम कारबाही गरिने सूचनामा उल्लेख छ ।

जनमत पार्टीका अध्यक्ष डा. सिके राउतले राष्ट्रिय स्वतन्त्र पार्टी (रास्वपा) प्रति लक्षित गर्दै देश चलाउने अवसर पाए भने देशलाई नै खाल्डोमा जाक्नसक्ने भन्दै चिन्ता जाहेर गरेका छन् ।

पार्टी, संगठन केही पनि चाहिँदैन, भन्दै तीन महिनाअघिसम्म उफ्रिनेहरू धमाधम पार्टी प्रवेश गरेको र कुनै एजेन्डा नभएकाहरू राजनीतिमा लागेको भन्दै उनले व्यंग्य गरेका हुन् ।

कुनै पार्टी चाहिँदैन भनेर कराइरहेका युवाहरू आफ्ना अगुवाले रास्वपाको शपथ खाएपछि अब के गर्लान् भनी चिन्ता समेत जाहेर गरेका छन् ।

‘स्वतन्त्रको राजनीति’ शिर्षक दिएर राउत सामाजिक सञ्जालमा लेख्छन् :
‘जसले ३ महिना अगाडिसम्म गाडी चलाउन ब्रेकै चाहिँदैन, इन्धन वा ब्याट्री नि चाहिँदैन बडो आस्थाका साथ भनिरहेको होस्, तपाईं त्यस्तो ड्राइभरले गुडाएको गाडी चढेर मुक्तिनाथ जान सुरक्षित ठान्नु हुन्छ ?

जसले ३ महिना अगाडिसम्म स्वतन्त्रको फूर्ती लगाइराखेका थिए, स्वतन्त्र बाहेक सबै कुरा बेकार हुन् भन्दै उफ्रिरहेका थिएँ, पार्टी चाहिँदै–चाहिँदैन, व्यवस्थापिका संसद चाहिँदै–चाहिँदैन, प्रदेश सभा चाहिँदै–चाहिँदैन, संविधान चाहिँदै–चाहिँदैन, संघीयता र पहिचान त झनै चाहिँदै–चाहिँदैन भन्दै थिए, जो ३ महिना अगाडिसम्मको ‘भिजन’ समेत राख्न सक्दैनन् र आज त्यही पार्टीकै अगाडि घुँडा टेक्दैछन्, भने उनीहरूको हातमा कसरी देश र जनताको भविष्य सुरक्षित हुन्छ ? ३ महिना अगाडि समेत आकलन गर्न नसक्ने उनीहरूसँग कुन दूरदृष्टि र भिजन छ होला ? उनीहरूले त सरकार बनाएको ३ महिनामा नै देशलाई कुन खाल्डोमा हाल्ने हुन् भन्न सकिन्न ।

अनि कति त नयाँ नयाँ पार्टी खोलेको २÷४ दिन भएको छैन, कहिले यता मिलाएको छ, कहिले उता मिलाएको छ। अनि यस्ता डामाडोलहरू जसको आफ्नै २ दिनको पनि ठेगान छैन, त्यसको पछाडि जनता लाग्दिनु पर्ने !

अझ तलतिर कथित स्वतन्त्र भनाउँदा युवाहरूको कुरै ठूलो ! उनका गुरूजीहरू त लख्रक्क परेर पार्टीको सपथ ग्रहण गरे, उता तलतिर आगो बालेर म कुनै पार्टीको सदस्य बन्ने छैन भनेर कसम खाँदै गरेका युवाहरू ! उफ्।’

राउतले अन्तमा थपेका छन्, ‘यो अरूको लागि लेखिएको होइन है, हाम्रै पार्टीबाट ‘म त स्वतन्त्र हूँ, पार्टीमा नबस्ने’ भन्दै भटकेका केही आत्माको शान्तिको लागि हो ।’

काठमाडौं – निर्वाचन आयोगले ३६ जना जिल्ला न्यायाधीशलाई जगेडामा रहने गरी मुख्य निर्वाचन अधिकृत तथा निर्वाचन अधिकृतका रुपमा तोकेको छ।

आयोगले आजै ७७ जना जिल्ला न्यायाधीशलाई मुख्य निर्वाचन अधिकृत तोकेको थियो। आगामी फागुन २१ गतेका लागि प्रतिनिधिसभा सदस्यको निर्वाचनको मिति तोकिएको छ। यही पुस २५ गतेदेखि लागू हुने गरी प्रतिनिधिसभा सदस्य ऐन, २०७४ को दफा ८ बमोजिम न्याय परिषद्को परामर्शमा ८८ जनालाई मुख्य निर्वाचन अधिकृत र निर्वाचन अधिकृत नियुक्त गरिएको थियो।

आयोगका अनुसार यसरी नियुक्त भएका मुख्य निर्वाचन अधिकृत र निर्वाचन अधिकृतलाई आगामी माघ २ गतेदेखि आफ्नो निर्वाचन क्षेत्रमा खटिन निर्देशन दिइएको छ।

मुख्य निर्वाचन अधिकृत तथा निर्वाचन अधिकृतको कार्यालय स्थापना गरी निर्वाचनका कार्यक्रम सञ्चालन गर्न आयोगले आग्रह गरेको छ।

कूल २७५ सदस्यीय प्रतिनिधिसभामा प्रत्यक्ष निर्वाचन प्रणालीबाट १६५ जना र समानुपातिक निर्वाचन प्रणालीमार्फत ११० जना निर्वाचित हुने व्यवस्था छ।

काठमाडौँ । राष्ट्रिय स्वतन्त्र पार्टी (रास्वपा)ले आज बृहत् राजनीतिक समायोजन सभा गर्दै छ ।

घोषणा सभा दिउँसो १ बजे राष्ट्रिय सभा गृहमा हुने बताइएको छ । नागरिक उन्मुक्ति पार्टीका पूर्व नेतृत्वहरू, थरुहट–थारुवान अभियन्ताहरू र रास्वपाबीच पार्टी समायोजन तय भएका हुन् ।

काठमाडौँ । काठमाडौँ महानगरपालिकाका मेयर बालेन साह रास्वपाको वरिष्ठ नेता मनोनीत भएका छन् । आइतबार बसेको पार्टीको केन्द्रीय समिति बैठकले शाहलाई केन्द्रीय समितिमा अनुमोदन गर्दै वरिष्ठ नेताको जिम्मेवारी दिएको हो ।

प्रवक्ता मनिष झाका अनुसार, आइतबार बसेका पार्टीका दुईवटा छुट्टाछुट्टै केन्द्रीय समिति बैठकबाट ३३ जना केन्द्रीय सदस्यहरू मनोनीत गरिएको छ ।

विवेकशील साझा र बालेन पक्षका गरी ३३ जना केन्द्रीय सदस्यलाई मनोनीत गरिएको हो । त्यस्तै, रास्वपाले ४ जना पदाधिकारीको संख्या थप गर्ने निर्णय पनि गरेको थियो ।

रास्वपाको विधान अनुसार उपसभापतिमा एक महिला सहित तीन जना हुने व्यवस्था छ । विधानको यही व्यवस्था कार्यान्वयन भए तीन मध्ये एक जना महिला उपसभापति हुनुपर्नेछ ।

हाल कुलमान घिसिङ, डीपी अर्याल र डा. स्वर्णिम वाग्ले उपसभापति छन् । तीन जनामा महिला उपसभापति नभएको हुँदा रास्वपाले विधान संशोधन गर्नुपर्ने भएको छ । उज्यालो नेपाल रास्वपासँग एकता हुँदा कुलमानलाई उपसभापति पद सहित भित्र्याइएको थियो ।

विधान अनुसार महामन्त्री एक जना हुने प्रावधान छ । आज बसेको केन्द्रीय समितिको बैठकले महामन्त्री पदमा एक जना थप्ने निर्णय गरेको छ । हाल रास्वपाको महामन्त्री कविन्द्र बुर्लाकोटी छन् । एक महिला सहित सहमहामन्त्री तीन जना हुने विधानको व्यवस्था छ । सहमहामन्त्री एक जना थप्ने निर्णय गरिएको छ । एक महिला सहित तीन जना हुने सहमहामन्त्रीमा सुमना श्रेष्ठले पदबाट राजीनामा दिएपछि विपिनकुमार आचार्य मात्रै सहमहामन्त्री छन् ।

सहप्रवक्ता पनि एक जना थप्ने निर्णय गरिएको छ । फरक लिङ्गसहित सहप्रवक्ता हुने व्यवस्था अनुसार हाल प्रतिभा रावल र रमेश प्रसाईँ उक्त जिम्मेवारीमा छन् । रास्वपाको विधान अनुसार २५ जना पदाधिकारी हुने व्यवस्था छ ।

हेटौंडा । काठमाडौं-हेटौंडा जोड्ने छोटो राजमार्ग अन्तर्गत मकवानपुरको भीमफेदी गाउँपालिकाको जुरीखेतमा भएको जिप दुर्घटनामा परी घाइते भएका मध्ये ६ जनाको मृत्यु भएको छ ।

जिल्ला प्रहरी कार्यालय मकवानपुरका डीएसपी पुष्कर बोगटीका अनुसार मृतकहरूको पहिचान खुल्न सकेको छैन ।

काठमाडौंबाट हेटौंडा जाँदै गरेको ना १ ज १७७८ नम्बरको जिप आइतबार साँझ भीमफेदी गाउँपालिका–६ जुरीखेतमा दुर्घटना भएको थियो ।

जिपमा ९ जना सवार थिए । जिप सडकबाट करिब एकसय मिटर तल खोल्सामा खसेर दुर्घटना भएको उनले बताए ।

घटनास्थलबाट घाइते ९ जना घाइतेलाई उद्धार गरी प्रहरीले उपचारका लागि हेटौंडा पठाएको थियो ।

काठमाडौं । पूर्वप्रधानमन्त्री एवं नेकपा (एमाले) का अध्यक्ष केपी शर्मा ओलीले भदौ २३ र २४ गतेको जेनजी आन्दोलन घटना छानबिनका लागि गठित जाँचबुझ आयोगसमक्ष आफ्नो लिखित बयान बुझाएका छन् ।

आयोगसम्बद्ध स्रोतका अनुसार आयोगको टोलीले ओलीलाई पत्र पठाएलगत्तै उनी बयान दिन तयार भए । ओली निकटका व्यक्तिहरूको संकेतमा आयोगको टोली गुण्डुस्थित उनको निवासमा पुगेको थियो । त्यहाँ ओलीले मौखिक नभई लिखित रूपमै आफ्नो दृष्टिकोण र जवाफ पेस गरेका थिए । ‘आयोगको टोली स्टेटमेन्ट लिएर फर्किएको छ,’ स्रोतले भन्यो ।

यसअघि ओलीले आयोगमा सिंहदरबार पुगेर बयान दिन अस्वीकार गर्दै आएका थिए । उनले ‘गुण्डुमा आए चिया खुवाएर पठाउँछु’ भन्दै आयोगलाई आफ्नै निवासमा बोलाउने अडान राखेका थिए । अन्ततः आयोगको टोली निवासमै पुगेर निकै गोप्य रूपमा लिखित बयान लिएर फर्किएको हो ।

स्रोतका अनुसार आयोगले संकलित विवरण र अन्य बयानका आधारमा ६० भन्दा बढी प्रश्नहरू तयार पारेको थियो । ओलीको लिखित जवाफ तिनै प्रश्नहरूमा केन्द्रित रहेको अनुमान गरिएको छ । आयोगका पदाधिकारीहरूले बयानको विवरण गोप्य राखेका छन् ।

आयोगले केही दिनअघि तत्कालीन गृहमन्त्री रमेश लेखकको पनि बयान लिइसकेको छ । लेखकले आन्दोलन दमनका लागि गोली चलाउने आदेश आफूले नदिएको स्पष्ट पारेका छन् । पूर्वन्यायाधीश गौरीबहादुर कार्की नेतृत्वको आयोगले सुरक्षा निकायका प्रमुखहरू र अन्य सरोकारवालासँग पनि बयान लिइसकेको छ ।

ओलीले पटक–पटक सार्वजनिक रूपमै आफूले गोली चलाउने आदेश नदिएको दाबी गर्दै आएका थिए ।

काठमाडौं । राष्ट्रिय स्वतन्त्र पार्टी (रास्वपा)को केन्द्रीय समिति बैठकले पार्टी एकीकरण तथा संगठन विस्तारको क्रममा यसअघि विभिन्न पक्षसँग भएको सम्झौता कार्यान्वयन गर्न पार्टी विधान संशोधन गर्ने निर्णय गरेको छ ।

बैठकले विधान संशोधनमार्फत पार्टीका पदाधिकारी संख्या थप गर्ने प्रस्ताव पारित गरेको छ । थपिने पदहरूमा उपसभापति १, महामन्त्री १, सहमहामन्त्री १ र सहप्रवक्ता १ रहेका छन् ।

यो संशोधन पार्टीमा नयाँ समूह तथा व्यक्तिहरूको समायोजनलाई व्यवस्थित गर्न तथा संगठनलाई थप सुदृढ बनाउन लक्षित रहेको बताइएको छ ।

काठमाडौं ।  जेनजी आन्दोलनमा दमन र गोली चलाइएको घटनाको छानबिनका लागि गठित जाँचबुझ आयोगले तत्कालीन प्रधानमन्त्री केपी शर्मा ओलीलाई बयानका लागि बोलाएको छ । पूर्वन्यायाधीश गौरीबहादुर कार्की नेतृत्वको आयोगले ओलीलाई पत्र पठाउँदै बयानका लागि उपस्थित हुन आग्रह गरेको हो ।

आयोगले यसअघि तत्कालीन गृहमन्त्री रमेश लेखकको बयान लिइसकेको छ । लेखकले आयोगसमक्ष आफूले गोली चलाउने आदेश नदिएको स्पष्ट पारेका छन् । लेखकको बयान सकिएलगत्तै आयोगले ओलीलाई पत्र पठाएको स्रोतले जनाएको छ । यसबाहेक आयोगले सुरक्षा निकायका तत्कालीन प्रमुखहरू, काठमाडौंका प्रमुख जिल्ला अधिकारीलगायतसँग पनि बयान लिइसकेको छ ।

तत्कालीन सरकार प्रमुखको हैसियतले जेनजी आन्दोलनको क्रममा भएको गोलीकाण्ड र दमनको जिम्मेवारीबारे स्पष्ट पार्न ओलीसँग बयान लिन लागिएको हो । तर ओलीले विभिन्न सार्वजनिक कार्यक्रममा आफूले गोली चलाउने आदेश नदिएको बारम्बार दोहोर्‍याउँदै आएका छन् । उनले आयोगमा बयान दिनु नपर्ने भन्दै ‘सार्वजनिक रूपमै बयान दिएको छु, फेरि किन जाने ?’ भन्ने अडान पनि व्यक्त गर्दै आएका छन् ।

काठमाडौँ । राष्ट्रिय स्वतन्त्र पार्टी (रास्वपा)ले विवेकशील साझाबाट आएका ७ जनालाई केन्द्रीय सदस्यमा मनोनीत गरेको छ ।

आज बसेको केन्द्रीय समिति बैठकले विवेकशील साझाबाट आएका ७ जनालाई केन्द्रीय सदस्यमा मनोनीत गर्ने निर्णय गरेको हो ।

बैठकले पार्टी समायोजन पछि आज ७ जनालाई केन्द्रीय समितिमा मनोनयन गरेको रास्वपाले जनाएको छ ।

मनोनीत हुनेमा समीक्षा वास्कोटा, प्रकाशचन्द्र परियार, सुरज प्रधान, नवराज थापा, आशुतोष प्रधान, धनेज थापा र रञ्जु दर्शना रहेका छन् । केही समय अघि विवेकशील साझा पार्टी रास्वपामा समाहित भएको थियो ।