त्रिभुवन अन्तर्राष्ट्रिय विमानस्थलको एयर फिल्ड लाइटिङ सिस्टममा समस्या आएको कारण सबै उडान र अवतरण रोकिएका छन् ।
विमानस्थल प्रवक्ता रिन्जी शेर्पाका अनुसार समस्या शनिबार बेलुका करिब साढे ५ बजेदेखि देखा परेको हो । अन्तर्राष्ट्रिय उडानका जहाजहरू आकाशमै होल्ड गरिएका छन् भने आन्तरिक उडानका जहाजहरू विमानस्थलमै रोकिएका छन्।
प्रवक्ता शेर्पाले भने, ‘के कारणले समस्या आएको हो भन्ने विषयमा जाँच भइरहेको छ। समस्या समाधान भएलगत्तै उडान र अवतरण पुनः सञ्चालन हुनेछ।’
उनका अनुसार प्राविधिक टोलीले हाल लाइटिङ सिस्टमको समस्या समाधान गर्ने प्रयास गरिरहेका छन् ।
