प्रतिनिधिसभा सदस्य विश्वराज पोखरेलले आफ्नो नाम जोडेर प्रकाशित समाचारप्रति आपत्ति जनाउँदै त्यसमा उल्लेख गरिएका आरोपहरू निराधार र भ्रामक रहेको बताएका छन् ।

दियोपोस्ट अनलाइनमा प्रकाशित समाचारको खण्डन गर्दै प्रेस विज्ञप्ति जारी गरेका पोखरेलले बिचौलियासँगको सम्बन्ध, आर्थिक लेनदेन तथा अन्य विषयमा लगाइएका आरोपहरू कपोलकल्पित भएको दाबी गरेका हुन् ।

उनले समाचारमा उल्लेख गरिएका इनम सापकोटासँग आफ्नो कुनै चिनजान, फोन सम्पर्क वा अन्य कुनै प्रकारको सम्बन्ध नरहेको स्पष्ट पारेका छन् । कुनै पनि दलाल वा बिचौलियासँग आफ्नो चिनजान, सम्पर्क वा संलग्नता नरहेको उनको भनाइ छ ।

कुनै प्रमाणित तथ्य र आधिकारिक आधारबिना आफ्नो नामलाई आपत्तिजनक आरोपसँग जोडेर सार्वजनिक गर्नु व्यक्तिगत प्रतिष्ठा, सामाजिक छवि र सार्वजनिक जीवनमाथिको गम्भीर आघात भएको पोखरेलले बताएका छन् । आफ्नो बदनाम गर्ने उद्देश्यले नियोजित रूपमा तथ्यहीन समाचार सम्प्रेषण गरी जनमानसमा भ्रम सिर्जना गर्ने प्रयासको उनले निन्दा गरेका छन् ।

आफ्नो जीवनमा कुनै पनि प्रकारको अनियमितता, गैरकानुनी आर्थिक कारोबार वा बिचौलियामार्फत अनुचित काम गराउने गतिविधि नभएको उनको दाबी छ । आफूलाई सम्बन्धित विषयमा प्रश्न वा जिज्ञासा भए प्रत्यक्ष सम्पर्क गरी तथ्य बुझ्न सकिने अवस्था हुँदाहुँदै एकपक्षीय र अप्रमाणित सामग्रीका आधारमा समाचार प्रकाशन गर्नु जिम्मेवार पत्रकारिताको मर्मविपरीत भएको उनले उल्लेख गरेका छन् ।

पोखरेलले आफ्नो नाम जोडेर प्रकाशित समाचारको गल्ती सच्याउन र आफ्नो आधिकारिक धारणा समेट्न सम्बन्धित अनलाइनलाई आग्रह गरेका छन् । साथै, आफ्नो प्रतिष्ठामा आँच पुर्‍याउने उद्देश्यले झुटा, भ्रामक तथा आधारहीन सामग्री प्रचारप्रसार गर्ने कार्यविरुद्ध प्रचलित कानुनबमोजिम कानुनी उपचार खोज्ने अधिकार सुरक्षित रहेको उनले बताएका छन् ।

३५ वर्षदेखि देश र नागरिकको सेवामा समर्पित रहेको उल्लेख गर्दै पोखरेलले आफ्नो व्यावसायिक निष्ठा र चरित्रमा कुनै दाग लाग्न नदिई राष्ट्रसेवामा समर्पित रहँदै आएको दाबी गरेका छन् ।

आगामी दिनमा पनि सत्य, निष्ठा र इमानदारीका साथ राष्ट्र र जनताको सेवामा समर्पित रहने प्रतिबद्धता व्यक्त गर्दै उनले राष्ट्रिय स्वतन्त्र पार्टीको कार्यकर्ताका रूपमा ओखलढुंगावासीको सेवामा निरन्तर लागिरहने बताएका छन् ।

 

 

प्रेस विज्ञप्ति

आज दियोपोस्ट नामक अनलाइनमा प्रकाशित समाचारमा मेरो नाम समेत जोडेर बिचौलियासँगको सम्बन्ध, आर्थिक लेनदेन तथा अन्य गम्भीर विषयमा लगाइएका आरोपप्रति मेरो गम्भीर ध्यानाकर्षण भएको छ ।

उक्त समाचारमा उल्लेख गरिएका आरोपहरू निराधार, भ्रामक तथा कपोलकल्पित छन् । कुनै पनि दलाल वा बिचौलियासँग मेरो जीवनमा चिनजान, सम्पर्क वा संलग्नता छैन । मसँग जोडेर प्रस्तुत गरिएका कथित आर्थिक लेनदेन तथा अन्य आरोपहरू पूर्ण रूपमा भ्रामक र खेदजनक छन् ।

समाचारमा उल्लेख गरिएका इनम सापकोटा नामका व्यक्तिसँग मेरो कुनै चिनजान, फोन सम्पर्क वा कुनै पनि प्रकारको सम्बन्ध छैन । यस सम्बन्धमा प्रकाशित दाबीहरू पूर्णतः निराधार छन् ।

कुनै प्रमाणित तथ्य र आधिकारिक आधारबिना मेरो नामलाई आपत्तिजनक आरोपसँग जोडेर सार्वजनिक गर्नु मेरो व्यक्तिगत प्रतिष्ठा, सामाजिक छवि र सार्वजनिक जीवनमाथि गम्भीर आघात पु¥याउने दुस्प्रयासको घोर विरोध गर्दछु । मेरो बदनाम गर्ने उद्देश्यले नियोजित रूपमा यस्ता कपोलकल्पित, तथ्यहीन समाचार संपे्रशण गर्नु गराउनु र जनमानसमा भ्रम सिर्जना गरी मेरो प्रतिष्ठामाथि क्षति पु–याउने दुस्प्रयासको घोर निन्दनिय छ ।

मेरो जीवनमा कुनै पनि प्रकारको अनियमितता, गैरकानुनी आर्थिक कारोबार वा बिचौलियामार्फत अनुचित काम गराउने गतिविधि भएको छैन । मसँग सम्बन्धित विषयमा कुनै प्रश्न वा जिज्ञासा भएमा सम्बन्धित पक्षले प्रत्यक्ष सम्पर्क गरी तथ्य बुझ्न सक्ने अवस्था हुँदाहुँदै एकपक्षीय र अप्रमाणित सामग्रीका आधारमा कसैले उक्साएको भरमा गलत समाचार प्रकाशन गर्नु जिम्मेवार पत्रकारिताको मर्मविपरीत हो । अतः मेरो नाम जोडेर संप्रेशन भएको समाचारको गल्ती सच्याउन र मेरो आधिकारिक धारणा समेट्न सम्बन्धित अनलाइनलाई आग्रह गर्दछु ।

मेरो प्रतिष्ठामा आँच पु¥याउने उद्देश्यले झुटा, भ्रामक तथा आधारहीन सामग्री प्रचारप्रसार गर्ने कार्यविरुद्ध प्रचलित कानुनबमोजिम आवश्यक कानुनी उपचार खोज्ने अधिकार मसँग सुरक्षित नै छ ।

म सदैव सत्य, तथ्य र विधिको शासनमा विश्वास गर्दछु । ३५ वर्षदेखि निरन्तर रुपमा देश र नागरिकको सेवामा समर्पित हुँदै मैले आफ्नो कर्तव्य इमानदारी, निष्ठा र जिम्मेवारीपूर्वक निर्वाह गरिआएको छु । आजसम्म आफ्नो चरित्र र व्यावसायिक निष्ठा र समाजसेवको क्रममा कुनै दाग लाग्न नदिई राष्ट्रसेवामा समर्पित रहिरहेको कुरा सर्वसाधरण सबैमा जानकारी गराउँदछु र आगामी दिनमा समेत सत्य, निष्ठा र इमानदारीका साथ राष्ट्र र जनताको सेवामा समर्पित रहने मेरो प्रतिबद्धता अटल रहिरहने छ । यसैलाई मेरो जीवनको सम्पत्ति, शक्ति, सामथ्र्य र जनविश्वसको रुपमा जिवन्त राख्दै राष्ट्रिय स्वतन्त्र पार्टीको कार्यकर्ताको रुपमा ओखलढुंगाबासीको सेवामा निष्ठाको साथ अहोरात्र काम गर्ने प्रतिबद्धता व्यक्त गर्दछु ।

धन्यवाद !

विश्वराज पोखरेल
प्रतिनिधि सभा सदस्य
ओखलढुंगा