समाज सेवा देखि मेयर सम्म !

0
769

कञ्चनपुर, २३ असार । सामाजिक कार्यका लागि सधैँ अग्रसर हुने कञ्चनपुरको शुक्लाफाँटा नगरपालिका–१० झलारीका दिलबहादुर ऐरलाई नसम्झने सायदै कोही होलान् । विकास निर्माणका कार्य अगाडि बढाउन, कुरीतिविरुद्ध जनचेतना छर्न र कसैलाई पिरलो परे सहयोग गर्न अगाडि सर्न सधैँ तत्पर रहँदै आउनुभएका दिलबहादुर शुक्लाफाँटा नगरपालिकाको प्रमुख पदमा छानिनुभएको छ ।

झैझगडा जित÷ जितको भावनाले मेलमिलाप गराउने र सरकारी कामकाज गराउनका लागि सर्वसाधारणले सधैँ सम्झने उहाँलाई नगरवासीले नगर प्रमुखको जिम्मेवारी सुम्पेका छन् । समाज सेवालाई निःस्वार्थ भावनाले गर्न तम्तयार रहने उहाँले नेपाली काँग्रेसका तर्फबाट प्रमुख पदमा उम्मेदवारी दिई सहजै प्रतिस्पर्धीभन्दा एक हजार बढी मत ल्याई जित हासिल गर्नुभएको छ ।

परिवारको पीरमर्कालाई थाती राख्दै जनसेवालाई मूल मर्म सम्झने उहाँलाई नगरवासीले अमूल्य मत दिई विजयी बनाएको झलारी बजारमा व्यवसाय गर्दै आउनुभएका शिवराज भट्टले बताउनुभयो । पेशाले पशु प्राविधिक रहेका उहाँले व्यवसायको रकमसमेत समाजसेवामै खर्च गरेर समाजका लागि उदाहरणीय कार्य गरेको उहाँले बताउनुभयो । “विभिन्न पार्टीमा आबद्धहरुले समेत आफ्नोभन्दा राम्रोलाई भोट भन्दै उहाँको सामाजिक योगदानको कदर गरी मतदान गरी विजयी गराएका छन्”, उहाँले भन्नुभयो ।
सफा, सुन्दर शहर स्थापना गर्ने र पर्यटकीय नगरीका रुपमा शुक्लाफाँटालाई चिनाउनका लागि नगरवासीको चाहनामा कार्य अगाडि बढाउने सोच उहाँको रहेको छ । संविधानमा टेकेर नगरवासीलाई कानुनी शासनको प्रत्याभूति गराउनसमेत पछि नपर्ने उहाँ बताउनुहुन्छ ।